An Daga—Saro Sanang Lugar nin Pagbalo?

KANIGOAN na pakaginhawa! Nakapasar sia. An estudyante na uminagi sa nakaririnding duwang semanang eksamin sa katapustapusi nakaresibi nin nakapaoogmang bareta. Makakalaog na sia ngonyan sa trabaho na haloy na niang gusto.

Dakol na tawo an siring kaiyan an pagmansay sa buhay digdi sa daga. Ibinibilang ninda iyan na sarong naeenot na pagbalo na kaipuhan na agihan nin gabos. An mga “nakapapasar” minabalyo sa sarong mas marahay na kamugtakan sa sarong Buhay Pagkagadan. Makamomondo nanggad kun an presenteng buhay—pag-eksister sana para sa dakol—an pinakamarahay na malalaoman nin mga tawo. Minsan ngani makosog asin asensado sa kadaklan na panahon kan saiyang buhay, an personahe sa Biblia na si Job nagkomento: “An tawo, na namundag sa babae, halipot an buhay asin pano nin kasakitan.”—Job 14:1.

Ipinababanaag an kaisipan nin dakol, an New Catholic Encyclopedia nagsasabi: “Langitnon na kamurawayan an katuyohan nin Dios na magin kaaabtan nin tawo. . . . An kaogmahan nin tawo masasabotan na nakadepende sa saiyang pagkaigwa nin langitnon na lubos na kaogmahan.” An sarong surbey kasuarin pa sana kan Church of Christ na ginibo sa Estados Unidos naghingako na 87 porsiento sa mga sinurbey an naniniwala na sinda posibleng magduman sa langit pagkagadan ninda.

An dakol na bakong Kristiano naglalaom man na bayaan an daga para dumuman sa mas marahay na lugar pagkagadan. Halimbawa, an mga Muslim naglalaom na magduman sa sarong langitnon na paraiso. An mga parasunod sa mga sekta nin Dalisay na Daga kan Budismo sa Tsina asin Hapon naniniwala na paagi sa daing katapusan na pagditso kan “Amitab,” an ngaran kan Buda kan Daing Sagkod na Liwanag, sinda imumundag liwat sa Dalisay na Daga, o Paraiso sa Solnopan, kun saen sinda mamumuhay sa pinakahalangkaw na grado nin kaogmahan.

Interesante nanggad, an Biblia, an banal na librong pinakamahiwas an pagkatradusir asin pagkawaras sa kinaban, dai sinasabi na an daga sarong lugar na dapat dulagan, garo sarong gapong tongtongan. Halimbawa, sinasabi kaiyan: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Manonompongan man sa Biblia an bantog na pahayag ni Jesus: “Maogma an mga mahoyo: huli ta mamanahon ninda an daga.”—Mateo 5:5, King James Version.

An pankagabsan na punto de vista na an satong pag-erok sa daga temporaryo nagpapasentido na an kagadanan iyo an paagi tanganing kamtan an may lubos na kaogmahan na buhay pagkagadan. Kun iyo, kun siring an kagadanan daing duwa-duwa na sarong bendisyon. Alagad an mga tawo daw sa pankagabsan arog kaiyan an pagmansay sa kagadanan, o hinihingoa daw ninda na palawigon an buhay na ini? Ipinapaheling nin eksperyensia na kun an mga tawo tama sana an salud asin seguridad, habo nindang magadan.

Minsan siring, huli ta pano nin karatan asin pagdusa an buhay sa daga, an langit minamansay pa man giraray nin dakol bilang an solamenteng lugar na igwa nin tunay na katoninongan asin kaogmahan. An langit daw saro sanang lugar nin lubos an kaogmahan sa katoninongan, na biyong mayo nin karatan asin dai pagkaoroyon? Asin an Buhay Pagkagadan yaon sana daw sa sarong langitnon na rona? Tibaad mabigla kamo sa mga simbag sa Biblia. Tabi ipadagos an pagbasa.