Kita an Klase na May Pagtubod

Paghuhulit kan Kahadean sa Altiplano sa Peru

SA PAG-OLTANAN kan sirangan asin solnopan na parte kan Kabukidan nin Andes—kun saen an Bolivia asin Peru minatagboan—yaon an Altiplano. An ngaran kaiyan nangangahulogan nin “halangkaw na kaplanodohan,” o “buklod.” An kadaklan na parte kaiyan yaon sa Bolivia.

An Altiplano 100 kilometros an lakbang asin labing 1,000 kilometros an laba, asin an promedyong langkaw kaiyan mga 3,700 metros poon sa kapatagan kan dagat. Kun maeroplano paduman hale sa kabiserang siudad na nasa baybayon nin Peru, an Lima, maagi kamo sa natatahoban nin niebeng El Misti, sarong bulkan na minasukdo sa panganoron sa langkaw na 5,822 metros. Maheheling sa harayo an natatahoban nin niebeng mga alitoktok kan Nevado Ampato asin Nevado Coropuna na labing 6,000 metros kaharalangkaw. Biglang matampad sa pagheling an mahiwason na buklod—an Altiplano na yaon sa timog kan Peru.

An kabisera kan Altiplano sa Peru iyo an Puno, na yaon sa amihanan-solnopan na poro kan Danaw nin Titicaca, an pinakahalangkaw na danaw sa kinaban na nananabigar. Huling an rehion labing tolong kilometro an langkaw, mangangaipo nin kadikit na panahon an mga bisita na makaadaptar sa aireng kulang sa oksiheno. Nag-iistar sa gilid kan Danaw nin Titicaca an mga Indian na Quechua asin Aymara. Nakasulot nin magagayon na pula, berde, o asul na gubing, maheheling sinda na nagtatrabaho sa saindang mga chacras, o sadit na mga oma. Minsan ngani Kastila an pangenot na lenguahe kan Peru, ginagamit man an Quechua asin Aymara sa Altiplano.

Pangengenot sa Paghuhulit

Dakol sa mapakumbaba, mahigos na mga tawo na nagtataram nin Quechua asin Aymara an kasuarin pa sana nagkaigwa nin tamang kaaraman sa katotoohan sa Biblia. Ini sa kadaklan huli sa nagsosopay na bendisyon ni Jehova sa maigot na mga paghihingoa kan bilog na panahon na mga parabalangibog kan Kahadean na naglilingkod bilang mga espesyal payunir.

Halimbawa, an mga espesyal payunir na si Jose asin Silvia iinasignar sa banwaan nin Putina, mga 50 kilometros hale sa Danaw nin Titicaca. Sa laog nin duwang bulan, si Silvia nagkokondukta na nin 16 na pag-adal sa Biblia, asin si Jose, 14. Sa laog sana nin anom na bulan, an kabilangan nin mga parahayag sa kongregasyon duminakol poon sa 23 nagin 41. Mientras tanto, an nag-aatender sa mga pagtiripon luminangkaw poon sa 48 sagkod sa pinakahalangkaw na kabilangan na 132.

“Kun minapoon nin mga pagtiripon kan kongregasyon sa puerang mga komunidad na ini,” an sabi ni Jose, “naheling mi na praktikal na ponan iyan sa Pampublikong Pagtiripon dangan sa Pag-adal sa Libro kan Kongregasyon. Pinagigin pasil kaiyan para sa mga bagohan na interesado na magpoon sa pag-atender sa mga pagtiripon.”

Duwang magtugang na babae—an saro payunir—an enot na nagdara kan maogmang bareta sa puerang komunidad nin Muñani, mga 20 kilometros hale sa Putina. Naponan ninda duman an pag-adal sa Biblia sa sarong butang lalaki na an ngaran Lucio. * Inimbitaran nia an saiyang tugang na si Miguel, sarong Katolikong misyonerong lego asin lider sa komunidad na taga kaharaning lugar. Kan hapoton si Miguel kan sarong katood kun taano ta serosemana siang nagduduman sa Muñani, sia nagsimbag na tanganing makanood manongod ki Jehova asin sa saiyang Tataramon. Dangan buminangon an hapot: “Taano ta dai kita mag-adal nin Biblia digdi?” Huli sa interes na ipinaheling kan mga tawo sa komunidad ni Miguel, tolos na iinareglo kan mga Saksi na magkaigwa nin pagtiripon duman.

Pinonan ni Miguel na ihiras sa iba an saiyang nanonodan. Alagad kumusta man an saiyang posisyon bilang sarong Katolikong misyonerong lego asin tenyente gobernador? Sa sarong miting sa tiriponan kan komunidad, iinanunsiar nia an saiyang pagdemitir bilang Katolikong misyonero. Kaipuhan daw na magnombra nin iba? An saro sa mga nagdadangog nagsabi: “Taano ta mangangaipo kita nin saro pang misyonero mantang nanonodan ta na an katotoohan?” Siempre, iyan minapanongod sa mga bagay na itinotokdo kan Mga Saksi  ni Jehova. Dugang pa nin saro: “Dai kami minaoyon na ika sana an magdemitir. Taano ta dai kita gabos magdemitir?” Dangan an gabos na nag-atender nagkururahaw nin sarabay: “Gabos kita magdemitir!”

Dai nahaloy pakatapos kaiyan pinag-olayan sa miting kan komunidad an manongod sa mga idolo asin krusipiho. Suminabi an sarong lalaki na an gabos na presente basahon an Deuteronomio 7:25, na nagsasabi: “An kinortehan na imahen kan saindang mga dios maninigo nindong soloon sa kalayo. Dai mo mawoton an pirak asin an bulawan kaiyan, ni kuanon man iyan para sa saimo man sana, ta tibaad ika masiod kaiyan; huli ta iyan bagay na makauuyam nin makuri ki Jehova na saimong Dios.”

Dangan sinabi kan lalaki na iitaas an kamot kan mga minaoyon na soloon an gabos na idolo. Tolos-tolos na uminitaas an gabos na kamot. (Gibo 19:19, 20) Ngonyan 23 kan 25 pamilya sa komunidad an nag-aadal kan Tataramon nin Dios. Duwa na an naglilingkod bilang dai pa bautisadong parahayag, asin limang mag-agom an nagpaplano nang legalisaron an saindang pag-agoman tanganing magkaigwa nin malinig na kamugtakan sa atubangan ni Jehova.—Tito 3:1; Hebreo 13:4.

Pagtotokdo na Ginagamit an mga Rekording sa Cassette

Huli ta dakol an dai tataong bumasa asin sumurat sa Altiplano, nakatabang na marhay an mga video asin rekording sa cassette kan Watch Tower sa lokal na mga lenguahe—dawa sa pagkondukta nin mga pag-adal sa Biblia. Sa tabang nin audio cassette, an sarong espesyal payunir na an ngaran Dora nagkokondukta nin mga pag-adal sa brosyur na Ano an Kahagadan sa Sato nin Dios? Ipinapadangog nin saro-saro an kada parapo, hinahapot nia an inaadalan sa Biblia dapit sa materyal na nadangog pa sana.

An sarong lokal na estasyon nin radyo regular na ibinobrodkast an mga kabtang kan brosyur na Kahagadan sa lenguaheng Quechua. Iyan man an ginigibo sa mga kabtang kan magasin na Awake! sa Kastila. Huli kaini, dakol na tawo an nakarerekonoser kan mensahe kan Kahadean asin gustong makanood nin orog pa kun an mga Saksi ni Jehova minasongko sa saindang harong.

Sa pankagabsan an Altiplano dai naririsa kan kinaban alagad bako sa pagheling nin Dios. Huli sa pagkamoot ni Jehova sa katawohan, dakol na tawo na nag-iistar sa halangkaw na lugar kan Altiplano sa Andes an napapabilang sa kaburonyogan na nagpapamuraway sa saiyang mamuraway na harong nin tunay na pagsamba.—Haggeo 2:7.

[Nota sa Ibaba]