Kun Paano Kamo Magkakaigwa nin mga Katood

“AN SARONG KATOOD SA BILOG NA BUHAY MEDYO MARAHAY NA; AN DUWA DAKOL NA; AN TOLO HAROS IMPOSIBLE NA.”—Henry Brooks Adams.

AN SIRING na komento nagsusuherir na an tunay na mga katood bihira. Parateng gayo na madadangog an mga komento na arog kan “Mayo ako nin siisay man na madodolokan,” “Dai ko mapagtiwalaan an siisay man,” o “An sakong ayam an pinakadayupot kong katood” sa mga tawong labi-labi an kamondoan na naghahanap nin pakikikatood.

An pagkaigwa asin pagmantener nin nagdadanay na pagkakatood sarong angat. Ihinayag nin sarong surbey sa sarong espesipikong grupo na “sa Estados Unidos 25 porsiento kan populasyon na nasa edad na an igwa nin ‘pabalikbalik na kapungawan’ asin . . . sa Pransia kabanga kan namamanwaan an nakaeksperyensia nin biyong pagsolosolo.” An pagdakol nin klab sa pagdi-date asin mga chat room sa komputer asin an pagdakol nin anunsio sa peryodiko kan mga naghahanap nin mga kaibaiba nagpaparisa na an mga tawo naghihimuyawot nin pakikiasosyar sa mga tawo.

An kapungawan nakakaapektar bako sanang sa mental na kamugtakan nin sarong tawo kundi siring man sa saiyang pisikal na salud, an paghingako ni Dr. David Weeks, sarong neurosikologo. “Kadakol kan sakong pasyente na may pobia sa kahaditan asin depresyon na masasabing mapungaw. May mga koneksion sa pag-oltanan nin grabeng depresyon asin nin grabeng kapungawan.”

An diborsio asin pagkalaglag nin buhay nin pamilya itinatalaga an padakol nang padakol na tawo na mamuhay nin solo. An sarong surbey na ginibo sa Britania nagkonklusyon na sa kapinonan kan ika-21 siglo, sagkod sa 30 porsiento kan populasyon kan nasyon na iyan an magsosolosolo.

Ihinula kan ipinasabong na Kasuratan na magigin lakop an espiritu nin kaimotan sa “huring mga aldaw.” (2 Timoteo 3:1-5) Minalataw na dakol an mas interesado sa materyal na mga rogaring, arog baga nin harong o kotse, o sa saindang mga trabaho kisa pagkultibar nin relasyon sa ibang tawo. An sabi  kan autor na si Anthony Storr: “Imbes na nakapokus sa agom asin mga aki, an saindang buhay nakasentro sa opisina.”

AN TUNAY NA MGA KATOOD DAING KAAGID SA HALAGA

An kalidad kan saindong buhay nakadependeng marhay sa kalidad kan saindong mga pakikikatood. Sa parate an mga nabubuhay para sa saindang sadiri bakong maogma huli ta mayo sinda nin katood na mahihirasan ninda kan saindang mga bagay o kan saindang mga nasa isip. Totoo an mga tataramon ni Jesu-Cristo: “Igwang orog na kaogmahan sa pagtao kisa pag-ako.” (Gibo 20:35) Inootro an katotoohan na ini, an Ingles na poeta na si George Byron nagsurat: “An gabos na magkakamit nin kagayagayahan dapat na ihiras iyan.”

Ano an katood? An sarong diksionaryo tinatawan nin kahulogan an katood na “sarong namumuya sa saro huli sa kapadangatan o pagpahalaga.” An tunay na katood makatatabang na giyahan an saindong kaisipan pasiring sa kapakipakinabang na mga bagay. Puede niang parigonon asin pakosogon an saindong boot sa mga panahon nin pangangaipo. Puede pa ngani nia kamong damayan sa saindong pagmondo. Sinabi ni Hadeng Salomon: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” (Talinhaga 17:17) Mantang an materyal na mga bagay sa parate nawawaran kan halaga kaiyan pag-abot nin panahon, an tunay na pagkakatood nagtatalubo asin nag-ooswag sa pag-agi nin panahon.

An Kasuratan nagsasadol sa mga Kristiano na “humiwas” sa saindang mga kapadangatan. (2 Corinto 6:13) Igwa nin kadonongan sa pagpaheling nin interes sa iba. Sa Eclesiastes 11:1, 2, mababasa niato: “Iapon mo an saimong tinapay sa ibabaw kan katubigan, huli ta pakaagi nin dakol na aldaw makukua mo giraray iyan. Maghiras ka sa pito, o minsan sa walo, huli ta dai mo aram kun anong kalamidad an mangyayari sa daga.” Paano daw aplikado an prinsipyong ini sa pakikikatood? Kun kamo nagkukultibar nin pakikikatood sa dakol na tawo, an nagkapira sa sainda puedeng tumabang sa saindo kun dumatong an mga problema.

An tunay na mga katood proteksion sa saindo sa saro pang paagi. “An mga lugad na itinatao nin sarong namomoot fiel,” an sabi kan Talinhaga 27:6. Dawa gurano pa kadakol na tawo an mag-omaw sa saindo, an tunay na mga katood sana an igong magmamalasakit sa saindo na sabihon an grabeng mga sala asin matao nin nakararahay na hatol sa mamomoton na paagi.—Talinhaga 28:23.

An marahay, dayupot na mga katood kabilang sa bihirang mga balaog na puedeng magtao nin positibong impluwensia sa saindo. Sa Gibo kapitulo 10, mababasa niato an sarong pangyayari sa buhay nin sarong opisyal kan hukbo nin Roma na si Cornelio, na sinabihan nin sarong anghel na an saiyang mga pamibi dinangog. Sa pag-antisipar kan pagdalaw ni apostol Pedro, “tinipon [ni Cornelio] an saiyang mga paryente asin dayupot na mga katood.” An dayupot na mga katood na idto ni Cornelio kabilang sa enot na bakong turi na mga Hentil na nag-ako kan maogmang bareta asin linahidan kan banal na espiritu, na may esperansang mamahala kaiba ni Cristo sa Kahadean nin Dios. Kanigoan na bendisyon para sa dayupot na mga katood ni Cornelio!—Gibo 10:24, 44.

 Pero, paano nindo poponan an pakikatood? An Biblia, na dakol nin sinasabi manongod sa pagkakatood, nagtatao nin praktikal na sadol. (Helingon an kahon sa ibaba.)

SAEN KAMO PUEDENG MAGKAIGWA NIN TUNAY NA MGA KATOOD

An pinakamarahay na lugar sa pagkaigwa nin tunay na mga katood konektado sa Kristianong kongregasyon. Enot sa gabos, puede kamong magkaoportunidad na makikatood ki Jehova, an saindong Kaglalang asin langitnon na Ama, asin ki Jesu-Cristo, an saindong Paraligtas. “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood,” an sabi ni Jesus, na inaagda kamo na magin saiyang katood. (Juan 15:13, 15) Paagi sa pakikikatood ki Jehova asin ki Jesu-Cristo, makasisierto kamo na ‘aakoon ninda kamo sa mga erokan na daing katapusan.’ Iyo, an pakikikatood ki Jehova asin ki Jesus nangangahulogan nin buhay na daing katapusan.—Lucas 16:9; Juan 17:3.

Paano nindo makakamtan an saindang mainit na pakikikatood? An mga kahagadan para sa pagigin bisita sa tolda ni Jehova bilang saro sa saiyang mga katood sinabi sa Salmo 15. Buksan nindo iyan sa Biblia, asin basahon nindo an limang bersikulo kan salmong iyan. Dugang pa, sinabi ni Jesu-Cristo: “Kamo an mga katood ko kun gibohon nindo an mga pagboot ko sa saindo.”—Juan 15:14.

Iyo, paagi sa maatom na pag-adal asin pag-aplikar kan instruksion na hale sa Tataramon nin Dios, an Biblia, ipinaheheling nindo na mawot nindo na magin katood ni Jehova asin Jesus. Tanganing magibo  ini, dapat man kamong mag-atender nin regular sa Kristianong mga pagtiripon, kun saen itinatao an kaaraman ni Jehova Dios. Fiel na magmaigot na maghinanyog ki Jehova, asin kamo orog na mapapadayupot sa saiya asin sa saiyang Aki.

Sa mga pagtiripon makakamidbid man nindo an mga indibiduwal na namomoot ki Jehova asin nagpapaheling kan mga bunga kan espiritu—pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri—sa saindang buhay. (Galacia 5:22, 23) Kun kamo totoong gusto na magkaigwa nin mga katood asin mahale an kapungawan, umatender serosemana sa Kristianong mga pagtiripon. An paggibo kaiyan nagbubugtak sa saindo sa tamang lugar sa tamang panahon tanganing kultibaron an nagdadanay na pakikikatood sa biniyayaan na banwaan nin Dios.

MAGKATOOD SAGKOD LAMANG

An tunay na pagkakatood makangangalas na balaog hale ki Jehova Dios. Iyan bunga kan saiya mismong personalidad asin naturalesa. Huli sa saiyang mamomoton asin buka an palad na espiritu, pinano nia an daga nin intelihenteng mga linalang na puede nindong magin katood. Makiasosyar sa mga kapwa Kristiano. Parigonon an saindang boot. Makiiba sa sainda sa ministeryo. Mamibi nin regular kaiba ninda asin para sa sainda. Kun siring maaarog nindo si Jehova asin an saiyang Aki, si Jesu-Cristo.

An pagkakatood sarong balaog na kayang itao asin akoon nin gabos. Sa harani nang ngapit, kamo magkakaigwa nin oportunidad na pahiwason an saindong grupo nin mga katood. Puede kamong makikatood sa minilyon na nabubuhay ngonyan, siring man sa mga nabuhay kan nakaaging mga henerasyon na natotorog sa kagadanan, na naghahalat sa pagkabuhay liwat sa panahon na “an kagadanan mawawara na.” (Kapahayagan 21:4; Juan 5:28, 29) Maghingoa na ngonyan na magin makikatood, asin makikatood sa mga namomoot ki Jehova. Pagmaigotan na kamtan an pakikikatood ki Jehova Dios asin ki Jesu-Cristo paagi sa paghinanyog sa ipinasabong na Tataramon nin Dios. Kun siring, sa bilog na panahon na daing sagkod, nungka na kamong magigin mapungaw giraray.

[Kahon/Mga Ritrato sa pahina 22, 23]

ANOM NA LAKDANG SA NAGDADANAY NA PAGKAKATOOD

1. MAGIN SARONG KATOOD. Si Abraham inapod na “katood ni Jehova” huli sa saiyang marigon na pagtubod. (Santiago 2:23) Alagad igwa nin dugang pang dahelan. Sinasabi kan Biblia na ipinaheling ni Abraham an saiyang kapadangatan sa Dios. (2 Cronica 20:7) Sia nagkaigwa nin inisyatiba asin ipinahayag nia an saiyang saboot ki Jehova. (Genesis 18:20-33) Iyo, kaipuhan an inisyatiba sa pagtao nin prueba kan saindong pakikikatood. Sinabi ni Jesus: “Magin matinao, asin an mga tawo magtatao sa saindo.” (Lucas 6:38) An tataramon na nagpaparigon sa boot o pagtabang tibaad iyo an pagponan kan pagtalubo nin dakulang pagkakatood. An parasurat na Amerikano na si Ralph Waldo Emerson minsan nagsabi: “An solamenteng paagi tanganing magkaigwa nin katood iyo na magin katood.”

2. MAGTAO NIN PANAHON NA KULTIBARON AN PAKIKIKATOOD. An kadaklan na tawo nagmamawot kan mga pakinabang nin pagkakatood. Alagad, sinda sibot-sibot sa pagtao kan kinakaipuhan na panahon. An Roma 12:15, 16 ineenkaminar kita na makihiras sa kaogmahan asin kapangganahan, sa kapungawan asin pagkadesganar, nin iba. Iyan nagsasabi: “Makigayagaya sa mga tawong naggagayagaya; makitangis sa mga tawong nagtatangis. Mag-isip kamo manongod sa iba na siring kan sa saindo man sana.” Si Jesu-Cristo, minsan ngani sarong sibot na tawo, pirmeng nagtatao nin panahon para sa saiyang mga katood. (Marcos 6:31-34) Girumdomon, an pagkakatood, arog nin namumurak na masitas, nangangaipong baribion asin atamanon tanganing iyan mamurak—asin iyan nangangaipo nin panahon.

3. MAGTAO NIN ATENSION KUN NAGTATARAM AN IBA. An marahay, atentong mga naghihinanyog sa parate mas madaling magkaigwa nin mga katood. “An gabos na tawo kaipuhan na magin listo kun dapit sa pagdangog, maluway kun dapit sa pagtaram,” an sabi ni disipulo Santiago. (Santiago 1:19) Kun kamo nakikipag-olay sa iba, ipaheling an personal na interes sa saindang saboot. Enkaminaron sinda na magtaram manongod sa saindang sadiri. Mangenot sa pagpaheling nin onra sa sainda. (Roma 12:10) Kun siring sinda magugustong makaibaiba kamo. Sa kabaliktaran, kun minomonopolisar nindo an gabos na orolay, o pirme nindong ibinibida an saindong sadiri, masasakitan kamong makanompong nin saro na gustong maghinanyog o nagmamalasakit sa saindong mga saboot asin pangangaipo.

4. MAGIN MAPAGPATAWAD. Sarong beses sinabihan ni Jesus si Pedro na magin andam na magpatawad “sagkod sa pitong polo may pitong beses.” (Mateo 18:21, 22) An tunay na katood madaling palampason an sadit na mga sala. Sa pag-ilustrar: An nagkapira habong magkakan nin bayawas huli sa saradit na pisog kaiyan. Minsan siring, an mga nasisiraman sa prutas na ini dai iniintindi an mga pisog. An tunay na mga katood namomotan huli sa saindang marahay na mga kualidad; an sadit na mga sala ninda pinalalampas. Sinadol kita ni Pablo: “Padagos kamong magpatiriostios asin sueltong magpatarawadtawadan.” (Colosas 3:13) An mga nakakanood na magin mapagpatawad nagdadanay an mga katood.

5. IGALANG AN PRIBADONG BUHAY NIN IBA. An gabos nangangaipo nin pagkapribado, pati an saindong mga katood. An Talinhaga 25:17 madonong na nagsabi: “Magin bihira an saimong bitis sa harong kan saimong kapwa, tanganing dai sia manganaan sa saimo asin ikaongis nia nanggad ika.” Huli kaini, magin rasonable manongod sa pagkaparate asin lawig nin pagdalaw sa mga katood. Likayan an pagigin masinadiri, na puedeng magbunga nin pag-imon. Gumamit nin marahay na paghusgar kun nagpapahayag nin personal na mga gusto asin opinyon dapit sa mga bagay-bagay. Nakakokontribwir ini sa nakagiginhawa asin nakaoogmang pagkakatood.

6. MAGIN BUKA AN PALAD. An mga pagkakatood nakukultibar paagi sa pagigin buka an palad. An sadol ni apostol Pablo iyo na “magin matinao, andam na manhiras.” (1 Timoteo 6:18) Halimbawa, maghiras nin nakaparirigon sa boot na mga tataramon sa iba. (Talinhaga 11:25) Magin suelto sa pagtao nin sinserong komendasyon asin nakaparirigon sa boot na mga tataramon. Kun kamo nagpapaheling nin tunay na interes sa ikararahay nin iba, sinda maaakit sa saindo. Isipon an magigibo nindo sa sainda imbes na magkonsentrar sa magigibo ninda para sa saindo.