An Biblia—Pinahalagahan na Marhay Asin Inolang

“Mawot ko na an sagradong mga libro ikatradusir sa gabos na lenguahe,” an isinurat ni Desiderio Erasmo, sarong rekonosidong intelektuwal na Holandes kan ika-16 na siglo.

AN GUSTONG-GUSTONG linalaoman ni Erasmo iyo na an gabos makabasa asin makasabot kan Kasuratan. Minsan siring, an mga kalaban kan Biblia maringis na hinaboan an siring na ideya. Sa katunayan, an Europa kan panahon na idto sarong labi-labi kapeligrosong lugar para sa siisay man na dawa kakadikit an interes dapit sa laog kan Biblia. Sa Inglaterra may sarong reglamento nin parlamento na ginibong ley, na nagboot na “an siisay man na magbasa kan Kasuratan sa Ingles maninigong halean nin daga, mga rogaring, mga gamit, asin buhay . . . asin na, kun sinda magpadagos na matagas, o mag-otro pagkatapos na mapatawad, sinda maninigo ngunang bitayon huli sa pagtraydor tumang sa hade, dangan soloon huli sa erehiya tumang sa Dios.”

Sa kontinente nin Europa, an Inkisisyon Katoliko daing herak na hinanap an “ereheng” mga sekta, arog kan Waldenses nin Pransia, asin pinili an mga iyan tanganing lamagon huli sa saindang ugale na paghuhulit “basado sa mga ebanghelyo asin surat kan mga apostol patin iba pang sagradong kasuratan, . . . huling an paghuhulit asin pagpaliwanag kan banal na kasuratan ibinabawal nin biyo sa mga lego.” Dai mabilang na mga lalaki asin babae an nag-agi nin makologon na pasakit asin kagadanan dahel sa pagkamoot ninda sa Biblia. Inatubang ninda an peligro nin pinakamasakit na mga penalidad huli sana sa pagpamibi kan Pamibi  kan Kagurangnan o pagsambit kan Sampulong Togon saka pagtokdo kaiyan sa mga aki ninda.

An siring na debosyon sa Tataramon nin Dios nagdanay sa puso nin dakol na kolonisador na naglayag tanganing sakopon an Amerika del Norte. Sa enot na peryodo nin Amerika, “an pagbasa asin relihion magkakonektar na marhay, na nagin sarong kultura na basado sana sa pagigin pamilyar sa Biblia,” an sabi kan librong A History of Private Life—Passions of the Renaissance. Sa katunayan, an sarong sermon na ipinublikar sa Boston kan 1767 nagrekomendar: “Magin mahigos sa pagbasa kan banal na kasuratan. Aga-aga asin barobanggi dapat kamong magbasa nin sarong kapitulo kan saindong Biblia.”

Segun sa Barna Research Group sa Ventura, California, labi sa 90 porsiento kan mga Amerikano an igwa nin promedyong tolong Biblia. Pero an sarong dai pa sana nahahaloy na pagsiyasat nagpapaheling na minsan ngani dakula pa man giraray an pagpahalaga sa Biblia duman, “an pagtao nin panahon na basahon iyan, pag-adalan iyan asin iaplikar iyan . . . lihis na sa panahon.” An kadaklan hababaw sana an aram sa laog kaiyan. An sarong kolumnista sa peryodiko nagkomento: “Bihira na an nag-iisip na [an Biblia] puedeng kaipuhan pa man giraray na marhay sa mga problema asin kahaditan sa presente.”

An Pagbaha nin Sekular na Kaisipan

An sarong popular na paniniwala iyo na puede tang mapakarhay an satong buhay paagi sana sa pangangatanosan asin kooperasyon nin tawo. An Biblia ibinibilang na saro sana sa dakol na libro manongod sa relihiosong mga opinyon asin personal na mga eksperyensia, bakong libro nin aktuwal na mga pangyayari asin katotoohan.

Kaya paano inaatubang nin kadaklan na tawo an paorog nang paorog na nagigin depisil asin nakapupurisaw na mga isyu sa buhay? Sinda naghihiro sa kadaihan nin espirituwal, na mayo nin marigon na moral asin relihiosong mga giya asin pagdirehir. Sinda nagin siring sa mga barko na mayo nin timon, na “itinutulod paatras-paabante asin ipinapadpad nin lambang doros nin katokdoan nin tawo, . . . paagi sa kadayaan asin katusohan nin mga tawo.”—Efeso 4:14, The Twentieth Century New Testament.

Kun siring, dapat niatong ihapot, An Biblia daw saro sana man na libro sa relihion? O iyan daw talagang Tataramon nin Dios, na igwa nin praktikal asin mahalagang marhay na impormasyon? (2 Timoteo 3:16, 17) An Biblia daw maninigo niatong estudyaran? Tatrataron kan minasunod na artikulo an mga hapot na ini.

[Ritrato sa pahina 3]

Si Desiderio Erasmo

[Credit Line]

Hale sa librong Deutsche Kulturgeschichte

[Ritrato sa pahina 4]

An mga Waldenses pinili tanganing lamagon huli sa saindang paghuhulit basado sa Kasuratan

[Credit Line]

Stichting Atlas van Stolk, Rotterdam