Mga Hapot Hale sa mga Parabasa

An Isaias kapitulo 53 igwa nin bantog na Mesiyanikong hula. An bersikulo 10 nagsasabi: “Si Jehova mismo naogma sa pagronot sa saiya; pinapaghelang nia sia.” Ano an boot sabihon kaini?

Madaling masabotan kun taano ta tibaad may maglataw na hapot manongod sa Isaias 53:10. Dai iniisip kan tunay na mga Kristiano na an satong madinamayon asin mapagpadangat na Dios maoogma sa pagronot o pagpahelang sa siisay man. Itinatao sa sato kan Biblia an basehan sa pagkompiar na an Dios dai naoogma sa pagpasakit sa daing sala. (Deuteronomio 32:4; Jeremias 7:30, 31) Sa nag-aging mga siglo may beses na puedeng tinogotan ni Jehova an pagdusa huli sa mga rason na kabagay kan saiyang kadonongan asin pagkamoot. Alagad sierto nanggad na dai nia pinangyari na magdusa an saiyang namomotan na Aki, si Jesus. Kaya, ano talaga an boot sabihon kan tekstong ini?

Bueno, matatabangan kitang masabotan an kahulogan kun eestudyaran ta an kabilogan kan bersikulo, na rinirisa an duwang paglataw kan tataramon na “naogma.” An Isaias 53:10 nagsasabi: “Si Jehova mismo naogma sa pagronot sa saiya; pinapaghelang nia sia. Kun ibugtak mo an saiyang kalag bilang dolot para sa pagkakasala, maheheling nia an saiyang aki, palalawigon nia an saiyang mga aldaw, asin sa saiyang kamot an naoogmahan ni Jehova magigin mapanggana.”

An kabilogan na mensahe kan Biblia nagpapaheling na “an naoogmahan ni Jehova,” na sinambit sa poro kan bersikulo, nakasentro sa paghaman kan saiyang katuyohan paagi sa Kahadean. An paggibo kaini ni Jehova mabindikar sa saiyang soberaniya asin magpapagin posible na mahale sa makinuyog na katawohan an minanang kasalan—an satong mga kasalan. (1 Cronica 29:11; Salmo 83:18; Gibo 4:24; Hebreo 2:14, 15; 1 John 3:8) An liabe sa gabos na ini iyo na an Aki nin Dios kinaipuhan na magin tawo asin itao an pantubos na atang. Siring kan aram ta, sa paggibo kaiyan si Jesus talagang nagdusa. Sinasabi sa sato kan Biblia na sia “nakanood nin pagkuyog hale sa mga bagay na saiyang tinios.” Kaya si Jesus talagang nakinabang sa pagdusa na iyan.—Hebreo 5:7-9.

Antes pa aram na ni Jesus na an nobleng gigibohon nia may kalabot na labi-labing sakit. Malinaw iyan sa saiyang mga tataramon na nasusurat sa Juan 12:23, 24, na dian mababasa ta: “Nagdatong na an oras na pamurawayon an Aki nin tawo. Totoong-totoo na sinasabi ko sa saindo, Kun an tipasi nin trigo dai maholog sa daga asin magadan, iyan nagdadanay sanang sarong tipasi; alagad kun iyan magadan, dangan iyan nagbubunga nin dakol.” Iyo, aram na ni Jesus na kaipuhan niang papagdanayon an saiyang integridad dawa pa magadan. An pagkasaysay nagpapadagos: “‘Ngonyan napupurisaw an sakong kalag, asin ano an sasabihon ko? Ama, iligtas mo ako sa oras na ini. Minsan siring, dahel kaini na ako nakaabot sa oras na ini. Ama, pamurawaya an saimong ngaran.’ Kun siring may sarong tingog na naghale sa langit: ‘Iyan pinamuraway ko na asin papamurawayon ko liwat iyan.’”—Juan 12:27, 28; Mateo 26:38, 39.

Sa kontekstong ini niato masasabotan an Isaias 53:10. Aram na nanggad ni Jehova na an eksperyensia kan saiyang Aki sa sarong parte mangangahulogan nin pagronot. Pero huling nasa isip an mamuraway asin kadakol na karahayan na ibubunga, naogma si Jehova sa kaipuhan na maeksperyensiahan ni Jesus. Sa sentidong iyan si Jehova “naogma sa pagronot” sa Mesiyas. Asin si Jesus naogma man sa mahahaman asin nahaman nia. Totoo nanggad, siring sa pagtatapos kan Isaias 53:10, ‘sa saiyang kamot an naoogmahan ni Jehova nagin mapanggana.’