Gurano Kahiwas kan Saindong Pagkamoot?

“Kamotan mo an saimong kapwa nin siring sa saimo man sana.”​—MATEO 22:39.

1. Kun namomotan niato si Jehova, taano ta dapat man niatong kamotan an satong kapwa?

KAN si Jesus hapoton kun arin an nakalalabi sa gabos na togon, sia nagsimbag: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” Dangan, kinotar nia an ikaduwang togon na kaagid kan enot: “Kamotan mo an saimong kapwa nin siring sa saimo man sana.” (Mateo 22:​37, 39) Iyo, an pagkamoot sa kapwa tanda nin sarong Kristiano. Sa katunayan, kun kita namomoot ki Jehova, dapat na kamotan niato an satong kapwa. Taano? Huli ta ipinaheheling niato an satong pagkamoot sa Dios paagi sa pagkuyog sa saiyang Tataramon, asin ipinagboboot sa sato kan saiyang Tataramon na kamotan an satong kapwa. Huli kaini, kun dai niato namomotan an satong mga tugang na lalaki asin babae, dai puedeng magin tunay an satong pagkamoot sa Dios.​—Roma 13:​8; 1 Juan 2:​5; 4:​20, 21.

2. Anong klase an maninigong magin pagkamoot niato sa satong kapwa?

² Kan sabihon ni Jesus na maninigo niatong kamotan an satong kapwa, an boot niang sabihon bako sanang pakikikatood. Asin an boot niang sabihon pagkamoot na napapalaen sa natural sanang yaon sa laog nin mga pamilya o sa pag-oltanan nin lalaki saka babae. Sia nagtataram manongod sa klase nin pagkamoot ni Jehova para sa saiyang nagdusay na mga lingkod asin ninda para sa saiya. (Juan 17:​26; 1 Juan 4:​11, 19) An sarong eskribang Judio​—na, arog kan namansayan ni Jesus, nagtataram nin intelihente​—nag-oyon ki Jesus na an pagkamoot sa Dios maninigo na “sa bilog na puso asin sa bilog na pakasabot asin sa bilog na kosog.” (Marcos 12:​28-34) Tama sia. An pagkamoot na kinukultibar nin Kristiano para sa Dios sagkod sa kapwa kalabot an satong emosyon asin an satong intelihensia. Iyan namamatean sa puso asin ginigiyahan kan isip.

3. (a) Paano tinokdoan ni Jesus an “sarong lalaki na madonong sa Ley” na sia maninigong magkaigwa nin mahiwas na punto de vista sa kun siisay an saiyang kapwa? (b) Paano an ilustrasyon ni Jesus aplikado sa mga Kristiano ngonyan?

 ³ Arog kan sinasabi ni Lucas, kan sabihon ni Jesus na maninigo niatong kamotan an satong kapwa, “an sarong lalaki na madonong sa Ley” naghapot: “Siisay man nanggad an sakuyang kapwa?” Nagsimbag si Jesus paagi sa sarong parabola. An sarong tawo binugbog, hinabonan, asin binayaan na haros gadan na sa may gilid nin dalan. Nag-agi enot an sarong saserdote dangan an sarong Levita. An duwa parehong dai sia inintindi. Ultimo, nag-agi an sarong Samaritano, naheling an tawong erido, asin guminawe na may dakulang kabootan sa saiya. Arin sa tolo an nagin kapwa kan tawong erido? Malinaw an simbag. (Lucas 10:​25-37) An tawong madonong sa Ley tibaad nabigla na madangog an pagsabi ni Jesus na an Samaritano puedeng magin mas marahay na kapwa kisa saserdote asin Levita. Malinaw nanggad, tinatabangan ni Jesus an tawong idto na kamotan an saiyang kapwa sa mas mahiwas na paagi. An mga Kristiano man namomoot sa siring na paagi. Estudyare an gabos na inaabot kan saindang pagkamoot.

Pagkamoot sa Laog kan Pamilya

4. Saen enot na an Kristiano naggigibo nin pagkamoot?

⁴ Namomotan nin mga Kristiano an mga miembro kan saindang pamilya​—namomotan nin mga agom na babae an mga agom na lalaki, namomotan nin mga agom na lalaki an mga agom na babae, namomotan nin mga magurang an mga aki. (Eclesiastes 9:​9; Efeso 5:​33; Tito 2:4) Totoo, may mga bungkos nin natural na pagkamoot sa kadaklan na pamilya. Minsan siring, an mga bareta nin mga nagsuway na mag-agom, pagmaltrato sa agom, asin pinababayaan o minamaltratong mga aki nagpapaheling na an pamilya nag-aagi nin sakit ngonyan, asin tibaad bakong igo an natural na pampamilyang mga saboot na iyan papagdanayon na sararo. (2 Timoteo 3:​1-3) Tangani na magin talagang mapanggana an saindang buhay pampamilya, kaipuhan na gibohon nin mga Kristiano an klase nin pagkamoot ni Jehova asin ni Jesus.​—Efeso 5:​21-27.

5. Siisay an inaasahan nin mga magurang na tumabang sa pagpadakula sa saindang mga aki, asin ano an nagin resulta para sa dakol?

⁵ Minamansay nin Kristianong mga magurang an saindang mga aki bilang ipinagtiwala ni Jehova, asin sia an inaasahan nindang tumabang sa pagpadakula sa sainda. (Salmo 127:​3-5; Talinhaga 22:6) Paagi digdi kinukultibar ninda an Kristianong pagkamoot, na nakatatabang sa sainda na maingatan an saindang mga aki sa nakararaot na mga impluwensia na puedeng makabiktima sa mga hoben. Bilang resulta, dakol na Kristianong magurang an nakaeeksperyensia nin kagayagayahan na kaagid kan sa sarong ina sa Netherlands. Pakatapos na pagmasdan an bautismo kan aki niang lalaki​—saro sa 575 nabautismohan sa Netherlands kan nakaaging taon​—isinurat nia an minasunod: “Sa oras na ini, nagbunga na an pangangapital ko kan nakaaging 20 taon. An gabos na panahon asin kosog​—saka an sakit, paghihingoa, asin kamondoan​—nalingawan na.” Kanigoan an kaogmahan nia na, sa sadiring kabotan, pinili kan aki nia na maglingkod ki Jehova. Kaiba sa pinakahalangkaw na kabilangan na 31,089 parahayag na nagreport sa Netherlands kan nakaaging taon an dakol na nakanood sa saindang mga magurang na kamotan si Jehova.

6. Paano makatatabang an Kristianong pagkamoot na mapakosog an bungkos nin pag-agoman?

⁶ An pagkamoot inapod ni Pablo na “sangkap na bungkos nin pagkasararo,” asin naiingatan kaiyan an pagsasaro nin mag-agom dawa sa maribok na mga panahon. (Colosas 3:​14, 18, 19; 1 Pedro 3:​1-7) Kan an sarong lalaki sa Rurutu, sadit na isla mga 700 kilometros hale sa Tahiti, magpoon na makipag-adal kan Biblia sa mga Saksi ni Jehova, kontrang marhay an agom nia. Sa kahurihurihi, kinua kaini an mga aki, binayaan an lalaki, asin nag-istar sa Tahiti. Pero, ipinaheling kan lalaki an saiyang pagkamoot paagi sa regular na pagpadara nin kuarta sa babae asin pagtelepono tanganing ihapot kun baga may kaipuhan ini o an mga aki. Sa siring, ginibo kan lalaki an bilog niang makakaya na maotob an saiyang Kristianong mga obligasyon. (1 Timoteo 5:8) Daing ontok an saiyang pamibi na logod magkasararo giraray an saiyang pamilya, asin sa kahurihurihi nagbalik an agom nia. Kan ini bumalik, trinatar nia ini na may “pagkamoot, pakatagal, kahoyoan nin boot.” (1 Timoteo 6:11) Kan 1998, sia nabautismohan asin sa huri labi-labi an kagayagayahan nia kan umoyon an agom nia na mag-adal kan Biblia. An pag-adal na iyan saro sa 1,351 na pinamayohan sa teritoryo na sakop kan sangang opisina sa Tahiti kan nakaaging taon.

7. Segun sa sarong lalaki sa Alemania, ano an nagparigon sa saiyang pag-agom?

⁷ Sa Alemania kinontra nin sarong lalaki an interes  kan saiyang agom sa katotoohan sa Biblia asin kombensido sia na gusto ining dayaon kan mga Saksi ni Jehova. Minsan siring, sa huri nagsurat sia sa Saksi na enot na nakanompong sa saiyang agom: “Mabalos sa pag-introdusir mo kan agom ko sa Mga Saksi ni Jehova. Kan primero, nahahadit ako ta kadakol kong nadangog na negatibo manongod sa sainda. Alagad ngonyan, mantang nakaatender na ako sa mga pagtiripon kaiba kan agom ko, narealisar ko kun gurano ako kanasala. Aram ko na an nadadangog ko katotoohan, asin orog na pinarigon kaiyan an samong pag-agom.” Kaiba sa 162,932 na Saksi ni Jehova sa Alemania​—asin 1,773 sa mga islang sakop kan sangang opisina sa Tahiti​—an dakol na pamilya na sararo sa diosnon na pagkamoot.

Pagkamoot Para sa Satong Kristianong mga Tugang

8, 9. (a) Siisay an nagtotokdo sa sato na kamotan an satong mga tugang, asin an pagkamoot nagpapahiro sa sato na gibohon an ano? (b) Tumao nin halimbawa sa kun paano an pagkamoot makatatabang sa mga tugang na magsinuportaran.

⁸ Sinabi ni Pablo sa mga Kristianong taga Tesalonica: “Kamo mismo tinotokdoan nin Dios na magkaminorootmootan.” (1 Tesalonica 4:9) Iyo, an mga ‘tinotokdoan ni Jehova’ nagkakaminorootmootan. (Isaias 54:13) An pagkamoot ninda ipinahahayag sa gawe-gawe, arog kan ipinaheling ni Pablo kan sia magsabi: “Paagi sa pagkamoot maglingkod kamo sa lambang saro.” (Galacia 5:​13; 1 Juan 3:18) Ini ginigibo ninda, halimbawa, kun saindang sinosongko an may helang na mga tugang na lalaki asin babae, pinaririgon an boot kan mga nagmomondo nin makuri, asin sinusuportaran an maluya. (1 Tesalonica 5:14) An satong tunay na Kristianong pagkamoot nakakokontribwir sa pagtalubo kan satong espirituwal na paraiso.

⁹ Sa Kongregasyon nin Ancón​—saro sa 544 kongregasyon sa Ecuador​—ipinaheling kan mga tugang an saindang pagkamoot sa praktikal na paagi. Huli sa krisis sa pinansial sinda nawaran nin trabaho o entrada, kaya nagdesisyon an mga parahayag na maghanap nin kuarta paagi sa pagtinda nin kakanon sa lokal na mga parasira pagpuli kan mga ini pakalihis nin magdamlagan na paninira. Nagkooperar an gabos, pati mga aki. Kaipuhan sindang pumoon nin ala 1:​00 n.a. tangani na andam na an kakanon sa alas 4:​00 n.a. pagpuli kan mga parasira. An kuartang nakua kan mga tugang pinagbaranga ninda segun sa saindang pangangaipo. An siring na pagtinabangan patunay nin tunay na Kristianong pagkamoot.

10, 11. Paano niato ikapaheheling an pagkamoot sa mga tugang na dai niato personal na kamidbid?

¹⁰ Minsan siring, an satong pagkamoot bako sanang  sa mga Kristiano na personal niatong kamidbid. Sinabi ni apostol Pedro: “Mamoot kamo sa bilog na kasararoan nin mga tugang.” (1 Pedro 2:17) Namomotan niato an gabos niatong tugang na lalaki asin babae huli ta sinda gabos kapwa niato nagsasamba ki Jehova Dios. An mga panahon nin krisis puedeng magtao nin oportunidad na patunayan an pagkamoot na ini. Halimbawa, durante kan 2000 na taon nin paglilingkod, dinestrosar nin grabeng mga baha an Mozambique, asin huli sa nagpapadagos na guerra sibil sa Angola dakol an pobre. An dakol sa 31,725 tugang sa Mozambique asin 41,222 sa Angola naapektaran kan mga pangyayaring ini. Huli kaini, an mga Saksi sa kataed na Aprika del Sur nagpadara nin dakol na probisyones tangani na mapagian an kasakitan kan saindang mga tugang sa kadagaan na iyan. An saindang pagigin andam na ikontribwir an “sobra” ninda sa saindang nangangaipong mga tugang nagpatunay kan saindang pagkamoot.​—2 Corinto 8:​8, 13-15, 24.

¹¹ Naheheling man an pagkamoot kun an mga tugang sa dakol na nasyon nagkokontribwir para sa pagtogdok nin mga Kingdom Hall asin Assembly Hall sa kadagaan na bakong gayong asensado. An sarong halimbawa sa Islas Salomon. Sa ibong nin grabeng ribok, an Islas Salomon nagkaigwa nin 6-porsientong pag-aumento nin parahayag kan nakaaging taon, na may pinakahalangkaw na kabilangan na 1,697. Plinano nindang magtogdok nin Assembly Hall. Minsan ngani dakol na taga isla an naghahale sa nasyon, nag-abot an mga boluntaryo haleng Australia tanganing tumabang sa pagtogdok. Pag-abot nin panahon, kinaipuhan na humale an mga boluntaryo, alagad natokdoan na ninda an lokal na mga tugang na taposon an pundasyon. Ipinaktora haleng Australia an prepabrikado na aserong estruktura kan Assembly Hall, asin an pagkatapos kan magayon na edipisyong ini para sa pagsamba​—sa panahon na abandonado an dakol na lugar na tinotogdokan​—magigin marahay na patotoo sa ngaran ni Jehova asin sa pagkamoot kan mga tugang.

Kapareho nin Dios, Namomotan Niato an Kinaban

12. Paano niato inaarog si Jehova sa satong aktitud sa mga bako niatong kapagtubod?

¹² Limitado daw an satong pagkamoot sa satong pamilya asin sa satong kasararoan nin magturugang? Dai kun kita “mga paraarog sa Dios.” Sabi ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Efeso 5:​1; Juan 3:16) Kapareho ni Jehova Dios, kita minagawe nin mamomoton sa gabos​—pati sa mga bako niatong kapagtubod. (Lucas 6:​35, 36; Galacia 6:10) Nangorogna sa bagay na ini, ihinuhulit niato an maogmang bareta kan Kahadean asin sinasabi sa iba an manongod sa dakulang akto nin pagkamoot nin Dios para sa sainda. Ini puedeng magbunga nin kaligtasan sa siisay man na naghihinanyog.​—Marcos 13:​10; 1 Timoteo 4:16.

13, 14. Ano an nagkapirang eksperyensia nin mga tugang na nagpaheling nin pagkamoot sa mga bakong Saksi, dawa may dakulang personal na molestia?

¹³ Estudyare an apat na ministrong espesyal payunir sa Nepal. An mga ini nadestino sa sarong siudad sa timog-solnopan kan nasyon, asin sa nakaaging limang taon, ipinaheling ninda an saindang pagkamoot paagi sa pasensiosong paghuhulit sa siudad asin hararayong baryo. Tanganing malakopan an saindang teritoryo, sinda parateng nagbibiahe nin dakol na oras sakay sa mga bisikleta sa mga temperatura na labing 40 grado Celsio. An saindang pagkamoot asin “pagtagal sa gibong marahay” nagkabunga nin marahay kan maorganisar an sarong grupo sa pag-adal sa libro sa saro kan mga baryo. (Roma 2:7) Kan Marso 2000, 32 katawo an nag-abot sa pagdangog kan pampublikong pahayag kan nagsosongkong paraataman sa sirkito. An Nepal nagkaigwa nin pinakahalangkaw na kabilangan na 430 parahayag kan nakaaging taon​—9-porsientong pag-aumento. Malinaw na binebendisyonan ni Jehova an kaigotan asin pagkamoot kan mga tugang sa nasyon na iyan.

¹⁴ Sa Colombia may temporaryong mga espesyal payunir na naghulit sa mga Indian na Wayuu. Tanganing magibo ini, kaipuhan na sinda mag-adal nin bagong lenguahe, alagad binalosan an saindang mamomoton na interes kan sa ibong nin makosog na oran, 27 an nag-atender sa sarong pampublikong pahayag. An mamomoton na kaigotan na arog kan ipinaheling kan mga payunir na ini nakakontribwir sa 5-porsientong pag-aumento sa Colombia asin pinakahalangkaw na kabilangan na 107,613 parahayag. Sa Dinamarca gusto nin sarong may edad nang tugang na babae na ipaabot sa iba an maogmang bareta, alagad ta sia baldado. Desidido, nakikomunikar sia sa mga interesado paagi sa pagsurat. Sa ngonyan, may kasuratan siang 42 katawo asin pinamamayohan nia an 11 pag-adal sa Biblia.  Saro sia sa pinakahalangkaw na kabilangan na 14,885 parahayag na nagreport sa Dinamarca kan nakaaging taon.

Kamotan an Saindong mga Kaiwal

15, 16. (a) Maninigo na magin gurano kahiwas an satong pagkamoot segun ki Jesus? (b) Paano trinatar nin responsableng mga tugang sa mamomoton na paagi an saro na nagsahot nin putik tumang sa Mga Saksi ni Jehova?

¹⁵ Sinabi ni Jesus sa tawong madonong sa Ley na an sarong Samaritano puedeng ibilang na kapwa. Sa saiyang Sermon sa Bukid, dinagdagan pa ngani iyan ni Jesus kan sabihon nia: “Nadangog nindo na sinabi, ‘Kamotan an saimong kapwa asin ikaongis an saimong enemigo.’ Minsan siring, ako nagsasabi sa saindo: Padagos na kamotan an saindong mga enemigo asin ipamibi idtong mga naglalamag sa saindo; tanganing mapatunayan nindo na kamo mga aki kan saindong Ama na nasa kalangitan.” (Mateo 5:​43-45) Dawa kun may kontra sa sato, hinihingoa niato na “padagos na daogon an karatan nin karahayan.” (Roma 12:​19-21) Kun mapupuede, ipinaaabot niato sa saiya an satong pinakamahal na marhay na rogaring, an katotoohan.

¹⁶ Sa Ucrania inapod nin sarong artikulo sa diaryong Kremenchuk Herald na sarong peligrosong sekta an Mga Saksi ni Jehova. Ini seryoso ta sa Europa may mga inaapod nin arog kaini an Mga Saksi ni Jehova tangani na makombensir an mga tawo na an mga aktibidad kan mga Saksi maninigong bugtakan nin restriksion o iprohibir. Huli kaini, dinolok an editor asin pinakiolayan na magpublikar nin sarong opisyal na deklarasyon sa prensa sa pagkorehir sa artikulo. Uminoyon sia, alagad kaiba kan opisyal na deklarasyon, inimprenta nia an deklarasyon na an orihinal na artikulo basado sa katotoohan. Kaya dinolok sia giraray nin responsableng mga tugang na may darang dagdag na impormasyon. Sa katapustapusi, narealisar kan editor na sala an orihinal na artikulo, asin nagpublikar sia nin pagbawi. An pagtratar sa saiya nin prangka asin maboot iyo an mamomoton na paagi nin pag-asikaso sa situwasyon na ini, asin iyan nagbunga nin marahay na resulta.

Paano Niato Makukultibar an Pagkamoot?

17. Ano an nagpaparisa na tibaad dai magin pirmeng pasil na gumawe nin mamomoton sa iba?

¹⁷ Pagkamundag nin sarong omboy, iyan madaling namomotan kan mga magurang kaiyan. An mamomoton na pagtratar sa mga nasa edad na bako pirmeng arog kaiyan kanatural. Posibleng marhay na iyan an dahelan na paorootrong sinasabi sa sato kan Biblia na magkaminorootmootan kita​—iyan bagay na kaipuhan niatong kultibaron. (1 Pedro 1:​22; 4:​8; 1 Juan 3:11) Aram ni Jesus na mababalo an satong pagkamoot kan sabihon nia na maninigo niatong patawadon an satong tugang  “sagkod sa pitong polo may pitong beses.” (Mateo 18:​21, 22) Sinadol man kita ni Pablo na ‘padagos na magpatiriostios.’ (Colosas 3:​12, 13) Bakong makangangalas na sinasabi sa sato: “Pagmaigotan nindong magibo an pagkamoot”! (1 Corinto 14:1) Paano niato magigibo ini?

18. Ano an makatatabang sa sato na kultibaron an pagkamoot sa iba?

¹⁸ Enot, puede niatong isaisip pirme an pagkamoot niato para ki Jehova Dios. An pagkamoot na ini makosog na pan-enganyar na kamotan an satong kapwa. Taano? Huli ta kun ginigibo ta iyan, ini nagtatao nin marahay na impresyon sa satong langitnon na Ama asin nagtatao nin kamurawayan saka kaomawan sa saiya. (Juan 15:​8-10; Filipos 1:​9-11) Ikaduwa, puede niatong hingoahon na helingon an mga bagay arog kan pagheling dian ni Jehova. Kada magkasala kita, kita nagkakasala tumang ki Jehova; pero, paorootro nia kitang pinatatawad asin padagos kitang namomotan. (Salmo 86:​5; 103:​2, 3; 1 Juan 1:​9; 4:18) Kun kinukultibar niato an punto de vista ni Jehova, magigin kitang andam na kamotan an iba asin patawadon an saindang mga kasalan tumang sa sato. (Mateo 6:12) Ikatolo, matatratar niato an iba na arog kan gusto niatong magin pagtratar ninda sa sato. (Mateo 7:12) Mantang kita bakong sangkap, parate kitang nagkakaipo nin kapatawadan. Halimbawa, kun nakatataram kita nin mga bagay na nakakokolog sa iba, inaasahan niato na gigirumdomon ninda na an gabos nagkakasala sa dila kun minsan. (Santiago 3:2) Kun gusto niato na trataron kita nin iba sa mamomoton na paagi, maninigo na trataron niato sinda sa mamomoton na paagi.

19. Paano niato mahahagad an tabang kan banal na espiritu sa pagkultibar sa pagkamoot?

¹⁹ Ikaapat, puede niatong hagadon an tabang kan banal na espiritu ta an pagkamoot kabilang sa bunga kan espiritu. (Galacia 5:​22, 23) An mga pakikikatood, saboot sa pamilya, asin romantikong pagkamoot parateng kanaturalan. Alagad kaipuhan niato an tabang kan espiritu ni Jehova na kultibaron an pagkamoot ni Jehova, an pagkamoot na sangkap na bungkos nin pagkasararo. Mahahagad niato an tabang kan banal na espiritu paagi sa pagbasa kan ipinasabong na Biblia. Halimbawa, kun aadalan niato an buhay ni Jesus, maheheling niato kun paano nia trinatar an mga tawo, asin puede niatong adalan na arogon sia. (Juan 13:​34, 35; 15:12) Dugang pa, makahahagad kita ki Jehova nin banal na espiritu, nangorogna sa mga situwasyon na nagigin depisil para sa sato na gumawe sa mamomoton na paagi. (Lucas 11:13) Ultimo, mapagmamaigotan niatong gibohon an pagkamoot paagi sa pagdanay na dayupot sa Kristianong kongregasyon. An pakikiiba sa mamomoton na mga tugang na lalaki asin babae nakatatabang sa sato na makultibar an pagkamoot.​—Talinhaga 13:20.

20, 21. Anong pambihirang patunay nin pagkamoot an ginibo kan Mga Saksi ni Jehova durante kan 2000 na taon nin paglilingkod?

²⁰ Kan nakaaging taon, nagkaigwa nin pinakahalangkaw na kabilangan na 6,035,564 parahayag kan maogmang bareta sa bilog na kinaban. Ginamit kan Mga Saksi ni Jehova an total na 1,171,270,425 oras sa paghanap sa mga indibiduwal tanganing sabihan sinda manongod sa maogmang bareta. Pagkamoot an nagpangyari sa sainda na tagalan an init, an oran, asin an lipot sa pag-otob ninda kan gibohon na ini. Pagkamoot an nagpahiro sa sainda na makipag-olay sa mga kaeskuela saka katrabaho asin dolokon an mga dai kamidbid sa mga kalye saka sa iba pang lugar. An dakol na sinongko kan mga Saksi indiperente, an nagkapira kontra. Minsan siring, an nagkapira nagpaheling nin interes, kaya 433,454,049 pagdalaw liwat an ginibo asin 4,766,631 pag-adal sa Biblia an pinamayohan. *

²¹ Kanigoan na patunay ini gabos sa pagkamoot kan Mga Saksi ni Jehova para sa saindang Dios asin para sa saindang kapwa! An pagkamoot na iyan nungka na malipot. Kompiado kita na sa 2001 taon nin paglilingkod mas dakula pang patotoo an itatao sa katawohan. Magpadagos logod an bendisyon ni Jehova sa saiyang maimbod asin maigot na mga parasamba mantang ‘an gabos nindang gibo nangyayari sa pagkamoot’!​—1 Corinto 16:14.

[Nota sa Ibaba]

Ikapaliliwanag daw Nindo?

• Siisay an inaarog niato kun namomotan niato an satong kapwa?

• Maninigo na magin gurano kahiwas an satong pagkamoot?

• Ano an nagkapirang eksperyensia na patunay sa Kristianong pagkamoot?

• Paano niato makukultibar an Kristianong pagkamoot?

[Mga Hapot Para sa Pag-adal]

 [Tsart sa pahina 18-21]

REPORT KAN 2000 NA TAON NIN PAGLILINGKOD KAN MGA SAKSI NI JEHOVA SA BILOG NA KINABAN

 (Hilingon an publikasyon)

[Mga Ritrato sa pahina 15]

Napagdadanay na sararo nin Kristianong pagkamoot an pamilya

[Mga Ritrato sa pahina 17]

Pinahihiro kita nin pagkamoot na ipaabot sa iba an satong paglaom