‘Sinda Nakikipag-olay Manongod sa Karahayan Asin Pagkamoot’

SA DAI pa sana nahahaloy na mga taon, an Mga Saksi ni Jehova sa Pransia nagin punteriya nin sigidong kampanya nin pagbalobagi. Naggamit nin mga tataramon na bakong gabos totoo asin salang impormasyon an saindang mga kaiwal tanganing imisrepresentar sinda sa publiko. Sa kapinonan nin 1999, an mga Saksi ni Jehova sa bilog na Pransia nagdistribwir nin 12 milyones na kopya nin pulyeto na may titulong People of France, You Are Being Deceived! (sa Bicol, Mga Taga Pransia, Kamo Dinadaya!) Sa pulyetong ini, pinagdenunsiar ninda an mapagpakaraot na mga tataramon tumang sa sainda.

Pirang aldaw pakalihis kan kampanya, si Mr. Jean Bonhomme, sarong doktor asin dating miembro kan Parlamento, nagpadara nin sarong surat para sa publiko sa sarong lokal na peryodiko. Sia nagsurat: “Kun minsan, an mga Saksi ni Jehova nagsosongko sa sakong harong. Sinda nagsosongko tanganing kaolayon ako manongod sa karahayan asin pankagabsan na pagkamoot. . . . Dai sinda nag-eentremeter. Sinda nagpapaliwanag na may kahoyoan asin naghihinanyog na may kabootan sa sakong pagduda.”

Nagpapaliwanag dapit sa espirituwal na punto de vista kan mga Saksi ni Jehova, si Mr. Bonhomme nagsabi: “An pagigin inosente sa kinaban, kun manongod sa sainda, dai nanggad makakadanyar. Sa ibong na lado, an pagigin inosente sa kinaban kan nagkapirang politiko mas grabe nanggad na peligro sa katoninongan nin mga siudadano asin sa armoniya nin sosyedad.”