Ginigibo Ko daw na Sakong Personal na Paratabang an Banal na Espiritu?

AN MGA teologo, apuera sa mga tawo sa pankagabsan, igwa nin manlaenlaen na ideya manongod sa kun ano an banal na espiritu nin Dios. Pero, dai kaipuhan an siring na kadaihan nin kasegurohan. Malinaw na ipinaliliwanag kan Biblia kun ano an banal na espiritu. Imbes na sarong persona, siring sa paghihingako kan nagkapira, iyan an makapangyarihan na puersa aktiba na ginagamit nin Dios sa paggibo kan saiyang kabotan.—Salmo 104:30; Gibo 2:33; 4:31; 2 Pedro 1:21.

Mantang an banal na espiritu konektadong marhay sa paghaman kan mga katuyohan nin Dios, maninigong booton niato na an satong buhay magin kaoyon kaiyan. Maninigong booton niato na iyan magin satong personal na paratabang.

Sarong Paratabang—Taano ta Kaipuhan?

Nag-aantisipar na sa saiyang paghale sa daga, inasegurar giraray ni Jesus an saiyang mga disipulo: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang.” Asin liwat pa: “Minsan siring, sinasabi ko sa saindo an katotoohan, Para sa saindong kapakinabangan na ako mahale. Huli ta kun dai ako maghale, an paratabang dai madigdi sa saindo; alagad kun ako paduman, isusugo ko sia sa saindo.”—Juan 14:16, 17; 16:7.

Tinawan ni Jesus an saiyang mga disipulo nin seryosong sugo paagi sa pag-instruksion sa sainda: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Bakong pasil an ipinagigibong ini, huli ta gigibohon ini sa ibong nin pagtumang.—Mateo 10:22, 23.

An pagtumang hale sa luwas iibanan nin dai pagkakaoyon hale sa laog kan kongregasyon. “Ngonyan nagsasadol ako saindo, mga tugang,” si Pablo nagsurat sa mga Kristiano sa Roma kan mga 56 C.E., “na tandaan nindo an mga nagpapabulag asin nagpapasingkog tumang sa katokdoan na nanodan nindo, asin likayan nindo sinda.” (Roma 16:17, 18) An situwasyon na ini orog pang maraot kun magadan na an mga apostol. Si Pablo nagpatanid: “Aram ko na pakahale ko an maringis na mga lobo malaog dian sa tahaw nindo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.”—Gibo 20:29, 30.

Kaipuhan an tabang nin Dios tanganing kontrahon an mga olang na ini. Ginibo nia iyan paagi ki Jesus. Pakabuhaya liwat sa saiya, kan Pentecostes 33 C.E., an mga 120 kan saiyang mga parasunod “gabos nagkaparano nin banal na espiritu.”—Gibo 1:15; 2:4.

Narekonoser kan mga disipulo na an banal na espiritu na ibinubo sa okasyon na ini iyo an ipinanugang tabang ni Jesus. Daing duda na orog nindang nasabotan ngonyan an midbidan na itinao ni Jesus: “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.” (Juan 14:26) Inapod man nia iyan na an ‘paratabang, an espiritu kan katotoohan.’—Juan 15:26.

Paanong an Espiritu Sarong Paratabang?

An espiritu maglilingkod bilang sarong paratabang sa nagkapirang paagi. Enot, nanuga si Jesus na iyan mapagirumdom sa saiyang mga disipulo kan mga bagay na isinabi nia sa sainda. An boot niang sabihon digdi bako sanang pagtabang sa sainda na matandaan an mga tataramon. An espiritu matabang sa sainda na masabotan an mas hararom na kahulogan asin importansia kan saiyang itinokdo. (Juan 16:12-14) Sa halipot, an espiritu an magiya sa saiyang mga disipulo sa orog na pakasabot kan katotoohan. Si apostol Pablo nagsurat kan huri: “Sa  sato na an mga iyan ipinahayag nin Dios paagi sa saiyang espiritu, huli ta an espiritu nagsisiyasat sa gabos na bagay, minsan an hararom na mga bagay nin Dios.” (1 Corinto 2:10) Tanganing ikatao kan linahidan na mga parasunod ni Jesus an tamang kaaraman sa iba, an sainda mismong pakasabot kaipuhan na marigon an pasisikadan.

Ikaduwa, tinokdoan ni Jesus an saiyang mga disipulo na mamibi asin na gibohon iyan nin parate. Kun may beses na dai ninda segurado kun ano an maninigo nindang ipamibi, an espiritu puedeng mangoltanan o tumabang sa sainda. “Sa siring man na paagi an espiritu nakikiiba man na may tabang sa satong mga kaluyahan; huli ta an problema kun ano an maninigo niatong ipamibi siring sa kaipuhan niato dai niato aram, alagad an espiritu mismo an nakikimaherak para sa sato na may mga pag-aagrangay na dai masayod.”—Roma 8:26.

Ikatolo, an espiritu matabang sa mga disipulo ni Jesus sa hayagan na pagdepensa kan katotoohan. Sia nagpatanid sa sainda: “Kamo dadarahon ninda sa lokal na mga hokoman, asin hahampakon ninda kamo sa saindang mga sinagoga. Tara, dadarahon kamo sa atubangan nin mga gobernador asin hade huli sako, sa pagpatotoo sainda asin sa mga nasyon. Minsan siring, kun kamo itao na ninda, dai kamo mahadit kun paano o kun ano an saindong itataram; huli ta an saindong itataram itatao saindo sa oras na iyan; huli ta an nagtataram bako sanang kamo, kundi an espiritu kan saindong Ama na nagtataram paagi sa saindo.”—Mateo 10:17-20.

An banal na espiritu matabang man na mamidbid an Kristianong kongregasyon asin pahihiroon an mga miembro kaiyan sa paggibo nin madonong na personal na mga desisyon. Pag-olayan niato nin mas detalyado an duwang aspektong ini kan topikong ini asin saboton kun ano an kahulogan kaiyan para sa sato ngonyan.

Magserbing Nagpapamidbid na Tanda

Sa laog nin dakol na siglo an mga Judio naglingkod sakop kan Ley ni Moises bilang piniling banwaan nin Dios. Huli ta hinaboan ninda si Jesus bilang Mesiyas, ihinula nia na sa dai na mahahaloy sinda mismo hahaboan man: “Ano nungka nindong nabasa sa Kasuratan, ‘An gapo na hinaboan kan mga paratogdok iyo an nagin pamayohan na gapo kan anggulo. Ini nangyari gikan ki Jehova, asin iyan makangangalas sa satong mga mata’? Kaya ngani ako nagsasabi saindo, An kahadean nin Dios hahaleon sa saindo asin itatao sa nasyon na nagpapaluwas kan mga bunga kaiyan.” (Mateo 21:42, 43) Kan maestablisar an Kristianong kongregasyon kan Pentecostes 33 C.E., an mga parasunod ni Cristo nagin an “nasyon na nagpapaluwas kan mga bunga kaiyan.” Poon kaidto, an kongregasyon na ini an pinakapaagihan sa pakipagkomunikar nin Dios. Tanganing pangyarihon na mamidbid kan mga tawo an pagbalyong ini kan pabor nin Dios, nagtao an Dios nin dai mamamaluan na nagpapamidbid na tanda.

Kan Pentecostes pinangyari kan banal na espiritu na an mga disipulo makataram sa lenguahe na nungka nindang nanodan, na nagpangyari sa mga nagmamasid na magngaralas asin maghapot: “Taano ta kita nakadadangog, an lambang saro sa sato, kan saiyang sadiring tataramon na satong namundagan?” (Gibo 2:7, 8) An abilidad na magtaram sa dai aram na mga lenguahe, kabale na an “dakol na ngangalasan asin tanda [na] nagpoon na mangyari paagi sa mga apostol,” nagin dahelan na rekonoseron nin mga tolong ribong tawo na an espiritu nin Dios totoo nanggad na nagpupunsionar.—Gibo 2:41, 43.

Siring man, paagi sa pagpaluwas kan “bunga kan espiritu”—an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri—an mga disipulo ni Cristo malinaw nanggad na namidbid bilang mga lingkod nin Dios. (Galacia 5:22, 23) Sa katunayan, an pagkamoot an lataw na marhay na midbidan kan tunay na Kristianong kongregasyon. Si Jesus naghula: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:34, 35.

Inako kan mga miembro kan enot na Kristianong kongregasyon an paggiya kan banal na espiritu nin Dios asin inaprobetsaran an tabang na itinao kaiyan. Minsan ngani aram kan mga Kristiano na an Dios dai ngonyan nagbabangon nin gadan asin naggigibo nin mga milagro arog kan enot na siglo, tinotogotan ninda an bunga kan espiritu nin Dios na ipamidbid sinda bilang tunay na mga disipulo ni Jesu-Cristo.—1 Corinto 13:8.

Sarong Paratabang sa Paggibo nin Personal na mga Desisyon

An Biblia produkto kan banal na espiritu. Sa siring, kun tinotogotan ta na kita dagkahon kan Biblia, garo man sana kita tinotokdoan kan banal na espiritu. (2 Timoteo 3:16, 17) Makatatabang iyan sa  sato sa paggibo nin madonong na mga desisyon. Alagad tinotogotan ta daw iyan?

Kumusta an manongod sa satong pagpili nin okupasyon o trabaho? Papangyarihon kan banal na espiritu na mansayon niato an sarong oportunidad sa trabaho gikan sa punto de vista ni Jehova. An satong trabaho kaipuhan na kaoyon kan mga prinsipyo sa Biblia, asin mas marahay na iyan dapat na makatabang sa sato na sundon an teokratikong mga pasohan. An sueldo o pagkaprominente patin prestihio na kaiba sa trabaho totoo nanggad na mas dikit an halaga. An mas mahalaga iyo na kun baga iyan magtatao sa sato kan mga pangangaipo sa buhay asin magtatao sa sato nin supisyenteng panahon asin oportunidad na maotob an satong Kristianong mga obligasyon.

An pagmawot na mag-ogma sa buhay normal asin angay. (Eclesiastes 2:24; 11:9) Kaya an timbang na Kristiano puede man na maghanap nin pag-aling-aling para marepreskohan asin mag-ogma. Alagad kaipuhan na sia pumili nin pag-aling-aling na nagpapabanaag kan bunga kan espiritu, bakong an klase na nagtatampok kan “mga gibo kan laman.” Si Pablo nagpapaliwanag: “Ngonyan hayag na an mga gibo kan laman, asin an mga iyan iyo an pakikisaro, karompotan, malaswang gawe, idolatriya, paggibo nin espiritismo, mga pakikienemigo, iriwal, pangimon, mga pagputok nin kaanggotan, mga pasuruhay, pagkabaranga, mga sekta, mga pagkauri, mga pagburat, mariribok na katiriponan sa pag-ogma, asin an siring na mga bagay.” Kaipuhan man na likayan na magin “egotista, na nagpupukaw nin pagdaraogan, na nagpapauroriurihan.”—Galacia 5:16-26.

Iyo man kun dapit sa pagpili nin mga katood. Madonong na pilion sinda oyon sa espirituwalidad, bakong oyon sa panluwas na itsura o mga rogaring. An tawong si David malinaw na katood nin Dios, huli ta ilinadawan sia nin Dios bilang “lalaking nakaoyon sa [saiyang] puso.” (Gibo 13:22) Iniignoro an panluwas na itsura, pinili nin Dios si David na magin hade kan Israel, oyon sa prinsipyo na: “An pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.”—1 Samuel 16:7.

Rinibo nang pagkakatood an naraot huli ta iyan nakabasar sa panluwas na itsura o mga rogaring. An pagkakatood na nakabasar sa dai masasarigan na mga kayamanan puedeng matapos nin bigla. (Talinhaga 14:20) An ipinasabong kan espiritu na Tataramon nin Dios sinasadol kita na kun nagpipili nin mga katood, maninigo na pilion ta an mga puedeng tumabang sa sato na maglingkod ki Jehova. Sinasabihan kita kaiyan na magkonsentrar sa pagtao imbes na sa pag-ako huli ta an pagtao nagbubunga nin orog na kagayagayahan. (Gibo 20:35) An panahon asin kapadangatan kabilang sa pinakamahalagang mga bagay na puede tang ikatao sa satong mga katood.

Sa sarong Kristiano na naghahanap nin maaagom, an Biblia nagtatao nin sadol na ipinasabong kan espiritu. Sa sarong paagi, iyan nagsasabi: ‘Magheling nin lihis pa sa lalauogon asin pigura. Helingon an mga bitis.’ An mga bitis? Iyo, sa sentidong ini: Ginagamit daw an mga iyan sa gibohon ni Jehova na paghuhulit kan maogmang bareta, asin sa siring an mga iyan daw magayon, sabi ngani, sa saiyang pagheling? Nasasapinan daw iyan kan mensahe nin katotoohan asin kan maogmang bareta nin katoninongan? Mababasa niato: “Abaang gayon sa ibabaw kan kabukidan kan mga bitis kan nagdadara nin maogmang bareta, kan nagbabalangibog nin katoninongan, kan nagdadara nin maogmang bareta dapit sa orog karahay, kan nagbabalangibog nin kaligtasan, kan nagsasabi sa Sion: ‘An saimong Dios nagin hade na!’”—Isaias 52:7; Efeso 6:15.

Mantang kita nabubuhay sa “delikadong mga panahon na masakit pakibagayan,” kaipuhan ta an tabang sa paggibo kan kabotan nin Dios. (2 Timoteo 3:1) An paratabang, an banal na espiritu nin Dios, nagtao nin mapuersang suporta sa gibohon kan mga Kristiano kan enot na siglo, kaiba an pagigin personal na paratabang ninda. An mahigos na pag-adal kan Tataramon nin Dios, na produkto kan banal na espiritu, sarong pangenot na paagi na magigibo ta man na satong personal na paratabang an banal na espiritu. Ginigibo ta daw iyan?

 [Bilog na pahinang ritrato sa pahina 23]