An Biblia—Sarong Libro Para sa Pamumuhay

AN TATARAMON nin Dios buhay asin mapuersa asin mas matarom kisa arin man na espada na may duwang tarom . . . asin nakamamansay kan mga kaisipan asin intension kan puso.” (Hebreo 4:12) An deskripsion na ini kan nahahaman kan Tataramon nin Dios sierto nanggad na ipinamimidbid an Biblia na bako sanang sarong marahay na libro.

“An mensahe kaiyan mahalagang marhay sa satong buhay kapareho kan satong sunod na hinangos,” an malinaw asin halipot na pagkasabi nin sarong parasurat sa relihion. Dangan idinugang nia: “Kun iisipon nindo an dapit sa satong pagmawot asin pangangaipo nin pagpaomay ngonyan asin babasahon an Biblia basado sa punto de vistang iyan, minasunod an nakasosorpresang mga resulta.” Siring sa lampara na maliwanagon, an Biblia nagtatao nin liwanag sa dakol na komplikadong isyu asin problema nin pamumuhay sa presenteng aldaw.—Salmo 119:105.

Iyo nanggad, an kadonongan na ipinahahayag sa Biblia igwa kan kakayahan na moldehon an satong kaisipan, tabangan kitang resolberan an mga problema, pakarhayon an kualidad kan satong buhay, asin tawan kita kan mga abilidad na makaya an mga situwasyon na dai niato kayang bagohon. An pinakamahalaga, an Biblia tinatabangan kita na mamidbid asin kamotan an Dios.

Sarong Libro na Nagtatao nin Katuyohan

An Autor kan Biblia, si Jehova Dios, ‘tatao kan gabos niatong dalan.’ Mas aram nia ngani kisa sato an manongod sa satong pisikal, emosyonal, asin espirituwal na mga pangangaipo. (Salmo 139:1-3) Sa makonsiderasyon na paagi, nagtatao sia nin malinaw na mga limitasyon para sa paggawe nin tawo. (Miqueas 6:8) Tama sanang hingoahon na masabotan an mga limitasyon asin paggiya na iyan saka pag-adalan na mamuhay sono dian. Maogma an tawo na an saiyang “kaogmahan yaon sa ley ni Jehova,” sabi kan salmista. “An gabos niang ginigibo mapapakarhay.” (Salmo 1:1-3) An siring na paglaom sierto nanggad na angay na siyasaton niato.

Si Maurice, sarong retiradong maestro, kaidto pa nagtutubod na an Biblia igwa nin historiko asin literaryong kahalagahan. Pero, duda sia na iyan ipinasabong nin Dios. Pakatapos na maghinanyog sa sarong paliwanag sa kun taano ta itinao nin Dios sa mga tawo an saiyang nasusurat na Tataramon, siniyasat ni Maurice an laen-laen na hula sa Biblia. Bilang hoben na lalaki, nag-adal sia nin suanoy na kasaysayan, literatura, siensia, asin geograpiya. Inaadmitir nia na sia madonong na marhay sa sadiri niang pagheling tanganing akoon an balakid na halimbawa na nagsusuportar sa pagkamasasarigan kan Biblia. “Nasiod ako sa butang  pag-aaabot sa kagianan, kayamanan, asin mga kasingawan sa buhay. An makamomondo, nagdanay akong daing pakaaram asin ignorante sa kagayonan asin pagigin totoo kan nakalalabi sa gabos na librong isinurat kasuarin man.”

Ngonyan na sia labi nang 70 anyos, si Maurice, na nasasambitan an estorya manongod sa pagpaheling ni Jesus ki apostol Tomas, nagsasabi nin may pagpapahalaga: “An sakong kamot giniyahan pasiring sa ‘nagdudugong lugad’ na hahaleon sagkod lamang sa sakong isip an gabos na pagduda na an Biblia talagang totoo.” (Juan 20:24-29) Siring kan tamang pagkasabi ni apostol Pablo, ihinahayag kan Biblia an mga intension kan puso, asin tinatawan kaiyan nin kahulogan an buhay. Iyan tunay nanggad na sarong libro para sa pamumuhay.

Nagtatao nin Karigonan sa Purisaw na Buhay

An Biblia nagtatao man nin hatol na nakatatabang sa mga tawo na haleon an saindang mga bisyo. Nahimo ni Daniel na haleon an maating bisyo na pagsigarilyo, siring man umontok sa mariribok na parti asin pag-abuso sa inomon na de alkohol. (Roma 13:13; 2 Corinto 7:1; Galacia 5:19-21) An totoo, an paghale sa siring na mga bisyo asin pagsolog “kan bagong personalidad” nangangaipo nin desididong paghihingoa. (Efeso 4:22-24) “Iyan sarong angat,” sabi ni Daniel, “ta kita bako nanggad na sangkap.” Minsan siring, sia nagin mapanggana. Ngonyan binabasa na ni Daniel an Tataramon nin Dios aroaldaw, asin pinapagdadanay sia kaiyan na dayupot ki Jehova.

Mantang sia nagdadakula, si Daniel pirmeng igwa nin hararom na paggalang sa Biblia—minsan ngani nungka niang binasa iyan—asin sia namimibi sa Dios barobanggi. Pero, may kulang. Mayo sia nin kaogmahan. Nagdatong an panahon nin dakulang pagbago kan maheling nia an ngaran nin Dios sa Biblia sa kaenot-enote. (Exodo 6:3; Salmo 83:18) Pakatapos kaiyan, ginagamit na nia an ngaran na Jehova kun sia namimibi, asin an saiyang mga pamibi nagin mas personal. “Si Jehova an nagin pinakadayupot na persona sa sako, asin sagkod ngonyan sia an sakong pinakadayupot na katood.”

Bago nag-adal sa Biblia, an heling ni Daniel sa ngapit daing paglaom. “Dai nang gayo kaipuhan an intelihensia tanganing maheling an nangyayari sa kinaban,” sabi nia. “Ako natatakot, asin hiningoa ko na magin sibot tanganing mahale iyan sa sakong isip.” Dangan nanodan nia na an Dios maestablisar nin hustisya para sa gabos sa sarong lininig na daga, kun saen an makinuyog na mga tawo puedeng magkamit nin daing sagkod na katoninongan asin kaogmahan. (Salmo 37:10, 11; Daniel 2:44; Kapahayagan 21:3, 4) Ngonyan si Daniel igwa na nin seguradong paglaom. An nakaparirigon na impluwensiang ini kan Biblia nagpangyari sa saiya na mapagdanay an positibong punto de vista sa buhay.

Tabang sa Pagpanggana sa mga Problema sa Emosyon

Si George siete anyos kan magadan an saiyang ina. Natatakot siang matorog sa banggi, ta dai nia aram kun mapapagmata pa sia pagkaaga. Dangan binasa nia an sinabi ni Jesus manongod sa kagadanan asin pagkabuhay liwat: ‘An oras maabot na an gabos na nasa mga lolobngan na girumdoman makadadangog kan tingog ni Jesus asin maruluwas.’ Natudok man sia kan mga tataramon ni Jesus: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.” (Juan 5:28, 29; 11:25) An siring na mga kaisipan garo rasonable, lohiko, asin nakararanga. “An katotoohan na ini,” sabi ni George, “bako sanang nakapupukaw sa isip kundi nakatutudok man sa puso.”

Si Daniel, na nasambitan kasubago, nagkaigwa man nin mga pagkatakot. Dai sia kayang padakulaon kan saiyang ina nin solo, kaya pinaistar sia sa dakol na ampunan. An pagmate nia pirme garo sia taga luwas asin hinihidaw nia an seguridad nin pagigin kabilang sa sarong mamomoton na pamilya. Sa kahurihurihi, nanompongan nia an hinahanap nia paagi sa pag-adal nia sa Biblia. Si Daniel nagin asosyado sa Kristianong kongregasyon kan Mga Saksi ni Jehova asin nagin kabtang nin sarong espirituwal na pamilya, kun saen naeksperyensiahan nia an  pakamate nin pagigin inaako asin namomotan nin iba. Iyo nanggad, an Biblia kapakipakinabang sa paaging praktikal asin nakakokontento sa emosyon.

Girumdomon, hineheling ni Jehova an nasa satong puso asin aram nia kun ano an hinahanap ta. An Dios “nagsisiyasat sa mga puso,” asin nagtatao sia “sa balang saro kan bagay sa saiyang mga dalan.”—Talinhaga 21:2; Jeremias 17:10.

Praktikal na Hatol Dapit sa Buhay Pampamilya

An Biblia nagtatao nin praktikal na hatol pag-abot sa relasyon nin tawo. Si George nagsasabi: “An mga pagkakatumang nin personalidad o dai pagkasinabotan kabilang sa mga situwasyon sa buhay na nagtatao nin tension.” Paano nia iyan inaatubang? “Kun sa heling ko may saro na igwa nin ano man tumang sa sako, iinaaplikar ko an prangkang hatol basado sa Mateo 5:23, 24: ‘Makipagkatoninongan ka sa saimong tugang.’ An simpleng bagay na puede kong ipakipag-olay an dapit sa pagkakatumang igwa nin resulta. Namamatean ko an katoninongan nin Dios na sinasabi kan Biblia. Epektibo iyan. Iyan praktikal na marhay.”—Filipos 4:6, 7.

Kun an mag-agom dai magkaoyon, pareho sinda kaipuhan na “magin listo kun dapit sa pagdangog, maluway kun dapit sa pagtaram, maluway kun dapit sa kaanggotan.” (Santiago 1:19) An siring na sadol nagpapaoswag sa komunikasyon. Si George nagsabi pa: “Kun iinaaplikar ko an hatol na kamotan asin trataron an sakong agom siring kan pagtratar ko sa sakong sadiri, naheheling ko an ensegidang mga resulta. Mas madali para sa saiya na igalang ako.” (Efeso 5:28-33) Iyo, tinotokdoan kita kan Biblia kun paano aadmitiron asin aatubangon an satong sadiring mga pagkabakong sangkap asin kun paano magigin mapanggana sa pag-atubang sa mga pagkabakong sangkap nin iba.

Hatol na Nagdadanay

An madonong na si Hadeng Salomon nagsabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:5, 6) Abaa kasimple, pero hararom, kan mga tataramon na iyan!

An Biblia sarong puersa para sa ikararahay. Pinapangyayari kaiyan an mga namomoot sa Dios na ioyon an saindang buhay sa saiyang kabotan asin makanompong nin kaogmahan sa ‘paglakaw sa ley ni Jehova.’ (Salmo 119:1) Ano man an satong mga kamugtakan, an Biblia igwa kan paggiya asin hatol na kaipuhan niato. (Isaias 48:17, 18) Basahon iyan aroaldaw, horophoropon an saindong binabasa, asin iaplikar iyan. Papagdadanayon kaiyan an saindong isip na malinaw asin nakasentro sa mga bagay na dalisay asin kapakipakinabang. (Filipos 4:8, 9) Manonodan nindo bako sanang kun paano mamuhay asin ikaogma an buhay kundi kun paano man mamomotan an Kaglalang kan buhay.

Paagi sa pagsunod sa siring na dalan, an Biblia magigin para sa saindo—siring sa minilyon na iba pa—bako sanang sarong marahay na libro. Iyan totoong magigin sarong libro para sa pamumuhay!

[Ritrato sa pahina 6]

Puedeng pakosogon kan Biblia an desisyon nindo na haleon an nakadadanyar na mga bisyo

[Ritrato sa pahina 7]

Tinotokdoan kamo kan Biblia kun paano madayupot sa Dios