Pagbasa sa Biblia—Kapakipakinabang Asin Nakaoogma
Pagbasa sa Biblia—Kapakipakinabang Asin Nakaoogma
“Basahon mo iyan . . . aldaw asin banggi.”—JOSUE 1:8.
1. Ano an nagkapirang pakinabang sa pankagabsan na pagbasa asin partikularmente sa pagbasa sa Biblia?
AN PAGBASA nin may halagang babasahon kapakipakinabang na okupasyon. An Pranses na pilosopo politikal na si Montesquieu (Charles-Louis de Secondat) nagsurat: “Para sa sako, an pag-adal kaidto pa iyo an pinakaremedyo para sa kapagalan sa buhay. Mayo nin kapurisawan na nangyari sa sako na dai nahale nin sarong oras na pagbasa.” Sa pinakadakulang kabtang, totoo ini manongod sa pagbasa sa Biblia. An pinasabngan na salmista nagsabi: “An ley ni Jehova sangkap, na nagpapaomay kan kalag. An pagirumdom ni Jehova mapagtitiwalaan, na nagpapadonong sa daing kabatidan. An mga pagboot ni Jehova tanos, nagpapagayagaya sa puso.”—Salmo 19:7, 8.
2. Taano ta iningatan ni Jehova an Biblia sa nag-aging mga panahon, asin ano an linalaoman niang gigibohon dian kan saiyang banwaan?
2 Bilang Autor kan Biblia, iningatan iyan ni Jehova Dios sa nag-aging mga siglo nin maringis na pagtumang kan mga kaiwal kaiyan, relihioso sagkod sekular. Huling kabotan nia na “an gabos na klase nin tawo makaligtas asin makaabot sa tamang kaaraman sa katotoohan,” sinesegurado nia na an saiyang Tataramon ikapaabot sa gabos na katawohan. (1 Timoteo 2:4) Kinakalkulo na an mga 80 porsiento kan mga nag-eerok sa daga puedeng makaolay paagi sa paggamit nin 100 na lenguahe. An teksto kan bilog na Biblia makukua sa 370 lenguahe, asin an mga kabtang kan Kasuratan mababasa sa 1,860 pang lenguahe asin dialekto. Boot ni Jehova na basahon kan saiyang banwaan an saiyang Tataramon. Binebendisyonan nia an saiyang mga lingkod na nagtatao nin atension sa saiyang Tataramon, iyo, na nagbabasa kaiyan aroaldaw.—Salmo 1:1, 2.
An Pagbasa sa Biblia Kahagadan sa mga Paraataman
3, 4. Ano an kahagadan kaidto ni Jehova sa mga hade sa Israel, asin anong mga rason sa kahagadan na ini an aplikado man sa Kristianong kamagurangan ngonyan?
3 Sa pagtaram bilang pag-antisipar sa panahon na an nasyon nin Israel magkakaigwa nin hadeng tawo, si Jehova nagsabi: “Mangyayari na kun sia magtukaw na sa trono kan saiyang kahadean, dapat na sumurat sia para sa saiya man sana nin sarong kopya kaining ley gikan duman sa yaon sa pag-asikaso kan mga saserdote, an mga Levita. Asin iyan dapat na sarayon nia, asin dapat na sia magbasa dian sa gabos na aldaw kan saiyang buhay, tanganing sia makanood na matakot ki Jehova na saiyang Dios tanganing otobon an gabos na tataramon kan ley na ini asin kan mga kukuyogon na ini paagi sa paggibo kaiyan; tanganing an saiyang puso dai magpalangkaw sa saiyang mga tugang na lalaki asin tanganing dai sia sumuhay sa togon patoo o pawala.”—Deuteronomio 17:18-20.
4 Mangnoha an mga rason kun taano ta hinahagad ni Jehova sa gabos na magigin hade sa Israel na basahon aroaldaw an libro kan ley nin Dios: (1) “tanganing sia makanood na matakot ki Jehova na saiyang Dios tanganing otobon an gabos na tataramon kan ley na ini asin kan mga kukuyogon na ini paagi sa paggibo kaiyan”; (2) “tanganing an saiyang puso dai magpalangkaw sa saiyang mga tugang na lalaki”; (3) “tanganing dai sia sumuhay sa togon patoo o pawala.” Bako daw na an Kristianong mga paraataman ngonyan kaipuhan na matakot ki Jehova, kumuyog sa saiyang mga ley, dai magpalangkaw sa saindang mga tugang, asin dai sumuway sa mga togon ni Jehova? An aroaldaw na pagbasa sa Biblia segurado nanggad na importante man sa sainda kapareho kaidto sa mga hade sa Israel.
5. Ano an isinurat kasuarin pa sana kan Namamahalang Grupo sa mga miembro kan mga Komite kan Sanga mapadapit sa pagbasa sa Biblia, asin taano ta marahay na sunodon kan gabos na Kristianong kamagurangan an konsehong iyan?
5 An Kristianong kamagurangan ngonyan sibot na marhay an iskedyul, kaya sarong angat an aroaldaw na pagbasa sa Biblia. Halimbawa, an mga miembro kan Namamahalang Grupo kan Mga Saksi ni Jehova asin mga miembro kan mga Komite kan Sanga sa bilog na kinaban gabos sibot na marhay na mga lalaki. Pero, an surat kasuarin pa sana hale sa Namamahalang Grupo sa gabos na Komite kan Sanga idinoon an pangangaipo nin aroaldaw na pagbasa sa Biblia asin marahay na ugale sa pag-adal. Paoorogon kaini, sabi kan surat, an satong pagkamoot ki Jehova asin sa katotoohan, asin “tatabangan kita [kaiyan] na mapagdanay an satong pagtubod, kagayagayahan, asin pagmamaigot sagkod sa mamuraway na katapusan.” An gabos na kamagurangan sa mga kongregasyon kan Mga Saksi ni Jehova nakamamate kan iyo man sanang pangangaipo. An aroaldaw na pagbasa kan Kasuratan tatabangan sinda na ‘humiro nin madonong.’ (Josue 1:7, 8) Para sa sainda partikularmente, an pagbasa sa Biblia “kapakipakinabang para sa pagtokdo, sa pagsagwe, sa pagtatanos, asin sa pagpatood sa katanosan.”—2 Timoteo 3:16, Revised Standard Version.
Kaipuhan kan mga Aki Asin Gurang
6. Taano ta binasa nin makosog ni Josue an gabos na tataramon kan ley ni Jehova sa atubangan kan tiripon na mga tribo nin Israel asin kan mga nakikihimanwa?
6 Kan suanoy na mga panahon, mayo nin makukuang indibiduwal na mga kopya kan Kasuratan na magagamit nin personal, kaya an pagbasa sa Biblia ginigibo sa atubangan nin tiripon na kaburonyogan. Pakatapos na itao sa saiya ni Jehova an kapangganahan laban sa siudad nin Hai, tinipon ni Josue an mga tribo nin Israel sa atubangan kan Bukid nin Ebal asin Bukid nin Gerizim. Dangan, an pagkasaysay nagsasabi sa sato: “Binasa niang makosog an gabos na tataramon kan ley, an bendisyon asin an maldisyon, sono sa gabos na nasusurat sa libro kan ley. Mayo ni sarong tataramon sa gabos na ipinagboot ni Moises na dai binasa nin makosog ni Josue sa atubangan kan bilog na kongregasyon nin Israel, kaibanan an mga babae asin saradit patin mga nakikihimanwa na nagraralakaw sa tahaw ninda.” (Josue 8:34, 35) An mga aki asin gurang, taga duman asin nakikihimanwa, kinaipuhan na garo baga ikaukit sa saindang puso asin isip kun anong paggawe an maresulta sa bendisyon ni Jehova asin kun ano an maresulta sa pagdesaprobar nia. An pagbasa sa Biblia nin regular seguradong makatatabang sa sato sa bagay na ini.
7, 8. (a) Sairisay ngonyan an arog sa “mga nakikihimanwa,” asin taano ta kaipuhan nindang basahon an Biblia aroaldaw? (b) Sa anong mga paagi maaarog kan “saradit” sa banwaan ni Jehova an halimbawa ni Jesus?
7 Ngonyan, an minilyon na lingkod ni Jehova kapareho kan “mga nakikihimanwang” idto sa espirituwal na sentido. Dati, sinda namumuhay sono sa mga pamantayan kan kinaban, alagad binago na ninda an saindang buhay. (Efeso 4:22-24; Colosas 3:7, 8) Dayaday na kaipuhan nindang ipagirumdom sa saindang sadiri an mga pamantayan ni Jehova dapit sa marahay asin maraot. (Amos 5:14, 15) An aroaldaw na pagbasa kan Tataramon nin Dios tinatabangan sinda na magibo ini.—Hebreo 4:12; Santiago 1:25.
8 Dakol man an “saradit” sa banwaan ni Jehova na tinokdoan kan mga pamantayan ni Jehova kan saindang mga magurang alagad nangangaipo na kombensiron an saindang sadiri dapit sa pagigin tama kan saiyang kabotan. (Roma 12:1, 2) Paano ninda iyan magigibo? Sa Israel, an mga saserdote asin kamagurangan na lalaki pinagbotan: “Babasahon mo an ley na ini sa atubangan kan bilog na Israel tanganing saindang madangog. Tiponon mo an banwaan, an mga lalaki asin an mga babae asin an saradit patin an nakihihimanwa na nasa laog kan saimong daga, tanganing sinda maghinanyog asin tanganing sinda makanood, huli ta kaipuhan sindang matakot ki Jehova na saindong Dios asin mag-ingat na otobon an gabos na tataramon kan ley na ini. Asin an saindang mga aki na dai pa nakakaaram maninigong maghinanyog, asin kaipuhan na makanood sindang matakot ki Jehova na saindong Dios.” (Deuteronomio 31:11-13) Huling sakop kan Ley, sa aki pang edad na 12 nagpaheling na si Jesus nin odok na interes sa pakasabot sa mga ley kan saiyang Ama. (Lucas 2:41-49) Kan huri, kinaugalean nia an paghinanyog asin pagpartisipar sa pagbasa kan Kasuratan sa sinagoga. (Lucas 4:16; Gibo 15:21) Marahay na arogon kan mga aki ngonyan an halimbawa ni Jesus paagi sa pagbasa kan Tataramon nin Dios aroaldaw asin regular na pag-atender sa mga pagtiripon kun saen binabasa asin pinag-aadalan an Biblia.
Pagbasa sa Biblia—Sarong Prioridad
9. (a) Taano ta kaipuhan kitang magin mapamili sa satong binabasa? (b) Ano an sinabi kan kagpundar na editor kan magasin na ini mapadapit sa mga pantabang sa pag-adal sa Biblia?
9 An madonong na si Hadeng Salomon nagsurat: “Mag-ingat ka: An paggibo nin dakol na libro mayo nin katapusan, asin an dakulang debosyon sa mga iyan nakapapagal sa laman.” (Eclesiastes 12:12) Tibaad may magsabi man na an pagbasa sa dakol na librong ipinupublikar ngonyan bako sanang nakapapagal sa laman kundi, an totoo, peligroso sa isip. Kaya mahalaga na magin mapamili. Apuera sa pagbasa sa satong mga publikasyon para sa pag-adal sa Biblia, kaipuhan tang basahon an Biblia mismo. An kagpundar na editor kan magasin na ini nagsurat sa mga parabasa kaiyan: “Nungkang paglingawan na an Biblia an satong Estandarte asin minsan pa itinao nin Dios an satong mga pantabang iyan ‘mga pantabang’ asin bakong pansalida sa Biblia.” * Huli kaini, minsan ngani dai iniignoro an mga publikasyon na basado sa Biblia, kaipuhan tang basahon an Biblia mismo.
10. Paano idinodoon kan “fiel asin may diskresion na oripon” an kahalagahan kan pagbasa sa Biblia?
10 Mapagrisa sa pangangaipong ini, dakol nang taon ngonyan na iiniiskedyul kan “fiel asin may diskresion na oripon” an pagbasa sa Biblia bilang kabtang kan programa sa Teokratikong Paadalan sa Pagmiministro sa lambang kongregasyon. (Mateo 24:45) An presenteng programa sa pagbasa sa Biblia tataposon an bilog na Biblia sa laog nin mga pitong taon. An iskedyul na ini kapakipakinabang para sa gabos alagad partikular na sa mga bagohan na dai pa noarin man nabasa an bilog na Biblia. Kahagadan sa mga nag-aatender sa Paadalan sa Biblia kan Watchtower sa Gilead para sa misyonero asin sa Paadalan sa Ministeryal na Pagsasanay siring man sa bagong mga miembro kan pamilyang Bethel na basahon an bilog na Biblia sa laog nin sangtaon. Ano man an iskedyul na sinusunod nindo, bilang indibiduwal o bilang pamilya, an pagsunod dian nagkakaipo nin pagtao nin prioridad sa pagbasa sa Biblia.
Ano an Ihinahayag kan Saindong Ugale sa Pagbasa?
11. Paano asin taano ta maninigo kitang kumakan sa mga tataramon ni Jehova aroaldaw?
11 Kun nadedepisilan kamo sa pagsunod sa saindong iskedyul nin pagbasa sa Biblia, tibaad angay na ihapot sa saindong sadiri: ‘Ano daw an tibaad magin epekto kan sakong ugale sa pagbasa o pagdalan nin TV sa sakong abilidad sa pagbasa kan Tataramon nin Dios?’ Girumdomon an isinurat ni Moises—asin inotro ni Jesus—na “an tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4; Deuteronomio 8:3) Kun paanong kaipuhan niatong kumakan nin tinapay o kan katumbas kaiyan aroaldaw sa satong buhay tanganing masusteniran an satong pisikal na hawak, kaipuhan ta man na ilaog sa isip an mga kaisipan ni Jehova aroaldaw tanganing mapagdanay an satong espirituwalidad. Makukua ta an mga kaisipan nin Dios kada aldaw paagi sa pagbasa kan Kasuratan.
12, 13. (a) Paano iiniilustrar ni apostol Pedro an maninigong magin pagmawot niato sa Tataramon nin Dios? (b) Paano laen an paggamit ni Pablo sa ilustrasyon nin gatas kisa paggamit ni Pedro?
12 Kun kita nagpapahalaga sa Biblia, “bakong siring sa mga tataramon nin tawo, kundi, siring sa iyo man nanggad, siring sa tataramon nin Dios,” kita mapararani dian siring sa pagmawot nin sarong omboy sa gatas kan saiyang ina. (1 Tesalonica 2:13) Pinagkomparar iyan ni apostol Pedro, na nagsurat: “Bilang mga omboy na bagong mamundag, magkaigwa kamo nin pagmawot sa daing kasalak na gatas kan tataramon, tanganing paagi kaiyan magtalubo kamo sa kaligtasan, basta nanamitan na nindo na an Kagurangnan maboot.” (1 Pedro 2:2, 3) Kun talagang nanamitan ta na, paagi sa personal na eksperyensia, na “an Kagurangnan maboot,” kita magkakaigwa nin pagmawot sa pagbasa sa Biblia.
13 Maninigong mangnohon na sa tekstong ini laen an paggamit ni Pedro kan pagbabaing sa gatas kisa paggamit ni apostol Pablo. Para sa sarong bagong mamundag na omboy, nasa gatas an gabos na kinakaipuhan na nutrisyon kaiyan. An ilustrasyon ni Pedro nagpapaheling na an Tataramon nin Dios igwa kan gabos na kaipuhan niato tanganing ‘magtalubo sa kaligtasan.’ Sa ibong na kampi, ginagamit ni Pablo an pangangaipo nin gatas bilang ilustrasyon kan maluyang ugale sa pagkakan kan nagkapira na naghihingakong mga adulto sa espirituwal. Sa saiyang surat sa mga Kristianong Hebreo, si Pablo nagsurat: “Minsan ngani kaipuhan na kamo magin mga paratokdo na huli sa panahon, nangangaipo pa giraray kamo nin may magtokdo sa saindo poon sa kapinonan kan simpleng mga bagay kan sagradong mga kapahayagan nin Dios; asin nagin kamo siring sa mga nangangaipo nin gatas, bakong nin kakanon na matagas. Huli ta an lambang nakikakabtang sa gatas dai pang kabatidan sa tataramon nin katanosan, huli ta sia omboy pa. Alagad an matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.” (Hebreo 5:12-14) An atentong pagbasa sa Biblia dakula an magigibo tanganing pataluboon an satong kakayahan nin pagmansay asin pakosogon an satong gana sa espirituwal na mga bagay.
Kun Paano Babasahon an Biblia
14, 15. (a) Anong pribilehio an iinaalok sa sato kan Autor kan Biblia? (b) Paano kita makikinabang sa kadonongan nin Dios? (Tumao nin mga halimbawa.)
14 An pinakakapakipakinabang na pagbasa sa Biblia minapoon, bakong paagi sa pagbasa, kundi paagi sa pamimibi. An pamibi sarong pambihirang pribilehio. Garo man sana pinonan nindong basahon an sarong libro dapit sa sarong hararom na tema paagi sa pag-apod sa autor na tabangan kamong masabotan an saindong babasahon. Kanigoan kadakulang pribilehio iyan! An Autor kan Biblia, si Jehova, iinaalok sa saindo an pribilehiong iyan. An sarong miembro kan namamahalang grupo kan enot na siglo nagsurat sa saiyang mga tugang: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa.” (Santiago 1:5, 6) An Namamahalang Grupo sa modernong panahon dayaday kitang sinasadol na gumibo nin mapagngayongayong pagbasa sa Biblia.
15 An kadonongan iyo an praktikal na pag-aplikar sa kaaraman. Kaya bago buksan an saindong Biblia, hagadon ki Jehova na tabangan kamong maheling an mga punto sa saindong babasahon na kaipuhan na iaplikar sa saindong personal na buhay. Ikonektar sa mga dati nang aram an bagong mga nanonodan. Gibohon iyan na kabtang kan “arogan nin ikararahay na mga tataramon” na inako na nindo. (2 Timoteo 1:13) Pensaron an mga eksena sa buhay kan mga lingkod ni Jehova kan nakaaging panahon, asin hapoton an saindong sadiri kun paano man kutana kamo huminiro sa kaagid na mga kamugtakan.—Genesis 39:7-9; Daniel 3:3-6, 16-18; Gibo 4:18-20.
16. Anong praktikal na mga suhestion an itinatao tanganing matabangan kitang magibo na orog na kapakipakinabang an satong pagbasa sa Biblia?
16 Dai magbasa na basta sana matapos an nakaiskedyul na mga pahina. Luwayluwaya sana nindo. Pag-isipan an saindong binabasa. Kun napupukaw an interes nindo sa sarong punto, helingon an mga cross reference kun igwa kaiyan an saindong Biblia. Kun an punto bako pa giraray malinaw, gumibo nin nota na sisiyasaton pa nindo iyan sa huri. Mantang kamo nagbabasa, markahan an mga teksto na espesyalmenteng gusto nindong tandaan o kopyahon iyan. Puede man kamong gumibo nin personal na mga nota asin sumurat sa pagirilid. Para sa mga teksto na iniisip nindo na magagamit nindo pag-abot nin panahon sa saindong paghuhulit asin pagtotokdo, isurat an pangenot na tataramon asin helingon sa indese kan mga termino sa Biblia sa likod kan Biblia nindo. *
Gibohon na Dakulang Kaogmahan an Pagbasa sa Biblia
17. Taano ta maninigo kitang mag-ogmang marhay sa pagbasa sa Biblia?
17 Nasambitan kan salmista an dapit sa maogmang tawo na an “kaogmahan yaon sa ley ni Jehova, asin sa saiyang ley sia nagbabasa sa maluya sanang tingog aldaw asin banggi.” (Salmo 1:2) An satong aroaldaw na pagbasa sa Biblia maninigo na dai magin rutina kundi sarong totoong dakulang kaogmahan. An sarong paagi na magibo iyan na kaogmahan iyo an magin pirmeng mapagrisa sa kahalagahan kan mga bagay na nanonodan. An madonong na si Hadeng Salomon nagsurat: “Maogma an tawo na nakanompong nin kadonongan . . . An mga dalan kaiyan mga dalan nin pagigin nakagagayagaya, asin an gabos na dana kaiyan katoninongan. Iyan kahoy nin buhay para sa mga nangangapot kaiyan, asin an mga higot na nangangapot kaiyan aapodon na maogma.” (Talinhaga 3:13, 17, 18) An paghihingoang kaipuhan tanganing makua an kadonongan talagang kapakipakinabang, ta an mga dalan kaiyan dalan nin pagigin nakagagayagaya, katoninongan, kaogmahan, asin sa katapustapusi, buhay.
18. Ano pa an kaipuhan apuera sa pagbasa sa Biblia, asin ano an eestudyaran ta sa minasunod na artikulo?
18 Iyo, an pagbasa sa Biblia kapakipakinabang sagkod nakaoogma. Alagad igo na daw iyan? An mga miembro kan mga iglesia nin Kakristianohan dakol nang siglo na nagbabasa sa Biblia, “danay na nag-aadal alagad noarin man dai nakaaabot sa tamang kaaraman kan katotoohan.” (2 Timoteo 3:7) Tanganing magin mabunga an pagbasa sa Biblia, dapat tang gibohon iyan sa katuyohan na iaplikar an kaaraman na nakukua paagi kaiyan sa satong personal na buhay asin gamiton iyan sa satong paghuhulit asin pagtotokdo. (Mateo 24:14; 28:19, 20) Nagkakaipo ini nin paghihingoa asin marahay na mga paagi nin pag-adal, na puede man na magin nakagagayagaya asin kapakipakinabang, siring kan satong maheheling sa minasunod na artikulo.
[Mga Nota sa Ibaba]
^ par. 9 Helingon an Jehovah’s Witnesses—Proclaimers of God’s Kingdom, ipinublikar kan Watchtower Bible and Tract Society of New York, Inc., pahina 241.
^ par. 16 Helingon an An Torrengbantayan na Mayo 1, 1995, pahina 16-17, “Mga Suhestion Tanganing Mapaoswag an Saindong Pagbasa sa Biblia.”
Mga Hapot sa Repaso
• Anong konseho sa mga hade sa Israel an aplikado ngonyan para sa mga paraataman, asin taano?
• Sairisay ngonyan an siring sa “mga nakikihimanwa” asin “saradit,” asin taano ta kaipuhan nindang basahon an Biblia aroaldaw?
• Sa anong praktikal na mga paagi kita tinatabangan kan “fiel asin may diskresion na oripon” na mabasa nin regular an Biblia?
• Paano kita makakukua nin tunay na pakinabang asin kaogmahan sa satong pagbasa sa Biblia?
[Mga Hapot Para sa Pag-adal]
[Ritrato sa pahina 9]
An kamagurangan, partikularmente, kaipuhan na magbasa kan Biblia aroaldaw
[Ritrato sa pahina 10]
Kinaugalean ni Jesus an pagpartisipar sa pagbasa kan Kasuratan sa sinagoga