Bareta kan mga Parabalangibog kan Kahadean

Tinatawan ni Jehova nin Pahingaloan an Saiyang Banwaan

AN MAY lindong na pahingaloan sa sarong dalan sa bukid ikinaoogmang marhay na maheling nin sarong kapoy na nagbabaklay. Sa Nepal, an siring na mga pahingaloan inaapod na chautara. An sarong tipikong chautara puedeng yaon sa kataed nin sarong marambong na poon nin banyan, sarong malimpoy na lugar na puedeng tumukaw asin magpahingalo. An pagtogdok nin chautara sarong akto nin kabootan, asin an kadaklan na kagtao kaiyan dai nagpapamidbid.

An mga eksperyensia hale sa Nepal nagpapaheling kun paano si Jehova Dios nagigin sarong Gikanan nin kagayagayahan asin espirituwal na kaginhawahan para sa dakol na kapoy na “nagbabaklay” sa sistemang ini nin mga bagay.—Salmo 23:2.

• Si Lil Kumari nag-eerok sa magayon na siudad nin Pokhara, na kahangahangang natatanaw an natatahoban nin niebeng alitoktok kan Kabukidan nin Himalaya. Alagad huling nahahadit sa paragastos kan pamilya, an pagmate ni Lil Kumari mayo na nin malalaoman. Kan an saro sa Mga Saksi ni Jehova magsongko sa saiya, napahiro sia kan maliwanag na paglaom sa Biblia asin tolos-tolos na nakiolay na sia adalan sa Biblia.

Minsan ngani nagustohan ni Lil Kumari an pag-adal, bakong pasil an magpadagos dahel sa makosog na pagtumang nin pamilya. Alagad dai sia nag-ontok. Sia regular na nag-aatender sa Kristianong mga pagtiripon asin iinaaplikar an saiyang nanonodan, nangorogna an may labot sa pagpasakop nin agom na babae. Bilang resulta, narealisar kan saiyang agom asin kan saiyang ina na an pag-adal sa Biblia ni Lil Kumari nagtatao nin pakinabang sa bilog na pamilya.

An saiyang agom asin dakol pang paryente nag-aadal na ngonyan sa Tataramon nin Dios. Sa sarong dai pa sana nahahaloy na asambleang ginibo sa Pokhara, si Lil Kumari nakinabang sa programa kaiba an 15 niang paryente. Sabi nia: “An harong ko nagin matoninong na lugar huli ta an samong pamilya nagkakasararo ngonyan sa tunay na pagsamba, asin nanompongan ko an tunay na katoninongan nin isip.”

• Minsan ngani ilegal sa Nepal an pagpalaenlaen nin klase sosyal, iyan igwa pa man giraray nin makosog na impluwensia sa pamumuhay kan mga tawo. Sa siring, dakol an interesado sa sinasabi kan Biblia manongod sa pagkapantaypantay asin dai pagpaorog. An pakanood na “an Dios daing ipinaoorog” nakapabago nin dakula sa buhay ni Surya Maya asin kan saiyang pamilya.—Gibo 10:34.

Napurisaw si Surya Maya sa inhustisya kan pagpalaenlaen sa klase sosyal asin sa pagabat kan hararom an pagkagamot na mga tradisyon asin kostumbre. Huling sarong debotong babae, si Surya Maya dakol nang taon na naghahagad nin tabang sa saiyang mga dios na idolo. Alagad dai sinimbag an saiyang mga pamibi. Sarong aldaw kan sia nag-aarang nin tabang, an saiyang sais anyos na makoapong babae na si Babita nagrani sa saiya asin naghapot: “Taano po ta nag-aarang kamo nin tabang sa mga idolo na mayo man nin magigibo?”

An ina palan ni Babita nakikipag-adal sa Biblia sa saro kan Mga Saksi ni Jehova. Entusiastiko si Babita na inimbitaran an saiyang lola sa sarong Kristianong pagtiripon. Kan mag-atender si Surya Maya, nasorpresa sia na maheling an mga tawo na laen-laen an klase sosyal na maogmang nag-iiribanan na mayo nin ano man na prehuwisyo. Tolos-tolos siang nakiolay na sia adalan sa Biblia. Minsan ngani nagresulta ini sa pagrayo sa saiya kan saiyang kataraed, dai nanluya an saiyang boot; ni nakaolang sa saiya na umoswag sa espirituwal an saiyang limitadong kakayahan sa pagbasa asin pagsurat.

Walong taon an nag-agi, asin an anom na miembro kan saiyang pamilya, kabale an saiyang agom asin tolong aki, nagin mga Saksi ni Jehova. Si Surya Maya ngonyan saro nang bilog na panahon na ministro, sarong regular payunir, na magayagayang tinatabangan an iba na butasan an saindang magabat na mga pagabat sa tunay na pahingaloan na solamente si Jehova an makatatao.