Pagtubos nin Panahon Para sa Pagbasa Asin Pag-adal
Pagtubos nin Panahon Para sa Pagbasa Asin Pag-adal
“[Tuboson] an angay na panahon para sa saindo man sana, huli ta an mga aldaw maraot.”—EFESO 5:16.
1. Taano ta madonong na ibadyet niato an satong panahon, asin ano an puedeng ihayag manongod sa sato kan paagi nin paggamit niato sa satong panahon?
MAY nagsabi na “an pagpili nin oras pag-ekonomiya sa oras.” An saro na binabadyet an saiyang panahon sa mga bagay na dapat na gibohon sa parate mas dakol an pakinabang sa saiyang oras. An madonong na si Hadeng Salomon nagsurat: “An gabos na bagay may itinalaan na oras, igwa nin panahon para sa gabos na bagay sa sirong nin langit.” (Eclesiastes 3:1, Moffatt) Kita gabos igwa nin pararehong kadakolan nin oras na magagamit; nasa sato na kun paano ta iyan ginagamit. An paagi nin depinidong pagtalaan niato sa satong mga prioridad asin pagbadyet sa satong panahon sa dakulang kabtang naghahayag kun ano an pinakamahalaga sa satong puso.—Mateo 6:21.
2. (a) Sa saiyang Sermon sa Bukid, ano an sinabi ni Jesus manongod sa satong espirituwal na pangangaipo? (b) Anong pagsiyasat sa sadiri an angay na gibohon?
2 Obligado kitang gumamit nin panahon sa pagkakan asin pagtorog huli ta pisikal na mga pangangaipo ini. Alagad kumusta an satong espirituwal na mga pangangaipo? Aram ta na iyan dapat man na panigoan. Sa saiyang Sermon sa Bukid, si Jesus nagpahayag: “Maogma idtong mga nakamamate kan saindang espirituwal na pangangaipo.” (Mateo 5:3) Iyan an dahelan na “an fiel asin may diskresion na oripon” regular na ipinagigirumdom sa sato an importansia nin pagdusay nin panahon sa pagbasa asin pag-adal sa Biblia. (Mateo 24:45) Tibaad aram nindo kun gurano ini kahalaga, alagad tibaad iniisip nindo na mayo nanggad kamo kan panahon na adalan o basahon an Biblia. Kun iyo, siyasaton ta an mga paagi kun paano matatawan nin orog na lugar sa satong buhay an pagbasa kan Tataramon nin Dios, an personal na pag-adal, asin an paghorophorop.
Pagkaigwa nin Panahon sa Pagbasa Asin Pag-adal sa Biblia
3, 4. (a) Anong hatol an itinao ni apostol Pablo may labot sa paggamit kan satong panahon, asin ano an kabale digdi? (b) Ano an boot sabihon ni Pablo kan hatolan nia kita na ‘tuboson an angay na panahon para sa sato man sana’?
3 Huli sa mga panahon na nabubuhayan niato, kita gabos kaipuhan na maghimate sa mga tataramon ni apostol Pablo: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot. Kaya dai na kamo magin bakong makatanosan, kundi padagos na saboton kun ano an kabotan ni Jehova.” (Efeso 5:15-17) Siempre, kabale sa hatol na ini an gabos na kabtang kan satong buhay bilang nagdusay na mga Kristiano, kaiba an pagkaigwa nin panahon sa pamimibi, pag-adal, mga pagtiripon, asin pakikikabtang nin pinakalubos sagkod sa mapupuede sa paghuhulit kan “maogmang bareta kan kahadean.”—Mateo 24:14; 28:19, 20.
4 Dakol sa mga lingkod ni Jehova ngonyan an garo baga nasasakitan na tawan nin lugar sa saindang buhay an pagbasa asin hararom na pag-adal sa Biblia. Siempre pa, dai ta puedeng dagdagan nin oras an satong aldaw, kaya an hatol ni Pablo siertong igwa nin ibang kahulogan. Sa Griego, an frase na “tinutubos an angay na panahon” nangangahulogan nin pagtubos na may ibang bagay na babayaan. Sa saiyang Expository Dictionary, tinawan iyan nin kahulogan ni W. E. Vine na “lubos na pagkinabang sa gabos na oportunidad, na ginagamit sa pinakamarahay na paagi an lambang oportunidad huli ta dai na iyan ikakabalik kun mawara.” Sa ano o saen kita puedeng tumubos nin angay na panahon para sa pagbasa asin pag-adal sa Biblia?
Dapat Kitang Magbugtak nin mga Prioridad
5. Taano asin paano niato maninigo na ‘siertohon an orog na mahalagang mga bagay’?
5 Apuera sa satong sekular na mga obligasyon, dakol kitang espirituwal na bagay na dapat asikasohon. Bilang nagdusay na mga lingkod ni Jehova, “dakol an gigibohon [ta] sa gibohon kan Kagurangnan.” (1 Corinto 15:58) Sa dahelan na ini, pinagbotan ni Pablo an mga Kristiano sa Filipos na ‘siertohon an orog na mahalagang mga bagay.’ (Filipos 1:10) Nangangahulogan ini na dapat magbugtak nin mga prioridad. An espirituwal na mga bagay maninigo na pirmeng maenot sa materyal na mga aasikasohon. (Mateo 6:31-33) Pero, kaipuhan man na magin timbang sa pag-otob sa satong espirituwal na mga obligasyon. Paano ta binabadyet an satong panahon sa pag-oltanan kan laen-laen na aspekto kan satong buhay Kristiano? Ibinareta kan nagbibiaheng mga paraataman na sa “orog na mahalagang mga bagay” na maninigong atenderan nin sarong Kristiano, an personal na pag-adal asin pagbasa sa Biblia an may tendensiang pabayaan.
6. Ano an puedeng magin kalabot sa pagtubos nin angay na panahon pag-abot sa sekular na trabaho o gibohon sa harong?
6 Siring sa satong naheling, kalabot sa pagtubos sa angay na panahon an “lubos na pagkinabang sa gabos na oportunidad” asin ‘paggamit sa pinakamarahay na paagi kan lambang oportunidad.’ Kaya kun may pagkukulang an satong ugale sa pagbasa asin pag-adal sa Biblia, marahay na gumibo nin personal na pag-analisar tanganing helingon kun paano ginagamit an satong panahon. Kun labi-labi kaeksihido an satong sekular na trabaho, na kadakol na panahon asin kosog niato an inuubos, maninigo na ipamibi ta iyan ki Jehova. (Salmo 55:22) Puedeng makagibo kita nin mga pagliliwat na matao sa sato nin orog na panahon para sa mahalagang mga bagay na may koneksion sa pagsamba ki Jehova, kabale an pag-adal asin pagbasa sa Biblia. Tama an pagkasabi na an trabaho nin babae nungkang natatapos. Kaya an mga tugang na Kristiana maninigo man na magbugtak nin mga prioridad ninda asin magtagama nin depinidong mga panahon para sa pagbasa sa Biblia asin seryosong pag-adal.
7, 8. (a) Sa anong mga aktibidad sa parate puedeng tumubos nin panahon para sa pagbasa asin pag-adal? (b) Ano an katuyohan nin pag-aling-aling, asin paano an paggirumdom kaini makatatabang sa sato na ibugtak an satong mga prioridad?
7 Sa pankagabsan, an kadaklan sa sato puedeng tumubos nin panahon para sa pag-adal paagi sa pagbaya sa dai kaipuhan na mga aktibidad. Puede tang hapoton an satong sadiri, ‘Gurano kadakol na panahon an ginagamit ko sa pagbasa nin sekular na mga magasin o peryodiko, pagdalan nin mga programa sa telebisyon, paghinanyog sa musika, o pagkawat sa video? Mas dakol na panahon daw an ginagamit ko sa atubangan nin komputer kisa sakong pagbasa sa Biblia?’ Si Pablo nagsasabi: “Dai na kamo magin bakong makatanosan, kundi padagos na saboton kun ano an kabotan ni Jehova.” (Efeso 5:17) An bakong makatanosan na paggamit nin telebisyon an minalataw na pangenot na dahelan kun taano an dakol na Saksi ta dai nakatatao nin igong panahon sa personal na pag-adal asin pagbasa sa Biblia.—Salmo 101:3; 119:37, 47, 48.
8 An nagkapira tibaad magsabi na dai sinda puedeng mag-adal sa gabos na panahon, na kaipuhan ninda an pag-aling-aling. Minsan ngani totoo ini, tibaad marahay na estudyaran an Salmo 19:7, 8.
kadakolan nin panahon na ginagamit ta sa pagpaharohayahay asin ikomparar iyan sa panahon nin aktuwal na pag-adal o pagbasa sa Biblia. An resulta tibaad nakabibigla. An pag-aling-aling asin pagpaharohayahay, baga man kaipuhan, dapat na nasa lugar. An katuyohan kaiyan represkohan kita para sa padagos na espirituwal na mga aktibidad. An dakol na programa sa telebisyon asin kawat sa video nakapapagal, mantang an pagbasa asin pag-adal kan Tataramon nin Dios nakarerepresko asin nagpapakosog.—Kun Paano Tinatawan nin Lugar kan Nagkapira an Pag-adal
9. Ano an mga bentaha sa pagsunod sa sadol na itinao sa pulyetong Pagsiyasat sa Kasuratan Aroaldaw—1999?
9 An introduksion sa edisyon na 1999 kan pulyetong Pagsiyasat sa Kasuratan Aroaldaw nagsasabi: “Pinakakapakipakinabang na konsideraron an pan-aroaldaw na teksto asin mga komento sa pulyetong ini sa aga. Mamamatean nindo na garo man sana kamo pinupukaw ni Jehova, an Kaharohalangkaweng Paratokdo, paagi sa saiyang mga instruksion. Si Jesu-Cristo sa makahulang paagi sinasabi na nakikinabang sa mga instruksion ni Jehova kada aga: ‘Sia [si Jehova] nagmamata kada aga; pinupukaw nia an sakong talinga na makadangog siring kan mga tinokdoan.’ An siring na mga instruksion nagtao ki Jesus ‘kan dila kan mga tinokdoan’ tanganing sia ‘tatao kun paano sisimbagon nin sarong tataramon an napapagal.’ (Isa. 30:20; 50:4; Mat. 11:28-30) An pagkamata sa napapanahon na hatol hale sa Tataramon nin Dios kada aga bako sanang nakatatabang sa saindo na maatubang an saindong mga problema kundi sinasangkapan man kamo ‘kan dila kan mga tinokdoan’ tanganing tabangan an iba.” *
10. Paano tinatawan nin lugar kan nagkapira an pagbasa asin pag-adal sa Biblia, asin may anong mga pakinabang?
10 An dakol na Kristiano sinusunod an sadol na ini paagi sa pagbasa sa pan-aroaldaw na teksto asin mga komento saka paagi sa pagbasa sa Biblia o pag-adal sa amay na aga. Sa Pransia an sarong fiel na payunir nagmamata nin amay kada aga asin nagdudusay nin 30 minutos sa pagbasa sa Biblia. Ano an nagpangyari sa saiya na magibo ini sa laog nin dakol na taon? Sia nagsasabi: “Ako odok na motibado, asin nagdadanay ako sa sakong iskedyul sa pagbasa ano man an mangyari!” Ano man na oras kan aldaw an pilion ta, an importante magdanay kita sa satong iskedyul. Si René Mica, na labi nang 40 taon sa paglilingkod bilang payunir sa Europa asin sa *
Aprika del Norte, nagsasabi: “Poon pa kaidtong 1950 pasohan ko nang basahon an bilog na Biblia kada taon, sarong bagay na nagibo ko na ngonyan nin 49 beses. Naniniwala ako na ini mahalagang marhay sa pagpapadanay ko nin dayupot na relasyon sa sakong Kaglalang. An paghorophorop sa Tataramon nin Dios tinatabangan ako na masabotan nin orog an hustisya ni Jehova asin an iba pa niang mga kualidad asin nagin iyan gikanan nin masakit paniwalaan na kakosogan.”“Kakanon sa Igong Panahon”
11, 12. (a) Anong espirituwal na “kakanon” an itinao kan “fiel na mayordomo”? (b) Paano itinatao an “kakanon” sa igong panahon?
11 Kun paanong an ugale nin regular na pagkakan nakakokontribwir sa marahay na salud sa pisikal, an regular na iskedyul para sa pag-adal asin pagbasa sa Biblia nakatatabang sa marahay na espirituwal na salud. Sa Ebanghelyo ni Lucas, mababasa ta an mga tataramon ni Jesus: “Siisay man nanggad an fiel na mayordomo, an sarong may diskresion, na nonombrahan kan saiyang kagurangnan na mamahala sa saiyang grupo nin mga katabang tanganing padagos na magtao sa sainda nin kakanon sa igong panahon?” (Lucas 12:42) Sa laog nin labi nang 120 taon ngonyan, an espirituwal na “kakanon sa igong panahon” itinatao sa An Torrengbantayan, siring man sa iba pang libro asin publikasyon na basado sa Biblia.
12 Mangnoha an pananaram na “sa igong panahon.” Sa tamang panahon, an satong “Kaharohalangkaweng Paratokdo,” si Jehova, paagi sa saiyang Aki asin grupong oripon, ginigiyahan an saiyang banwaan sa mga bagay na may labot sa doktrina asin gawe-gawe. Garo man sana kita iribang nakadadangog nin tingog na nagsasabi sa sato: “‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” (Isaias 30:20, 21) Dugang pa, kun an mga indibiduwal atentong binabasa an Biblia asin an gabos na publikasyon sa Biblia, sa parate nagkakaigwa sinda kan saboot na an mga kaisipan na ipinahayag dian espesyalmenteng ipinanonongod sa sainda. Iyo, an diosnon na hatol asin paggiya maabot sa igong panahon niato, na nagpapangyari sa sato na malabanan an sugot o makagibo nin madonong na desisyon.
Pataluboon an Marahay na Ugale sa Pagkakan
13. Ano an nagkapirang maluyang ugale nin pagkakan sa espirituwal?
13 Tanganing lubos na makinabang sa siring na “kakanon” na itinatao sa igong panahon, kaipuhan kitang magkaigwa nin marahay na ugale sa pagkakan. Mahalagang marhay na magkaigwa nin regular na iskedyul para sa pagbasa sa Biblia asin personal na pag-adal patin magdanay dian. Igwa daw kamo nin marahay na ugale sa pagkakan sa espirituwal asin regular na panahon nin hararom na personal na pag-adal? O binabasa sana nindo nin madali an materyal na maingat na inandam para sa sato, na naghihidali sa pagkakan, sabi ngani, o biyo 1 Timoteo 1:19; 4:15, 16.
pa nganing linilipasan an pagkakan? An maluyang ugale nin pagkakan sa espirituwal nagin dahelan na an nagkapira nanluya sa pagtubod—suminuhay pa ngani.—14. Taano ta kapakipakinabang na maingat na basahon an materyal na garo baga pamilyar na?
14 An nagkapira tibaad maghona na aram na ninda an pundamental na mga doktrina asin na bakong gabos na artikulo may iinaatubang na kompletamenteng bago. Kun siring, dai na kaipuhan an sistematikong pag-adal asin pag-atender sa mga pagtiripon. Minsan siring, ipinaheheling kan Biblia na kaipuhan kitang pagirumdomon kan mga bagay na dati nang nanodan. (Salmo 119:95, 99; 2 Pedro 3:1; Judas 5) Kun paanong an sarong matibay na paraluto iyo man sanang pundamental na mga rikado an ginagamit sa dakol na masisiram na luto, an grupong oripon nagtatao nin masustansiang espirituwal na kakanon sa dakol na laen-laen na paagi. Dawa sa mga artikulo na nagtatratar sa mga tema na parate nang kinomentohan kaidto, igwa nin marahayon na mga punto na habo niatong malipasan. An katunayan iyo na an nakukua niato sa satong binabasa sa kadaklan na kabtang minadepende sa kun guranong panahon asin paghihingoa an itinatao niato sa pag-adal kaiyan.
Espirituwal na mga Pakinabang sa Pagbasa Asin Pag-adal
15. Paano an pagbasa asin pag-adal sa Biblia nakatatabang sa sato na magin mas marahay na mga ministro kan Tataramon nin Dios?
15 Kadakol kan pakinabang na nakukua ta sa pagbasa asin pag-adal sa Biblia. Kita natatabangan na makaabot sa pamantayan kan saro sa satong pundamental na Kristianong mga paninimbagan, arin na baga, na bilang indibiduwal kita magin “sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.” (2 Timoteo 2:15) Mientras na padagos kitang nagbabasa asin nag-aadal sa Biblia, orog man na mapapano nin mga kaisipan nin Dios an satong isip. Kun siring, arog ki Pablo, mahihimo ta na ‘makipagrasonan sa mga tawo hale sa Kasuratan, na ipinaliliwanag asin pinapatunayan paagi sa mga reperensia’ an makangangalas na katotoohan kan mga katuyohan ni Jehova. (Gibo 17:2, 3) Madadagdagan an satong abilidad sa pagtotokdo, asin an satong mga pakikipag-olay, pahayag, asin hatol magigin orog na nakapakokosog sa espirituwal.—Talinhaga 1:5.
16. Sa anong personal na mga paagi kita nakikinabang sa pagbasa asin pag-adal kan Tataramon nin Dios?
16 Dugang pa, an panahon na idinudusay sa pagsiyasat sa Tataramon nin Dios mapangyari sa sato na mas lubos na ikakomporme an satong buhay sa mga dalan ni Jehova. (Salmo 25:4; 119:9, 10; Talinhaga 6:20-23) Pakokosogon kaiyan an satong espirituwal na mga kualidad, arog baga kan kapakumbabaan, kaimbodan, asin kaogmahan. (Deuteronomio 17:19, 20; Kapahayagan 1:3) Kun iinaaplikar ta an kaaraman na nakukua ta sa pagbasa asin pag-adal sa Biblia, nakakamtan ta an sueltong pagbolos kan espiritu nin Dios sa satong buhay, na nagreresulta sa mas abundang bunga kan espiritu sa gabos niatong ginigibo.—Galacia 5:22, 23.
17. Paano an kadakolan asin kualidad kan satong personal na pagbasa asin pag-adal sa Biblia nakakaapektar sa satong relasyon ki Jehova?
17 An pinakamahalaga, an panahon na tinutubos sa ibang mga aktibidad tanganing magbasa asin mag-adal kan Tataramon nin Dios matao nin abundang balos may labot sa satong relasyon sa Dios. Si Pablo namibi na an saiyang mga kapwa Kristiano “mapano kan tamang kaaraman sa . . . kabotan [nin Dios] sa bilog na kadonongan asin espirituwal na pakatalastas, tanganing maglakaw na angay ki Jehova sa katuyohan na lubos na makapaogma sa saiya.” (Colosas 1:9, 10) Kaagid kaiyan, tanganing kita ‘makalakaw na angay ki Jehova,’ kita dapat na “mapano kan tamang kaaraman sa saiyang kabotan sa bilog na kadonongan asin espirituwal na pakatalastas.” Malinaw nanggad, an pagkamit niato kan bendisyon asin pag-oyon ni Jehova sa dakulang kabtang minadepende sa kadakolan asin kualidad kan satong personal na pagbasa asin pag-adal sa Biblia.
18. Anong mga bendisyon an mapapasato kun susunodon ta an mga tataramon ni Jesus na nasusurat sa Juan 17:3?
18 “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Saro iyan sa mga teksto na pinakaparateng ginagamit kan Mga Saksi ni Jehova sa pagtabang sa iba na masabotan an kahalagahan kan pag-adal kan Tataramon nin Dios. Sierto nanggad na mahalaga man para sa lambang saro sa sato na gibohon iyan nin personal. An sato mismong paglaom na mabuhay sagkod lamang nakadepende sa satong pag-oswag sa kaaraman dapit ki Jehova asin sa saiyang Aki, si Jesu-Cristo. Asin isip-isipa nanggad an kahulogan kaiyan. Nungkang matatapos an satong pakanood nin orog pa manongod ki Jehova—asin magkakaigwa nin panahon na daing sagkod tanganing makanood manongod sa saiya!—Eclesiastes 3:11; Roma 11:33.
[Mga Nota sa Ibaba]
^ par. 9 Ipinublikar kan Watchtower Bible and Tract Society of New York, Inc.
^ par. 10 Helingon an artikulong “Kun Noarin Ninda Iyan Binabasa Asin Kun Paano Sinda Nakikinabang,” na ipinublikar sa luwas kan An Torrengbantayan na Mayo 1, 1995, pahina 20-1.
Mga Hapot sa Repaso
• Ano an ihinahayag kan paagi nin paggamit niato sa satong panahon?
• Sa anong mga aktibidad puedeng tuboson an panahon para sa pagbasa asin pag-adal sa Biblia?
• Taano ta maninigo niatong bantayan an satong ugale sa pagkakan sa espirituwal?
• Anong mga pakinabang an nakakamtan gikan sa pagbasa asin pag-adal kan Kasuratan?
[Mga Hapot Para sa Pag-adal]
[Mga Ritrato sa pahina 20, 21]
An regular na pagbasa asin pag-adal sa Biblia mapangyari sa sato na ‘magamit an tataramon kan katotoohan sa tamang paagi’
[Mga Ritrato sa pahina 23]
An pagbalanse kan ibang mga aktibidad sa satong sibot na pamumuhay sa espirituwal na mga okupasyon nagtatao nin abundang balos