Puede daw Kamong Mapadayupot sa Sarong Dios na Dai Naheheling?
Puede daw Kamong Mapadayupot sa Sarong Dios na Dai Naheheling?
‘Paano ako makapatatalubo nin dayupot na relasyon sa saro na dai ko naheheling?’ an tibaad ihapot nindo. Tibaad garo baga balidong hapot iyan. Alagad isip-isipa:
GURANO kaimportante sa pagpatalubo nin mamomoton asin nagdadanay na relasyon an pagheling? Bako daw na an mga bagay na dai naheheling pareho kaimportante, kun bakong orog na importante? Tunay nanggad! Sa dahelan na iyan may mga tawo na nakapatalubo nin dayupot na relasyon sa iba paagi sa regular na pagsurat—na an saindang mga surat sadiosan na nagpapahayag nin mga gusto, dai gusto, pasohan, prinsipyo, kualidad na magpangisi, asin iba pang mga karakteristiko nin personalidad o hilig.
Pinatutunayan man nin mga buta na an pagheling bakong importante sa pagpatalubo nin dayupot na relasyon sa ibang tawo. Estudyare an halimbawa ni Edward asin Gwen, mag-agom na buta. * Namidbid ni Edward si Gwen sa sarong eskuelahan para sa mga buta, kun saen kapareho nia sia nasa edad nang estudyante. Naghanga sia sa mga kualidad ni Gwen, nangorogna sa saiyang pagkaonesto sa pagtaram asin gawe-gawe, asin sa saiyang marahayon na aktitud sa trabaho. Si Gwen naakit man ki Edward huli ta, sabi nia, “ipinaheling nia an gabos na kualidad na nagimatan ko na importante.” Nagin magkailusyon sinda, asin pakalihis nin tolong taon kinasal sinda.
“Kun magkaibanan kamo,” sabi ni Edward, “an pagigin buta bako man talagang mahalaga sa pagpatalubo nin relasyon sa ibang tawo. Puedeng dai nindo naheheling an kada saro, alagad an mga pagmate bakong buta.” Ngonyan, pakalihis nin 57 taon, makosogon pa man giraray an saindang pagkaminootan. Ipinaliliwanag ninda na kalabot sa sekreto kan saindang magayonon na relasyon an kisuerra apat na bagay: (1) pagrisa sa mga kualidad kan saro, (2) pag-isip-isip asin pagkaakit sa mga kualidad na iyan, (3) pagpadanay nin marahay na komunikasyon, asin (4) paggibo na magkaibanan.
An apat na puntong ini mahalagang marhay sa arin man na magayon na relasyon, baga man nin mga magkatood, mag-agom o, mas mahalaga, nin mga tawo asin nin Dios. Sa masunod na artikulo, maheheling ta kun paanong an pag-aplikar sa mga puntong ini makatatabang sa sato na mapatalubo an dayupot na relasyon sa Dios, minsan ngani dai ta sia naheheling. *
[Mga Nota sa Ibaba]
^ par. 4 Liniwat an mga ngaran.
^ par. 6 Bakong arog sa relasyon nin mga tawo, an relasyon sa Dios basado sa pagtubod sa saiyang pag-eksister. (Hebreo 11:6) Para sa kompletong paliwanag dapit sa pagpatalubo nin makosog na pagtubod sa Dios, helingon tabi an Is There a Creator Who Cares About You?, na ipinublikar kan Watchtower Bible and Tract Society of New York, Inc.