Sarong Pag-agrangay Para sa Tabang

“NALINGAWAN na ako nin Dios!” an agrangay nin sarong babaeng taga Brazil. Pagkatapos kan biglang pagkagadan kan saiyang agom, an pagmate nia an buhay nia mayo na nin ano man na kahulogan. Nakaprobar na daw kamo na rangahon an saro na siring kaiyan kanapupurisaw o tibaad nag-aagrangay para sa tabang?

May mga biyo nang nawaran nin paglaom kaya tinatapos ninda an saindang buhay—asin an dakol sa sainda mga hoben. Segun sa peryodikong Folha de S. Paulo, an sarong pagsiyasat sa Brazil nagpapaheling na “an paghugot nin mga hoben luminangkaw nin 26 porsiento.” Halimbawa, estudyare an kamugtakan ni Walter, * sarong hoben na lalaki sa São Paulo. Mayo sia nin mga magurang, mayo nin harong, mayo nin pribadong buhay, mayo nin mga katood na maaasahan nia. Tanganing taposon an saiyang kasakitan, nagdesisyon si Walter na tumagbang sa sarong tulay.

An sarong nagsosolong ina, si Edna, duwa na an aki kan may makamidbid siang ibang lalaki. Pakalihis sana nin sambulan, sinda nagpoon na magsaro sa harong kan ina kan lalaki, na nakikisale sa espiritismo asin sarong alkoholiko. Si Edna nagkaaki nin saro pa, nagpoon na mag-inom nin labi-labi, asin nagin makuri an kamondoan kaya nagprobar siang maghugot. Sa katapustapusi, nawaran sia nin poder na mag-ataman sa saiyang mga aki.

Kumusta man an mga may edad na? Si Maria dati mahilig sa kaogmahan asin matabil. Minsan siring, mantang sia nagkakaedad nagpoon siang maghadit manongod sa saiyang trabaho bilang nars huli ta ikinatatakot nia na sia masasala. Huli kaini namondo sia nin makuri. Pakatapos na probaran na bolongon an saiyang sadiri, sia nagpaheling sa doktor, asin an pagbolong sa saiya garo baga nakatabang. Alagad kan mawaran sia nin trabaho sa edad na 57, buminalik an makuring depresyon kaya mayo na siang maheling na solusyon. Si Maria nagpoon na mag-isip na maghugot.

“Mga 10 porsiento kan mga tawong makuri an kamondoan an nagpoprobar na maghugot,” an sabi ni Propesor Jose Alberto Del Porto kan Unibersidad nin São Paulo. “Masakit maniwala na mas dakol an nagadan sa paghugot kisa omisidyo, alagad iyan sarong mamondong katunayan,” an report kan mediko mayor sa E.U., si Dr. David Satcher.

Kun minsan an pagprobar na maghugot garo man sana sarong pag-agrangay para sa tabang. Asin sierto na boot kan mga miembro nin pamilya asin mga katood na gibohon an tama para sa saro na nawaran na nin paglaom. Siempre, dai makatatabang an paggamit kan mga pananaram na arog baga kan: “Dai mo  na pagparabasolon an sadiri mo,” “Dakol na tawo an mas grabe pa kisa saimo” o, “Kita gabos nakamamate nin maraot sa panapanahon.” Imbes, taano ta dai magin totoong katood asin marahay na parahinanyog? Iyo, hingoahon na tabangan an nawaran nin paglaom na masabotan na igwa nin saysay an buhay.

An Pranses na autor na si Voltaire nagsurat: “An tawo na, huling inaatake nin kapungawan, maghugot ngonyan, magmamawot na kutana nabuhay sia kun nakapaghalat sia nin sarong semana.” Bueno, kun siring, paano madidiskobre nin mga tawong nadedesesperar na an buhay may halaga?

[Nota sa Ibaba]

[Ritrato sa pahina 3]

Nagdadakol an mga hoben asin nasa edad na na naghuhugot

[Ritrato sa pahina 4]

Paano nindo matatabangan an saro na nawaran na nin paglaom?