Daing Sagkod na Kaogmahan—Sa Langit o sa Daga?

AN SAINDO daw na kaogmahan nakadepende sa pangenot sa ineerokan nindong lugar? An kadaklan na tawo daing pag-alangan na maadmitir na an kaogmahan mas nakadepende sa mga dahelan na arog kan marahay na salud, katuyohan sa buhay, asin marahay na relasyon sa iba. Siring kaini an pagkasabi dian kan sarong talinhaga sa Biblia: “Orog na marahay an kakanon na gulay na igwa nin pagkamoot kisa bakang pinataba sa sabsaban asin may kaibang pagkaongis.”—Talinhaga 15:17.

Minsan siring, makamomondo na an satong daganon na erokan may halawig na kasaysayan nin pagkaongis, kadahasan, asin iba pang klase nin karatan. Alagad kumusta man an langit, o an rona nin mga espiritu, na dakol na tawo an naglalaom na makaduman pagkagadan ninda? Iyan daw kaidto pa sarong lugar nin lubos an kaogmahan sa katoninongan asin katrangkilohan sa gabos na panahon, na mayo nin ano man na ribok, siring sa parateng sinasabi?

Itinotokdo kan Biblia na an Dios nag-eerok sa langit kaiba an minilyon na espiritung linalang na inaapod na mga anghel. (Mateo 18:10; Kapahayagan 5:11) An mga ini sinasabing espiritung ‘mga aki nin Dios.’ (Job 38:4, 7) Kapareho nin mga tawo, an mga anghel libre ahente moral man; bako sindang mga robot. Kun siring, nangangahulogan iyan na puede man sindang pumili na gibohon an tama o gibohon an sala. Pipilion daw nin mga anghel na gibohon an sala? Tibaad mabigla an nagkapira na maaraman na kaidtong rinibong taon na an nakaagi, an awad-awad na kabilangan nin mga anghel talagang, sa katunayan, nagkasala tumang sa Dios—sinda nagrebelde tumang sa saiya!—Judas 6.

Mga Rebelde sa Langit

An kasalan naglataw sa rona nin mga espiritu huli sa pagrebelde nin sarong anghel, na inapod Satanas (Paratumang) asin Diablo (Parabalobagi). An dati makinuyog na anghel na ini pinili na gibohon an sala sa libreng kabotan nia. Pakatapos kaiyan sia nagin nakararaot na impluwensia sa ibang espiritung linalang, kaya kan panahon ni Noe, bago an Baha, kadakol kan uminayon ki Satanas sa pagrebelde tumang sa Dios.—Genesis 6:2, nota sa ibaba; 2 Pedro 2:4.

An nagkasalang mga anghel na ini dai tolos pinalayas sa langit. Imbes, itinogot an saindang paglaoglaog—na minalataw na igwa nin nagkapirang restriksion—sa laog nin rinibong taon. * Minsan siring, kan matapos an pagtogot nin Dios sa mga paragibo nin maraot na ini, sinda “ihinolog” hale sa langit, na sa katapustapusi lalaglagon. Dangan an sarong tingog sa langit nagsabi: “Huli kaini mag-ogma, kamo kalangitan asin kamo na nag-eerok dian!” (Kapahayagan 12:7-12) Malinaw na an fiel na mga anghel naggayagaya nin dakula na, sa katapustapusi, an kalangitan nalinigan sa marigsok na mga manriribok na idto!

Kun iisipon an sa pankagabsan dai aram na mga detalyeng ini, malinaw na dai puedeng magkaigwa nin tunay na katoninongan basta binabasangbasang kan intelihenteng mga linalang an mga ley asin prinsipyo nin Dios. (Isaias 57:20, 21; Jeremias 14:19, 20) Sa ibong na lado, kun kinukuyog kan gabos an ley nin Dios, nangingibabaw an katoninongan asin katrangkilohan. (Salmo 119:165; Isaias 48:17, 18) Kaya kun an gabos na tawo mamoot asin magkuyog sa Dios patin magkaminorootmootan, bako daw na an daga magigin tunay nanggad na sarong  nakaoogmang marhay na erokan? An Biblia nagsisimbag nin iyo!

Alagad paano man an mga may kapasloan na habong bagohon an saindang maraot na mga dalan? Sinda daw mamemerwisyo sagkod lamang sa katoninongan kan mga talagang nagmamawot na gibohon an kabotan nin Dios? Dai, inatubang nin Dios an maraot na mga anghel sa langit, asin aatubangon man nia an maraot na mga tawo digdi sa daga.

Sarong Daga na Lininig

“An kalangitan iyo an sakong trono, asin an daga iyo an sakong tongtongan,” an sabi nin Dios. (Isaias 66:1) Bilang an sangkap na representasyon mismo nin kabanalan, dai totogotan nin Dios na an saiyang “tongtongan” raoton sagkod lamang kan maraot. (Isaias 6:1-3; Kapahayagan 4:8) Kun paanong hinale nia an maraot na mga espiritu sa kalangitan, hahaleon man nia an gabos na maraot na tawo sa daga, siring kan ipinaheheling kan minasunod na mga teksto sa Biblia:

“An mga paragibo nin maraot mismo popohoon, alagad idtong mga naglalaom ki Jehova iyo an mga makasasadiri kan daga.”

—Salmo 37:9.

“An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot, sinda popohoon sa mismong daga; asin kun manongod sa mga madaya, sinda hahaleon dian.”—Talinhaga 2:21, 22.

“Matanos sa kabtang nin Dios na balosan nin kahorasaan an mga nagtatao nin kahorasaan sa saindo, alagad, sa saindo na nag-aagi sa kahorasaan, pakaginhawa kaiba mi sa pagkahayag kan Kagurangnan na si Jesus hale sa langit kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan hudisyal na padusa na daing katapusan na pagkalaglag hale sa atubangan kan Kagurangnan asin sa kamurawayan kan saiyang kakosogan.”—2 Tesalonica 1:6-9.

“An kinaban [nin maraot na katawohan] maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.

Magdadanay daw na Matoninong an Daga?

Minsan ngani ipinaheheling nin malinaw kan Kasuratan na may sagkodan an pagtogot nin Dios sa mga maraot, paano kita makaseseguro na an maraot, oras na haleon, dai na mabalik? Total, pagkatapos kan Baha kaidtong kaaldawan ni Noe, iyan dai nahaloy naglataw liwat sagkod na kinaipuhan nin Dios na olangon an maraot na mga pakana nin katawohan paagi sa pagribaraw kan saindang lenguahe.—Genesis 11:1-8.

An pangenot na dahelan kan satong kompiansa na an maraot dai na malataw liwat iyo na an daga dai na pamamahalaan nin mga tawo siring kaidtong dai nahaloy pagkatapos kan Baha. Imbes, iyan pamamahalaan kan Kahadean nin Dios. Namamahala gikan sa langit, an Kahadean na ini magigin an solamenteng gobyerno sa daga. (Daniel 2:44; 7:13, 14) Iyan marikas na mahiro tumang sa siisay man na maprobar na ponan liwat an karatan. (Isaias 65:20) Sa katunayan, gagadanon kaiyan pag-abot nin panahon an mismong kagtugdas nin karatan—si Satanas na Diablo—pati an mga demonyo, an maraot na mga anghel na nagsunod sa saiya.—Roma 16:20.

Saro pa, mawawara na an mga dahelan nin kahaditan nin katawohan manongod sa kakanon, gubing, istaran, asin trabaho—na an kadaihan kaiyan ngonyan nagtutulod sa nagkapira na magin kriminal. Iyo, an bilog na daga gigibohon na sarong maproduktong paraiso na may abundansia para sa gabos.—Isaias 65:21-23; Lucas 23:43.

Mas mahalaga, totokdoan kan Kahadean an mga sakop kaiyan sa matoninong na pamumuhay mantang kadungan kaiyan ilalangkaw sinda sa pinakalubos na pagkasangkap nin tawo. (Juan 17:3; Roma 8:21) Pakatapos kaiyan, an katawohan dai na kaipuhan pang makipagtusayan sa mga kaluyahan asin makasalan na mga tendensia, na pinapangyayaring magin posible asin nakaoogmang marhay an sangkap na pagkuyog sa Dios, siring kan sangkap na tawong si Jesus. (Isaias 11:3) Sa katunayan, si Jesus nagdanay na maimbod sa Dios dawa sa atubangan nin  grabeng sugot asin padusa—mga bagay na biyong dai na maeeksperyensiahan sa buhay sa Paraiso.—Hebreo 7:26.

Kun Taano an Nagkapira ta Talagang Minaduman sa Langit

Minsan siring, aram kan dakol na nagbabasa kan Biblia an mga tataramon ni Jesus: “Sa harong kan sakong Ama kadakol kan ontokan. . . . Ako maduman tanganing mag-andam nin lugar para sa saindo.” (Juan 14:2, 3) Bako daw na kinokontra kaini an ideya na buhay na daing katapusan sa sarong paraisong daga?

An mga tokdong ini dai nagkakasarongatan. Sa katunayan, nagsusuportar an saro sa saro. Primero, sinasabi kan Biblia na limitado sanang kabilangan nin fiel na mga Kristiano—arin na baga, 144,000 sa sainda—an ibinabangon bilang espiritung mga linalang tanganing mag-erok sa langit. Taano sinda ta tinatawan kan marahayon na balos na ini? Huli ta sinda an minakompuesto kan grupo na naheling ni Juan sa sarong bisyon na “nagkaburuhay . . . asin namahala bilang mga hade sa kaibanan ni Cristo sa laog nin sangribong taon.” (Kapahayagan 14:1, 3; 20:4-6) Kun ikokomparar sa binilyon na nasa daga, an 144,000 tunay nanggad na sarong “sadangoton na aripompon.” (Lucas 12:32) Dugang pa, mantang nakaeksperyensia kan mga problema na komun sa katawohan, arog ni Jesus sinda “makakapakidamay sa satong mga kaluyahan” mantang pinangengenotan ninda an pagparahay kan katawohan asin kan daga.—Hebreo 4:15.

An Daga—Daing Sagkod na Erokan nin Katawohan

Paagi sa pagtao kan atang na pantubos ni Jesu-Cristo, pinonan nin Dios na tiponon an 144,000 kaidtong haros 2,000 na taon na an nakaagi, asin may mga nagpaparisa na kompleto na an grupong ini. (Gibo 2:1-4; Galacia 4:4-7) Minsan siring, an atang ni Jesus bakong para sa mga kasalan kan 144,000 sana, “kundi siring man kan sa bilog na kinaban.” (1 Juan 2:2) Huli kaini, an gabos na naggigibo nin pagtubod ki Jesus may esperansang mabuhay na daing sagkod. (Juan 3:16) Idtong mga natotorog sa lolobngan alagad nasa girumdoman nin Dios bubuhayon liwat, bakong sa langit, kundi sa buhay sa sarong lininig na daga. (Eclesiastes 9:5; Juan 11:11-13, 25; Gibo 24:15) Ano an natatagama sa sainda duman?

An Kapahayagan 21:1-4 nagsisimbag, na sinasabi: “Uya! An tolda nin Dios nasa mga tawo . . . Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Imahinara baya—an mga tawo binubutasan sa kagadanan, asin an kolog saka pagtangis na bunga kaiyan mayo na sagkod lamang! Sa katapustapusi, an orihinal na katuyohan ni Jehova para sa daga asin sa katawohan makaaabot sa mamuraway na kaotoban kaiyan.—Genesis 1:27, 28.

An Satong Pagpipilian—Buhay o Kagadanan

Si Adan asin Eva nungkang tinawan nin opsion na dumuman sa langit. An saindang pagpipilian magsalang kuyogon an Dios asin mabuhay nin daing sagkod sa sarong paraisong daga o makisuway sa saiya asin magadan. Makamomondo, pinili ninda an pagsuway asin kun siring nagbalik sa “kabokabo” kan daga. (Genesis 2:16, 17; 3:2-5, 19) Nungkang katuyohan nin Dios na an pamilya nin tawo sa pankagabsan magadan asin umistar sa langit na maagi sa lolobngan. Linalang nin Dios an manampulong ribong anghel tanganing mag-istar sa langit; an espiritung mga linalang na ini bakong mga tawo na nagadan asin na binuhay liwat sa langit.—Salmo 104:1, 4; Daniel 7:10.

Ano an dapat tang gibohon tanganing umako kan bendisyon na mabuhay sagkod lamang sa Paraiso digdi sa daga? An enot na lakdang iyo an pag-adal sa Tataramon nin Dios, an Banal na Biblia. “Ini nangangahulogan nin buhay na daing katapusan,” an sinabi ni Jesus sa pamibi, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”—Juan 17:3.

An pag-aplikar kan kaaraman na iyan saro pang lakdang pasiring sa daing katapusan na kaogmahan sa Paraiso. (Santiago 1:22-24) An mga namumuhay oyon sa Tataramon nin Dios may esperansang maheling mismo kan saindang mga mata an kaotoban kan nakapupukaw sa boot na mga hula na siring kan nasusurat sa Isaias 11:9, na nagsasabi: “Dai sinda [an katawohan] magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”

[Nota sa Ibaba]

 [Mga Ritrato sa pahina 7]

“An mga matanos mismo magmamana kan daga, asin sinda mag-eerok dian sagkod lamang.”—Salmo 37:29