Namomotan daw Nindo nin Labi-labi an mga Pagirumdom ni Jehova?

“Inootob kan kalag ko an saimong mga pagirumdom, asin namomotan ko iyan nin labi-labi.”—SALMO 119:167.

1. Saen ta partikularmenteng manonompongan an paorootrong pagkasambit sa mga pagirumdom ni Jehova?

BOOT ni Jehova na magin maogma an saiyang banwaan. Siempre, tanganing kamtan an tunay na kaogmahan kita dapat na lumakaw sa ley nin Dios asin otobon an saiyang mga pagboot. Sa katuyohan na iyan, tinatawan nia kita nin mga pagirumdom. An mga ini paorootrong nasasambitan sa Kasuratan, partikularmente sa Salmo 119, na posibleng isinurat kan hoben na si Prinsipe Ezequias nin Juda. An magayon na awit na ini minapoon sa mga tataramon na: “Maogma an mga daing sala sa saindang dalan, an mga naglalakaw sa ley ni Jehova. Maogma an mga nag-ootob sa saiyang mga pagirumdom; sa bilog na puso sia padagos na hinahanap ninda.”—Salmo 119:1, 2.

2. Paano konektado sa kaogmahan an mga pagirumdom nin Dios?

² Kita ‘naglalakaw sa ley ni Jehova’ paagi sa pagkua nin tamang kaaraman sa saiyang Tataramon asin paagi sa pag-aplikar kaiyan sa buhay. Minsan siring, huling kita bakong sangkap, kaipuhan ta an mga pagirumdom. An termino sa Hebreo na trinadusir na “mga pagirumdom” nagpaparisa na ipinagigirumdom sa sato nin Dios an saiyang ley, mga pagboot, regulasyon, togon, asin reglamento. (Mateo 10:18-20) Magdadanay kitang maogma solamente kun padagos niatong ootobon an mga pagirumdom na iyan, ta tinatabangan kita kaiyan na malikayan an espirituwal na natatagong mga peligro na nagreresulta sa kapahamakan asin kamondoan.

Pangaptan an mga Pagirumdom ni Jehova

3. Basado sa Salmo 119:60, 61, igwa kita nin anong kompiansa?

³ An mga pagirumdom nin Dios mahalagang marhay sa salmista na nag-awit: “Naghumari ako, asin dai ako nag-atraso sa pag-otob sa saimong mga togon. An mismong mga pisi kan mga maraot pinurupotan ako. An saimong ley dai ko liningawan.” (Salmo 119:60, 61) Tinatabangan kita kan mga pagirumdom ni Jehova na matagalan an paglamag huli ta kompiado kita na kayang patodon kan satong langitnon na Ama an mga pisi nin restriksion na iginagapos sa sato  kan mga kaiwal. Sa itinalaan na panahon, bubutasan nia kita sa mga balakid na iyan tanganing ikapadagos ta an paghuhulit kan Kahadean.—Marcos 13:10.

4. Ano an maninigong magin reaksion ta sa mga pagirumdom nin Dios?

⁴ Kun beses, itinatanos kita kan mga pagirumdom ni Jehova. Logod na pirme niatong apresyaron an siring na pagtatanos, siring kan ginibo kan salmista. Mapagngayongayo siang nagsabi sa Dios: “An saimong mga pagirumdom iyo an gusto ko . . . Namomotan ko an saimong mga pagirumdom.” (Salmo 119:24, 119) Mas dakol kitang pagirumdom nin Dios kisa kan sa salmista. An ginatos na kotasyon sa Hebreong Kasuratan na minalataw sa Griegong Kasuratan ipinagigirumdom sa sato bako sana an mga instruksion ni Jehova sa saiyang banwaan na sakop kan Ley kundi siring man an saiyang mga katuyohan may labot sa Kristianong kongregasyon. Kun sa heling nin Dios angay na ipagirumdom sa sato an mga bagay na may koneksion sa saiyang mga ley, nagpapasalamat kita sa siring na paggiya. Asin paagi sa ‘pangangapot sa mga pagirumdom ni Jehova,’ nalilikayan ta an makasalan na mga pan-akit na ikinaaanggot kan satong Kaglalang asin nakahahale kan satong kaogmahan.—Salmo 119:31.

5. Paano niato mamomotan nin labi-labi an mga pagirumdom ni Jehova?

⁵ Gurano an maninigong pagkamoot niato sa mga pagirumdom ni Jehova? “Inootob kan kalag ko an saimong mga pagirumdom, asin namomotan ko iyan nin labi-labi,” an inawit kan salmista. (Salmo 119:167) Mamomotan ta nin labi-labi an mga pagirumdom ni Jehova kun mamansayon asin aakoon ta iyan bilang konseho nin Ama na totoong may pagmakolog sa sato. (1 Pedro 5:6, 7) Kaipuhan ta an saiyang mga pagirumdom, asin an satong pagkamoot dian matalubo mantang naheheling ta kun paano kita nakikinabang dian.

Kun Taano ta Kaipuhan Niato an mga Pagirumdom nin Dios

6. Ano an sarong dahelan na kaipuhan niato an mga pagirumdom ni Jehova, asin ano an matabang sa sato na matandaan iyan?

⁶ An sarong dahelan na kaipuhan ta an mga pagirumdom ni Jehova iyo na kita malilingawon. An sabi kan The World Book Encyclopedia: “Sa pankagabsan, nagdadakol an nalilingawan nin mga tawo mientras na nag-aagi an panahon. . . . Naeksperyensiahan na gayod nindo na dai nindo maisip an sarong ngaran o sarong impormasyon na nasa poro kan saindong dila. . . . An siring na temporaryong pagkawara nin memorya, na parateng nangyayari, inaapod na retrieval failure (dai pakagirumdom). Iinaagid iyan kan mga sientista sa paghihingoang hanapon an sarong bagay na nawawara sa sarong disaregladong kuarto. . . . An sarong marahay na paagi na maseguradong magirumdoman an sarong impormasyon iyo na adalan iyan pakalihis nin panahon na an paghona nindo aram na nindo nin eksakto iyan.” An maurop na pag-adal asin pag-otro matabang sa sato na matandaan an mga pagirumdom nin Dios asin sunodon iyan para sato mismong ikararahay.

7. Taano ta orog na kaipuhan ngonyan an mga pagirumdom nin Dios kisa kasuarin pa man kaidto?

⁷ Orog niatong kaipuhan an mga pagirumdom ni  Jehova ngonyan kisa kasuarin man kaidto huli ta an karatan nakaabot na sa pinakadakulang sokol sa kasaysayan nin tawo. Kun tatawan ta nin atension an mga pagirumdom nin Dios, makukua ta an pakarorop na kaipuhan tanganing makalikay na dai maenganyar sa maraot na mga dalan kan kinaban. “Nagkamit ako nin orog na pakarorop kisa gabos kong paratokdo,” sabi kan salmista, “huli ta an saimong mga pagirumdom sakong pinagmamalasakitan. Ako minagawe na igwa nin orog na pakasabot kisa kamagurangan na lalaki, huli ta inotob ko an saimong mga togon. Sa gabos na maraot na dana pinogolan ko an sakong mga bitis, sa katuyohan na maotob ko an saimong tataramon.” (Salmo 119:99-101) Paagi sa pagkuyog sa mga pagirumdom nin Dios, mararayo kita sa “gabos na maraot na dana” asin malilikayan ta na magin siring sa katawohan, na “nasa kadikloman sa isip, asin siblag sa buhay na gikan sa Dios.”—Efeso 4:17-19.

8. Paano kita orog na magigin andam na atubangon nin mapanggana an mga pagbalo sa pagtubod?

⁸ Kaipuhan man an mga pagirumdom nin Dios huli ta pinakokosog kita kaiyan na tagalan an dakol na pagbalo sa sato sa “panahon [na ini] kan katapusan.” (Daniel 12:4) Kun mayo an siring na mga pagirumdom kita magigin “malilingawon na paradangog.” (Santiago 1:25) Alagad an maurop na personal asin pankongregasyon na pag-adal kan Kasuratan sa tabang kan mga publikasyon hale sa “fiel asin may diskresion na oripon” tatabangan kita na maatubang nin mapanggana an mga pagbalo sa pagtubod. (Mateo 24:45-47) An siring na espirituwal na mga probisyon pinangyayari kita na masabotan an dapat niatong gibohon tanganing mapaogma si Jehova kun kita nasa masakit na mga kamugtakan.

An Mahalagang Marhay na Kabtang kan Satong mga Pagtiripon

9. Sairisay an “balaog na mga lalaki,” asin paano ninda tinatabangan an mga kapagtubod?

⁹ An satong pangangaipo nin mga pagirumdom nin Dios ikinatatao sa sarong kabtang sa Kristianong mga pagtiripon, kun saen nagtatao nin pagtotokdo an nombradong mga tugang na lalaki. Si apostol Pablo nagsurat na kan si Jesus “magsakat sa kaitaasan nagdara sia nin mga bihag; nagtao sia nin balaog na mga lalaki.” Idinugang ni Pablo: “Itinao [ni Cristo] an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, manongod sa pagpakarhay giraray kan mga banal, manongod sa gibohon nin paglingkod, manongod sa pagpakosog kan hawak ni Cristo.” (Efeso 4:8, 11, 12) Makapagpapasalamat nanggad kita na ginigiyahan kan “balaog na mga lalaking” ini—an nombradong kamagurangan—an satong atension sa mga pagirumdom ni Jehova kun kita nagtitiripon para sa pagsamba!

10. Ano an idinodoon kan Hebreo 10:24, 25?

¹⁰ Pahihiroon kita kan pagpasalamat sa mga probisyon nin Dios na magin presente sa satong limang pagtiripon kan kongregasyon kada semana. Idinoon ni Pablo an pangangaipo na magtiripon nin regular. Sia nagsurat: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.”—Hebreo 10:24, 25.

11. Paano kita nakikinabang sa kada saro kan satong semanal na mga pagtiripon?

¹¹ Inaapresyar daw nindo an nagigibo para sa sato  kan satong mga pagtiripon? An semanal na Pag-adal sa Torrengbantayan pinakokosog an satong pagtubod, tinatabangan kita na sunodon an mga pagirumdom ni Jehova, asin pinasasarig kita laban sa “espiritu kan kinaban.” (1 Corinto 2:12; Gibo 15:31) Sa Pampublikong Pagtiripon, an mga espiker nagtatao nin pagtotokdo hale sa Tataramon nin Dios, kabale an mga pagirumdom ni Jehova asin an makangangalas na “mga tataramon [ni Jesus] nin buhay na daing katapusan.” (Juan 6:68; 7:46; Mateo 5:1–7:29) An satong mga kakayahan sa pagtotokdo natatais sa Teokratikong Paadalan sa Pagmiministro. An Pagtiripon sa Paglilingkod mahalagang marhay sa pagtabang sa sato na mapaoswag an satong pag-atubang kan maogmang bareta sa harong-harong, sa mga pagdalaw liwat, sa pag-adal sa Biblia, asin sa iba pang kabtang kan satong ministeryo. An mas sadit na grupo kan Pag-adal sa Libro kan Kongregasyon nagtatao sa sato nin orog na oportunidad na tumao nin mga kapahayagan na sa parate may kaibang mga pagirumdom nin Dios.

12, 13. Paano nagpaheling nin apresasyon sa Kristianong mga pagtiripon an banwaan nin Dios sa sarong nasyon sa Asia?

¹² Paagi sa regular na pagigin presente sa mga pagtiripon kan kongregasyon ikinapagigirumdom sa sato an mga togon nin Dios asin tinatabangan kita na magdanay na makosog sa espirituwal sa ibong nin guerra, kasakitan sa pagbuhay, asin iba pang pagbalo sa satong pagtubod. An kahalagahan kan mga pagtiripon namatean na gayo kan mga 70 Kristiano sa sarong nasyon sa Asia na pinaharale sa saindang harong asin pinirit na mag-istar sa mahibog na kadlagan. Desididong magpadagos na magtiripon nin regular, nagbuelta sinda sa saindang banwaan na dinestroso nin guerra, kinua an mga natada sa Kingdom Hall, asin itinogdok liwat iyan sa kadlagan.

¹³ Pakatapos na tioson an dakol na taon nin guerra sa saro pang parte kan nasyon man sanang iyan, an banwaan ni Jehova maigot pa man giraray na naglilingkod. An saro sa kamagurangan sa lugar na iyan hinapot: “Ano an nakatabang na marhay tanganing papagdanayon na sararo an mga tugang?” An simbag nia? “Sa 19 taon, nungka kaming dai nagtiripon. Kun beses huli sa pambobomba o iba pang problema, an nagkapirang tugang dai makaduman sa tiriponan, alagad nungka kaming nagkanselar nin pagtiripon.” An mahal na mga tugang na lalaki asin babaeng ini tunay nanggad na inaapresyar an kahalagahan kan ‘dai pagpabaya sa pagtorotiripon ninda.’

14. Ano an manonodan ta sa kaugalean kan gurang nang si Ana?

¹⁴ An 84 anyos na balong si Ana “dai noarin man nagpapalta sa templo.” Bilang resulta, presente sia kan an omboy na si Jesus darahon duman dai nahaloy pagkamundag nia. (Lucas 2:36-38) Nagdedesidir daw kamo na dai magpalta sa mga pagtiripon? Ginigibo daw nindo an saindong pinakamakakaya na atenderan an gabos na sesyon kan satong mga  asamblea asin kombension? An kapakipakinabang sa espirituwal na pagtotokdo na inaako sa mga pagtiripon na ini nagtatao sa sato nin malinaw na ebidensia na an satong langitnon na Ama may pagmakolog sa saiyang banwaan. (Isaias 40:11) Pinaooswag man kan siring na mga okasyon an kagayagayahan, asin pinatutunayan kan satong pagigin presente an satong apresasyon sa mga pagirumdom ni Jehova.—Nehemias 8:5-8, 12.

Isinisiblag kan mga Pagirumdom ni Jehova

15, 16. Paano nakakaapektar sa satong gawe-gawe an pag-otob sa mga pagirumdom ni Jehova?

¹⁵ An pag-otob sa mga pagirumdom nin Dios nakatatabang na isiblag kita sa maraot na kinaban na ini. Halimbawa, an paghimate sa mga pagirumdom nin Dios pinopogolan kita sa pagkomiter nin seksuwal na inmoralidad. (Deuteronomio 5:18; Talinhaga 6:29-35; Hebreo 13:4) An sugot na magputik, magin madaya, o maghabon mapangganang malalabanan paagi sa pagsunod sa mga pagirumdom nin Dios. (Exodo 20:15, 16; Levitico 19:11; Talinhaga 30:7-9; Efeso 4:25, 28; Hebreo 13:18) An pag-otob sa mga pagirumdom ni Jehova pinopogolan man kita na magbalos, magtanom nin raot sa boot, o magbalobagi sa siisay man.—Levitico 19:16, 18; Salmo 15:1, 3.

¹⁶ Paagi sa paghimate sa mga pagirumdom nin Dios, kita nagdadanay na sinantipikar, o itinagama, para sa paglilingkod sa saiya. Asin kanigoan kahalaga na magin siblag sa kinaban na ini! Sa pamibi ki Jehova kan ultimong banggi kan saiyang buhay sa daga, ini an ipinakimaherak ni Jesus para sa saiyang mga parasunod: “Itinao ko sa sainda an saimong tataramon, alagad an kinaban naongis sa sainda, huli ta sinda bakong kabtang kan kinaban, kun paanong ako bakong kabtang kan kinaban. Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot. Sinda bakong kabtang kan kinaban, kun paanong ako bakong kabtang kan kinaban. Santipikaron mo sinda paagi sa katotoohan; an saimong tataramon katotoohan.” (Juan 17:14-17) Padagos niatong pakamahalon an Tataramon nin Dios, na itinatagama kita para sa sagradong paglilingkod sa saiya.

17. Ano an puedeng mangyari kun pinalimanlimanan ta an mga pagirumdom nin Dios, kaya ano an maninigo tang gibohon?

¹⁷ Bilang mga lingkod ni Jehova, boot niatong magdanay na inaako para sa paglilingkod sa saiya. Minsan siring, kun palilimanlimanan ta an mga pagirumdom nin Dios puede kitang madaog kan espiritu kan kinaban na ini, na pinalalakop sa kadaklan kan pagtaram, babasahon, aling-alingan, asin gawe-gawe kaiyan. Asin habo nanggad niatong magin mamomoton sa kuarta, mapagpasikat sa sadiri, maabhaw, daing utang na boot, bakong maimbod, maringis, matagas an payo, mahambog, mamomoton sa kasingawan imbes na mamomoton sa Dios—sa pagsambit sa pira sana kan mga ugale na ipinaheheling kan mga siblag sa Dios. (2 Timoteo 3:1-5) Huling kita nabubuhay na sa poro kan huring mga aldaw kan maraot na sistemang ini nin mga bagay, padagos kitang mamibi para sa tabang nin Dios tanganing kita makapadagos sa pag-otob sa mga pagirumdom ni Jehova asin sa siring ‘makapag-ingat segun sa saiyang tataramon.’—Salmo 119:9.

18. An pag-otob sa mga pagirumdom nin Dios mapangyari sa sato na gumibo nin anong positibong mga lakdang?

 ¹⁸ An mga pagirumdom ni Jehova bako sanang pinatatanidan kita dapit sa mga bagay na dai niato dapat gibohon. An pag-otob sa saiyang mga pagirumdom mapangyari sa sato na gumibo nin positibong aksion, na pinahihiro kitang magtiwala nin lubos ki Jehova asin kamotan sia sa bilog niatong puso, kalag, isip, asin kosog. (Deuteronomio 6:5; Salmo 4:5; Talinhaga 3:5, 6; Mateo 22:37; Marcos 12:30) An mga pagirumdom nin Dios minomotibar man kita na kamotan an satong kataed. (Levitico 19:18; Mateo 22:39) Kita nangorognang nagpapaheling nin pagkamoot sa Dios asin sa kataed paagi sa paggibo kan kabotan nin Dios asin paghiras sa iba kan nagtatao nin buhay na “kaaraman nin Dios.”—Talinhaga 2:1-5.

An Pag-otob sa mga Pagirumdom ni Jehova Nangangahulogan nin Buhay!

19. Paano niato ikapaheheling sa iba na praktikal asin kapakipakinabang an paghimate sa mga pagirumdom ni Jehova?

¹⁹ Kun ootobon ta an mga pagirumdom ni Jehova asin tatabangan an iba na gibohon man iyan, ililigtas ta an satong sadiri asin an mga naghihinanyog sa sato. (1 Timoteo 4:16) Paano niato ikapaheheling sa iba na an paghimate sa mga pagirumdom ni Jehova talagang praktikal asin kapakipakinabang? Paagi sa pag-aplikar kan mga prinsipyo sa Biblia sa sato mismong buhay. Sa siring na paagi an mga “may tamang tendensia sa buhay na daing katapusan” magkakaigwa nin ebidensia na an dalan na sinasabi sa Tataramon nin Dios iyo an talagang pinakamarahay na dapat lakawan. (Gibo 13:48) Maheheling man ninda na ‘an Dios tunay nanggad na yaon sa sato’ asin mapahihiro sinda na umayon sa sato sa pagsamba sa Soberanong Kagurangnan na si Jehova.—1 Corinto 14:24, 25.

20, 21. An mga pagirumdom nin Dios asin an saiyang espiritu mapangyari sa sato na gibohon an ano?

²⁰ Paagi sa pagpadagos sa pag-adal sa Kasuratan, pag-aplikar kan satong nanonodan, asin lubos na pag-aprobetsar sa espirituwal na mga probisyon ni Jehova, mamomotan ta nin labi-labi an saiyang mga pagirumdom. Kun hinihimate, tatabangan kita kan mga pagirumdom na ini na isolog an “bagong personalidad na linalang segun sa kabotan nin Dios sa tunay na katanosan asin kaimbodan.” (Efeso 4:20-24) An mga pagirumdom ni Jehova asin an saiyang banal na espiritu mapangyari sa sato na ipaheling an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri—mga kualidad na laen na marhay sa mga ugale kan kinaban na namumugtak sa kapangyarihan ni Satanas! (Galacia 5:22, 23; 1 Juan 5:19) Kun siring, makapagpapasalamat kita kun ipinagigirumdom sa sato an mga kahagadan ni Jehova durante kan satong personal na pag-adal sa Biblia, kan nombradong kamagurangan, asin sa satong mga pagtiripon, asamblea, asin kombension.

²¹ Huling inootob ta an mga pagirumdom ni Jehova, kita nakapaggagayagaya dawa kun nagdudusa dahel sa katanosan. (Lucas 6:22, 23) Kita nag-aasa sa Dios na iligtas kita sa pinakapeligrosong mga situwasyon. Iyan nangorognang mahalaga ngonyan ta an gabos na nasyon tinitiripon na para sa “guerra kan dakulang aldaw nin Dios na Makakamhan sa gabos” sa Har–​Magedon.—Kapahayagan 16:14-16.

22. Ano an maninigong magin determinasyon niato mapadapit sa mga pagirumdom ni Jehova?

²² Tanganing mag-ako kita kan dai na kutana maninigong balaog na buhay na daing katapusan, dapat niatong kamotan nin labi-labi an mga pagirumdom ni Jehova asin kuyogon iyan nin bilog na puso. Kun siring magkaigwa logod kita kan espiritu kan salmista na nag-awit: “An katanosan kan saimong mga pagirumdom sagkod sa panahon na daing talaan. Ipasabot mo sa sako, tanganing ako padagos na mabuhay.” (Salmo 119:144) Asin ipaheling logod niato an determinasyon na risang-risa sa mga tataramon kan salmista: “Nag-apod ako sa saimo [Jehova]. Ligtasan ako! Asin ootobon ko an saimong mga pagirumdom.” (Salmo 119:146) Iyo, paagi sa tataramon asin gibo, patunayan ta na talagang namomotan ta nin labi-labi an mga pagirumdom ni Jehova.

Ano an Isisimbag Nindo?

• Paano minansay kan salmista an mga pagirumdom ni Jehova?

• Taano ta kaipuhan niato an mga pagirumdom nin Dios?

• Ano an kabtang kan satong mga pagtiripon kun dapit sa mga pagirumdom nin Dios?

• Paano kita isinisiblag kan mga pagirumdom ni Jehova sa kinaban na ini?

[Mga Hapot Para sa Pag-adal]

[Ritrato sa pahina 15]

Namotan nin labi-labi kan salmista an mga pagirumdom ni Jehova

[Mga Ritrato sa pahina 16, 17]

Sa pag-arog sa halimbawa ni Ana, nagdedesidir daw kamo na dai magpalta sa mga pagtiripon?

[Ritrato sa pahina 18]

An paghimate sa mga pagirumdom ni Jehova isinisiblag kita bilang malinig asin inaako para sa paglilingkod sa saiya