‘Dumalagan sa Paaging Iyan’

IMAHINARA na ika yaon sa sarong istadyum sa karawat na pano-pano nin mariribok na mga tawo. An mga atleta pasiring na sa lugar na kakarawatan. An kadaklan nagkukururahaw kan maheling an saindang mga eroe. Yaon an mga hurado tanganing ipaotob an mga susundon. Kan pinonan na an karawat, an kururahaw nin kapangganahan kasabay kan kagsing nin pagkadesganar. Nakabubungog na urupakan an nagsasabat sa mga ganador!

Ika nagdadalan, bako nin sarong karawat sa modernong panahon, kundi nin saro na ginibo kaidtong mga 2,000 na taon na an nakaagi sa Istmus sa Corinto. Digdi, kada duwang taon poon kan ikaanom na siglo B.C.E. sagkod sa ikaapat na siglo C.E., ginigibo an bantog na Karawat sa Istmus. Sa laog nin dakol na aldaw yaon sa karawat an atension kan bilog na Grecia. An karawat bako sanang simpleng atletikong kompetisyon. An mga atleta simbolo nin sa militar na pagigin andam. An mga ganador​—na iniidolo bilang mga eroe​—minaresibi nin mga koronang gibo sa mga dahon nin kahoy. Ngana-nganang regalo an itinatao sa sainda, asin tinatawan sinda kan siudad nin dakulang pension sagkod na sinda nabubuhay.

Pamilyar si apostol Pablo sa Karawat sa Istmus na harani sa Corinto asin ikinomparar nia an pamumuhay nin sarong Kristiano sa sarong atletikong kompetisyon. Paagi sa pagsambit sa mga paradalagan, wrestler, asin boksingero, angay na iinilustrar nia an mga balos kan marahay na pagpatood, tama na pinaghihingoahan, asin pakatagal. Siempre, aram man kan mga Kristianong sinuratan nia an manongod sa karawat na iyan. Daing duda na an nagkapira nagin kabilang sa nagkukururahaw na kadaklan sa istadyum. Kaya pasil nindang masasabotan an ilustrasyon ni Pablo. Kumusta man kita ngonyan? Kita man yaon sa sarong paorumbasan​—para sa buhay na daing katapusan. Paano kita makikinabang sa mga pagkasambit ni Pablo sa mga kompetisyon na iyan?

‘Nakikipagdaogan Sono sa mga Susundon’

An mga kahagadan sa pag-entra sa suanoy na mga karawat estriktong marhay. An sarong paraanunsiar ipepresentar an balang atleta sa mga paradalan asin makurahaw: ‘Igwa daw nin siisay man na may ikaaakusar sa tawong ini na ano man na krimen? Sia daw sarong parahabon o maraot asin biko sa saiyang pamumuhay asin ugale?’ Oyon sa Archaeologia Graeca, “daing tawo na sarong midbid na kriminal, o may [haraning] relasyon sa siisay man na siring, an totogotan na makipagdaogan.” Asin may magabat na penalidad an pagbalga sa mga susundon kan karawat paagi sa pagbabawal sa mga nagbalga na umentra sa mga kompetisyon.

An impormasyon na ini makatatabang sa sato na masabotan an tataramon ni Pablo: “Kun an siisay man nakikipagdaogan sa karawat, dai sia kinokoronahan kun dai sia nakipagdaogan sono sa mga susundon.” (2 Timoteo 2:5) Siring man, sa pagdalagan sa paorumbasan para sa buhay, kaipuhan niatong maabot an mga kahagadan ni Jehova, na sinusunod  an saiyang halangkawon na mga pamantayan sa moral sono sa pagkasabi sa Biblia. Minsan siring, pinatatanidan kita kan Biblia: “An tendensia kan puso nin tawo maraot poon sa saiyang pagkaniaki.” (Genesis 8:21) Sa siring, dawa pakaentra sa paorumbasan, kaipuhan ta na magin maingat sa padagos na pakikipagdaogan oyon sa mga susundon tanganing padagos na mapasatuya an pag-oyon ni Jehova asin makamtan an buhay na daing katapusan.

An pinakadakulang tabang tanganing gumawe sa paaging ini iyo an pagkamoot sa Dios. (Marcos 12:​29-31) An siring na pagkamoot an mapangyari sa sato na mawoton na paogmahon si Jehova asin gumawe oyon sa saiyang kabotan.​—1 Juan 5:3.

‘Pabayaan an Gabos na Kagabatan’

Sa suanoy na karawat, an mga paradalagan dai nagagabatan nin mga gubing o kagamitan. “Sa mga pareha, . . . kinatodan nang maheling an mga nakikilaban na biyong huba,” an sabi kan librong The Life of the Greeks and Romans. An dai pagsulot nin gubing nagtatao sa mga atleta nin liksi, kapasilan sa paghiro, asin kagianan. Mayo nin nasasayang na kosog na resulta kan dai kaipuhan na pagabat. Posibleng marhay na ini an nasa isip ni Pablo kan sia sumurat sa mga Kristianong Hebreo: “Pabayaan ta man an gabos na kagabatan . . . , asin dumalagan kita na may pakatagal sa paorumbasan na ibinugtak sa atubangan ta.”​—Hebreo 12:1.

Anong klaseng pagabat an puedeng makaolang sa sato sa paorumbasan para sa buhay? An saro iyo an pagmawot na magtipon nin dai kaipuhan na materyal na mga bagay o magmantener nin magastos na estilo nin pamumuhay. An nagkapira tibaad umasa sa kayamanan para sa seguridad o ibilang iyan na gikanan nin kaogmahan. An siring na sobrang “pagabat” tibaad makapaluya sa sarong paradalagan sagkod na, sa kahurihurihi, an Dios talagang dai nang gayo importante sa saiya. (Lucas 12:​16-21) An buhay na daing katapusan tibaad magluwas na garo sarong harayong paglaom. ‘An bagong kinaban madatong sa maabot na panahon,’ tibaad mangatanosan an saro, ‘alagad mientras tanto puede ta man na aprobetsaran an iinaalok kan kinaban.’ (1 Timoteo 6:​17-19) An siring na materyalistikong punto de vista pasil sanang marhay na makapasuki sa saro sa paorumbasan para sa buhay o olangon an saro dawa sa pagpoon kaiyan.

Sa Sermon sa Bukid, si Jesus nagsabi: “Mayo nin siisay man na makapaglilingkod sa duwang kagurangnan; huli ta ikaoongis nia an saro asin mamomotan nia an ikaduwa, o magigin dayupot sia sa saro asin isisikwal nia an ikaduwa. Dai kamo makapaglilingkod sa Dios asin sa Kayamanan.” Dangan, pakasaysay kan pag-asikaso ni Jehova sa mga pangangaipo nin mga hayop asin tinanom saka pagsabi na an mga tawo orog na mahalaga kisa mga iyan, sia nagsadol: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakaaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:​24-33.

‘Dumalagan na May Pakatagal’

Bakong gabos na suanoy na pareha haralipot na distansiang daralaganan. An sarong paorumbasan, na an apod doʹli·khos, minaabot sa mga apat na kilometro. Iyan depisil na pagbalo sa kosog asin pakatagal. Oyon sa tradisyon, kan 328 B.C.E., an sarong atleta na an ngaran Ageas, pakatapos na ganahon an paorumbasan na ini, duminalagan papuli sa saiyang siudad na iniistaran, an Argos, tanganing ianunsiar an saiyang panggana. Kan aldaw na iyan, sia duminalagan nin mga 110 kilometros!

An Kristianong paorumbasan halawig man na pagdalagan na babaloon an satong pakatagal. An pagtagal sa paorumbasan na ini sagkod sa katapusan kaipuhan tanganing mag-ako kan pag-oyon ni Jehova asin kan premyo na buhay na daing katapusan. Duminalagan si Pablo sa paorumbasan sa  siring na paagi. Kan madali na siang magadan, sia nakapagsabi: “Nakipaglaban ako kan marahay na pakilaban, natapos ko an paorumbasan, naingatan ko an pagtubod. Poon ngonyan igwa na nin nakatagama para sa sako na korona nin katanosan.” (2 Timoteo 4:​7, 8) Arog ni Pablo, kaipuhan tang ‘taposon’ an paorumbasan. Kun an satong pakatagal manluya huli sana ta an paorumbasan medyo mas halawig kisa inaasahan niato kan enot, dai niato maaako an satong balos. (Hebreo 11:6) Kanigoan kamakamomondo kaiyan, ta naheheling na niato na haranihon na kita sa sagkodan kan pareha!

An Premyo

An mga ganador sa suanoy na atletikong mga kompetisyon sa Grecia tinatawan nin mga korona na sa parate gibo sa mga dahon nin mga kahoy asin dinedekoraran nin mga burak. Sa Karawat sa Pitia, an mga ganador minaresibi nin sarong korona na gibo sa laurel. Sa Karawat sa Olimpia nakukua ninda an mga korona nin mga dahon nin kadlaganon na olibo, mantang sa Karawat sa Istmus tinatawan sinda nin mga koronang gibo sa pino. “Tanganing pukawon an kaigotan kan mga nakikilaban,” an komento nin sarong nag-espesyalisar sa Biblia, “durante kan kompetisyon, an mga korona, an mga premyo sa panggana, asin an mga sanga nin palma, nakalaag sa tolo an bitis na patongan, o lamesa, na yaon sa istadyum, na naheheling kan mga partisipante.” Para sa ganador, an pagsulot kan korona tanda nin dakulang onra. Sa saiyang pag-uli, sia mapangganang nakasakay sa sarong karuwahe palaog sa siudad.

Nasa isip ini, hinapot ni Pablo an mga nagbabasa sa surat nia sa Corinto: “Dai kamo nakakaaram na an mga paradalagan sa paorumbasan gabos nagdadalagan, alagad ta saro sana an nag-aako kan premyo? Dumalagan kamo sa paagi na kamtan nindo iyan. . . . Siempre, sinda ngonyan naggigibo kaiyan tangani na sinda makakua nin koronang matutunawon, alagad kita nin bakong matutunawon.” (1 Corinto 9:​24, 25; 1 Pedro 1:​3, 4) Kanigoan an kalaenan! Bakong arog kan naluluyos na mga korona sa suanoy na mga karawat, an premyo na naghahalat sa mga makakatapos sa pagdalagan sa paorumbasan para sa buhay nungkang mararaot.

Mapadapit sa mas marahay na koronang ini, si apostol Pedro nagsurat: “Kun mahayag na an poon na pastor, aakoon nindo an dai napaparang korona nin kamurawayan.” (1 Pedro 5:4) An ikaaalok daw na ano man na premyo kan kinaban na ini ikakokomparar sa inmortalidad, an premyo na bakong matutunawon na buhay sa langitnon na kamurawayan kaiba ni Cristo?

Ngonyan, an dakulang mayoriya nin Kristianong mga paradalagan bako nang linahidan nin Dios na magin saiyang espirituwal na mga aki asin mayo nin langitnon na paglaom. Dai sinda nagdadalagan para sa premyong inmortalidad. Minsan siring, an Dios nagbubugtak man nin daing kaagid na premyo sa atubangan ninda. Iyan an buhay na daing katapusan sa pagkasangkap sa sarong paraisong daga sa pamamahala kan Kahadean nin langit. Dawa arin na premyo an pinagmamaigotan na makua nin sarong Kristianong paradalagan, sia maninigong dumalagan na may orog na determinasyon asin bagsik kisa siisay man na paradalagan sa sarong atletikong kompetisyon. Taano? Huling an premyo dai mawawara noarin man: “Iyo ini an panuga na ipinanuga nia mismo sa sato, an buhay na daing katapusan.”​—1 Juan 2:25.

Huli sa siring kadaing kaparehong premyo sa atubangan nin Kristianong paradalagan, ano an maninigong magin pagmansay nia sa mga pan-akit kan kinaban na ini? Iyan maninigong magin siring kan ki Pablo, na nagsabi: “Tunay na ibinibilang ko man an gabos na bagay na kapierdihan huli sa daing kaagid na halaga kan kaaraman manongod ki Cristo Jesus na sakong Kagurangnan. Huli saiya tinios ko an pagkawara kan gabos na bagay asin ibinibilang ko an mga iyan na tapok.” Kaoyon kaini, kanigoan kaigot na duminalagan si Pablo! “Mga tugang, dai ko pa ibinibilang an sakong sadiri na nakapangapot na kaiyan; alagad igwa nin sarong bagay manongod kaiyan: Linilingawan ko an mga bagay na nasa hudian asin pinipirit kong aboton  an mga bagay na nasa enotan, pinupunta ko an pasohan para sa premyo.” (Filipos 3:​8, 13, 14) Si Pablo duminalagan na nakatorohok nin marigon sa premyo. Maninigo na iyo man kita.

An Satong Marahayon na Halimbawa

Sa suanoy na karawat, an mga kampeon nagkakamit nin lakop na paghanga. An mga poeta nagsusurat manongod sa sainda, asin an mga eskultor naggigibo nin mga estatuwa ninda. An historyador na si Vera Olivova nagsasabi na sinda “pinamumuraway nin labi-labi asin nagkakamit nin dakulang marhay na popularidad.” Sinda man nagseserbing mga arogan kan mas hoben na henerasyon nin mga kampeon.

Siisay an “kampeon” na nagseserbing marahayon na halimbawa para sa mga Kristiano? Si Pablo nagsisimbag: “Dumalagan kita na may pakatagal sa paorumbasan na ibinugtak sa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kagayagayahan na ibinugtak sa atubangan nia tinagalan nia an hariging pasakitan, na hinamak an kasopganan, asin nagtukaw sa too kan trono nin Dios.” (Hebreo 12:​1, 2) Iyo, tanganing kita manggana sa satong pakipag-umbasan para sa buhay na daing sagkod, kaipuhan kitang magheling nin maingat sa satong Arogan, si Jesu-Cristo. Magigibo ta ini paagi sa regular na pagbasa kan mga pagkasaysay sa Ebanghelyo asin paghorophorop sa mga paagi na maaarog ta sia. Matabang sa sato an siring na pag-adal na masabotan na si Jesu-Cristo makinuyog sa Dios asin pinatunayan an kualidad kan saiyang pagtubod paagi sa saiyang pakatagal. Bilang premyo sa saiyang pakatagal, inako nia an pag-oyon ni Jehova Dios kaiba an dakol na makangangalas na pribilehio.​— Filipos 2:​9-11.

Siempre, an pinakalataw na kualidad ni Jesus iyo an saiyang pagkamoot. “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:13) Tinawan nia nin mas hararom na kahulogan an terminong “pagkamoot” paagi sa pagsabi sa sato na mamotan dawa an satong mga kaiwal. (Mateo 5:​43-48) Huling namomotan nia an saiyang langitnon na Ama, nakanompong si Jesus nin kagayagayahan sa paggibo kan kabotan kan saiyang Ama. (Salmo 40:​9, 10; Talinhaga 27:11) An pagheling ta ki Jesus bilang satong Arogan asin bilang an saro na nagtatalaan kan dapat na magin rikas niato sa depisil na paorumbasan para sa buhay mapahiro man sa sato na mamotan an Dios asin an satong kapwa asin makanompong nin tunay na kagayagayahan sa satong sagradong paglilingkod. (Mateo 22:​37-39; Juan 13:​34; 1 Pedro 2:21) Tandaan na si Jesus dai man naghahagad nin mga bagay na imposible. Inaasegurar nia kita: “Ako mahoyo asin may kababaan an puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”​—Mateo 11:​28-30.

Arog ni Jesus, kaipuhan tang itorohok an satong mga mata sa premyo na nakatagama para sa gabos na makakatagal sagkod sa katapusan. (Mateo 24:13) Kun kita makikipagdaogan sono sa mga susundon, kun pababayaan ta an gabos na kagabatan, asin kun kita madalagan na may pakatagal, magigin kompiado kita sa kapangganahan. An natatanaw na pasohan nag-aapod sa sato na magpadagos! Pinakokosog liwat kita kaiyan huli sa kagayagayahan na iiniinspirar kaiyan sa sato, an kagayagayahan na pinagigin mas pasil na agihan an dalan na yaon sa enotan niato.

[Ritrato sa pahina 29]

An Kristianong paorumbasan sarong halawig na pagdalagan​—nangangaipo iyan nin pakatagal

[Ritrato sa pahina 30]

Bakong arog kan nakokoronahan na mga atleta, an mga Kristiano puedeng mag-antisipar sa sarong dai nararaot na premyo

[Ritrato sa pahina 31]

An premyo para sa gabos na makakatagal sagkod sa katapusan

[Picture Credit Line sa pahina 28]

Diretso sa pagpublikar kan Museo Britano