Taano ta Dapat na Magin Rasonable sa Satong mga Linalaoman?

AN MGA paglaom na naotob asin mga kamawotan na nakamtan nagtatao sa sato nin pakamate nin satispaksion. Pero totoo na an dakol sa satong mga pangarap asin linalaoman dai nangyayari oyon sa minamawot ta. Dahelan sa paorootrong mga pagkadesganar sa buhay puede kitang mauyam sa satong sadiri asin sa iba pa ngani. Tamang-tama an komento nin sarong madonong na tawo: “An paghalat na naglalawig kasakitan sa puso.”—Talinhaga 13:12.

Ano an nagkapirang bagay na puedeng magresulta sa pakamate nin pagkadesganar? Paano ta mahihimo na magin rasonable sa satong mga linalaoman? Apuera kaini, taano ta para sa satong pakinabang an paggibo kaiyan?

Mga Linalaoman Asin Pagkadesganar

Huli sa marikas na dalagan nin buhay ngonyan, mientras na kita naghihingoang sumabay, lalo man kitang garo baga nababayaan. An mga hinahagad sa satong panahon asin kosog puedeng magin daing ontok, asin kun dai ta mahaman an plinano ta, yaon an tendensia na basolon ta an satong sadiri. Puede pa nganing isipon ta na garo baga dinedesganar ta an iba. Si Cynthia, sarong agom na babae asin ina na nakakaaram kan pasan na sakit nin pagpadakula sa aki, nagsasabi: “An pagigin pabarobago sa pagtatanos sa sakong mga aki asin an pakamate na dai ko sinda pinapatood nin igo nakapopongot.” Si Stephanie, sarong tinedyer, nagsasabi mapadapit sa saiyang edukasyon: “Mayo ako nin igong panahon na gibohon an gabos na gusto ko, asin pinoponan iyan nin pagkaaburido ko.”

An sobra kahalangkaw na mga linalaoman madaling magin perpeksionismo, asin ini puedeng makapanluyang marhay sa boot. Si Ben, sarong hoben pang may agom na lalaki, nagtutuga: “Kun sinisiyasat ko an sakong mga hiro, kaisipan, o saboot, naheheling ko pirme na puede pa kutanang nagin mas marahay iyan. Danay akong naghahanap nin pagkaperpekto, asin ini nagbubunga nin pagkaaburido, pagkasudya kan mawot, asin pagkadesganar.” Si Gail, sarong Kristianang agom na babae, nagsasabi: “An sa perpeksionistang kaisipan mayo nin konsiderasyon sa pagkukulang. Gusto mi na magin matibayon na mga ina asin agom na babae. Kaipuhan ming magin mabunga tanganing magin maogma, kaya an nasasayang na paghihingoa nakaiiritar sa samo.”

Pero an saro pang bagay na puedeng magbunga nin personal na pagkadesganar iyo an nagluluyang salud asin kagurangan. An limitado nang pakahirohiro asin nainaan nang kosog pinadadakula an satong mga limitasyon asin dinudugangan an pakamate nin pagkadesganar. “Naaaburido ako sa sakong sadiri huli sa dai pakahaman nin mga bagay na pasilon man sana asin normal bago ako nagkahelang,” an inadmitir ni Elizabeth.

An nasambitan sa enotan sampol kan puedeng pagponan nin pakamate nin pagkadesganar. Kun dai kokontrolon, an siring na mga saboot puede pa nganing magin dahelan na kita maniwala na dai kita inaapresyar kan iba. Kaya, anong positibong mga paagi an puede tang gibohon tanganing mapangganahan an mga pagkadesganar asin makultibar an rasonableng mga linalaoman?

Mga Paagi na Makultibar an Rasonableng mga Linalaoman

Enot, girumdomon na si Jehova rasonable asin mapagsabot. An Salmo 103:14 nagpapagirumdom sa sato: “Sia mismo nakaaaram na gayo kan pagkaporma sa sato, na ginigirumdom na kita kabokabo.” Huling aram an satong mga kakayahan asin limitasyon, an linalaoman ni Jehova sa sato iyo sana an kaya niatong itao. Asin an sarong bagay na talagang hinahagad nia sa sato iyo na “magin hababa an boot sa paglakaw sa kaibahan kan [satong] Dios.”—Miqueas 6:8.

 Sinasadol man kita ni Jehova na dumolok sa saiya sa pamibi. (Roma 12:12; 1 Tesalonica 5:17) Pero paano iyan nakatatabang sa sato? An pamibi pinasasarig asin ginigibong balanse an satong pag-iisip. An odok na pamibi sarong pag-admitir na kaipuhan ta an tabang—tanda iyan nin kababaan nin boot asin kapakumbabaan. Galaga si Jehova na simbagon an satong mga pamibi paagi sa pagtao sa sato kan saiyang banal na espiritu, na kabale sa bunga kaiyan an pagkamoot, kabootan, karahayan, asin pagpopogol sa sadiri. (Lucas 11:13; Galacia 5:22, 23) Pinagigian man kan pamibi an kahaditan asin pagkasudya kan mawot. Paagi sa pamibi, “nakakukua kamo nin karangahan na mayo sa ano man na iba pang gikanan,” sabi ni Elizabeth. Minaoyon si Kevin: “Namimibi ako na logod tawan ako nin kalmadong puso asin malinaw na isip tanganing maatubang ko an problema. Dai ako noarin man sinusudya ni Jehova.” Aram ni apostol Pablo an dakulang halaga nin pamibi. Kaya irinekomendar nia: “Ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Iyo, an pakikikomunikar ki Jehova talagang epektibo sa pagtabang sa sato na makultibar an rasonableng mga linalaoman sa satong sadiri asin sa iba.

Pero paminsanminsan, kaipuhan ta an ensegidang pagpasarig sa boot. An tataramon sa tamang panahon marahay. An kompidensial na pakipag-olay sa sarong pinagtitiwalaan asin maygurang na katood puedeng makatabang sa sato na magkaigwa nin bagong pagmansay sa kun ano an dahelan kan satong pagkadesganar o paghadit. (Talinhaga 15:23; 17:17; 27:9) Nanonodan kan mga hoben na nasasakitan na daogon an pagkasudya kan mawot na an paghagad nin konseho sa mga magurang nakatatabang sa sainda na magin timbang. May pag-apresyar na inaadmitir ni Kandi: “An mamomoton na paggiya kan sakong mga magurang ginibo akong mas rasonable asin timbang saka magin mas maogmang kaibaiba.” Iyo, an pagirumdom sa Talinhaga 1:8, 9 napapanahon na marhay: “Paghinanyog, aki ko, sa disiplina kan saimong ama, asin dai mo pagpabayaan an ley kan saimong ina. Huli ta iyan korona nin kagayonan sa saimong payo asin magayon na kuintas sa saimong liog.”

An mga epekto nin sa perpeksionistang kaisipan sinumaryo nanggad sa sarabihon na: “An laoman na an buhay ibabagay sa satong mga espesipikasyon pag-agyat nin pagkasudya kan mawot.” Tanganing malikayan ini, kaipuhan an pagliwat nin kaisipan. An kapakumbabaan asin kababaan nin boot—pagkaigwa nin realistikong pagmansay sa satong mga limitasyon—sierto nanggad na patataluboon sa sato an timbang asin rasonableng mga linalaoman. Angay nanggad, an Roma 12:3 pinatatanidan kita na “dai mag-isip dapit sa [satong] sadiri nin orog kisa maninigong isipon.” Saro pa, an Filipos 2:3 dinadagka kita na magkaigwa nin kababaan nin pag-isip asin ibilang an iba na mas halangkaw.

Si Elizabeth, na nasambitan kasubago, aburido na sa saiyang sadiri huli sa saiyang helang. Para sa saiya, kinaipuhan an panahon tanganing masabotan an pagmansay ni Jehova sa mga bagay-bagay asin mamatean an pagkaranga sa pakaaram na dai nia linilingawan an satong paglilingkod. Si Colin dai na makahirohiro bilang resulta nin sarong nagpapaluyang helang. Sa primero, nagsaboot sia na an saiyang ministeryo haros dai nang saysay kun ikokomparar sa nagigibo nia kaidtong marahay pa an salud. Paagi sa paghorophorop sa mga teksto na arog kan 2 Corinto 8:12, nahale nia an mga saboot na ini. An bersikulong ini nagsasabi: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” “Minsan ngani kakadikit kan ikatatao ko,” sabi ni Colin, “puede pa akong tumao, asin inaako iyan ni Jehova.” Sa Hebreo 6:10, pinagigirumdom kita: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”

Kun siring, paano ta maaaraman kun baga rasonable an satong mga linalaoman? Hapota an saindong sadiri, ‘An mga linalaoman ko daw kaoyon sa mga linalaoman nin Dios?’ An Galacia 6:4 nagsasabi: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.” Girumdomon, si Jesus nagsabi: “An sakong sakal maboot asin an sakong pasan magian.” Iyo, bilang mga Kristiano, talagang igwa kita nin sakal na dapat pasanon, alagad iyan “maboot” asin “magian,” asin nanuga si Jesus na iyan makapagiginhawa kun manodan tang pasanon iyan nin tama.—Mateo 11:28-30.

 An Rasonableng mga Linalaoman Igwa nin Balos

Talagang igwa nin ensegida asin nagdadanay na balos gikan sa paghinanyog sa asin pag-aplikar kan hatol sa Tataramon nin Dios mantang pinagmamaigotan tang kultibaron an rasonableng mga linalaoman. Sarong bagay, may marahay na epekto ini sa sato sa pisikal. Si Jennifer, na nakinabang sa mga pagirumdom ni Jehova, nag-aadmitir: “Igwa ako nin orog na kosog asin entusiasmo para sa buhay.” Tamang-tama, an Talinhaga 4:21, 22 sinasadol kita na tawan nin atension an mga kasabihan ni Jehova paagi sa satong mga mata asin puso, “ta iyan buhay sa mga nakakanompong kaiyan asin kabagsikan sa gabos nindang laman.”

An saro pang balos iyo an ikararahay sa isip asin emosyon. “Kun ipinaiirarom ko an sakong isip asin puso sa impluwensia kan Tataramon nin Dios, an pagmate ko pirme akong mas maogmang tawo,” sabi ni Theresa. Totoo, makaeeksperyensia pa man giraray kita nin mga pagkadesganar sa buhay. Pero, mas pasil niatong makakaya iyan. “Rumani kamo sa Dios, asin sia marani sa saindo,” an sadol kan Santiago 4:8. Nanunuga man si Jehova na pakokosogon kita sa pag-atubang sa mga angat sa buhay asin bebendisyonan kita nin katoninongan.—Salmo 29:11.

An pagkaigwa nin rasonableng mga linalaoman nagpapangyari sa sato na magdanay na marigon sa espirituwal. Bendisyon man ini. Makakokonsentrar kita nin malinaw sa mas importanteng mga bagay sa buhay. (Filipos 1:10) Kun siring an satong mga pasohan realistiko asin kayang aboton, na nagtatao nin orog na kagayagayahan asin pagkakontento. Kita magigin mas andam na ipaniwala an satong sadiri ki Jehova, sa pakaaram na pangyayarihon nia an mga bagay para sa pinakaikararahay. “Magpakumbaba kamo sa irarom kan mapangyaring kamot nin Dios, tanganing ilangkaw nia kamo sa itinalaan na panahon,” sabi ni Pedro. (1 Pedro 5:6) Igwa pa daw nin mas nakakokontento kisa tawan ni Jehova nin onra?

[Mga Ritrato sa pahina 31]

An pagkultibar nin rasonableng mga linalaoman makatatabang sa sato na makaya an mga pagkasudya kan mawot asin pagkadesganar