Paglingkodan an Dios na May Espiritu nin Pagigin Gikan sa Boot

“AKO maogmang gayo na maggagamit kan sakong sadiri asin lubos na mapagamit para sa saindong kalag,” an isinurat ni apostol Pablo. (2 Corinto 12:15) Ano an sinasabi sa saindo kan mga tataramon na ini manongod sa punto de vista asin aktitud na maninigong hingoahon na kultibaron kan mga lingkod ni Jehova? Segun sa sarong intelektuwal sa Biblia, kan isurat ni Pablo an mga tataramon na iyan sa mga Kristiano sa Corinto, sia nagsasabi: “Andam ako na gamiton an sakong kosog, asin panahon, asin buhay, patin gabos na yaon sa sako para sa ikararahay nindo, siring sa masinggayang ginigibo nin sarong ama para sa saiyang mga aki.” Si Pablo andam na ‘lubos na magpagamit,’ o “mapagal na marhay asin maubos an kosog,” kun iyan an kaipuhan tanganing otobon an saiyang Kristianong ministeryo.

Dugang pa, an gabos na ini ginibo ni Pablo na “maogmang gayo.” Sia “lubos na andam” na gibohon iyan, an sabi kan The Jerusalem Bible. Kumusta man kamo? Andam daw kamo na gamiton an saindong panahon, kosog, mga talento, asin mga rekurso sa paglilingkod ki Jehova Dios asin sa kapakanan nin iba, dawa kun an paggibo kaiyan nangangahulogan nin ‘pagkapagal na marhay asin pagkaubos nin kosog’ kun beses? Asin gigibohon daw nindo ini na “maogmang gayo”?

Habo Talaga Nindang Maglingkod

An kadaklan na indibiduwal dai sana nagduduwaduwa na maglingkod sa Dios kundi daing kadudaduda na habong gibohon iyan. An saindang espiritu may pagkaingrato, maimot na pagkaindependiente, may pagrebelde pa ngani. Tinentaran ni Satanas si Adan asin Eva na mag-isip nin arog kaiyan. Sala na sinabi nia na sinda magigin “arog nin Dios, na nakamimidbid kan marahay asin maraot”—na kayang magdesisyon sa sainda man sana kun ano an tama asin kun ano an sala. (Genesis 3:1-5) Iniisip kan mga igwa nin kaparehong espiritu ngonyan na maninigo sindang magkaigwa nin lubos na katalingkasan na gibohon an talagang mawot ninda na mayo nin ano man na obligasyon sa Dios o pakikilabot nia. (Salmo 81:11, 12) Gusto nindang gamiton an gabos na yaon sa sainda sa pag-aaabot kan saindang sadiring personal na kapakanan.—Talinhaga 18:1.

Bako man gayod kamong kapareho kan sobra man na marhay na punto de vistang ini. Posibleng marhay na tunay an pagpahalaga nindo sa balaog na buhay na yaon sa saindo ngonyan asin sa orog pa nganing makangangalas na oportunidad na mabuhay sagkod lamang sa sarong paraisong daga. (Salmo 37:10, 11; Kapahayagan 21:1-4) Tibaad odok kamong nagpapasalamat ki Jehova huli sa saiyang karahayan sa saindo. Alagad kita gabos kaipuhan na magin listo sa peligro na kayang raoton ni Satanas an satong kaisipan sa paagi na an satong paglilingkod tibaad sa aktuwal magin dai inaako nin Dios. (2 Corinto 11:3) Paano ini puedeng mangyari?

Kaipuhan an Gikan sa Boot na Paglilingkod

Gusto ni Jehova nin gikan sa boot, bilog na pusong paglilingkod. Nungka nia kitang pinipirit na gibohon an saiyang kabotan. Si Satanas an magibo nin gabos na medyos tanganing impluwensiahan o sugotan an mga tawo na gibohon an saiyang kabotan. May koneksion sa paglilingkod sa Dios, an Biblia talagang  may sinasabing obligasyon, mga togon, kahagadan, asin iba pa. (Eclesiastes 12:13; Lucas 1:6) Pero, an satong pangenot na motibo sa paglilingkod sa Dios iyo na namomotan ta sia.—Exodo 35:21; Deuteronomio 11:1

Gurano man an pagkagamit ni Pablo kan saiyang sadiri sa paglilingkod sa Dios, aram nia na mayo nanggad ini nin halaga ‘kun mayo sia nin pagkamoot.’ (1 Corinto 13:1-3) Kun an mga kagsurat sa Biblia inaapod an mga Kristiano na mga oripon nin Dios, an boot nindang sabihon bako an kaherakherak na kaoripnan basado sa pamimirit. (Roma 12:11; Colosas 3:24) An boot sabihon iyo an gikan sa boot na pagpasakop basado sa hararom, odok sa pusong pagkamoot sa Dios asin sa saiyang Aki, si Jesu-Cristo.—Mateo 22:37; 2 Corinto 5:14; 1 Juan 4:10, 11.

An satong paglilingkod sa Dios dapat na magpabanaag man nin hararom na pagkamoot sa mga tawo. “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki,” an isinurat ni Pablo sa kongregasyon sa Tesalonica. (1 Tesalonica 2:7) Sa dakol na kadagaan ngonyan, an mga ina igwa nin legal na obligasyon na atamanon an saindang mga aki. Alagad segurado na dai ini ginigibo nin kadaklan na ina tangani sanang kuyogon an ley, bako daw? Dai. Ginigibo ninda iyan huli ta mahal ninda an saindang mga aki. Tara, an sarong nagpapasusong ina maogmang naggigibo nin dakulaon na mga pagsasakripisyo para sa saiyang mga aki! Huling si Pablo igwa nin kaparehong “mamomoton na kapadangatan” para sa mga pinaglilingkodan nia, sia “naogmang gayo” (“gikan sa boot,” King James Version; “naogmang marhay,” New International Version) na gamiton an saiya mismong buhay sa pagtabang sa sainda. (1 Tesalonica 2:8) An pagkamoot an nagmomotibar sa sato na arogon an halimbawa ni Pablo.—Mateo 22:39.

Kumusta Man an Paglilingkod na Magabat an Boot?

Siempre, dai niato dapat na togotan an pagkamoot sa sadiri na magin mas mahalaga kisa pagkamoot sa Dios asin sa mga tawo. Ta kun siring, igwa nin totoong peligro na an ikatatao ta sana iyo an paramas sana, magabat sa boot na paglilingkod. Puede pa ngani kitang magpoon na magkaigwa nin paghinanakit, na nagkokolog an boot na dai kita makapamuhay nin lubos sono sa satong sadiring mga mawot. Nagin totoo ini sa nagkapirang Israelita na nawaran kan saindang pagkamoot sa Dios alagad naglilingkod pa man giraray sa saiya huli sa pakamate nin obligasyon. Ano an resulta? An paglilingkod sa Dios nagin ‘nakapapagal’ para sa sainda.—Malaquias 1:13.

An ano man na idinodolot sa Dios maninigo na pirmeng “daing kaninan,” daing depekto, an “pinakaprimera” na makukua. (Levitico 22:17-20; Exodo 23:19) Minsan siring, imbes na itao ki Jehova an pinakaprimera kan saindang mga hayop an mga tawo kan kaaldawan ni Malaquias nagpoon na magdolot kan talagang habo ngani ninda mismo. Ano an reaksion ni Jehova? Sinabihan nia an mga saserdote: “Kun kamo nagdodolot nin hayop na buta na iaatang [kamo nagsasabi]: ‘Bako iyan na maraot.’ Asin kun kamo nagdodolot nin hayop na pilay o may helang: ‘Bako iyan na maraot.’ Irani mo, tabi, iyan sa saimong gobernador. Maoogma daw sia sa saimo, o aakoon ka daw nia na may kabootan? . . . Asin nagdara kamo nin bagay na inagaw, asin kan pilay, asin kan may helang; iyo, dinara nindo iyan bilang balaog. Ikaoogma ko daw iyan sa saindong kamot?”—Malaquias 1:8, 13.

Paano ini puedeng mangyari sa siisay man sa sato? An satong mga pagsasakripisyo puedeng magin “nakapapagal” para sa sato kun mayo kita nin totoong gikan sa boot na puso asin espiritu. (Exodo 35:5, 21, 22; Levitico 1:3; Salmo 54:6; Hebreo 13:15, 16) Halimbawa, inaako daw ni Jehova an mga tada-tada kan satong panahon?

Puede daw na odok na pakaisipon nin siisay man na maaako kutana nin Dios kun an sarong miembro nin pamilya na marahay an intension o an sarong maigot na Levita maski paano pinirit an sarong magabat an boot na Israelita na pilion an saiyang pinakaprimerang hayop tanganing iatang mantang habo man talaga niang idolot iyan? (Isaias 29:13; Mateo 15:7, 8) Hinaboan ni Jehova an siring na mga atang asin sa kahurihurihi an mga tawo na nagdodolot kaiyan.—Oseas 4:6; Mateo 21:43.

Dakulang Kaogmahan sa Paggibo kan Kabotan nin Dios

Tanganing makatao nin paglilingkod sa Dios na saiyang aakoon, dapat tang sunodon an halimbawa ni Jesu-Cristo. “Pinagmamaigotan kong maotob, bakong an sadiri kong kabotan,” sabi nia, “kundi an kabotan nia na nagsugo sa sako.” (Juan 5:30) Nakanompong si Jesus nin dakulang kaogmahan sa paglilingkod sa Dios nin gikan sa boot. Inotob ni Jesus an makahulang mga tataramon ni David: “An paggibo kan boot mo, O Dios ko, iyo an naoogmahan ko.”—Salmo 40:8.

Minsan ngani ikinaogmang marhay ni Jesus an paggibo kan kabotan ni Jehova, bako ining pirmeng pasil. Horophoropa an nangyari bago sia  inarestar, binista, asin ginadan. Mantang nasa tatamnan nin Getsemani, si Jesus “mamondong gayo” asin “nasa labi-labing kasakitan.” Makosogon an sakit sa emosyon kaya, mantang sia namimibi, “an saiyang ganot nagin siring sa mga toro nin dugo na nagdadalahay sagkod sa daga.”—Mateo 26:38; Lucas 22:44.

Taano ta nakamate si Jesus kan labi-labing kasakitan na iyan? Tunay nanggad na bakong huli sa sadiring interes o ano man na pagduwaduwang gibohon an kabotan nin Dios. Sia andam na magadan, na makosog pa ngani an nagin reaksion sa sinabi ni Pedro: “Maherak ka sa saimong sadiri, Kagurangnan; dai ini mangyayari sa saimo.” (Mateo 16:21-23) An iniisip ni Jesus iyo an magigin epekto ki Jehova asin sa Saiyang banal na ngaran kan saiyang kagadanan bilang dinuduhaging kriminal. Aram ni Jesus na magigin makolog na marhay sa boot kan saiyang Ama na maheling an saiyang namomotan na marhay na Aki na tinatratar sa barbarong paagi.

Nasabotan man ni Jesus na sia nagdadangadang sa sarong importanteng marhay na panahon sa paghaman kan katuyohan ni Jehova. An fiel na pagsuportar sa mga ley nin Dios magpapatunay nin daing kadudaduda na si Adan puede man kutanang nakapagdesisyon nin siring. Ihahayag kan pagigin fiel ni Jesus na biyong falso an sinabi ni Satanas na an mga tawong binabalo dai gikan sa boot asin fiel na maglilingkod sa Dios. Paagi ki Jesus, sa katapustapusi roronoton ni Jehova si Satanas asin hahaleon an mga epekto kan saiyang pagrebelde.—Genesis 3:15.

Kanigoan kadakulang paninimbagan an nasa abaga ni Jesus! An ngaran kan saiyang Ama, an katoninongan nin uniberso, asin an kaligtasan kan pamilya nin tawo gabos nakadepende sa pagigin fiel ni Jesus. Narerealisar ini, sia namibi: “Ama ko, kun mapupuede, togoti na an kopang ini lumihis sa sako. Minsan siring, bakong an boot ko, kundi an boot mo.” (Mateo 26:39) Dawa nasa pinakagrabeng sakit, si Jesus nungkang nag-urong-sulong sa saiyang pagigin andam na magpasakop sa kabotan kan saiyang Ama.

“An Espiritu Nagmamawot na Gayo, Alagad an Laman Maluya”

Kun paanong si Jesus nakamate nin grabeng sakit sa emosyon mantang sia naglilingkod ki Jehova, malalaoman ta na gigipiton kita ni Satanas bilang mga lingkod nin Dios. (Juan 15:20; 1 Pedro 5:8) Dugang pa, kita bakong sangkap. Kaya dawa kita andam na maglingkod sa Dios, bakong pasil para sa sato na gibohon iyan. Naheling ni Jesus kun paano nasakitan an saiyang mga apostol na gibohon an gabos na ipinagigibo nia sa sainda. Iyan an dahelan na sia nagsabi: “Siempre, an espiritu nagmamawot na gayo, alagad an laman maluya.” (Mateo 26:41) Mayo nin kanaturalan nang kaluyahan sa saiyang sangkap na laman bilang tawo. Minsan siring, nasa isip nia an kaluyahan kan laman kan saiyang mga disipulo, an pagkabakong sangkap na minana ninda sa bakong sangkap na si Adan. Aram ni Jesus na huli sa minanang pagkabakong sangkap asin ibinungang mga limitasyon nin tawo, makikipagtusayan sinda na gibohon an gabos na mawot ninda sa paglilingkod ki Jehova.

Kaya, kun siring, tibaad makamate kita nin arog ki apostol Pablo, na napurisaw na gayo kan pinopogolan nin pagkabakong sangkap an saiyang kakayahan na lubos na paglingkodan an Dios. “An kakayahan na magmawot nasa sako,” an isinurat ni Pablo, “alagad an kakayahan na gumibo kan marahay mayo.” (Roma 7:18) Naeeksperyensiahan ta man na dai niato nakakayang gibohon nin lubos an gabos na marahay na bagay na boot niatong gibohon. (Roma 7:19) Bako ining huli sa ano man na pagduwaduwa sa kabtang niato. Iyan huli nanggad ta an kaluyahan kan laman inoolang dawa an satong pinakamarahay na mga paghihingoa.

Dai kita madesesperar. Kun igwa kita nin odok sa pusong pagigin andam na gibohon an bilog niatong makakaya, seguradong aakoon nin Dios an satong paglilingkod. (2 Corinto 8:12) Logod na ‘gibohon ta an satong bilog na makakaya’ na arogon an espiritu ni Cristo na lubos na pagpasakop sa kabotan nin Dios. (2 Timoteo 2:15; Filipos 2:5-7; 1 Pedro 4:1, 2) Babalosan asin susuportaran ni Jehova an siring na espiritu nin pagigin gikan sa boot. Itatao nia sa sato “an kosog na lihis sa ordinaryo” tanganing hipnoan an satong mga kaluyahan. (2 Corinto 4:7-10) Sa tabang ni Jehova, arog ki Pablo, ‘maogmang gayo na gagamiton ta an satong sadiri asin lubos na mapagamit’ sa mahalagang marhay na paglilingkod sa Saiya.

[Ritrato sa pahina 21]

Gikan sa boot na naglingkod si Pablo sa Dios sagkod sa saiyang pinakamakakaya

[Ritrato sa pahina 23]

Dawa nasa pinakagrabeng sakit, ginibo ni Jesus an kabotan kan saiyang Ama