Katoninongan Para sa Bagong Milenyo?

AN Internasyonal na Taon Para sa Kultura nin Katoninongan ilinansar sa Paris asin Siudad nin Nueva York kan Setyembre 14, 1999. Ini an idineklarar para sa taon 2000 kan Junta Heneral kan Naciones Unidas. Si Federico Mayor, dating direktor heneral kan UNESCO, solemneng nakiolay na “magbilog nin sarong panglobong mobimiento para sa sarong kultura nin katoninongan asin daing kadahasan.”

An UNESCO may kasabihan na “mantang an mga guerra nagpopoon sa isip nin mga tawo, kaipuhan na sa isip nin mga tawo ikatogdok an mga depensa nin katoninongan.” Kaoyon kaini, an organisasyon nagpaplanong palakopon an sarong kultura nin katoninongan paagi sa “edukasyon, pag-oolay asin kooperasyon.” Si Mr. Mayor nagkomento na bakong igo an “pagigin matoninong, dawa ngani an pagigin kontra sa guerra, kundi an pagigin parapatoninong.”

Makamomondo, an taon 2000 bako nanggad matoninong. An kasaysayan sa presenteng panahon​—kaiba an mga pangyayari sa taon 2000​—nagtampok kan kadaihan nin kakayahan nin tawo na olangon an guerra asin kadahasan sa ibong nin sinserong mga paghihingoa na haleon iyan.

Minsan siring, mahalagang mangnohon na an katoninongan talagang konektado sa edukasyon. Kaidtong mga 2,700 na taon na an nakaagi, ihinula ni propeta Isaias: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.” (Isaias 54:13) An iyo man sanang propeta naheling antes pa an panahon na an mga tawo sa gabos na nasyon mapasiring sa dalisay na pagsamba ki Jehova Dios tanganing manodan an Saiyang mga dalan. Na ano an resulta? “Dadaragopdopon ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.” (Isaias 2:​2-4) Kaoyon kan hula na iyan, an Mga Saksi ni Jehova naggigibo nin pagtotokdo sa bilog na kinaban na nakatabang na sa minilyon na daogon an nasyonalistiko asin rasyal na pagkaongis na iyong pinakagamot kan kadaklan na guerra.

An mga guerra sa katapustapusi mawawara na sa pagsakop kan Kahadean nin Dios, na matao nin nagdadanay na katoninongan asin katiwasayan digdi sa daga. (Salmo 72:​7; Daniel 2:44) Dangan, an mga tataramon kan salmista maootob: “Helinga nindo an mga ginigibo ni Jehova, kun paano sia nagbugtak nin mga ngangalasan sa daga. Pinaoontok nia an mga guerra sagkod sa kaporoporohi kan daga.”​—Salmo 46:​8, 9.