Nagrururo an Moral na mga Prinsipyo sa Buhay

“NUNGKANG nangyari an arog kaiyan,” an sabi ni Helmut Schmidt, dating kansilyer kan Alemania. Irinereklamo nia an kasuarin pa sanang mga kaso nin grabeng pandadaya kan mga opisyal na naglilingkod sa publiko na nagluwas sa pangenot na mga bareta. “Nawara na an mga pamantayan sa moral huli sa kahanaban,” an sinabi nia.

Dakol an maoyon sa saiya. Ibinibilang na bakong mahalaga an moral na mga prinsipyo sa buhay na basado sa Tataramon nin Dios, an Biblia, asin na haloy nang inaako nin dakol bilang giya para sa tama asin sala. Ini an kamugtakan dawa sa kadagaan na asosyado daa sa Kristianismo.

Mahalaga daw an Moralidad sa Biblia?

An moralidad na basado sa katokdoan kan Biblia kaiba an pagkaonesto asin integridad. Pero, lakop an pandadaya, karatan, asin panloloko. An The Times sa Londres nagbabareta na may mga detektib na “soboot ibinulsa an sagkod sa £100,000 sa kada pagpabakal giraray nin kinompiskar na droga sa mga kriminal o pagraot kan ebidensia tumang sa darakulang lider nin sindikato.” Sa Austria an pandadaya sa seguro sinasabing ordinaryo na sanang gibohon. Asin sa Alemania an komunidad nin mga sientipiko nabigla kan madiskobre  dai pa sana nahahaloy kan mga parasiyasat an “saro sa pinakaiskandalosong kaso nin pandadaya sa siensia sa Alemania.” An sarong propesor, sarong “sikat sa tahaw nin mga eksperto sa henetiko sa Alemania,” inakusar nin lagduan na pamamalsipikar o pan-iimbento nin impormasyon.

Kaiba man sa moralidad na basado sa Biblia an pagigin fiel sa pag-agoman, na an intension magin permanenteng relasyon. Alagad nagdadakol an kabilangan nin mga mag-agom na nagdidiborsio sa korte. An peryodikong Katoliko na Christ in der Gegenwart (An Modernong Kristiano) nagbabareta na “dawa sa ‘konserbatibong’ Suiza, padakol nang padakol na mag-agom an nagbubulag.” Sa Netherlands, 33 porsiento kan gabos na pag-agoman an natatapos sa diborsio. An sarong babae na nakarisa kan sosyal na mga pagbabago sa Alemania sa nakaaging pirang taon nagsurat manongod sa saiyang kapurisawan: “An pag-agoman ibinibilang na ngonyan na lihis na sa uso asin lipas na sa panahon. An mga tawo dai na nag-aagom nin kapadis na makakaibahan sa bilog na buhay.”

Sa ibong na lado, minilyon an ibinibilang an mga pamantayan sa moral na itinokdo sa Biblia na mapagtitiwalaan asin mahalaga sa buhay sa satong kinaban sa presenteng panahon. Nadiskobre nin sarong mag-agom na nag-eerok sa linderos nin Suiza-Alemania na an pakanood na mamuhay sono sa moralidad sa Biblia ginibo sindang mas maogma. Kun para sa sainda, “sasaro sana an giya para sa gabos na aspekto nin buhay. An giyang iyan iyo an Biblia.” Ano sa paghona nindo? An Biblia daw puedeng magin mapakikinabangan na marhay na giya? Praktikal daw ngonyan an moralidad na basado sa Biblia?