An mga Kristiano Nakakaeksperyensia nin Kaogmahan sa Paglilingkod
An mga Kristiano Nakakaeksperyensia nin Kaogmahan sa Paglilingkod
“Igwang orog na kaogmahan sa pagtao kisa pag-ako.”—Gibo 20:35.
1. Anong salang aktitud an lakop ngonyan, asin taano ta nakadadanyar iyan?
SA HURING mga dekada kan mga taon 1900, an termino sa Ingles na “me-ism” parateng nadadangog. An “me-ism” talagang nangangahulogan “ako nguna” asin nagpaparisa nin aktitud na isinasalak an kaimotan asin kahanaban sa kadaihan nin pagmakolog sa iba. Masisierto niato na sa taon 2000, dai pa nanggad gadan an “me-ism.” Pirang beses nindong nadadangog an mga hapot na, “Ano an pakinabang ko dian?” o, “Ano an makukua ko dian?” An siring na maimot na aktitud dai nakatatabang sa kaogmahan. Iyan kabaliktaran na marhay kan prinsipyong sinabi ni Jesus: “Igwang orog na kaogmahan sa pagtao kisa pag-ako.”—Gibo 20:35.
2. Paano naheheling na nagbubunga nin kaogmahan an pagtao?
2 Totoo daw na an pagtao nagbubunga nin orog na kaogmahan kisa pag-ako? Iyo. Isip-isipa si Jehova Dios. Nasa saiya “an gikanan nin buhay.” (Salmo 36:9) Itinatao nia an gabos na kaipuhan niato tanganing kita magin maogma asin mabunga. Tunay nanggad, sia an Burabod nin “lambang marahay na balaog asin lambang sangkap na regalo.” (Santiago 1:17) Si Jehova, an “maogmang Dios,” pirmeng nananao. (1 Timoteo 1:11) Namomotan nia an mga linalang niang tawo, na tinatawan nia nin kadakol. (Juan 3:16) Isip-isipa man an sarong pamilyang tawo. Kun kamo magurang, aram nindo kun gurano kadakol na sakripisyo, kun guranong pagtao, an kaipuhan sa pagpadakula nin sarong aki. Asin sa dakol na taon an aki daing pakaaram sa mga sakripisyong ginigibo nindo. Iyan gabos ipinamumugtak niang dapat na asahan. Pero, ikinaoogma nindong maheling na nag-ooswag an saindong aki bilang resulta kan saindong daing kaimotan na pagtao. Taano? Huli ta sia namomotan nindo.
3. Taano ta sarong dakulang kaogmahan na paglingkodan si Jehova asin an satong mga kapagtubod?
3 Sa kaagid na paagi, an tunay na pagsamba midbid sa pagtao na basado sa pagkamoot. Mantang namomotan niato si Jehova asin namomotan niato an satong mga kapagtubod, sarong dakulang kaogmahan na paglingkodan sinda, na itao an satong panahon asin kosog para sa sainda. (Mateo 22:37-39) An siisay man na nagsasamba na maimot an mga motibo kadikiton na kagayagayahan an nakakamtan. Alagad an mga naglilingkod na daing kaimotan, na mas pinagmamakolgan an ikatatao ninda kisa inaasahan nindang akoon, tunay na nakakaeksperyensia nin kaogmahan. Mamamansayan an katotoohan na ini paagi sa pag-estudyar kun paano ginagamit sa Kasuratan an nagkapirang termino sa Biblia na konektado sa satong pagsamba. Pag-oolayan niato an tolo sa mga terminong ini sa artikulong ini asin sa masunod.
An Paglilingkod sa Publiko ni Jesus
4. Anong klase an “paglilingkod sa publiko” sa Kakristianohan?
4 Sa orihinal na Griego, an sarong mahalagang termino na may koneksion sa pagsamba iyo an lei·tour·giʹa, na tinatradusir na “paglilingkod sa publiko” sa New World Translation. Sa Kakristianohan an lei·tour·giʹa nagpalataw kan terminong “liturhiya.” * Minsan siring, an pormalistikong mga liturhiya nin Kakristianohan bako man talagang kapakipakinabang na paglilingkod sa publiko.
5, 6. (a) Anong paglilingkod sa publiko an ginibo sa Israel, na may anong mga pakinabang? (b) Anong mas dakulang marhay na paglilingkod sa publiko an suminalida sa ginigibo kaidto sa Israel, asin taano?
5 Ginamit ni apostol Pablo an termino sa Griego na konektado sa lei·tour·giʹa mapadapit sa mga saserdote nin Israel. Sabi nia: “An lambang saserdote minatindog aroaldaw tanganing magtao nin paglilingkod sa publiko [sarong porma nin lei·tour·giʹa] asin magdolot kan pareho man sanang mga atang nin parate.” (Hebreo 10:11) An mga saserdoteng Levita nagtao nin mahalagang marhay na paglilingkod sa publiko sa Israel. Sinda nagtokdo kan Ley nin Dios asin nagdolot nin mga atang na nakatahob sa mga kasalan kan banwaan. (2 Cronica 15:3; Malaquias 2:7) Kun sinusunod kan mga saserdote asin kan banwaan an Ley ni Jehova, an nasyon may mga dahelan na maggayagaya.—Deuteronomio 16:15.
6 An pagtao nin paglilingkod sa publiko sa irarom kan Ley sarong tunay na pribilehio para sa mga saserdoteng Israelita, alagad an paglilingkod ninda nawaran nin ano man na halaga kan isikwal an Israel huli sa pagigin bakong fiel. (Mateo 21:43) Si Jehova nag-areglo nin sarong bagay na mas dakula—an paglilingkod sa publiko na ginibo ni Jesus, an dakulang Halangkaw na Saserdote. May labot sa saiya, mababasa niato: “Sia huli sa padagos na pagkabuhay sagkod lamang igwa kan saiyang pagkasaserdote na mayo nin siisay man na mga kasalihid. Bilang resulta sia man lubos na makapagliligtas duman sa mga minadolok sa Dios paagi sa saiya, huli ta sia danay na buhay tanganing makimaherak para sa sainda.”—Hebreo 7:24, 25.
7. Taano an paglilingkod sa publiko ni Jesus ta nagbubunga nin daing kabaing na mga pakinabang?
7 Si Jesus nagpapadagos bilang saserdote sagkod lamang, na mayo nin mga kasalihid. Sa siring, sia sana an lubos na makapagliligtas sa mga tawo. Ginigibo nia an daing kabaing na paglilingkod na iyan sa publiko, bakong sa templo na gibo nin tawo, kundi sa antitipikong templo, an dakulang areglo ni Jehova para sa pagsamba na nagpunsionar kan 29 C.E. Si Jesus naglilingkod ngonyan sa Kabanalbanale kan templong iyan, sa langit. Sia “sarong lingkod sa publiko [lei·tour·gosʹ] sa banal na lugar asin sa totoong tolda, na pinatindog ni Jehova, asin bakong nin tawo.” (Hebreo 8:2; 9:11, 12) Halangkawon man an katongdan ni Jesus, sia “sarong lingkod sa publiko” pa man giraray. Ginagamit nia an saiyang halangkaw na autoridad sa pagtao, bakong sa pagkua. Asin an siring na pagtao nagtatao sa saiya nin kagayagayahan. Iyan kabtang kan “kagayagayahan na ibinugtak sa atubangan nia” asin nagpakosog sa saiya na magtagal sa bilog niang buhay digdi sa daga.—Hebreo 12:2.
8. Paano si Jesus guminibo nin paglilingkod sa publiko tanganing salidahan an tipan nin Ley?
8 May saro pang aspekto an paglilingkod sa publiko ni Jesus. Isinurat ni Pablo: “Si Jesus nagkamit nin orog karahay na paglilingkod sa publiko, kaya sia man an parapangoltanan sa sarong katimbang na orog karahay na tipan, na legal na pinasikad sa orog karahay na mga panuga.” (Hebreo 8:6) Si Moises an nangoltanan sa tipan na iyo an basehan kan relasyon kan Israel ki Jehova. (Exodo 19:4, 5) Si Jesus nangoltanan sa sarong bagong tipan, na nagpangyari kan pagkamundag nin sarong bagong nasyon, an “Israel nin Dios,” na kompuesto nin mga Kristianong linahidan kan espiritu hale sa dakol na nasyon. (Galacia 6:16; Hebreo 8:8, 13; Kapahayagan 5:9, 10) Abaa kapuerteng paglilingkod sa publiko idto! Abaa kita kanaoogma na mamidbid si Jesus, sarong lingkod sa publiko na paagi sa saiya kita makatatao nin maaakong pagsamba ki Jehova!—Juan 14:6.
An mga Kristiano Nagtatao Man nin Paglilingkod sa Publiko
9, 10. Ano an nagkapirang klase nin paglilingkod sa publiko na ginigibo nin mga Kristiano?
9 Mayo nin tawo na naggigibo nin paglilingkod sa publiko na arog kamamuraway kan ginigibo ni Jesus. Minsan siring, kun akoon na nin linahidan na mga Kristiano an saindang langitnon na balos, sinda minapuesto na kataed ni Jesus asin nakikakabtang sa saiyang paglilingkod sa publiko bilang langitnon na mga hade asin saserdote. (Kapahayagan 20:6; 22:1-5) Pero, an mga Kristiano digdi sa daga naggigibo nanggad nin paglilingkod sa publiko, asin sinda nakakaeksperyensia nin dakulang kagayagayahan sa paggibo kaiyan. Halimbawa, kan magkulang nin kakanon sa Palestina, si apostol Pablo nagdara nin mga donasyon hale sa mga tugang sa Europa tanganing makatabang na pagianon an kasakitan kan Judiong mga Kristiano sa Judea. Idto paglilingkod sa publiko. (Roma 15:27; 2 Corinto 9:12) Ngonyan, an mga Kristiano naoogmang gumibo nin kaparehong paglilingkod, na nagtatao nin listong tabang kun an saindang mga tugang nag-aagi nin makuring sakit, natural na mga kalamidad, o iba pang mga kalamidad.—Talinhaga 14:21.
10 Si Pablo nagtaram manongod sa saro pang paglilingkod sa publiko kan sia sumurat: “Dawa kun ako ibinububo na siring sa dolot na inomon sa ibabaw kan atang asin paglilingkod sa publiko na dian kamo giniyahan nin pagtubod, naoogma ako asin nakikigayagaya ako sa saindo gabos.” (Filipos 2:17) An kahigosan ni Pablo para sa mga taga Filipos paglilingkod sa publiko na ginibong may pagkamoot asin pagkautitok. Ginigibo ngonyan an kaparehong paglilingkod sa publiko, nangorogna nin linahidan na mga Kristiano, na naglilingkod bilang “an fiel asin may diskresion na oripon,” na nagtatao nin espirituwal na kakanon sa igong panahon. (Mateo 24:45-47) Dugang pa, bilang sarong grupo, an mga ini “banal na kabilogan na grupo nin mga saserdote,” na isinugong “magdolot nin espirituwal na mga atang na inaako nin Dios paagi ki Jesu-Cristo” asin ‘ipahayag nin mahiwas an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 2:5, 9) Arog ni Pablo, ipinaggagayagaya ninda an siring na mga pribilehio mantang saindang ‘ibinububo an saindang sadiri’ sa pag-otob sa saindang mga paninimbagan. Asin an saindang kairibang “ibang karnero” minaiba sa sainda asin nagsusuportar sa sainda sa gibong pagtaram sa mga tawo manongod ki Jehova asin sa saiyang mga katuyohan. * (Juan 10:16; Mateo 24:14) Abaa kadakula asin kagayagayang paglilingkod sa publiko iyan!—Salmo 107:21, 22.
Magtao nin Sagradong Paglilingkod
11. Paano an propetisang si Ana nagtao nin marahay na halimbawa sa gabos na Kristiano?
11 An saro pang termino sa Griego na may koneksion sa satong pagsamba iyo an la·treiʹa, na trinadusir na “sagradong paglilingkod” sa New World Translation. An sagradong paglilingkod may koneksion sa mga gibo nin pagsamba. Halimbawa, an 84 anyos na balo asin propetisang si Ana sinasabing “dai noarin man nagpapalta sa templo, na nagtatao nin sagradong paglilingkod [sarong termino sa Griego na konektado sa la·treiʹa] banggi-aldaw na may mga pag-ayuno asin pagngayongayo.” (Lucas 2:36, 37) Si Ana danay na nagsamba ki Jehova. Sia marahay na halimbawa para sa sato gabos—hoben asin gurang, lalaki asin babae. Kun paanong si Ana namibi nin maigot ki Jehova asin regular na nagsamba sa saiya sa templo, kaiba man sa satong sagradong paglilingkod an pamimibi asin pag-atender sa mga pagtiripon.—Roma 12:12; Hebreo 10:24, 25.
12. Ano an mayor na kabtang kan satong sagradong paglilingkod, asin paano man ini sarong paglilingkod sa publiko?
12 Nasambitan ni apostol Pablo an sarong mayor na kabtang kan satong sagradong paglilingkod kan sia sumurat: “An Dios, na sakuyang tinatawan nin sagradong paglilingkod sa sakong espiritu may koneksion sa maogmang bareta manongod sa saiyang Aki, iyo an saksi ko kun paanong mayo nin ontok pirme ko kamong nasasambitan sa sakong mga pamibi.” (Roma 1:9) Iyo, an paghuhulit kan maogmang bareta bako sanang paglilingkod sa publiko sa mga nagdadangog kaiyan kundi saro man na gibo nin pagsamba ki Jehova Dios. Baga man kita dangogon o dai, an gibong paghuhulit sagradong paglilingkod na itinatao ki Jehova. An paghihingoa niato na sabihan an iba manongod sa mararahay na kualidad asin maboot na mga katuyohan kan satong namomotan na marhay na langitnon na Ama tunay na nagtatao sa sato nin dakulang kagayagayahan.—Salmo 71:23.
Saen Kita Nagtatao nin Sagradong Paglilingkod?
13. Ano an paglaom kan mga nagtatao nin sagradong paglilingkod sa patyong nasa laog kan espirituwal na templo ni Jehova, asin sairisay an nakikigayagaya sa sainda?
13 Sa linahidan na mga Kristiano, nagsurat si Pablo: “Mantang kita mag-aako nin kahadean na dai matatanyog, padagos kitang magkaigwa nin dai na kutana maninigong kabootan, na paagi kaiyan kita makatatao sa Dios nin sagradong paglilingkod sa paaging maaako na may diosnon na takot asin paghanga.” (Hebreo 12:28) May kompiadong paglaom na magmana kan Kahadean, an mga linahidan dai natatanyog an pagtubod mantang sinasamba ninda an Kaharohalangkawe. Sinda sana an makatatao sa saiya nin sagradong paglilingkod sa kuartong Banal asin sa patyong nasa laog kan espirituwal na templo ni Jehova, asin hinahalat ninda na may galagang pag-antisipar an maglingkod kaiba ni Jesus sa Kabanalbanale, sa langit mismo. An kairiba ninda, an grupong ibang karnero, nakikigayagaya sa sainda sa saindang makangangalas na paglaom.—Hebreo 6:19, 20; 10:19-22.
14. Paano an dakulang kadaklan nakikinabang sa paglilingkod sa publiko ni Jesus?
14 Pero, kumusta man an ibang karnero? Arog kan naheling antes pa ni apostol Juan, an sarong dakulang kadaklan ninda naglataw sa huring mga aldaw na ini, asin “hinugasan ninda an saindang mga gubing asin pinaputi iyan sa dugo kan Kordero.” (Kapahayagan 7:14) Ini nangangahulogan na, arog kan saindang linahidan na mga kapwa nagsasamba, sinda nagtutubod sa paglilingkod sa publiko ni Jesus, an pagdolot nia kan saiyang sangkap na buhay bilang tawo para sa katawohan. An ibang karnero nakikinabang man sa paglilingkod sa publiko ni Jesus ta sinda ‘nangangapot sa tipan ni Jehova.’ (Isaias 56:6) Bako, sinda bakong partisipante sa bagong tipan, alagad nangangapot sinda dian ta kinukuyog ninda an mga ley na konektado dian asin nagkokooperar sa mga areglong ginibo paagi dian. Nakikiasosyar sinda sa Israel nin Dios, na nagkakakan sa iyo man sanang espirituwal na lamesa asin nakikipagtabangan sa mga miembro kaiyan, na inoomaw an Dios sa publiko asin nagdodolot nin espirituwal na mga atang na nakapaoogma sa saiya.—Hebreo 13:15.
15. Saen nagtatao nin sagradong paglilingkod an dakulang kadaklan, asin paano sinda naaapektaran kan bendisyon na ini?
15 Sa siring, naheheling an dakulang kadaklan na “nagtitindog sa atubangan kan trono asin sa atubangan kan Kordero, na nagugubingan nin maputing mga gubing.” Dugang pa, “sinda yaon sa atubangan kan trono nin Dios; asin sinda nagtatao sa saiya nin sagradong paglilingkod aldaw asin banggi sa saiyang templo; asin an Saro na nakatukaw sa trono mabiklad kan saiyang tolda sa sainda.” (Kapahayagan 7:9, 15) Sa Israel, an mga proselito nagsamba sa patyong nasa luwas kan templo ni Salomon. Sa kaagid na paagi, an dakulang kadaklan nagsasamba ki Jehova sa patyong nasa luwas kan saiyang espirituwal na templo. An paglilingkod duman nagpapangyari na sinda maggayagaya. (Salmo 122:1) Dawa pagkatapos na akoon kan ultimo sa saindang linahidan na kairiba an saiyang langitnon na mana, sinda magpapadagos na tumao nin sagradong paglilingkod ki Jehova bilang saiyang banwaan.—Kapahayagan 21:3.
Sagradong Paglilingkod na Dai Maaako
16. Anong mga patanid an itinatao mapadapit sa sagradong paglilingkod?
16 Kan kaaldawan kan suanoy na Israel, an sagradong paglilingkod kaipuhan na itao kaoyon kan mga ley ni Jehova. (Exodo 30:9; Levitico 10:1, 2) Siring man ngonyan, may mga kahagadan na dapat na otobon tangani na akoon ni Jehova an satong sagradong paglilingkod. Kaya ngani nagsurat si Pablo sa mga taga Colosas: “Kami . . . dai nag-ontok sa pagpamibi para sa saindo asin sa paghagad na kamo mapano kan tamang kaaraman sa saiyang kabotan sa bilog na kadonongan asin espirituwal na pakatalastas, tanganing maglakaw na angay ki Jehova sa katuyohan na lubos na makapaogma sa saiya mantang kamo padagos na namumunga sa lambang marahay na gibo asin nag-ooswag sa tamang kaaraman dapit sa Dios.” (Colosas 1:9, 10) Mayo sa sato an pagdeterminar kan tamang paagi nin pagsamba sa Dios. Mahalagang marhay an tamang kaaraman sa Kasuratan, espirituwal na pakatalastas, asin diosnon na kadonongan. Ta kun dai, puedeng mapasalang marhay an mga bagay.
17. (a) Paano pinaraot an sagradong paglilingkod kan kaaldawan ni Moises? (b) Paano puedeng mapasala an sagradong paglilingkod ngonyan?
17 Girumdoma an mga Israelita kan kaaldawan ni Moises. Mababasa niato: “An Dios nagtalikod asin pinabayaan sindang magtao nin sagradong paglilingkod sa hukbo nin langit.” (Gibo 7:42) Naheling kan mga Israelitang idto an makapangyarihan na mga gibo ni Jehova para sa sainda. Pero, nagdolok sinda sa ibang dios kan hinona ninda na ini sa bentaha ninda. Sinda bakong maimbod, asin an kaimbodan kaipuhan tangani na ikaogma nin Dios an satong sagradong paglilingkod. (Salmo 18:25) Totoo, pira sana ngonyan an matalikod ki Jehova tanganing sumamba sa mga bitoon o mga bulawan na ogbon na baka, alagad may iba pang mga porma nin idolatriya. Si Jesus nagpatanid tumang sa paglilingkod sa “Kayamanan,” asin inapod ni Pablo na idolatriya an kaaraan. (Mateo 6:24; Colosas 3:5) Si Satanas ilinalangkaw an sadiri bilang sarong dios. (2 Corinto 4:4) An siring na mga klase nin idolatriya lakop asin sarong siod. Halimbawa, isip-isipa an saro na naghihingakong nagsusunod ki Jesus alagad an tunay na pasohan sa buhay yumaman o an tunay na pinagtitiwalaan iyo an sadiri asin an sadiri niang mga ideya. Siisay an talagang pinaglilingkodan nia? Gurano an pagkakalaen nia sa mga Judio kan kaaldawan ni Isaias na nanumpa sa ngaran ni Jehova alagad sa marompot na mga idolo itinao an kredito kan saiyang dakulang mga gibo?—Isaias 48:1, 5.
18. Paano an sagradong paglilingkod ginibo nin sala kan nakaagi asin ngonyan?
18 Nagpatanid man si Jesus: “Maabot an oras na an lambang gumadan sa saindo maghohona na nakagibo sia nin sagradong paglilingkod sa Dios.” (Juan 16:2) Si Saulo, na nagin si apostol Pablo, daing duwa-duwa na naghona na sia naglilingkod sa Dios kan sia ‘umoyon sa paggadan ki Esteban’ asin ‘magtaram nin huma asin paggadan tumang sa mga disipulo kan Kagurangnan.’ (Gibo 8:1; 9:1) Ngonyan, an nagkapirang naggigibo nin paglinig etniko asin pagpara sa bilog na rasa naghihingako man na nagsasamba sa Dios. Dakol na tawo an naghihingakong nagsasamba sa Dios, alagad an pagsamba ninda sa katotoohan sa mga dios nin nasyonalismo, tribalismo, kayamanan, sadiri, o iba pang dios.
19. (a) Ano an punto de vista niato sa satong sagradong paglilingkod? (b) Anong klaseng sagradong paglilingkod an magtatao sa sato nin kagayagayahan?
19 Sinabi ni Jesus: “Si Jehova na saimong Dios an dapat mong sambahon, asin sa saiya ka sana dapat na magtao nin sagradong paglilingkod.” (Mateo 4:10) An kaolay nia si Satanas, alagad abaa kahalagang marhay na kita gabos maghimate sa saiyang mga tataramon! An pagtao nin sagradong paglilingkod sa Soberanong Kagurangnan kan uniberso sarong may dignidad, makangingirhat na pribilehio. Asin ano an masasabi manongod sa paggibo nin paglilingkod sa publiko na konektado sa satong pagsamba? An paggibo kaini para sa satong kapwa magayagayang trabaho na nagbubunga nin dakulang kaogmahan. (Salmo 41:1, 2; 59:16) Pero, an siring na paglilingkod nagbubunga sana nin tunay na kaogmahan kun iyan itinatao nin bilog na puso asin sa tamang paagi. Siisay talaga an nagsasamba nin tama sa Dios? Kiisay na sagradong paglilingkod an inaako ni Jehova? Masisimbag niato an siring na mga hapot kun eestudyaran niato an ikatolong termino sa Biblia na may koneksion sa satong pagsamba. Gigibohon niato ini sa masunod na artikulo.
[Mga Nota sa Ibaba]
^ par. 4 An mga liturhiya nin Kakristianohan sa pankagabsan magsalang mga seremonya sa pagsamba o espesipikong mga ritual, arog baga kan Eukaristia sa Iglesia Katolika Romana.
^ par. 10 Sa Gibo 13:2, sinasabi na an mga propeta asin paratokdo sa Antioquia “hayag na naglilingkod” (sa pagtradusir sa sarong termino sa Griego na konektado sa lei·tour·giʹa) ki Jehova. Posibleng marhay, kaiba sa hayag na paglilingkod na ini an paghuhulit sa publiko.
Ano an Isisimbag Nindo?
• Anong dakulang paglilingkod sa publiko an ginibo ni Jesus?
• Anong paglilingkod sa publiko an ginigibo nin mga Kristiano?
• Ano an Kristianong sagradong paglilingkod, asin saen iyan ginigibo?
• Dapat na magkaigwa kita nin ano tangani na makapaogma sa Dios an satong sagradong paglilingkod?
[Mga Hapot Para sa Pag-adal]
[Ritrato sa pahina 10]
An mga magurang nakakaeksperyensia nin dakulang kagayagayahan sa pagtao
[Mga Ritrato sa pahina 12, 13]
An mga Kristiano nagtatao nin paglilingkod sa publiko kun tinatabangan ninda an iba asin kun ibinabalangibog ninda an maogmang bareta
[Ritrato sa pahina 14]
Kaipuhan niato an tamang kaaraman asin pakasabot tangani na makasierto na an satong sagradong paglilingkod inaako nin Dios