Estorya nin Buhay

Bilog na Kalag na Paglilingkod sa Ibong kan mga Pagbalo

ISINAYSAY NI RODOLFO LOZANO

Namundag ako sa Mejico, sa siudad nin Gomez Palacio, Estado nin Durango, kan Setyembre 17, 1917. An Rebolusyon na Mejicano nasa kasagsagan. Minsan ngani natapos an rebolusyon kan 1920, nagpadagos sa laog nin dakol na taon an kariribokan sa ineerokan ming lugar, na nagpangyari na magin masakit na marhay an buhay.

SARONG beses, kan maaraman ni Nanay na magkakaigwa nin enkuentro an puersa kan mga rebelde asin armi, itinago nia ako kaiba an sakong tolong tugang na lalaki asin duwang tugang na babae sa laog kan harong sa laog nin nagkapirang aldaw. Kakadikit kan samong makakakan, asin nagigirumdoman ko na kami nagtatago kan sakong sadit pang tugang na babae sa irarom nin kama. Pakatapos kaiyan, si Nanay nagdesisyon na darahon kaming mga aki sa Estados Unidos, na duman masunod an sakong ama kan huri.

Nag-abot kami sa California kan 1926, dai nahaloy bago nangyari an Grabeng Krisis sa Estados Unidos. Nagpabarobalyo kami kun saen may makukua kaming trabaho, sa mga lugar na arog kan Kababan nin San Joaquin, Santa Clara, Salinas, asin Siudad nin King. Nakanood kaming magtrabaho sa mga oma asin mag-ani nin gabos na klase nin prutas asin gulay. Minsan ngani magabat an trabaho ko kan ako hoben pa, idto nakaoogmang marhay na panahon sa sakong buhay.

Napaabotan kan Katotoohan sa Biblia

Kan Marso 1928, may sarong Estudyante sa Biblia, an apod kaidto sa Mga Saksi ni Jehova, na nagdalaw samo. Sia may edad na, nagtataram nin Kastila na an ngaran Esteban Rivera. An titulo kan pulyeto na iwinalat nia, na “Where Are the Dead?,” nakatudok sa sakong isip, siring man an laog kaiyan. Dawa ako hoben pa kaidto, ipinadagos ko an pag-adal sa Biblia asin pakikiasosyar sa Mga Estudyante sa Biblia. Pag-abot nin panahon, an  sakong ina asin tugang na babae na si Aurora nagin man maigot na mga paraomaw ki Jehova.

Kaidtong kabangaan kan mga taon nin 1930, itinogdok an sarong Kingdom Hall sa San Jose para sa kongregasyon na Ingles an tataramon. Mantang dakol na Hispaniko an nagtatrabaho sa mga oma sa lugar na idto, pinonan mi na hulitan sinda asin magkondukta nin Pag-adal sa Torrengbantayan. Ginibo mi ini sa tabang kan mga Saksi na Hispaniko na taga San Francisco, mga 80 kilometros karayo. Pag-abot nin panahon, nagkaigwa kami nin mga 60 nag-aatender sa mga pagtiripon na Kastila an lenguahe sa Kingdom Hall nin San Jose.

Sa kahurihurihi, kan Pebrero 28, 1940, sinimbolisaran ko an sakong pagdusay ki Jehova paagi sa bautismo sa tubig sa sarong asamblea sa San Jose. Kan suminunod na taon, ninombrahan ako bilang payunir, sarong bilog na panahon na ministro kan Mga Saksi ni Jehova. Dangan kan Abril 1943, inimbitaran ako na bumalyo sa Stockton, sarong siudad na mga 130 kilometros karayo, tanganing organisaron an sarong kongregasyon na Kastila an lenguahe. Kan panahon na idto, naglilingkod ako bilang nangengenot na paraataman kan kongregasyon na Ingles sa San Jose, asin pinangangatamanan ko man an mga Saksing nagtataram nin Kastila duman. Pakatapos na iareglo na asikasohon nin iba an mga paninimbagan na ini, nagbalyo ako sa Stockton.

Binalo an Integridad

Poon kan 1940, paorootro akong ipinaapod sa atubangan kan konseho sa pag-apod sa serbisyo, alagad sa kada pag-apod iginalang an sakong paninindogan bilang sarong habong magsoldados huli sa konsensia. Dai nahaloy kan an Estados Unidos uminentra sa ikaduwang guerra mundial kan Disyembre 1941, nadagdagan an pangigipit kan konseho sa pag-apod sa serbisyo. Sa katapustapusi, kan 1944, ako ibinilanggo. Mantang naghahalat nin sentensia, ibinugtak ako sa sirong kaiba nin mga kriminal. Nakaaaram na saro ako sa mga Saksi ni Jehova, an dakol sa sainda naghapot kun paano makaaapektar sa saindang kamugtakan sa atubangan nin Dios an mga krimen na ginibo ninda.

An mga Saksi sa San Jose nagpiansa sako tanganing ako makaluwas, mantang naghahalat nin pagbista. Kinaptan nin sarong abogado sa Los Angeles na nagrerepresentar sa mga demandado sa mga kaso na may labot sa diretso sibil an sakong kaso na daing bayad. An huwes nagdesisyon na palibrehon ako sa kondisyon na ako pumondo sa pagpapayunir, magkaigwa nin sekular na trabaho, asin magreport sa mga autoridad pederal kada bulan. Dai ko inako an desisyon na iyan, kaya ako sinentensiahan na mabilanggo nin duwang taon sa bilibid nin Isla Mcneil sa Estado nin Washington. Duman ginamit ko an sakong panahon sa sigidong pag-adal sa Biblia. Nag-adal man akong magmakinilya. Dai pang duwang taon, pinaluwas ako huli sa marahay na gawe-gawe. Iinareglo ko  tolos-tolos na ipadagos an ministeryo bilang payunir.

Pinahiwas na Aktibidad

Kan tiglipot nin 1947, iinasignar akong maghulit sa mga nagtataram nin Kastila sa Siudad nin Colorado, Texas, kaiba an sarong kaibaibang payunir. Alagad grabe an lipot kaya kami nagduman sa San Antonio tanganing makaeksperyensia nin mas mainit na klima. Minsan siring, nag-oran nin grabe duman kaya naabala an samong ministeryong pagharongharong. Madaling naubos an samong kuarta. Sa laog nin pirang semana nabuhay kami sa mga sanwits na hilaw na repolyo an palaman asin tsa na alfalfa. An sakong kaibaiba nagpuli, alagad ako nagdanay. Kan maaraman kan mga Saksi na nagtataram nin Ingles an sakong pisikal na mga pangangaipo, pinonan ninda akong tabangan.

Kan suminunod na tigsoli, nagbalik ako sa sakong asignasyon sa Siudad nin Colorado, asin pag-abot nin panahon nabilog an sarong sadit na kongregasyon na Kastila an lenguahe. Dangan nagbalyo ako sa Sweetwater, Texas, na duman nagtabang ako na mabilog an saro pang kongregasyon na Kastila an tataramon. Mantang nasa Sweetwater, nakaresibi ako nin surat na iniimbitaran ako sa ika-15 klase kan Paadalan sa Biblia kan Watchtower sa Gilead para sa pagsasanay sa pagmimisyonero na nagpoon kaidtong Pebrero 22, 1950. Pakatapos kan gradwasyon kan tig-init na idto sa internasyonal na kombension sa Yankee Stadium sa Nueva York, nagdanay ako sa laog nin tolong bulan sa pankinaban na opisina prinsipal kan Mga Saksi ni Jehova sa Brooklyn. Duman sinanay ako para sa sakong asignasyon sa sangang opisina sa Mejico.

Gibohon sa Mejico

Nag-abot ako sa Siudad nin Mejico kan Oktubre 20, 1950. Pakalihis nin mga duwang semana, ninombrahan ako bilang paraataman sa sanga, asignasyon na kinaptan ko sa laog nin apat may kabangang taon. An eksperyensia na nakamtan ko sa paglilingkod bilang payunir, sa bilanggoan, sa Gilead, asin sa Brooklyn nagin kapakipakinabang na marhay. Pakaabot sa Mejico, naheling ko tolos an pangangaipo na parigonon an espirituwalidad kan samong Mejicanong mga tugang na lalaki asin babae. Nangorognang kaipuhan kaidto na tabangan sinda na mangapot sa halangkaw na mga pamantayan sa moral kan Tataramon nin Dios.

Sa mga nasyon sa Latin-Amerika, kaiba an Mejico, nagin kaugalean na an mga magkailusyon magsaro na dai kinakasal nin legal. An mga relihion sa Kakristianohan, partikularmente an Iglesia Katolika Romana, tinogotan na magpadagos an bakong sono sa Kasuratan na kaugalean na ini. (Hebreo 13:4) Sa siring, an nagkapira nagin mga miembro kan mga kongregasyon kan Mga Saksi ni Jehova, minsan ngani sinda dai kinasal nin legal. Ngonyan ginibo an areglo tangani na an mga siring tawan nin anom na bulan na husayon an mga bagay-bagay. Ta kun dai sinda dai na rerekonoseron bilang mga Saksi ni Jehova.

Para sa dakol, an paghusay kan saindang pamumuhay simple. Kaipuhan sana nindang legalisaron an saindang relasyon paagi sa pagpakasal. An iba mas komplikado an mga situwasyon. Halimbawa, an nagkapira nag-agom nin duwang beses, asin tolong beses pa ngani, na dai noarin man nagkua nin legal na diborsio. Kan an mga kamugtakan panmag-agom sa banwaan ni Jehova sa katapustapusi nagin kaoyon sa mga katokdoan kan Tataramon nin Dios, nakamtan an marahay na espirituwal na mga bendisyon sa laog kan mga kongregasyon.​​—1 Corinto 6:​9-​11.

Kan mga aldaw na idto hababa an grado nin sekular na edukasyon sa Mejico sa pankagabsan. Dawa kaidtong bago ako umabot kan 1950, an sangang opisina pinonan na organisaron an mga klase sa pagbasa asin pagsurat sa mga kongregasyon. Ngonyan an mga klaseng ini inorganisar liwat, asin ginibo an mga areglo na irehistro iyan sa gobyerno. Poon kan 1946, kan pinonan na magkaigwa nin mga rekord, labing 143,000 katawo sa Mejico an natokdoan na magbasa asin magsurat sa mga klase na pinamayohan kan mga Saksi!

An mga ley sa Mejico mapamogol na marhay may labot sa relihion. Minsan siring, kan nakaagi pa sanang mga taon nagkaigwa nin mahalagang mga pagbabago sa bagay na ini. Kan 1992 inaprobaran an sarong bagong ley manongod sa relihiosong bagay-bagay, kaya kan 1993, an Mga Saksi ni Jehova sa Mejico irinehistro bilang sarong relihiosong organisasyon.

Para sa sako an mga pagbabagong ini nagin gikanan nin dakulang kagayagayahan, bagay na inisip ko kutanang imposible kan mas naenot na mga panahon. Sa nag-aging dakol na taon, ako  paorootrong nagsongko sa mga opisina nin gobyerno asin napaatubang sa medyo may pagkadeskompiadong aktitud. Minsan siring, marahay na maheling kun paano inasikaso an mga ini paagi sa Departamento Legal sa samong sangang opisina, kaya ngonyan medyo kadikit na kaolangan an inaatubang mi sa paghuhulit.

Paglilingkod na Kaibaan Sarong Misyonerang Agom

Kan ako umabot sa Mejico, dakol na an yaon sa nasyon na naggradwar sa mas naenot na mga klase nin Gilead. An saro sainda iyo si Esther Vartanian, sarong Armenianang Saksi na nagpoon na magpayunir sa Vallejo, California, kan 1942. Nagpakasal kami kan Hulyo 30, 1955, asin pakatapos kaiyan nagpadagos sa samong asignasyon sa Mejico. Si Esther nagdanay sa pagmimisyonero sa Siudad nin Mejico, asin kami nag-erok sa sangang opisina, na duman nagpadagos akong maglingkod.

Kan 1947, si Esther uminabot sa saiyang enot na destino sa pagmimisyonero sa Monterrey, Nuevo León, Mejico. Sasaro sana an kongregasyon nin 40 Saksi sa Monterrey, alagad kan panahon na sia ibalyo sa Siudad nin Mejico kan 1950, igwa na nin apat na kongregasyon. Sa samong sangang opisina na harani sa Siudad nin Mejico, sa presente igwa nin duwang hoben na gikan nin mga pamilya na inadalan sa Biblia ni Esther kan sia naglilingkod sa Monterrey.

Kaidtong 1950 an teritoryo sa paghuhulit kan mga misyonero sa Siudad nin Mejico kaiba an kadaklan na lugar sa siudad. Binabagtas ninda an saindang destino paagi sa paglakaw o sakay sa luma nang marhay na mga auto na pano-pano nin tawo. Kan ako umabot kan mga huring kabtang kan 1950, may pitong kongregasyon duman. Ngonyan ini nagin nang mga 1,600, na may labing 90,000 na parahayag kan Kahadean sa Siudad nin Mejico, asin kan nakaaging taon, labing 250,000 katawo an nag-atender sa Memorial kan kagadanan ni Cristo duman! Sa nag-aging mga taon, kami ni Esther nagkapribilehio na maglingkod sa dakol kan mga kongregasyon na ini.

 Kun pinoponan mi ni Esther an sarong pag-adal sa Biblia, pirme ming hinihingoa na magkainteres an ama kan pamilya tanganing an bilog na pamilya magin kaayon. Sa siring, naheling niamo an dakol na dakulang pamilya na naglilingkod ki Jehova. Nagtutubod ako na an saro sa mga dahelan kan marikas na pag-oswag nin tunay na pagsamba sa Mejico iyo na an bilog na mga pamilya sa parate sararong minaayon sa tunay na pagsamba.

Binendisyonan ni Jehova an Gibohon

Poon kan 1950 an pag-oswag kan gibohon sa Mejico risang gayo, kapwa sa pag-oswag sa kabilangan asin mga pagbabago sa organisasyon. Tunay na kaogmahan na makakontribwir sa sadit na paagi sa pag-oswag, na naglilingkod kaiba nin mapag-istimar asin maogmang mga tawo.

Si Karl Klein, na naglilingkod bilang miembro kan Namamahalang Grupo kan Mga Saksi ni Jehova, asin an saiyang agom, si Margaret, dinalaw kami mantang sinda nagbabakasyon mga pirang taon na an nakaagi. Gustong maeksperyensiahan ni Tugang na Klein an pulso kan gibohon sa samong Mejicanong teritoryo, kaya sinda ni Margaret nagduman sa Kongregasyon nin San Juan Tezontla, harani sa Siudad nin Mejico, na duman kami nag-aatender kan panahon na idto. Sadit an samong tiriponan, mga 4.5 metros an lakbang asin 5.5 metros an laba. Kan kami umabot, mga 70 katawo an presente na duman, asin haros mayo nang lugar para sa mga nakatindog. An mga maedad na nakatukaw sa mga tukawan, an mga hoben pa sa mga bangko, asin an saradit na aki sa mga ladrilyo o sa salog.

Si Tugang na Klein naghangang marhay huli ta an gabos na aki may andam na Biblia, na hinahanap an mga teksto sa Biblia kasabay kan ispiker. Pakatapos kan pampublikong pahayag, si Tugang na Klein nagpaliwanag mapadapit sa Mateo 13:​19-23 asin nagsabi na sa Mejico igwa nin awad-awad na “marahay na daga” na sinambit ni Jesus. Sa presente, pito sa mga aki na nag-atender kan aldaw na idto an nagtatrabaho sa dakulaon na proyekto nin pagpahiwas kan samong mga pasilidad sa sangang opisina harani sa Siudad nin Mejico. An saro pa naglilingkod sa Bethel, asin nagkapira pa an payunir!

Kan ako umabot sa Siudad nin Mejico, 11 sanang miembro an nasa samong sangang opisina. Ngonyan nasa mga 1,350 na kami na nagtatrabaho sa pasilidad, na mga 250 sa mga ini an nagtatrabaho sa konstruksion kan bagong mga edipisyo kan sangang opisina. Kun matapos na an gabos na gibohon na ini, posible sa 2002, mahihimo mi nang tawan nin lugar an mga 1,200 katawo pa sa samong pinahiwas na mga pasilidad. Kun iisipon na kami mayo pang 7,000 na parahayag kan Kahadean sa bilog na nasyon kan 1950, alagad ngonyan labi na kaming 500,000! Nagsosopay sa kagayagayahan an sakong puso na maheling kun paano binendisyonan ni Jehova an mga paghihingoa kan samong mapakumbabang mga tugang sa Mejico, na naghihingoang marhay na omawon sia.

Pag-atubang sa Dakulang Kadepisilan

An saro sa sakong pinakadakulang mga kadepisilan kasuarin pa sana iyo an helang. Sa pankagabsan, ako nagkaigwa nin marahay na salud. Alagad kan Nobyembre 1988, inatake ako sa puso na biyong nakaapektar sa sakong pisikal na mga kakayahan. Sa tabang ni Jehova, paagi sa ehersisyo asin iba pang terapi, medyo nabawi ko na an sakong kosog, alagad an pirang kabtang kan sakong hawak dai ko pa napahihiro. Padagos akong binobolong asin inaataman sa medikal tanganing malikayan an grabeng kolog nin payo asin iba pang epekto na yaon pa.

Minsan ngani dai ko na magibo an siring kadakol kan gusto kong gibohon, nakanonompong ako nin pagkakontento sa pakaaram na natabangan ko an dakol na makanood manongod sa mga katuyohan ni Jehova asin magin saiyang nagdusay na mga lingkod. Ikinaoogma ko man an pakikipag-olay sa pinakadakol na Kristianong tugang na lalaki asin babae sagkod sa mapupuede kun sinda nagdadalaw sa samong sangang opisina; namamatean ko na kami pareho naparirigon an boot.

An pakaaram na inaapresyar ni Jehova an samong paglilingkod sa saiya asin na an samong ginibo bakong sayang nakapakosog na marhay sa sako. (1 Corinto 15:58) Sa ibong kan sakong mga limitasyon asin helang, isinasapuso ko an mga tataramon sa Colosas 3:​23, 24: “Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo, huli ta aram nindo na hale ki Jehova mag-aako kamo kan tamang balos nin pamana.” Bilang pag-otob sa konsehong ini, nanodan kong maglingkod ki Jehova nin bilog na kalag sa ibong nin mga pagbalo.

[Ritrato sa pahina 24]

Kan 1942 kan ako payunir

[Ritrato sa pahina 24]

Pinonan kan sakong agom an saiyang asignasyon sa pagmimisyonero sa Mejico kan 1947

[Ritrato sa pahina 24]

Kaiba si Esther ngonyan

[Mga Ritrato sa pahina 26]

Sa itaas, wala: An samong pamilyang Bethel sa Mejico kan 1952 kaiba ako na nasa enotan

Sa itaas: Labing 109,000 an nagtiripon sa istadyum na ini sa Siudad nin Mejico para sa sarong pandistritong kombension kan 1999

Sa ibaba, wala: An samong bagong mga pasilidad kan sangang opisina na ngonyan madali nang matapos