Tinatawan ni Jehova nin Puersa an Napapagal

“[Si Jehova] nagtatao nin puersa sa napapagal; asin sa saro na mayo nin dinamikong enerhiya saiyang pinadadakol an bilog na kosog.”—ISAIAS 40:29.

1. Iilustrar an puersa na nasa mga bagay na linalang nin Dios.

DAING limite an puersa ni Jehova. Asin kanigoan na dinamikong enerhiya an nasa mga bagay na saiyang linalang! An saditon na atomo—an mismong sangkap nin gabos na bagay—sadit-sadit kaya an sasarong turo nin tubig may sarong gatos na bilyon bilyon na atomo. * An gabos na buhay sa satong globo depende sa enerhiya na pinoprodusir nin atomikong mga reaksion sa saldang. Alagad guranong enerhiya kan saldang an kaipuhan tanganing masusteniran an buhay sa daga? An nakaaabot sa daga saditon na parte kan gabos na enerhiya na pinoprodusir kan saldang. Minsan siring, an saditon na parte kan enerhiya kan saldang na minaabot sa daga dai masokol an kalabihan sa kabilogan na enerhiya na ginagamit sa mga industriya kan kinaban.

2. Sa pundamental, ano an sinasabi kan Isaias 40:26 manongod sa puersa ni Jehova?

² Baga man iniisip niato an atomo o tinatawan niato nin atension an mahiwason na uniberso, nagugulat kita sa makangingirhat na puersa ni Jehova. Bakong makangangalas na nasabi nia: “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan, na gabos inaapod nia sa  mismong ngaran. Huli sa kadakolan nin dinamikong enerhiya, mantang sia man makosog an puersa, ni saro sa sainda mayong nawawara”! (Isaias 40:26) Iyo, si Jehova “makosog an puersa,” asin sia an Burabod kan “dinamikong enerhiya” na ginamit sa paglalang sa enterong uniberso.

Labi sa Ordinaryong Puersa an Kaipuhan

3, 4. (a) Ano an nagkapirang bagay na puedeng makapagal sa sato? (b) Anong hapot an kaipuhan na estudyaran?

³ Minsan ngani daing limite an puersa nin Dios, an mga tawo napapagal nanggad. Saen man kita magduman, nakakaheling kita nin mga tawong pagal. Napapagmata sindang pagal, minalaog sa trabaho o eskuelahan na pagal, minapuling pagal, asin natotorog na bako sanang pagal kundi pagal-pagal. An nagkapira nagmamawot na may madumanan sinda asin magkaigwa nin kadikit na pahingalo na kaipuhan nindang marhay. Bilang mga lingkod ni Jehova, kita napapagal man, ta an satong buhay na may diosnon na debosyon nagkakaipo nin makosog na paghihingoa. (Marcos 6:30, 31; Lucas 13:24; 1 Timoteo 4:8) Asin dakol an iba pang bagay na nakauubos kan satong kosog.

⁴ Dawa kita mga Kristiano, bako kitang libre sa mga problemang inaagihan nin mga tawo sa pankagabsan. (Job 14:1) An helang, mga remalaso pinansial, o iba pang problema na lakop sa buhay puedeng gikanan nin pagkadesganar, na may nakapanluluyang epekto. Dagdag pa sa mga kadepisilan na ini an mga pagbalo na inaagihan sana kan mga pinaglalamag huli sa katanosan. (2 Timoteo 3:12; 1 Pedro 3:14) Huli sa pan-aroaldaw na mga sakit hale sa kinaban asin sa oposisyon sa satong gibong paghuhulit kan Kahadean, an nagkapira sa sato tibaad pagalon na kaya gusto na niatong manluya sa paglilingkod ki Jehova. Apuera kaini, sa paghihingoa na raoton an integridad niato sa Dios, ginagamit ni Satanas na Diablo an gabos na paaging magagamit nia. Kun siring, paano niato makukua an espirituwal na kosog na kaipuhan tangani na dai kita mapagal asin umontok?

5. Taano ta labi sa kosog nin tawo an kaipuhan tanganing magibo an Kristianong ministeryo?

⁵ Para sa espirituwal na kosog, dapat na kita manarig ki Jehova, an Kaglalang na makapangyarihan sa gabos. Sinabi ni apostol Pablo na an kaipuhan sa Kristianong ministeryo labi sa ordinaryong puersa nin mga tawong bakong sangkap. Isinurat nia: “Igwa kami kan kayamanan na ini sa mga lalagan na gibo sa dalipay, tanganing an puersa na labi sa ordinaryo magin sa Dios asin bakong an gikan mismo sa samo.” (2 Corinto 4:7) Ginigibo kan linahidan na mga Kristiano an “ministeryo nin pakiulian” na may suporta kan kairiba ninda na daganon an paglaom. (2 Corinto 5:18; Juan 10:16; Kapahayagan 7:9) Mantang ginigibo niato na mga tawong bakong sangkap an gibohon nin Dios sa ibong nin paglamag, dai niato magigibo iyan sa sato sanang kosog. Tinatabangan kita ni Jehova paagi sa saiyang banal na espiritu, asin sa siring ibinabantog kan satong kaluyahan an kadakulaan kan saiyang puersa. Asin nararanga nanggad kita kan garantiya na “susuportaran ni Jehova an mga matanos”!—Salmo 37:17.

‘Si Jehova Iyo an Satong Enerhiya nin Buhay’

6. Paano sinisierto sa sato kan Kasuratan na si Jehova an Burabod niato nin kosog?

⁶ An satong langitnon na Ama “makosog an puersa” asin pasil sanang pabagsikon kita. Sa katunayan, sinasabi sa sato: “[Si Jehova] nagtatao nin puersa sa napapagal; asin sa saro na mayo nin dinamikong enerhiya saiyang pinadadakol an bilog na kosog. An mga aking lalaki magkakaparagal sagkod makakapoy, asin an hoben na mga lalaki magkakapurukan nanggad, alagad an mga naglalaom ki Jehova magkakamit nin bagong puersa. Sinda maralayog na may mga pakpak na siring sa agila. Sinda madaralagan asin dai makakapoy; sinda maralakaw asin dai magkakaparagal.” (Isaias 40:29-31) Huli sa nag-oorog na mga sakit, tibaad kun beses an pagmate niato garo kita pagal-pagal nang paradalagan na garo baga dai na kaya kan saiyang mga tabay. Alagad nasa enotan na sana an sagkodan kan paorumbasan para sa buhay, asin dai kita dapat na sumuko. (2 Cronica 29:11) An satong Kaiwal, an Diablo, naglilibot na “siring sa nagngangarob na leon,” asin gusto nia kitang paontokon. (1 Pedro 5:8) Girumdomon niato na ‘si Jehova iyo an satong kosog asin satong kalasag,’ asin abunda an mga probisyon na ginibo nia ‘sa pagtao nin puersa sa napapagal.’—Salmo 28:7.

7, 8. Ano an prueba na pinakosog ni Jehova si David, Habacuc, asin Pablo?

⁷ Si David tinawan ni Jehova kan kosog na kaipuhan tanganing makapagpadagos sa ibong nin grabeng mga kaolangan. Kun siring, may lubos na pagtubod asin kompiansa, nagsurat si David: “Paagi sa Dios kita magkakamit nin enerhiya nin buhay, asin saiyang babatayan an satuyang mga kaiwal.” (Salmo 60:12)  Si Habacuc pinakosog man ni Jehova tangani na matapos nia an asignasyon sa saiya bilang propeta. Sabi kan Habacuc 3:19: “Si Jehova na Soberanong Kagurangnan iyo an sakong enerhiya nin buhay; asin gigibohon nia an sakong mga bitis na arog kan sa usang babae, asin palalakawon nia ako sa sakong mga kalangkawan.” Mahalaga man na mangnohon an halimbawa ni Pablo, na nagsurat: “Igwa ako kan kosog para sa gabos na bagay huli sa [Dios] na nagtatao nin puersa sa sako.”—Filipos 4:13.

⁸ Kapareho ni David, Habacuc, asin Pablo, maninigo kitang tumubod sa abilidad nin Dios na pakosogon kita asin sa saiyang kapangyarihan na iligtas kita. Huling aram na an Soberanong Kagurangnan na Jehova iyo an Burabod niato nin “enerhiya nin buhay,” estudyaran niato ngonyan an nagkapirang paagi na makakua nin espirituwal na kosog sa mga probisyon na abundang itinatao nin Dios.

Espirituwal na mga Probisyon sa Pagpabagsik sa Sato

9. Ano an kabtang kan Kristianong mga publikasyon sa pagtao sato nin sustansia?

⁹ An utitok na pag-adal kan Kasuratan sa tabang nin Kristianong mga publikasyon makapababagsik asin makasusustenir sa sato. Nag-awit an salmista: “Maogma an tawo na . . . an saiyang kaogmahan yaon sa ley ni Jehova, asin sa saiyang ley sia nagbabasa sa maluya sanang tingog aldaw asin banggi. Asin sia nanggad magigin siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.” (Salmo 1:1-3) Kun paanong kita dapat na magkakan tanganing mapagdanay an pisikal na kosog, kaipuhan na kita maglaog sa isip nin espirituwal na kakanon na itinatao nin Dios paagi sa saiyang Tataramon asin Kristianong mga publikasyon tanganing mapagdanay an satong espirituwal na kosog. Kun siring, kaipuhan an makahulogan na pag-adal asin paghorophorop.

10. Noarin kita puedeng makanompong nin oras para sa pag-adal asin paghorophorop?

¹⁰ Kapakipakinabang nanggad na horophoropon “an hararom na mga bagay nin Dios.” (1 Corinto 2:10) Alagad noarin kita makanonompong nin oras para sa paghorophorop? An aki ni Abraham na si Isaac “nasa luwas na naglalakawlakaw tanganing maghorophorop sa oma kan nag-aagaw-diklom na.” (Genesis 24:63-67) An salmistang si David ‘naghorophorop sa Dios durante kan mga pagbantay sa banggi.’ (Salmo 63:6) Puede niatong adalan an Tataramon nin Dios asin horophoropon iyan sa aga, sa pag-agaw-diklom, sa banggi—sa katunayan, sa ano man na oras. An siring na pag-adal asin paghorophorop nagbubunga kan saro pa sa mga probisyon ni Jehova na nakapakokosog sa espirituwal—an pamibi.

11. Taano ta maninigo niatong tawan nin dakulang importansia an regular na pamimibi?

¹¹ An regular na pamimibi sa Dios nakatatabang na mapabagsik kita. Kun siring, logod na kita ‘magmaigot sa pamimibi.’ (Roma 12:12) Kun beses, kaipuhan na espesipiko niatong hagadon an kadonongan asin kosog na kaipuhan tanganing makaya an sarong pagbalo. (Santiago 1:5-8) Satuya man na pasalamatan asin omawon an Dios kun namamasdan niato an pagkaotob kan saiyang mga katuyohan o naheheling niato na pinakosog nia kita na makapagpadagos sa paglilingkod sa saiya. (Filipos 4:6, 7) Kun kita magdadanay na dayupot ki Jehova sa pamibi, nungka nia kitang pababayaan. “Uya!” an awit ni David, “an Dios iyo an sakong paratabang.”—Salmo 54:4.

12. Taano ta maninigo niatong arangon sa Dios an saiyang banal na espiritu?

¹² Pinababagsik kita asin pinakokosog kita kan satong langitnon na Ama paagi sa saiyang banal na espiritu, o puersa aktiba. Isinurat ni Pablo: “Ilinuluhod ko an sakong mga tuhod sa Ama . . . sa katuyohan na itao nia sa saindo segun sa mga kayamanan kan saiyang kamurawayan na kamo magin poderoso dian sa pagkatawo nindo sa laog na may puersa paagi kan saiyang espiritu.” (Efeso 3:14-16) Maninigo na arangon niato an banal na espiritu, na kompiado na kita bebendisyonan kaiyan ni Jehova. Nangatanosan si Jesus: Kun an aki maghagad nin sira, an itatao daw sa saiya nin sarong mamomoton na ama halas? Siempre dai. Huli kaini, an konklusyon nia: “Kun kamo, minsan [makasalan asin sa siring poko mas o menos] maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa  mga naghahagad sa saiya!” (Lucas 11:11-13) Mamibi kita na may siring na kompiansa asin pirme niatong girumdomon na an fiel na mga lingkod nin Dios puedeng “magin poderoso” na may puersa paagi kan saiyang espiritu.

An Kongregasyon Tabang na Nagpapakosog

13. Ano an maninigong magin punto de vista niato sa Kristianong mga pagtiripon?

¹³ Pinababagsik kita ni Jehova paagi sa mga pagtiripon kan Kristianong kongregasyon. Sinabi ni Jesus: “Kun saen may duwa o tolo na nagkakatiripon sa ngaran ko, yaon ako sa tanga ninda.” (Mateo 18:20) Kan iyan ipanuga ni Jesus, ipinaliliwanag nia an mga bagay na nagkakaipo kan atension kan mga nangengenot sa kongregasyon. (Mateo 18:15-19) Minsan siring, sa pundamental aplikado an mga tataramon nia sa gabos niatong pagtiripon, asamblea, asin kombension, na pinoponan asin tinatapos nin pamibi sa ngaran nia. (Juan 14:14) Kaya sarong pribilehio na umatender sa siring na Kristianong katiriponan, baga man pira sana an yaon o rinibo an presente. Kun siring, magpaheling kita nin utang na boot sa mga okasyon na ini na an intension pakosogon kita sa espirituwal asin dagkahon kita sa pagkamoot asin marahay na mga gibo.—Hebreo 10:24, 25.

14. Ano an pakinabang niato sa mga paghihingoa nin Kristianong kamagurangan?

¹⁴ An Kristianong kamagurangan nagtatao nin espirituwal na tabang asin pagparigon sa boot. (1 Pedro 5:2, 3) Tinabangan asin pinarigon ni Pablo an boot kan mga kongregasyon na pinaglingkodan nia, arog kan ginigibo ngonyan nin nagbibiaheng mga paraataman. Sa katunayan, hinimuyawot niang makaibanan an mga kapagtubod tangani na magkaigwa nin nakapakokosog na pagriribayan nin pagparigon sa boot. (Gibo 14:19-22; Roma 1:11, 12) Logod na kita pirmeng magpaheling nin pag-apresyar sa satong lokal na kamagurangan asin iba pang Kristianong paraataman, na dakula an kabtang sa pagpakosog sa sato sa espirituwal.

15. Paano an mga kapagtubod niato sa satong kongregasyon nagigin “tabang na nagpapakosog”?

¹⁵ An mga kapagtubod na minakompuesto sa satong kongregasyon puedeng magin “tabang na nagpapakosog.” (Colosas 4:10, 11) Bilang ‘tunay na mga kaibaiba’ matatabangan ninda kita sa mga panahon nin kasakitan. (Talinhaga 17:17) Halimbawa, kan an 220 lingkod nin Dios paluwason sa kampo de konsentrasyon sa Sachsenhausen na guardiado nin Nazi kan 1945, napaatubang sinda sa baklayon na 200 kilometros. Nagbaklay sinda bilang sarong grupo, asin ginuyod kan mas makokosog an mga pinakamaluya sa pirang karetilya. An resulta? Sa sarong pagpamartsa sa mga preso na an manluya pinababayaan na magadan na labing 10,000 na preso sa kampo de konsentrasyon an nagadan, mayo ni sarong Saksi ni Jehova an nagadan. An siring na mga salaysay na minaluwas sa mga publikasyon kan Watch Tower, pati an Yearbook of Jehovah’s Witnesses asin Jehovah’s Witnesses—Proclaimers of God’s Kingdom, nagpapatunay na tinatawan nin Dios nin puersa an saiyang banwaan, kaya dai sinda minaontok.—Galacia 6:9. *

Pinakokosog kan Satong Ministeryo sa Langtad

16. Paano an regular na pakikikabtang sa ministeryo nagpapakosog sa sato sa espirituwal?

¹⁶ An regular na pakikikabtang sa paghuhulit kan  Kahadean nagpapakosog sa sato sa espirituwal. An siring na aktibidad tinatabangan kitang magkonsentrar sa Kahadean nin Dios asin pirmeng isaisip an panahon na daing sagkod asin an maogmang mga esperansa na tagama kaiyan. (Judas 20, 21) An mga panuga sa Kasuratan na ipinakikipag-olay niato sa satong ministeryo nagtatao sa sato nin paglaom asin puede kitang gibohon na arog kadeterminado ni propeta Miqueas, na nagsabi: “Kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.”—Miqueas 4:5.

17. Anong mga suhestion an itinatao mapadapit sa mga pag-adal sa Biblia?

¹⁷ Napakokosog an sato mismong relasyon ki Jehova mantang orog niatong ginagamit an Kasuratan sa pagtotokdo sa iba. Halimbawa, kun pinamamayohan an mga pag-adal sa Biblia sa tabang kan librong Kaaraman na Minagiya Pasiring sa Buhay na Daing Katapusan, madonong na basahon saka pag-olayan an dakol sa sitadong teksto. Ini nakatatabang sa inaadalan asin pinakokosog an satuya mismong espirituwal na pakasabot. Kun an inaadalan nasasakitan na masabotan an sarong ideya o ilustrasyon sa Biblia, bako sanang sarong pag-adal an puedeng gibohon tanganing matapos an sarong kapitulo sa librong Kaaraman. Abaa kita kaogma na mag-andam na marhay asin gumibo nin ekstrang paghihingoa na tabangan an iba na magin dayupot sa Dios!

18. Iilustrar kun paano epektibong ginagamit an librong Kaaraman.

¹⁸ Taon-taon, epektibong ginagamit an librong Kaaraman sa pagtabang sa rinibo na magin nagdusay na lingkod ni Jehova, asin kabilang digdi an dakol na mayo nin inadalan sa Biblia. Halimbawa, kan sia aki pa, dai tinutuyong nadangog nin sarong lalaking Hindu sa Sri Lanka an sarong babaeng Saksi na nagpapaliwanag manongod sa Paraiso. Pakalihis nin nagkapirang taon dinolok nia an babae, asin dai nahaloy pinonan kan agom na lalaki kaini an pakipag-adal sa saiya sa Biblia. Sa katunayan, an barobatang ini nag-adal aroaldaw, asin natapos sa medyo halipot sanang panahon an librong Kaaraman. Nagpoon siang mag-atender sa gabos na pagtiripon, binayaan nia an dati niang relihion, asin nagin siang parahayag kan Kahadean. Kan sia mabautismohan, pinamamayohan na nia an pakipag-adal sa Biblia sa sarong kamidbid.

19. Mantang hinahanap nguna niato an Kahadean, sa ano kita makasisierto?

¹⁹ An paghanap nguna sa Kahadean nagtatao sa sato nin nakapakokosog na kagayagayahan. (Mateo 6:33) Dawa kita nag-aagi nin laen-laen na pagbalo, padagos kitang nagbabalangibog kan maogmang bareta na may kaogmahan asin kaigotan. (Tito 2:14) An dakol sa sato nakaaabot sa mga kahagadan para sa bilog na panahon na paglilingkod bilang payunir, asin an nagkapira naglilingkod sa mga lugar na mas dakula an pangangaipo para sa mga paraebanghelyo. Baga man kita magayagayang nagsusuportar sa intereses kan Kahadean sa mga paaging ini o sa iba pa, kompiado kita na dai lilingawan ni Jehova an satong ginibo asin an pagkamoot na ipinaheheling niato para sa saiyang ngaran.—Hebreo 6:10-12.

Magpadagos sa Kosog ni Jehova

20. Paano niato ikapaheheling na si Jehova an inaasahan niato para sa kosog?

²⁰ Ipaheling nanggad niato nin boluntad saka bilog na puso na kita naglalaom ki Jehova asin nag-aasa sa saiya para sa kosog. Magigibo niato iyan paagi sa lubos na pag-aprobetsar sa espirituwal na mga probisyon nia paagi sa ‘fiel na oripon.’ (Mateo 24:45) An pribado asin kongregasyonal na pag-adal kan Tataramon nin Dios sa tabang nin Kristianong mga publikasyon, odok sa pusong pamibi, espirituwal na tabang kan kamagurangan, marahay na mga halimbawa nin fiel na mga kapagtubod, asin regular na pakikikabtang sa ministeryo kabilang sa mga probisyon na nakapakokosog sa satong relasyon ki Jehova asin nagtatao sa sato nin puersa na magpadagos sa sagradong paglilingkod sa saiya.

21. Paano ipinahayag ni apostol Pedro asin Pablo an pangangaipo nin kosog na itinatao nin Dios?

 ²¹ Sa ibong kan satong kaluyahan bilang tawo, pakokosogon kita ni Jehova na gibohon an saiyang kabotan kun kita mananarig sa saiya para sa tabang. Aram an pangangaipo para sa siring na tabang, isinurat ni apostol Pedro: “Kun may naglilingkod, sia maglingkod na nagsasarig sa kosog na itinatao nin Dios.” (1 Pedro 4:11) Asin ipinaheling ni Pablo an pagsarig nia sa kosog na itinatao nin Dios kan sia magsabi: “Ako nag-oogma sa mga kaluyahan, sa mga pagtuya, sa mga pangangaipo, sa mga paglamag asin kasakitan, dahel ki Cristo. Huli ta kun noarin ako maluya, saka man ako mapuersa.” (2 Corinto 12:10) Ipaheling logod niato an kaparehong kombiksion asin magtao kita nin kamurawayan sa Soberanong Kagurangnan na Jehova, na nagtatao nin puersa sa napapagal.—Isaias 12:2.

[Mga Nota sa Ibaba]

Ano an Isisimbag Nindo?

• Taano an banwaan ni Jehova ta nagkakaipo nin labi sa ordinaryong puersa?

• Ano an prueba sa Kasuratan na tinatawan nin Dios nin puersa an saiyang mga lingkod?

• Ano an nagkapirang espirituwal na probisyon na itinao ni Jehova tanganing mapakosog kita?

• Paano niato ikapaheheling na an Dios an inaasahan niato para sa kosog?

[Mga Hapot Para sa Pag-adal]

[Ritrato sa pahina 12]

Napakokosog an sato mismong relasyon ki Jehova mantang ginagamit niato an Biblia sa pagtotokdo sa iba