“An Saiyang Oras Dai Pa Naabot”

“Mayo nin siisay man na kuminapot sa saiya, huli ta an saiyang oras dai pa naabot.”—JUAN 7:30.

1. Anong duwang bagay an nagdeterminar sa ihiniro ni Jesus?

“AN Aki nin tawo nagdigdi, bakong tanganing paglingkodan, kundi tanganing maglingkod asin itao an saiyang kalag bilang pantubos na karibay nin dakol,” an sabi ni Jesu-Cristo sa saiyang mga apostol. (Mateo 20:28) Sa Romanong gobernador na si Poncio Pilato, sia nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Aram nanggad kaidto ni Jesus kun taano ta sia magagadan asin kun anong gibohon an kaipuhan niang hamanon bago sia magadan. Aram man nia kun gurano pa kalawig an saiyang panahon na otobon an saiyang misyon. An saiyang ministeryo sa daga bilang Mesiyas tolo may kabangang taon sana. Nagpoon iyan sa saiyang bautismo sa tubig sa Salog nin Jordan (kan 29 C.E.) sa kapinonan kan ihinulang ika-70 simbolikong semana asin natapos kan sia magadan sa hariging pasakitan sa kabangaan kan semanang iyan (kan 33 C.E.). (Daniel 9:24-27; Mateo 3:16, 17; 20:17-19) Huli kaini, sa pundamental may duwang bagay na nagdeterminar sa enterong ihiniro ni Jesus digdi sa daga: an katuyohan kan saiyang pagdigdi asin an malinaw na pakaaram kan talaan na panahon.

2. Paano ilinaladawan si Jesu-Cristo sa Ebanghelyo, asin paano nia ipinaheling an pakaaram sa saiyang misyon?

² An pagkasaysay sa Ebanghelyo ilinaladawan si Jesu-Cristo bilang sarong tawong aktibo na nagbaklay sa bilog na daga nin Palestina, na ipinahahayag an maogmang bareta kan Kahadean nin Dios asin naggigibo nin dakol na ngangalasan. Durante kan enot na kabtang kan dinamikong ministeryo ni Jesus, sinabi manongod saiya: “An saiyang oras dai pa naabot.” Si Jesus mismo nagsabi: “An sakong itinalaan na panahon dai pa lubos na minaabot.” Kan madali nang matapos an saiyang ministeryo, ginamit  nia an pananaram na “nag-abot na an oras.” (Juan 7:8, 30; 12:23) An pakaaram ni Jesus kan oras, o kan panahon para sa saiyang asignasyon, kabale an saiyang kagadanan bilang atang, siertong nakaapektar sa saiyang sinabi asin ginibo. An pakasabot kaini puedeng magtao sa sato nin pakarorop sa saiyang personalidad asin sa saiyang pag-isip, na tinatabangan kitang ‘sunodon an saiyang mga lakad’ nin mas estrikto.—1 Pedro 2:21.

Desidido na Gibohon an Kabotan nin Dios

3, 4. (a) Ano an nangyari sa sarong punsion sa kasal sa Cana? (b) Taano ta sinayumahan kan Aki nin Dios an suhestion ni Maria na maninigo niang gibohan nin paagi an pagkulang nin arak, asin ano an manonodan ta digdi?

³ Taon nin 29 C.E. Pipira pa sanang aldaw an nag-agi poon kan personal na pilion ni Jesus an saiyang enot na mga disipulo. Sinda gabos ngonyan yaon sa baryo nin Cana sa distrito nin Galilea tanganing umatender sa sarong punsion sa kasal. An ina ni Jesus, si Maria, yaon man. Kinulang an arak. Nagsusuherir na maninigo siang gumibo nin paagi, sinabihan ni Maria an saiyang aki: “Mayo na sinda nin arak.” Alagad si Jesus nagsimbag: “Ano an labot ko sa saimo, babae? An sakong oras dai pa naabot.”—Juan 1:35-51; 2:1-4.

⁴ An simbag ni Jesus na, “Ano an labot ko sa saimo, babae?” sarong porma nin hapot kan suanoy na nagpaparisa nin pagsayuma sa suhestion o proposisyon. Taano ta sinayumahan ni Jesus an sinabi ni Maria? Bueno, 30 anyos na sia ngonyan. Pirang semana pa sana bago kaini, sia binautismohan, linahidan nin banal na espiritu, asin ipinamidbid ni Juan na Bautisador bilang “an Kordero nin Dios na naghahale kan kasalan kan kinaban.” (Juan 1:29-34; Lucas 3:21-23) Ngonyan an pagboot sa saiya dapat sanang maggikan sa Supremong Autoridad na nagsugo sa saiya. (1 Corinto 11:3) Mayo nin siisay man, dawa haraning miembro nin pamilya, an puedeng togotan na mag-entremeter sa gibohon na dahel kaiyan nagdigdi si Jesus sa daga tanganing otobon. Kanigoan na pagkadesididong gibohon an kabotan kan saiyang Ama an ipinahayag sa simbag ni Jesus ki Maria! Logod na kita magin siring man kadesidido na otobon an satong “bilog na katongdan” sa Dios.—Eclesiastes 12:13.

5. Anong milagro an ginibo ni Jesu-Cristo sa Cana, asin ano an epekto kaiyan sa iba?

⁵ Nasasabotan an boot sabihon kan sinabi kan saiyang aki, si Maria tolos-tolos na huminale asin pinagbotan an mga katabang: “Kun ano an sabihon nia saindo, gibohon nindo.” Asin rinesolberan ni Jesus an problema. Pinakagan nia nin tubig sa mga katabang an mga dulay, asin ginibo nia an tubig na magin pinakamasiram na arak. Nangyari ini bilang enot na pakaeksperyensia sa kapangyarihan ni Jesus na gumibo nin milagro, na nagtatao nin tanda na an espiritu nin Dios nasa saiya. Kan maheling kan bagong mga disipulo an milagrong ini, napakosog an saindang pagtubod.—Juan 2:5-11.

Maigot Para sa Harong ni Jehova

6. Taano ta ikinaanggot na marhay ni Jesus an naheling nia sa templo sa Jerusalem, asin anong aksion an ginibo nia?

⁶ Dai nahaloy tigsoli na nin 30 C.E., asin si Jesus saka an saiyang kairiba paduman sa Jerusalem tanganing iselebrar an Paskua. Mantang yaon duman, an saiyang mga disipulo naheling an Namomoon sa sainda na huminiro sa paagi na tibaad dai pa ninda noarin man naheling na ginibo nia kaidto. An mahanab na Judiong mga negosyante nagpapabakal nin mga hayop asin gamgam para sa pag-atang sa laog mismo kan templo. Asin halangkawon an singil ninda sa fiel na Judiong mga parasamba. Anggot na marhay, huminiro si Jesus. Naggibo sia nin sarong latigong pisi asin inalaw an mga paratinda. Iinuula an mga sinsilyo kan mga pararibay nin kuarta, tinurumba nia an saindang mga lamesa. “Halea nindo digdi an mga bagay na ini!” an ipinagboot nia sa mga nagtitinda nin salampati. Kan an mga disipulo ni Jesus maheling sia na huminiro na igwa nin siring kainit na boot, nagirumdoman ninda an hula manongod sa Aki nin Dios: “Hahalonon ako kan kaigotan para sa saimong harong.” (Juan 2:13-17; Salmo 69:9) Dapat na maigot man kitang magmaan na dai pagtogotan an kinabanon na mga tendensia na atian an satong pagsamba.

7. (a) Ano an dahelan kan pagsongko ni Nicodemo sa Mesiyas? (b) Ano an manonodan ta sa pagpatotoo ni Jesus sa sarong Samaritana?

⁷ Mantang nasa Jerusalem, si Jesus naggibo nin pambihirang mga tanda, asin dakol an nagtubod sa saiya. Minsan si Nicodemo, sarong miembro kan Sanhedrin, o Judiong korte suprema, naghanga ki Jesus asin nagduman sa saiya sa banggi tanganing dakol pa an manodan. Dangan, si Jesus asin an saiyang mga disipulo nagdanay sa “Judeanong nasyon” sa laog nin mga walong bulan, na naghuhulit asin naggigibo nin mga disipulo. Minsan siring, kasunod kan pagkabilanggo ki Juan na Bautisador  sinda naghale sa Judea tanganing magduman sa Galilea. Kan mag-agi sinda sa distrito nin Samaria, inaprobetsaran ni Jesus an oportunidad na magtao nin lubos na patotoo sa sarong Samaritana. Inandam kaini an dalan tanganing dakol na Samaritano an magturubod. Magin man kitang alisto sa mga oportunidad na magtaram manongod sa Kahadean.—Juan 2:23; 3:1-22; 4:1-42; Marcos 1:14.

Mahiwas na Paghuhulit sa Galilea

8. Anong gibohon an pinonan ni Jesus sa Galilea?

⁸ Bago an “oras” kan kagadanan ni Jesus, dakol siang gigibohon sa paglilingkod sa saiyang langitnon na Ama. Sa Galilea, pinonan ni Jesus an ministeryo na orog pa nganing dakula kisa sa Judea asin Jerusalem. Sia ‘naglibot sa bilog na Galilea, na nagtotokdo sa saindang mga sinagoga asin naghuhulit kan maogmang bareta kan kahadean patin nagpapaomay kan gabos na klase nin kahelangan asin kan gabos na klase nin kamatean sa banwaan.’ (Mateo 4:23) An saiyang nakapupukaw sa isip na mga tataramon na: “Magsorolsol kamo, banwaan, huli ta an kahadean kan kalangitan harani na,” nag-aningal sa enterong distrito. (Mateo 4:17) Pagpirang bulan, kan mag-abot an duwang disipulo ni Juan na Bautisador tanganing makibareta mismo manongod ki Jesus, sinabihan nia sinda: “Lakaw kamo, ibareta nindo ki Juan an saindong naheling asin nadangog: an mga buta nakakaheling, an mga pilay nagraralakaw, an mga daoton nagkakarilinigan asin an mga bongog nakakadangog, an mga gadan binubuhay liwat, an mga dukha sinasabihan kan maogmang bareta. Asin maogma sia na dai nasingkog sa sako.”—Lucas 7:22, 23.

9. Taano an mga kadaklan ta nagburunyog ki Cristo Jesus, asin anong leksion an makukua ta digdi?

⁹ ‘An marahay na orolay may labot ki Jesus nakalakop sa bilog na palibot,’ asin an dakulang mga kadaklan nagburunyog sa saiya—hale sa Galilea, Decapolis, Jerusalem, Judea, asin sa ibong kan Salog nin Jordan. (Lucas 4:14, 15; Mateo 4:24, 25) Nagduruman sinda sa saiya bako sanang huli sa saiyang milagrosong mga pagpaomay kundi huli man sa saiyang makangangalas na mga katokdoan. An saiyang mensahe nakaaakit asin nakaparirigon sa boot. (Mateo 5:1–7:27) An mga tataramon ni Jesus managom asin kawiliwili. (Lucas 4:22) An mga kadaklan  “napangalas nin makuri sa saiyang paagi nin pagtotokdo,” huli ta sia nagtataram gikan sa Kasuratan na may autoridad. (Mateo 7:28, 29; Lucas 4:32) Siisay an dai mapararani an boot sa siring na tawo? Logod na pataluboon ta man an abilidad sa pagtotokdo tanganing madagka sa katotoohan an mga indibiduwal na sadiosan an puso.

10. Taano ta hiningoa kan mga taga Nazaret na gadanon si Jesus, asin taano ta nasudya sinda?

¹⁰ Minsan siring, bakong gabos na nagdangog ki Jesus andam na umako. Dawa sa kapinonan kan saiyang ministeryo, kan sia nagtotokdo sa sinagoga sa ginikanan niang banwaan sa Nazaret, nagkaigwa nin pagprobar na gadanon sia. Minsan ngani an mga taga duman nagngalas sa saiyang “managom na mga tataramon,” boot nindang makaheling nin mga milagro. Minsan siring, imbes na gumibo nin dakol na ngangalasan duman ibinuyagyag ni Jesus an saindang kapasloan asin kadaihan nin pagtubod. Napano nin kaanggotan, an mga nasa sinagoga nagtirindog, dinakop si Jesus, asin idinalagan sia sa gati nin sarong bukid tanganing iholog sia nin suwi sa ampas. Alagad nakadulag sia sa sainda asin ligtas na nakarayo. An “oras” kan saiyang kagadanan dai pa naabot.—Lucas 4:16-30.

11. (a) Taano an nagkapirang namomoon sa relihion ta nagduman tanganing magdangog ki Jesus? (b) Taano ta sinahotan si Jesus nin pagbalga sa Sabbath?

¹¹ An mga namomoon sa relihion—mga eskriba, Fariseo, Saduceo asin iba pa—parate man na presente kun saen naghuhulit si Jesus. Dakol sa sainda an yaon duman, bakong tanganing maghinanyog asin makanood, kundi tanganing mantatsar asin hingoahon na siodon sia. (Mateo 12:38; 16:1; Lucas 5:17; 6:1, 2) Halimbawa, mantang nagsosongko sa Jerusalem para sa Paskua kan 31 C.E., pinaomayan ni Jesus an sarong lalaki na 38 taon nang may helang. An Judiong mga namomoon sa relihion sinahotan si Jesus nin pagbalga sa Sabbath. Sia nagsimbag: “An sakong Ama sagkod ngonyan padagos na naggigibo, asin ako padagos na naggigibo.” Ngonyan an mga Judio sinahotan sia nin paglanghad huli sa paghingako na sia Aki nin Dios paagi sa pag-apod sa saiya na Ama. Hiningoa nindang gadanon si Jesus, alagad sia asin an saiyang mga disipulo naghale sa Jerusalem tanganing magduman sa Galilea. Kaagid kaiyan, madonong na likayan ta an dai kinakaipuhan na pakipaghampangan sa mga paratumang mantang idinudusay ta an satong kosog sa paghuhulit kan Kahadean asin paggibo nin mga disipulo.—Juan 5:1-18; 6:1.

12. Gurano kahiwas na hinulitan ni Jesus an teritoryo sa Galilea?

¹² Sa suminunod na sangtaon may kabanga o labi pa, sa Galilea sana ginibo ni Jesus an kadaklan kan saiyang ministeryo, na nagsosongko sa Jerusalem tangani sanang umatender sa tolong taonan na kapiestahan kan mga Judio. Gabos-gabos, tolong beses siang nagbiahe sa paghuhulit sa Galilea: an enot kaiba an 4 na bagong disipulo, an ikaduwa kaiba an 12 apostol, asin an sarong pinahiwas na paghuhulit na isinugo man an sinanay na mga apostol. Kanigoan kahiwas na patotoo sa katotoohan an ikinatao sa Galilea!—Mateo 4:18-25; Lucas 8:1-3; 9:1-6.

May Kosog nin Boot na Pagpatotoo sa Judea Asin Perea

13, 14. (a) Sa anong okasyon hiningoa kan mga Judio na dakopon si Jesus? (b) Taano ta dai naarestar kan mga opisyal si Jesus?

¹³ Tigrakdag na nin 32 C.E., asin an “oras” ni Jesus sa ngapit pa. Harani na an Kapiestahan nin mga Tabernakulo. An mga tugang ni Jesus sa ina sinadol sia ngonyan: “Maghale ka digdi asin paduman ka sa Judea.” Boot ninda na ipaheling ni Jesus an saiyang mga kapangyarihan nin pagmilagro sa gabos na nagkakatiripon sa kapiestahan sa Jerusalem. Pero aram ni Jesus an peligro. Kaya sinabihan nia an saiyang mga tugang: “Dai pa ako matukad pasiring sa kapiestahan na ini, huli ta an sakong itinalaan na panahon dai pa lubos na minaabot.”—Juan 7:1-8.

¹⁴ Pakapagpadigson nin dikit na panahon sa Galilea, si Jesus nagduman sa Jerusalem “bakong sa hayag kundi sa hilom.” An mga Judio talagang hinahanap sia sa kapiestahan, na nagsasarabi: “Haen an tawong iyan?” Kan nangangabangaan na an kapiestahan, si Jesus nagduman sa templo asin may kosog nin boot na nagpoon na maghulit. Hiningoa nindang dakopon sia, tibaad tanganing ibilanggo sia o ipagadan sia. Pero, dai sinda nagin mapanggana dahel ta “an saiyang oras dai pa naabot.” Dakol ngonyan an nagtubod ki Jesus. Maski an mga opisyal na isinugo kan mga Fariseo na dumakop sa saiya nagbaralik na daing dara, na nagsarabi: “Mayo pa nin ibang tawo na nagtaram nin arog kaini.”—Juan 7:9-14, 30-46.

15. Taano an mga Judio ta nagpururot nin gapo tanganing daklagon si Jesus, asin anong kampanya nin paghuhulit an sunod na ilinansar nia?

¹⁵ An mga enkuentro sa pag-oltanan ni Jesus asin kan Judiong mga nagtutumang sa saiya nagpadagos  mantang sia nagtotokdo manongod sa saiyang Ama sa templo durante kan kapiestahan. Sa ultimong aldaw kan kapiestahan, huling ikinaanggot an sinabi ni Jesus manongod sa saiyang buhay bago nagin tawo, an mga Judio nagpururot nin gapo tanganing daklagon sia. Alagad nagtago sia asin nakadulag na dai naano. (Juan 8:12-59) Mantang nasa luwas kan Jerusalem, si Jesus naglansar nin sigidong kampanya nin paghuhulit sa Judea. Nagpili sia nin 70 disipulo asin, pakatapos na instruksionan sinda, sinugo sinda nin manduwaduwa tanganing hulitan an teritoryo. Dinumanan ninda nin patienot an lambang lugar asin siudad na plano ni Jesus, kaiba an saiyang mga apostol, na dumanan.—Lucas 10:1-24.

16. Sa anong peligro duminulag si Jesus durante kan Kapiestahan nin Pagdusay, asin anong gibohon an pinagkakasibotan giraray nia?

¹⁶ Kan tiglipot nin 32 C.E., an “oras” ni Jesus naghaharani na. Nagduman sia sa Jerusalem para sa Kapiestahan nin Pagdusay. An mga Judio naghihingoa pa man giraray na gadanon sia. Mientras na si Jesus naglalakaw sa portiko kan templo, pinalibotan ninda sia. Sinasahotan giraray sia nin paglanghad, nagpururot sinda nin gapo tanganing gadanon sia. Alagad siring kan ginibo nia kan mga nakaagi, si Jesus duminulag. Dai nahaloy naghuhulit na sia sa tinampo, ngonyan naman sa mga siudad asin baryo sa distrito nin Perea, sa ibong kan Jordan hale sa Judea. Asin dakol an nagturubod sa saiya. Alagad an sarong bareta may labot sa saiyang namomotan na katood na si Lazaro pinababalik sia sa Judea.—Lucas 13:33; Juan 10:20-42.

17. (a) Anong apuradong mensahe an naresibi ni Jesus mantang naghuhulit sa Perea? (b) Ano an nagpapaheling na aram ni Jesus an katuyohan kan dapat niang gibohon asin an talaan na panahon kan mga pangyayari?

¹⁷ An apuradong mensahe hale ki Marta asin Maria, an mga tugang na babae ni Lazaro, na taga Betania nin Judea. “Kagurangnan, uya! an padangat mo naghehelang,” an sabi kan mensahero. “An helang na ini dai ikagagadan,” an simbag ni Jesus, “kundi para sa kamurawayan nin Dios, tanganing an Aki nin Dios mapamuraway paagi kaiyan.” Tanganing mahaman an katuyohan na ini, tinuyo ni Jesus na magdanay nin duwang aldaw sa inoontokan nia. Dangan sinabi nia sa saiyang mga disipulo: “Paduman liwat kita sa Judea.” Habong magtubod, sinda nagsimbag: “Rabi, kasuarin pa sana an mga Judeano naghiringoang gapoon ka, asin maduman ka liwat?” Alagad aram ni Jesus na an natatadang “oras na liwanag nin saldang,” o an panahon na itinalaan nin Dios para sa saiyang ministeryo sa daga, halipot na sana. Aram nanggad nia kun ano an dapat niang gibohon asin kun taano.—Juan 11:1-10.

Sarong Milagro na Dai Puedeng Palimanlimanan nin Siisay Man

18. Kan dumatong si Jesus sa Betania, ano an kamugtakan duman, asin ano an nangyari pagkaabot nia?

¹⁸ Sa Betania, si Marta an enot na suminabat ki Jesus, na nagsasabi: “Kagurangnan, kun uya ka digdi dai kutana nagadan an sakong tugang.” Suminunod si Maria asin an mga nagduruman sa harong ninda. Naghihiribi gabos. “Saen sia nindo ibinugtak?” an hapot ni Jesus. Sinda nagsimbag: “Kagurangnan, madia asin helinga.” Pag-abot ninda sa lolobngan nin girumdoman—sarong lungib na may gapong nakasandig sa tata kaiyan—si Jesus nagsabi: “Halea nindo an gapo.” Huling dai naiintindihan an intension na gibohon ni Jesus, si Marta kuminontra: “Kagurangnan, sa panahon na ini mabata na sia, ta apat na aldaw na siang gadan.” Alagad naghapot si Jesus: “Bakong sinabi ko sa saimo na kun tumubod ka maheheling mo an kamurawayan nin Dios?”—Juan 11:17-40.

19. Taano si Jesus ta namibi nin hayagan bago buhayon liwat si Lazaro?

¹⁹ Mantang hinahale an gapo na nakatatahob sa tata kan pinaglobngan ki Lazaro, si Jesus namibi nin makosog tanganing an mga tawo makaaram na an saiyang gigibohon mangyayari paagi sa kapangyarihan nin Dios. Dangan nagkurahaw sia sa makosog na tingog: “Lazaro, lumuwas ka!” Luminuwas si Lazaro na an saiyang mga bitis asin kamot nagagapos pa nin mga henerong sa gadan asin an saiyang  lalauogon napapatos nin podong. “Hubadi sia nindo asin palakawa,” an sabi ni Jesus.—Juan 11:41-44.

20. Ano an nagin reaksion kan mga nakaheling na binuhay liwat ni Jesus si Lazaro?

²⁰ Kan maheling an milagrong ini, an kadaklan sa mga Judio na nagduruman tanganing rangahon si Marta asin Maria nagturubod ki Jesus. An iba naghale tanganing iosip sa mga Fariseo an nangyari. An reaksion ninda? Tolos-tolos, sinda asin an poon na mga saserdote nagpaapod nin apuradong miting kan Sanhedrin. Natataranta, sinda nanambitan: “Ano an satong gigibohon, huli ta an tawong ini naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga Roma asin kukuanon an satong lugar asin an satong nasyon.” Alagad an Halangkaw na Saserdoteng si Caifas nagsabi sa sainda: “Dai kamo nangangatanosan na para sa saindong pakinabang na an sarong tawo magadan para sa banwaan asin na an bilog na nasyon dai malaglag.” Kun siring, magpoon kan aldaw na idto nagpaharatolhatol sinda na gadanon si Jesus.—Juan 11:45-53.

21. Nagin kapinonan nin ano an milagro kan pagbuhay liwat ki Lazaro?

²¹ Kaya paagi sa pagdigson kan saiyang pag-abot sa Betania, nakagibo si Jesus nin sarong milagro na mayo nin puedeng mag-ignoro. Huling tinawan nin Dios nin kapangyarihan, binuhay liwat ni Jesus an sarong tawo na apat na aldaw nang gadan. Pati an maimpluwensiang Sanhedrin napiritan na magmangno asin magpasar nin sentensiang kagadanan sa Paramilagro! Sa siring an milagro nagin kapinonan nin sarong importanteng pagbabago sa ministeryo ni Jesus—sarong pagbalyo hale sa panahon na “an saiyang oras dai pa naabot” pasiring sa panahon na “nag-abot na an oras.”

Ano an Isisimbag Nindo?

• Paano ipinaheling ni Jesus na aram nia an saiyang gibohon na iinasignar nin Dios?

• Taano ta sinayumahan ni Jesus an suhestion kan saiyang ina manongod sa arak?

• Ano an manonodan ta sa paagi nin parateng pag-atubang ni Jesus sa mga paratumang?

• Taano ta nagdigson si Jesus na asikasohon an paghelang ni Lazaro?

[Mga Hapot Para sa Pag-adal]

[Mga Ritrato sa pahina 12]

Idinusay ni Jesus an saiyang kosog sa saiyang responsibilidad na iinasignar nin Dios