Kun Paano Kamo Mapapadayupot sa Dios

“Rumani kamo sa Dios, asin sia marani sa saindo,” an sabi kan Santiago 4:8. Ipinaheheling kun gurano nanggad an pagmawot ni Jehova Dios na an mga tawo magkaigwa nin dayupot na relasyon sa saiya, itinao nia an saiyang Aki para sa sato.

BILANG reaksion sa mamomoton na introduksion na iyan, si apostol Juan nagsurat: “Kita namomoot [sa Dios], huli ta sia enot na namoot sa sato.” (1 Juan 4:19) Alagad tanganing kita personal na mapadayupot sa Dios, may mga lakdang na dapat tang gibohon. Kaagid iyan kan apat na paagi nin pagdayupot niato sa mga kapwa tawo, siring kan sinabi sa naenot na artikulo. Siyasaton ta ngonyan an mga ini.

Masdan an Marahayon na mga Kualidad nin Dios

An Dios igwa nin dakol na marahayon na kualidad, na an nagkapira sa pinakalataw iyo an saiyang pagkamoot, kadonongan, hustisya, asin kapangyarihan. An saiyang kadonongan asin kapangyarihan bastanteng pinatutunayan kan harayong uniberso sagkod kan kinaban sa palibot niato, poon sa darakulaon na galaksia sagkod sa saraditon na atomo. An salmista nagsurat: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan.”—Salmo 19:1; Roma 1:20.

An paglalang nagpapabanaag man kan pagkamoot nin Dios. Halimbawa, an paagi nin pagkagibo sa sato nagpapaheling na boot nin Dios na kita maogma sa buhay. Tinawan nia kita kan kakayahan na maheling an mga kolor, makanamit asin makaparong, mag-apresyar sa musika, magngisi, maogma sa gayon, na tinatawan man kita nin dakol na iba pang abilidad asin karakteristiko na bako man talagang kaipuhan sa buhay. Iyo, an Dios totoong buka an palad, maboot, asin mamomoton—mga kualidad na daing duda na nagkokontribwir sa saiyang pagigin “maogmang Dios.”—1 Timoteo 1:11; Gibo 20:35.

Labi-labi an paggayagaya ni Jehova sa bagay na an paggamit kan saiyang soberaniya asin an pagsuportar dian kan saiyang intelihenteng mga linalang basado sa pangenot sa pagkamoot. (1 Juan 4:8) Totoo, si Jehova an Unibersal na Soberano, alagad an pagtratar nia sa mga tawo, espesyalmente sa saiyang maimbod na mga lingkod, siring sa pagtratar nin sarong mamomoton na ama sa saiyang mga aki. (Mateo 5:45) Mayo sia nin ipinag-iimot na para sa saindang ikararahay. (Roma 8:38, 39) Siring sa nasambitan, itinao pa ngani nia an buhay kan saiyang Aking bugtong para sa sato. Iyo, an pagkamoot nin Dios an dahelan na kita nag-eeksister asin igwa kan paglaom na buhay na daing sagkod.—Juan 3:16.

Tinawan kita ni Jesus nin hararom na pakarorop sa personalidad nin Dios huli ta lubos niang inarog an saiyang Ama. (Juan 14:9-11) Sia biyong bakong maimot, makonsiderasyon, asin maasikaso. Sarong beses, si Jesus iinintrodusir sa sarong lalaking bongog asin may diperensia sa pagtaram. Maiimahinar nindo na an lalaki puedeng bakong pamugtak an boot kun nasa matawo. Interesante nanggad, an lalaking ini dinara ni Jesus sa sarong pribadong lugar asin duman nia sia pinaomayan. (Marcos 7:32-35) Inaapresyar daw nindo an mga tawo na mapagrisa sa saindong mga saboot asin na iginagalang an saindong dignidad? Kun iyo, kun siring orog nanggad kamong mapapadayupot ki Jehova asin ki Jesus mantang kamo nakakanood nin orog manongod sa sainda.

Isip-isipon an mga Kualidad nin Dios

An saro puedeng magkaigwa nin marahayon na mga kualidad, alagad kaipuhan niatong isip-isipon an tawong iyan tanganing mapadayupot sa tawong iyan. Aplikado man iyan ki Jehova. An paghorophorop sa saiyang mga kualidad sarong mahalagang marhay na ikaduwang lakdang sa pagdayupot sa saiya. Si Hadeng David, saro na totoong namotan si Jehova asin “nakaoyon sa . . . puso [ni Jehova],” nagsabi: “Ginirumdom ko an mga aldaw kaidtong suanoy; naghorophorop ako sa gabos mong gibo; gikan sa boot na dayaday akong nagtao nin atension sa gibo kan saimong mga kamot.”—Gibo 13:22; Salmo 143:5.

 Kun minamasdan nindo an mga ngangalasan nin paglalang o binabasa an Tataramon nin Dios, an Biblia, kamo daw, arog ni David, naghohorophorop sa saindong naheheling asin binabasa? Imahinara an sarong aki na nakaresibi pa sana nin sarong surat hale sa saiyang ama na ugos na marhay sa saiya. Paano nia mamansayon an surat na iyan? Sierto na dai nia basta hehelingon sana an mga laog kaiyan asin tolos na ilalaog iyan sa sulong-sulong. Imbes, pag-aadalan nia iyan, na kinukua dian an gabos na detalye asin pakahulogan. Kaagid kaiyan, an Tataramon nin Dios maninigo na magin mahalagang marhay para sa sato, siring kan salmista na nag-awit: “Kanigoan an sakong pagkamoot sa saimong ley! Sa bilog na aldaw iyan sakong pinagmamalasakitan.”—Salmo 119:97.

Papagdanayon an Marahay na Komunikasyon

An marahay na komunikasyon iyo an nagtataong buhay sa arin man na relasyon. Kalabot dian an pagtaram asin paghinanyog—asin bako sanang paagi sa isip kundi siring man sa puso. Kita nakikipag-olay sa Kaglalang paagi sa pamibi, na iyo an may pagsambang pakipagkomunikar sa Dios. Ikinaoogmang marhay ni Jehova an mga pamibi kan mga namomoot asin naglilingkod sa saiya saka minimidbid si Jesu-Cristo bilang Saiyang pangenot na representante.—Salmo 65:2; Juan 14:6, 14.

Sa nakaaging panahon, an Dios nakipag-olay sa mga tawo sa laen-laen na paagi, kabale an mga bisyon, pangatorogan, asin paagi sa mga anghel. Minsan siring, ngonyan na mga aldaw ginigibo nia iyan paagi sa saiyang nasusurat na Tataramon, an Banal na Biblia. (2 Timoteo 3:16) An nasusurat na Tataramon igwa nin dakol na bentaha. Puede iyan na konsultahon ano man na oras. Siring sa surat, puede iyan na orootrohon. Asin mayo iyan nin mga pagbiribid na parateng maheheling sa berbal na bersion nin estorya. Kaya isipon nindo na an Biblia sarong dakulang koleksion nin mga surat hale sa saindong namomotan na langitnon na Ama, asin paagi sa mga surat na ini togotan nindo sia na kaolayon kamo aroaldaw.—Mateo 4:4.

Halimbawa, sinasabi kan Biblia an pagmansay ni Jehova sa tama asin sala. Ipinaliliwanag kaiyan an saiyang katuyohan para sa katawohan asin sa daga. Asin ihinahayag kaiyan an saiyang mga pagtratar sa dakol na laen-laen na tawo asin nasyon, poon sa maimbod na mga parasamba sagkod sa makuring marhay na mga kaiwal. Sa paaging ini nin pagpasurat sa saiyang mga interaksion sa mga tawo, nagtao si Jehova nin pambihira kadetalyadong pagkaladawan kan saiyang personalidad. Ihinahayag nia an saiyang pagkamoot, kagayagayahan, pagkamondo, pagkadesganar, pagkaanggot, pagkaherak, pagmakolog—iyo, an saiyang mga kaisipan asin saboot, asin an pundamental na mga rason kaini—an gabos sa paagi na madaling masabotan kan mga tawo.—Salmo 78:3-7.

Pakatapos na mabasa nindo an sarong kabtang kan Tataramon nin Dios, paano kamo makikinabang sa pagbasa nindo? Asin, sa partikular, paano kamo orog na mapapadayupot sa Dios? Enot, isip-isipon an saindong binasa asin nanodan manongod sa Dios bilang persona, na pinatataros sa puso nindo an mga punto. Dangan sa pamibi sabihon ki Jehova an saindong mga iniisip asin kalaoglaoging mga saboot manongod sa materyal na binasa nindo asin kun paano nindo hihingoahon na makinabang dian. Iyan an komunikasyon. Siempre, kun igwa pa man kamo nin ibang iniisip, an mga ini puede nanggad na iiba sa saindong pamibi.

Gibohon an mga Bagay sa Kaibanan nin Dios

An Biblia nagsasabi dapit sa nagkapirang fiel na tawo kan suanoy na panahon na sinda naglakaw sa kaibanan nin, o sa atubangan kan, tunay na Dios. (Genesis 6:9; 1 Hade 8:25) Ano an boot sabihon kaiyan? Sa pundamental na sinda namuhay kada aldaw na garo man sana an Dios nasa kaibanan mismo ninda. Totoo, sinda makasalan. Pero, namotan ninda an mga ley asin prinsipyo nin Dios, asin sinda namuhay kaoyon sa katuyohan nin Dios. Si Jehova napapadayupot sa mga siring, asin may pagmakolog sia sa sainda, siring sa ipinaheheling sa Salmo 32:8:  “Papangyayarihon ko na ika magkaigwa nin pakarorop asin totokdoan taka sa dalan na saimong lalakawan. Magtatao ako nin sadol na nakatorohok sa saimo.”

Puede man nindong magin dayupot na katood si Jehova—saro na naglalakaw sa kaibanan nindo, may pagmakolog sa saindo, asin tinatawan kamo nin sa ama na konseho. Si Jehova ilinadawan ni propeta Isaias bilang “an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) Mantang naeeksperyensiahan ta an mga pakinabang na ini, namamatean ta an presensia ni Jehova na garo man sana yaon “sa [satong] too,” siring kan namatean ni David.—Salmo 16:8.

An Ngaran nin Dios—An Pokus kan Saiyang mga Kualidad

An dakol na relihion asin an nagdadakol na traduksion nin Biblia dai ginagamit asin ipinamimidbid an personal na ngaran nin Dios. (Salmo 83:18) Pero, sa orihinal na tekstong Hebreo, an ngaran na iyan—Jehova—minalataw nin mga 7,000 na beses! (May pagkasarongatan,baga man hinahale an ngaran nin  Dios, an kadaklan na paratradusir kan Biblia pinapagdadanay an mga ngaran nin dakol na falsong dios na nasambitan sa orihinal na teksto, siring kan Baal,Bel, Merodac, asin Satanas pa ngani!)

Hinohona nin nagkapira na an paghale sa ngaran nin Dios sadit na bagay. Alagad isipa: Mas depisil daw o mas madali an pagpatalubo nin dayupot, may kaliwanagan na relasyon sa sarong persona na daing ngaran? An mga titulo na arog kan Dios asin Kagurangnan (na ginagamit man sa falsong mga dios) puedeng mag-apod nin atension sa kapangyarihan, autoridad, o posisyon ni Jehova, alagad solamente an saiyang personal na ngaran an nagpapamidbid sa saiya nin klaro. (Exodo 3:15; 1 Corinto 8:5, 6) An personal na ngaran kan tunay na Dios nagrerepresentar sa saiyang mga kualidad asin karakteristiko. An teologong si Walter Lowrie tamang nagsabi: “An tawo na dai midbid an Dios sa ngaran dai man talaga sia midbid bilang persona.”

Estudyare an halimbawa ni Maria, sarong sinserong Katoliko na taga Australia. Kan enot siang makamidbid kan mga Saksi ni Jehova, tinogotan ni Maria an mga Saksi na ipaheling sa saiya an ngaran nin Dios sa Biblia. Ano an nagin reaksion nia? “Kan primero kong maheling an ngaran nin Dios sa Biblia, naghibi ako. Natudok na marhay an boot ko kan pakaaram na puede ko palan talagang maaraman asin gamiton an personal na ngaran nin Dios.” Ipinadagos ni Maria an pag-adal sa Biblia, asin sa kaenot-enote sa saiyang buhay, namidbid nia si Jehova bilang persona asin nakapatalubo sia nin nagdadanay na relasyon sa saiya.

Iyo, puede kitang ‘rumani sa Dios,’ dawa dai ta sia naheheling kan satong literal na mga mata. Puede tang “maheling” an saiyang nangongorog kagayon na personalidad sa satong isip asin puso asin sa siring tumalubo an satong pagkamoot sa saiya. An siring na pagkamoot iyo an “sangkap na bogkos nin pagkasararo.”—Colosas 3:14.

[Kahon/Ritrato sa pahina 6]

Binabalosan ni Jehova an Pagkamoot Nindo sa Saiya

AN RELASYON pagrinibayan. Mantang kita minadayupot sa Dios, minahiro sia paagi sa pagdayupot nin orog sa sato. Horophoropa an saiyang mga saboot dapit sa gurang nang si Simeon asin Ana, na pareho espesyal na nanabihan sa Biblia. An kagsurat kan Ebanghelyo na si Lucas nagsasabi sa sato na si Simeon “matanos asin magalang,” na naghahalat sa Mesiyas. Narisa ni Jehova an marahay na mga kualidad na ini ni Simeon asin nagpaheling sia nin pagkamoot sa namomotan na gurang nang lalaking ini paagi sa pagpahayag sa saiya na “dai sia makakaheling nin kagadanan sagkod na saiyang maheling an Cristo.” Inotob ni Jehova an saiyang panuga asin giniyahan si Simeon pasiring sa omboy na si Jesus, na dara kan Saiyang mga magurang sa templo sa Jerusalem. Naoogmang marhay asin odok an pag-apresyar, kinugos ni Simeon an omboy asin namibi: “Ngonyan, Soberanong Kagurangnan, tinotogotan mo an saimong oripon na maghaleng talingkas na may katoninongan segun sa saimong tataramon; huli ta naheling kan sakong mga mata an saimong paagi nin pagligtas.”—Lucas 2:25-35.

“Sa oras mismong idto,” ipinaheling man ni Jehova an saiyang pagkamoot sa 84 anyos na si Ana paagi sa paggiya man sa saiya pasiring ki Jesus. An mahal na marhay na balong ini, sabi sa sato kan Biblia, pirmeng yaon sa templo na “naggigibo nin sagradong paglilingkod” ki Jehova. Nagsosopay an apresasyon, sia, arog ki Simeon, nagpasalamat ki Jehova sa saiyang ekstraordinaryong kabootan, na pakatapos kaiyan ipinag-estorya nia an manongod sa aki “sa gabos na naghahalat sa pagkaligtas kan Jerusalem.”—Lucas 2:36-38.

Iyo, narisa ni Jehova kun gurano kararom kan pagkamoot asin pagkatakot sa saiya ni Simeon asin Ana asin kun gurano sinda kainteresado sa pagkahaman kan saiyang katuyohan. Dai daw kamo napapadayupot ki Jehova huli sa siring na mga pagkasaysay sa Biblia?

Arog kan saiyang Ama, minansay man ni Jesus an tunay na nasa laog na persona. Mantang nagtotokdo sa templo, narisa nia an sarong “dukhang balo” na nagdonar nin ‘duwa sanang saradit na sinsilyo na kadikiton an halaga.’ Para sa ibang nagmamasid an saiyang balaog kadikiton an halaga alagad para ki Jesus bako. Inomaw nia an babaeng ini huli ta itinao nia an gabos na nasa saiya. (Lucas 21:1-4) Huli kaini, makaseseguro kita na pinahahalagahan kita ni Jehova asin ni Jesus kun itinatao ta sa sainda an pinakamakakaya niato, baga man an satong balaog dakula o sadit.

Minsan ngani an Dios naggagayagaya sa mga namomoot sa saiya, nakokolgan an boot nia kun an mga tawo minatalikod sa saiya asin sala an ginigibo. An Genesis 6:6 nagsasabi sa sato na ‘nakolgan an puso’ ni Jehova huli sa karatan nin katawohan bago an Baha kan kaaldawan ni Noe. Kan huri, an masinuway na mga Israelita paorootrong ‘binalo an Dios, asin pinakolog ninda an boot pati kan Banal na Saro nin Israel,’ sabi kan Salmo 78:41. Iyo, an Dios bakong indiperenteng “Kagtugdas” na mayo nin pagmate. Sia totoong persona, na an mga pagmate bakong dai tinitimbangan o pinaluluya nin pagkabakong sangkap, siring kan sa satuya.

[Mga Ritrato sa pahina 7]

An pagpensar sa mga linalang ni Jehova sarong paagi nin pagdayupot sa saiya