Kita an Klase na May Pagtubod

Pagpaisi kan Kahadean nin Dios sa mga Isla nin Fiji

SI Jesu-Cristo sarong beses nagtaram dapit sa duwang dalan. An saro mahiwas asin pasiring sa kagadanan. An saro naman piot alagad pasiring sa buhay. (Mateo 7:13, 14) Tanganing matabangan an mga tawo na pilion an tamang dalan, katuyohan ni Jehova Dios na an maogmang bareta kan Kahadean ikahulit sa bilog na kinaban. (Mateo 24:14) Huli kaini, an mga tawo sa gabos na lugar naghihinanyog sa mensahe kan Kahadean, asin an nagkapira pinipili an buhay paagi sa pagigin “an klase na may pagtubod sa ikapagdadanay na buhay kan kalag.” (Hebreo 10:39) Inaagda mi kamo na basahon an dapit sa desisyon para sa buhay na ginibo kan nagkapirang taga Fiji asin iba pang kataraed na isla sa Timog Pasipiko.

Sinda Nagtiwala ki Jehova

Si Mere saro pa sanang aking nag-eeskuela kan enot niang madangog an mensahe kan Kahadean kan 1964. Huli sa saiyang pagkapasuway sa sarong harayong isla, dai nia nakakaolay an mga Saksi ni Jehova. Minsan siring, sa kahurihurihi nagkaigwa sia nin tamang kaaraman sa Biblia. Kan panahon na idto, sia kasal na sa sarong lalaki na iyo an namomoon sa baryo kaini. Bilang resulta kan desisyon ni Mere na mamuhay sono sa mga prinsipyo kan Biblia, pinagringisan sia kan saiyang agom asin kan mga paryente kaini, asin dai sia tinino kan saiyang mga kababaryo. Minsan siring, nabautismohan sia kan 1991.

Dai nahaloy pakatapos kaiyan, an agom ni Mere, si Josua, nagin maboot asin nagpoon pa ngani na makiayon sa orolay sa Biblia ni Mere asin kan saindang mga aki. Si Josua nagpondo sa pag-atender sa Iglesia Metodista. Pero bilang namomoon, pinamamayohan pa man giraray nia an semanal na mga miting sa baryo. Sa pagheling kan mga taga baryo, si Josua bakong maimbod, ta an Iglesia Metodista mahalagang kabtang kan buhay sa baryo nin mga Fijiano. Huli kaini, si Josua sinadol kan lokal na pastor na bumalik sa saiyang dating relihion.

Makosog an boot na kinompirmar ni Josua na sia asin an saiyang pamilya nagdesisyon na asin determinadong sambahon si Jehova Dios “sa espiritu asin katotoohan.” (Juan 4:24) Sa suminunod na pagtiripon sa baryo, an pangenot na namomoon nagboot na si Josua asin an saiyang pamilya humale sa baryo bilang mga isinikwal. Tinawan sinda nin pitong aldaw na bayaan an isla asin an saindang harong, daga, asin mga pananom—iyo, an saindang bilog na pagbuhay.

An espirituwal na mga tugang sa sarong isla tuminabang ki Josua asin sa saiyang pamilya, na tinatabangan sindang magkaigwa nin maiistaran asin daga na matatanoman. Si Josua asin an saiyang pinakamatuang aking lalaki bautisado na ngonyan, asin an saro pang aking lalaki naglilingkod bilang dai pa bautisadong parahayag kan maogmang bareta. Dai pa sana nahahaloy si Mere nagregular payunir (pambilog na panahon na parabalangibog kan Kahadean). An saindang desisyon na maglingkod ki Jehova nagbunga nin pagkawara nin posisyon asin materyal na mga rogaring, alagad arog ni apostol Pablo, para sa sainda daing halaga ini kun ikokomparar sa nakamtan ninda—Filipos 3:8.

Desisyon na Kalabot an Konsensia

An pagdesisyon na sunodon an konsensia na sinanay sa Biblia naghahagad nin pagtubod asin kosog nin boot. Ini nanggad an inagihan kan bagong mabautismohan na si Suraang, sarong hoben na babaeng taga Tarawa, saro sa mga isla nin Kiribati. Si Suraang naghagad nin iksemsion sa sarong aspekto kan saiyang trabaho bilang nars sa ospital. Dai sinultaran an saiyang kahagadan, na nagresulta sa pagsugo sa saiya na asikasohon an sarong sadit na sentro medikal sa sarong harayong isla kun saen napasuway sia sa iba niang mga kapagtubod.

Sa islang idto nagin nang kostumbre na an gabos na bagong abot magdolot sa lokal na “espiritu.” An mga tawo naniniwala na an dai paggibo kaiyan  maresulta sa kagadanan. Huling dai tinogotan ni Suraang na gibohon an aktong ini nin idolatriya para sa saiya asin sa saiyang mga kaibanan, hinalat kan mga taga baryo na sia tilokon kan naanggot na espiritu. Kan mayo nin maraot na nangyari ki Suraang o sa saiyang mga kaibanan, dakol na oportunidad an nabuksan para sa saiya na magtao nin marahay na patotoo.

Alagad dai pa tapos an mga pagbalo ki Suraang. Para sa nagkapirang hoben na lalaki sa islang idto sarong angat an pag-akit sa mga bisitang hoben na babae. Minsan siring, sinayumahan ni Suraang an saindang mga pasakalye asin pinapagdanay an saiyang integridad sa Dios. Sa katunayan, sia nakapaglilingkod bilang regular payunir, minsan ngani sia puedeng apodan bilang nars sa laog nin 24 oras kada aldaw.

Bago an sarong bangkete na ginibo bilang pagtao nin onra ki Suraang kan sia mahale na sa isla, an kamagurangan sa baryo nagsabi na sia an enot na tunay na misyonera na nagsongko sa sainda. Huli sa saiyang marigon na paninindogan para sa mga prinsipyo sa Biblia, an iba sa islang idto naghimate sa mensahe kan Kahadean.

Pisikal na mga Kadepisilan

An pagigin harayo kan nagkapirang baryo nangangahulogan na an banwaan ni Jehova kaipuhan na maghingoang marhay na makikabtang sa ministeryo asin umatender sa Kristianong mga pagtiripon. Estudyare an halimbawa nin apat na bautisadong Saksi—sarong lalaki asin tolong babae—na dakol na oras na nagbibiahe nin balikan sa mga pagtitipon. Kalabot sa saindang pagbaklay paduman dangan pabalik an babalyohon na tolong salog. Kun hararom an tubig, an tugang na lalaki nguna an minalangoy paibong, na ginuguyod an sarong dakulang kaldero na nasa laog an saindang mga bag, libro, asin bado para sa pagtiripon. Dangan minalangoy sia pabalik tanganing tabangan an tolong tugang na babae.

An saro pang sadit na grupo, na nag-aatender sa pagtiripon sa harayong isla nin Nonouti sa Kiribati, laen man an inaatubang na mga kadepisilan. An harong na pinagtitiriponan ninda pito o walo katawo sana an nagkakaigo. An ibang nag-aatender nagtutukaw sa luwas asin nagsisirip sa mga lanob na gibo sa mga alambreng ginagamit sa paggibo nin laoman nin manok. An pinagtitiriponan heling-heling kan ibang mga taga baryo na nag-aaragi hale asin paduman sa saindang magagayon na simbahan. Siempre, aram kan mga lingkod ni Jehova na an mga tawo, bakong mga edipisyo, an talagang kawiliwili sa punto de vista nin Dios. (Haggeo 2:7) An sarong bautisadong tugang na babae sa isla gurang na asin dai makalakaw nin harayo. Pero, tinatabangan sia sa ministeryo nin sarong hoben na babae, sarong dai pa bautisadong parahayag na ilinilibot sia sakay sa sarong ibinubusol na kareta. Kanigoan na pagpapahalaga an ipinaheheling ninda sa katotoohan!

An labi sa 2,100 na parahayag na naglilingkod sa mga isla nin Fiji desididong magpadagos sa pagpaisi kan maogmang bareta kan Kahadean nin Dios. Asin kompiado sinda na dakol pa an magigin “an klase na may pagtubod sa ikapagdadanay na buhay kan kalag.”

[Mapa sa pahina 8]

(Para sa aktuwal na format, hilingon an publikasyon)

Australia

Fiji