Nagduman sa mga Isla kan Pasipiko—Tanganing Magtrabaho!

 AN MGA halatan nin pahaleng mga pasahero sa internasyonal na mga aeropuerto sa Brisbane asin Sydney, Australia, biyong nagraragungrong sa kaogmahan na bakong ordinaryo. An sarong grupo nin 46 katawo nakaiskedyul na lumupad pasiring sa masaldang na Samoa tanganing tagboon an 39 iba pa hale sa Nueva Zelandia, Hawaii, asin Estados Unidos. Pambihirang marhay an saindang bagahe—sa pangenot kompuesto nin mga kasangkapan, arog baga nin martilyo, lagadi, asin barena—mga bagay na dai dadarahon nin saro sa ordinaryong kamugtakan sa pagbiahe pasiring sa nakaaatraer na isla nin Pasipiko. Alagad ta an saindang misyon bako nanggad na ordinaryo.

Nagbibiahe sa sadiri nindang gastos, gagamiton ninda an duwang semana bilang daing sueldong mga boluntaryo sa sarong programa sa pagtogdok na minamaneho kan Opisina Rehional sa Inhenyeriya sa sangang opisina kan Mga Saksi ni Jehova sa Australia. Kalabot sa programa, na sinusustentohan nin gikan sa boot na mga kontribusyon, an pagtogdok nin mga Kingdom Hall, Assembly Hall, erokan nin mga misyonero, asin mga pasilidad nin sanga o pagtradusir para sa marikas na nagdadakol na kongregasyon kan Mga Saksi ni Jehova sa mga isla sa Pasipiko. Kamidbidon ta an nagkapirang trabahador, na dati nang kaiba sa mga grupo nin nagtotogdok nin Kingdom Hall sa sadiri nindang nasyon.

Si Max, sarong paraatop, taga Cowra sa New South Wales, Australia. Sia may agom asin limang aki. Si Arnold taga Hawaii. Sinda mag-agom igwang duwang aking lalaki, asin si Arnold payunir man, o bilog na panahon na ministro. Arog ni Max, si Arnold naglilingkod bilang magurang sa saiyang pinaghalean na kongregasyon. Malinaw nanggad, an mga lalaking ini—asin sinda tipiko sa kadaklan na nasa programa—dai nagboluntaryo huli ta sinda may sobrang panahon na magagamit. Imbes, sinda asin an saindang pamilya nasasabotan an pangangaipo, asin mawot nindang gibohon an magigibo ninda tanganing makatabang.

Pinaninigoan kan mga Trabahador Hale sa Laen-laen na Nasyon an Mahalagang Marhay na Pangangaipo

An sarong lugar na nangangaipo kan saindang mga abilidad asin serbisyo iyo an Tuvalu, sarong nasyon sa Pasipiko na may mga 10,500 katawong nag-eerok na nasa harayong grupo nin siyam na korales na isla sa ragit harani sa ekwador asin amihanan-solnopan nin Samoa. An mga isla sa promedyo may hiwas na mga 2.5 kilometro kuadrado an kada saro. Kan 1994, an 61 Saksi duman nangangaipong marhay nin bagong Kingdom Hall asin mas dakulang opisina sa pagtradusir.

Sa kabtang na ini nin tropikal na Pasipiko, an mga  edipisyo dapat na dinisenyo asin itinogdok na makatagal sa dayaday na makosogon na mga bagyo asin buwawi. Alagad kadikit an makukuang de kalidad na materyales sa pagtogdok sa mga islang ini. An solusyon? Gabos na sangkap—poon sa pan-atop asin mga sulay sagkod sa muebles asin kurtina, inodoro asin mga bunganga nin shower, pati mga tornilyo asin pako—ipinaktora sa darakulang kahon nin kargo hale sa Australia.

Bago nag-abot an materyales, inandam nin sarong naenot na sadit na grupo an totogdokan asin ibinugtak an pundasyon. Dangan an internasyonal na mga trabahador nag-arabot tangani na itogdok, pintahan, asin bugtakan nin kompletong gamit an mga edipisyo.

Kulibat palan, an bilog na aktibidad na ini sa Tuvalu nakapukaw sa kaanggotan nin sarong lokal na klerigo na iinanunsiar sa radyo na an mga Saksi nagtotogdok nin sarong “Torre nin Babel”! Pero, ano an katotoohan? “Kan madiskobre kan mga tawong nagtotogdok kan Torre nin Babel sa Biblia na dai na sinda nagkakasarabotan huli ta rinibaraw nin Dios an saindang lenguahe, kinaipuhan nindang abandonaran an saindang proyekto asin bayaan na dai tapos an torre,” an sabi nin sarong boluntaryong trabahador na si Graeme. (Genesis 11:1-9) “Kabaliktaran nanggad kun nagtatrabaho ka para ki Jehova Dios. Sa ibong kan mga pagkakalaen sa lenguahe asin kultura, an mga proyekto pirmeng natatapos.” Asin natapos nanggad an proyektong ini—sa laog sana nin duwang semana. Sa katunayan, 163 katawo, kaiba an agom kan primer ministro, an nag-atender sa seremonya sa dedikasyon.

Si Doug, an superbisor kan proyekto, sa pagpahayag nin opinyon bunga nin pagpensar kan eksperyensia, nagsasabi: “Sarong kagayagayahan na magtrabaho kaiba an mga boluntaryo hale sa ibang mga nasyon. Manlaenlaen an samuyang pamamaagi sa pagtrabaho, manlaenlaen an terminong ginagamit, manlaenlaen pa ngani an mga sistema sa pagsokol, pero arin man digdi dai nagin causa nin ano man na problema.” Mantang nagtrabaho na sa nagkapirang proyekto na siring kaiyan, idinugang nia: “Orog pang pinaririgon kaini sa sakong isip na sa suporta ni Jehova an saiyang banwaan kayang magtogdok nin edipisyo saen man na lugar digdi sa daga, maski gurano pa kanapapasuway o kasakit kan totogdokan. Totoo, dakol kaming may talentong lalaki, alagad an espiritu ni Jehova an nagpapangyari na iyan magin posible.”

An espiritu nin Dios nagpapahiro man sa Saksing mga pamilya sa mga isla na magtao nin kakanon asin mga dadagosan, na, para sa iba, dakulang sakripisyo. Asin iyan odok na inaapresyar kan mga nagkakamit kan siring na pagkamapag-istimar. Si Ken, na taga Melbourne, Australia, nakapagtrabaho na sa kaagid na proyekto sa Polinesia nin Pransia. Sinabi nia: “Nagduman kami bilang mga lingkod, alagad trinato kami na siring sa mga hade.” Kun posible, an lokal na mga Saksi nagtatabang man sa pagtogdok. Sa Islas Salomon, an mga babae naghahalo nin semento—na kamot an ginagamit. Sanggatos na lalaki asin babae an nagtukad sa kaitaasan nin kabukidan na basa sa oran asin nagpasan pababa nin labing 40 tonelada nin troso. An mga hoben nagtabang man. Natatandaan nin sarong trabahor na taga Nueva Zelandia: “Nagigirumdoman ko an sarong hoben na tugang na lalaki na taga isla na pinapasan an duwa sagkod sa tolong sako  nin semento na sararoan sana. Asin sia nagpapala nin graba sa bilog na aldaw na nasasaldangan asin naooranan.”

An pagpatabang sa lokal na mga Saksi sa gibohon nagtatao nin saro pang pakinabang. An sangang opisina kan Watch Tower Society sa Samoa nagbabareta: “An mga tugang na taga isla nakanood nin mga abilidad sa trabaho na magagamit ninda sa pagtogdok nin mga Kingdom Hall saka sa paghirahay asin pagsulit pakatapos na magkaigwa nin buwawi. Puede man iyan na makatabang sa sainda sa paghanap-buhay sa sarong komunidad na an dakol nadedepisilan sa bagay na iyan.”

An Programa sa Pagtogdok Nagtatao nin Marahay na Patotoo

Si Colin nasa Honiara kaidto asin naheling nia na itinotogdok an Assembly Hall sa Islas Salomon. Napahanga, sia nagsurat sa lokal na sangang opisina kan Watch Tower Society kan mensaheng ini sa Ingles na Pidgin: “Everyone they gettim one mind and no one cross, they also one family.” (Sa Bicol, “Nagkakasararo an gabos asin mayo nin napupungot, sinda man sarong pamilya.”) Dai nahaloy pakatapos kaiyan, pagpuli nia sa saiyang baryo sa Aruligo, na 40 kilometros an rayo, sia asin an saiyang pamilya nagtogdok kan sadiri nindang Kingdom Hall. Dangan nagpadara sinda nin saro pang mensahe sa sangang opisina: “An samong Kingdom Hall, na may podyum pa ngani, andam na, kaya puede daw kaming magkaigwa nin pagtiripon digdi?” Tolos-tolos na iinareglo ini, asin labing 60 katawo an regular na nag-aatender.

Naheling nin sarong konsehero kan Unyon Europeo an proyekto sa Tuvalu. “Seguro parareho an sinasabi kan gabos sa saindo,” an sinabi nia sa sarong trabahador, “alagad ini milagro nanggad para sa sako!” An sarong babae na nagtatrabaho sa sarong opisina sentral kan mga koneksion nin telepono naghapot sa saro pang bisitang boluntaryo: “Taano ta ogmahon kamo gabos? Mainiton digdi!” Dai pa ninda naheling kaidto an Kristianismo na ginigibo sa siring na praktikal asin mapagsakripisyong paagi.

Mga Pagsasakripisyong Dai Pinagbabasolan

“An nagtatanom nin abunda mag-aani man nin abunda,” an sabi kan Biblia sa 2 Corinto 9:6. An mga trabahador, an saindang pamilya, asin an saindang kongregasyon padagos na nagtatanom nin dakol sa pagtabang sa saindang mga kapwa Saksi sa Pasipiko. “An sakong kongregasyon nagdonar nin labing un-tersio kan sakong pamasahe sa eroplano,” an sabi ni Ross, sarong magurang sa kongregasyon na taga Kincumber, harani sa Sydney, “asin an sakong bayaw, na nag-iba man, nagkontribwir nin dagdag na $500.” An saro pang trabahador binayadan an saiyang pamasahe paagi sa pagpabakal kan saiyang kotse. An saro pa nagpabakal nin daga. Si Kevin nangangaipo pa nin $900, kaya nagdesisyon sia na ipabakal an 16 niang salampati na duwang taon an edad. Paagi sa sarong kamidbid, nakanompong sia nin mabakal na nagtangro nin $900 para sa mga iyan!

“Bawi daw an pamasahe asin dai naganar na mga sueldo, na gabos-gabos $6,000?” an hapot ki Danny asin Cheryl. “Iyo! Maski doble pa kan kantidad na iyan, iyan labi pa sa kapakipakinabang,” an simbag ninda. Si Alan, na taga Nelson, Nueva Zelandia, nagsabi pa: “Sa sakong nagastos sa pagduman ko sa Tuvalu, puede kutana akong nakaduman sa Europa asin may natada pang kuarta. Alagad nakamtan ko man daw kutana an mga bendisyon, o nagkaigwa nin kadakol na katood na laen-laen an pinaghalean, o nakagibo nin para sa iba imbes na para sa sako? Dai! Dawa siring, ano man an itinao ko sa satong mga tugang na taga isla, nakalalabi nanggad an ibinalos ninda sa sako.”

An saro pang nagdedeterminar na bagay sa kapangganahan kan programa iyo an suporta kan pamilya. Mantang an nagkapirang agom na babae naiibanan an saindang agom na lalaki asin nagtatabang pa ngani sa trabaho, an iba may inaasikasong mga aking nag-eeskuela o negosyo kan pamilya. “An pagigin andam kan sakong agom na babae na asikasohon an mga aki asin an pamilya mantang ako mayo,” an sabi ni Clay, “mas dakula nanggad na sakripisyo kisa kan sako.” Tunay nanggad, an gabos na agom na lalaki na dai ikinaiba an saindang agom na babae lubos na maoyon dian!

Poon kan matapos an proyekto sa Tuvalu, an boluntaryong mga trabahador nakatogdok na nin mga Kingdom Hall, Assembly Hall, erokan nin mga misyonero, asin mga opisina sa pagtradusir sa Fiji, Tonga, Papua New Guinea, New Caledonia, asin iba pang lugar. An dakol na proyekto, kaiba an nagkapira sa mga lugar sa Timog-Sirangan na Asia, nasa plano pa. Magkakaigwa daw nin igong mga trabahador?

Minalataw na dai iyan magigin problema. “An gabos digdi na nakikabtang sa internasyonal na mga proyekto sa pagtogdok naghagad na girumdomon kun may pinaplano na naman,” an isinurat kan sangang opisina sa Hawaii. “Tolos-tolos pakapuli ninda, nagpopoon na sindang magtipon para dian.” Paano dai magigin mapanggana an programa kun idadagdag mo an nagsosopay na bendisyon ni Jehova sa daing kaimotan na dedikasyon na arog kaiyan?

[Ritrato sa pahina 9]

Materyales para sa proyekto

[Mga Ritrato sa pahina 9]

Mga trabahador sa tinotogdokan

[Mga Ritrato sa pahina 10]

Kan matapos an mga proyekto, naggayagaya kami sa nahaman kan espiritu nin Dios