Maparigon nin Pagkamoot

“Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.”​—MATEO 22:37.

1. (a) Ano an nagkapirang bagay na kinukultibar nin sarong Kristiano? (b) Arin an pinakamahalagang kualidad na Kristiano, asin taano?

KINUKULTIBAR nin sarong Kristiano an dakol na bagay tangani na magin epektibong ministro. Tinatawan nin pagdodoon kan librong Talinhaga an halaga nin kaaraman, pakasabot, asin kadonongan. (Talinhaga 2:​1-10) Dinetalye ni apostol Pablo an pangangaipo nin marigon na pagtubod asin makosog na paglaom. (Roma 1:​16, 17; Colosas 1:​5; Hebreo 10:39) Mahalaga man na marhay an pakatagal asin pagpopogol sa sadiri. (Gibo 24:​25; Hebreo 10:36) Minsan siring, may sarong bagay na kun mayo nakababawas sa gabos na ibang bagay asin puede pa ngani iyan na halean nin halaga. An bagay na iyan iyo an pagkamoot.​—1 Corinto 13:​1-3, 13.

2. Paano ipinaheling ni Jesus an halaga nin pagkamoot, asin anong mga hapot an pinalalataw kaini?

² Ipinaheling ni Jesus an halaga nin pagkamoot kan sabihon nia: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Mantang an pagkamoot iyo an tandang nagpapamidbid sa sarong tunay na Kristiano, kaipuhan niatong ihapot an mga hapot na arog kan, Ano an pagkamoot? Taano iyan ta kaipuhan na marhay kaya sinabi ni Jesus na iyan, orog kisa ano pa man, nagpapamidbid sa saiyang mga disipulo? Paano niato makukultibar an pagkamoot? Siisay an maninigo niatong kamotan? Estudyaran niato an mga hapot na ini.

Ano an Pagkamoot?

3. Paano ikalaladawan an pagkamoot, asin taano ta kalabot dian an isip sagkod an puso?

³ OAn sarong deskripsion sa pagkamoot ‘pakamate nin mainit na personal na pagkamuya o hararom na kapadangatan, mainit na pagkagusto sa iba.’ Iyan kualidad na nagpapahiro sa mga tawo na gibohon an ikararahay nin iba, kun beses may kaibang dakulang personal na pagsasakripisyo. An pagkamoot, arog kan pagkaladawan dian sa Biblia, kalabot an isip sagkod an puso. An isip, o intelihensia, may kabtang ta an tawong namomoot may pakaaram na ginigibo ini, na minimidbid na sia asin an ibang tawo na namomotan nia gabos may mga kaluyahan saka nakaaatraer na mga kualidad. Kalabot pa an intelihensia ta may mga namomotan an sarong Kristiano​—kun beses, tibaad tumang sa natural niang inklinasyon​—ta aram nia gikan sa pagbasa nia kan Biblia na gusto nin Dios na gibohon nia iyan. (Mateo 5:​44; 1 Corinto 16:14) Pero, sa pundamental an pagkamoot gikan sa puso. An tunay na pagkamoot sono sa pagkahayag kaiyan sa Biblia nungka na intelektuwal sana. Kalabot dian an hararom na sinseridad asin lubos na emosyonal na dedikasyon.​—1 Pedro 1:22.

4. Sa anong paagi na an pagkamoot bungkos na epektibong marhay?

⁴ An tawo na maimot an puso bihira na may kakayahan na magkaigwa nin talagang mamomoton na relasyon ta an tawong namomoot andam na enoton an intereses nin iba kisa saiya. (Filipos 2:​2-4) An mga tataramon ni Jesus na “igwang orog na kaogmahan sa pagtao kisa pag-ako” nangorognang totoo kun an pagtao sarong akto nin pagkamoot. (Gibo 20:35) An pagkamoot bungkos na epektibong marhay. (Colosas 3:14) Iyan parateng may kaibang pakikikatood, alagad an bungkos nin pagkamoot mas masarig kisa bungkos nin pakikikatood.  An romantikong relasyon nin mag-agom kun beses inaapod na pagkamoot; minsan siring, an pagkamoot na ineenkaminar kan Biblia na kultibaron niato mas nagdadanay kisa pisikal na atraksion. Kun an mag-agom talagang nagkakaminootan, sinda nagdadanay na magkaibanan dawa kun bako nang posible an pisikal na relasyon huli sa mga kamatean nin paggurang o huli ta baldado na an saro sa sainda.

Pagkamoot—Sarong Kaipuhan na Kualidad

5. Taano an pagkamoot ta kaipuhan na kualidad para sa sarong Kristiano?

⁵ Taano an pagkamoot ta kaipuhan na kualidad para sa sarong Kristiano? Enot, huli ta pinagbotan ni Jesus an saiyang mga parasunod na magkaminorootmootan. Sinabi nia: “Kamo mga katood ko kun ginigibo nindo an ipinagboboot ko sa saindo. An mga bagay na ini ipinagboboot ko sa saindo, na kamo magkaminorootmootan.” (Juan 15:​14, 17) Ikaduwa, huli ta si Jehova an personipikasyon nin pagkamoot, asin bilang saiyang mga parasamba sia maninigo niatong arogon. (Efeso 5:​1; 1 Juan 4:16) Sinasabi kan Biblia na an paglaog sa isip nin kaaraman ki Jehova asin ki Jesus nangangahulogan nin buhay na daing katapusan. Paano niato masasabi na midbid niato an Dios kun dai kita maghihingoa na arogon sia? Nangatanosan si apostol Juan: “An dai namomoot dai nakakamidbid sa Dios, huli ta an Dios pagkamoot.”​—1 Juan 4:8.

6. Paano mapagtitimbang nin pagkamoot an laen-laen na aspekto kan satong buhay?

⁶ An pagkamoot mahalaga huli sa ikatolong dahelan: Tinatabangan kita kaiyan na pagtimbangon an laen-laen na aspekto kan satong buhay asin tinatawan nin marahay na motibo an satong ginigibo. Halimbawa, mahalagang marhay na padagos na ilaog sa isip an kaaraman sa Tataramon nin Dios. Para sa sarong Kristiano, an siring na kaaraman garo kakanon. Iyan nakatatabang sa saiya na magtalubo pasiring sa pagkamaygurang asin gumawe kaoyon kan kabotan nin Dios. (Salmo 119:​105; Mateo 4:​4; 2 Timoteo 3:​15, 16) Minsan siring, nagpatanid si Pablo: “An kaaraman nagpapaabhaw, alagad an pagkamoot nagpaparigon.” (1 Corinto 8:1) Mayo nin sala sa tamang kaaraman. An problema nasa sato​—kita may makasalan na mga tendensia. (Genesis 8:21) Kun mayo an pantimbang na impluwensia nin pagkamoot, an kaaraman puedeng gibohon an saro na maabhaw, na iniisip na sia mas marahay kisa iba. Iyan dai mangyayari kun sa pundamental sia minomotibar nin pagkamoot. “An pagkamoot . . . dai nananagsag, dai nagpapaabhaw.” (1 Corinto 13:4) An Kristiano na minomotibar nin pagkamoot dai nagigin mapalangkaw, dawa kun sia magkaigwa nin hararom na kaaraman. An pagkamoot pinapagdadanay siang mapakumbaba asin inoolang sia sa pagmawot na mabantog.​—Salmo 138:​6; Santiago 4:6.

7, 8. Paano kita tinatabangan nin pagkamoot na magkonsentrar sa orog na mahalagang mga bagay?

⁷ Nagsurat si Pablo sa mga taga Filipos: “Ini an padagos kong ipinamimibi, na an saindong pagkamoot paorog nang paorog na magin abunda na may tamang kaaraman asin lubos na pakamansay; tangani na kamo makasierto sa orog na mahalagang mga bagay.” (Filipos 1:​9, 10) An Kristianong pagkamoot makatatabang sa sato na masunod an pag-enkaminar na ini na siertohon an orog na mahalagang mga bagay. Bilang halimbawa, estudyare an mga tataramon ni Pablo ki Timoteo: “Kun an siisay man na lalaki naghihingoang maabot an katongdan nin paraataman, sia nagmamawot nin marahay na gibo.” (1 Timoteo 3:1) Durante kan 2000 na taon nin paglilingkod, nadagdagan nin 1,502 an kabilangan nin kongregasyon sa bilog na kinaban, kaya an bagong total 91,487. Huli kaini, dakula an pangangaipo para sa dagdag na kamagurangan, asin dapat na tawan nin komendasyon an mga naghihingoang maabot an pribilehiong iyan.

⁸ Minsan siring, an mga naghihingoang maabot an mga pribilehio nin pangangataman mapagdadanay an marahay na pagkatimbang kun isasaisip ninda an katuyohan kan siring na pribilehio. An pagkaigwa sana nin autoridad o pagkaprominente bakong iyo an mahalagang bagay. An kamagurangan na nakapaoogma ki Jehova minomotibar nin pagkamoot sa saiya asin sa saindang mga tugang. Dai sinda naghahanap nin pagkaprominente o impluwensia. Pakahatoli kan kamagurangan sa kongregasyon na papagdanayon an marahay na aktitud, idinoon ni apostol Pedro an pangangaipo nin “kababaan nin pag-isip.” Hinatolan nia an gabos sa kongregasyon: “Magpakumbaba kamo sa irarom kan poderosong kamot nin Dios.” (1 Pedro 5:​1-6) An siisay man na naghihingoang makaabot marahay na estudyaran an halimbawa nin dai mabilang na kamagurangan sa bilog na kinaban na mahigos, mapakumbaba, asin kun siring sarong bendisyon sa saindang kongregasyon.​—Hebreo 13:7.

 An Marahay na Motibo Nakatatabang sa Sato na Magtagal

9. Taano ta isinasaisip nin mga Kristiano an mga bendisyon na ipinanuga ni Jehova?

⁹ Maheheling sa iba pang paagi an halaga nin pagigin minomotibar nin pagkamoot. Sa mga nagmamaigot na magibo an diosnon na debosyon huli sa pagkamoot, an Biblia nanunuga nin nagsosopay na mga bendisyon ngonyan asin nin dai maimahinar sa rahay na mga bendisyon sa ngapit. (1 Timoteo 4:8) An Kristiano na makosog an pagtubod sa mga panugang ini asin kombensido na si Jehova “nagigin an parabalos sa mga maigot na naghahanap sa saiya” natatabangan na manindogan nin marigon sa pagtubod. (Hebreo 11:6) An kadaklan sa sato hinihidaw an kaotoban kan mga panuga nin Dios asin inaarog an saboot ni apostol Juan: “Amen! Madia, Kagurangnan na Jesus.” (Kapahayagan 22:20) Iyo, an paghorophorop sa mga bendisyon na natatagama kun kita fiel nagpapakosog sa sato na magtagal, kun paanong an pagsaisip kan “kagayagayahan na ibinugtak sa atubangan nia” nakatabang ki Jesus na magtagal.​—Hebreo 12:​1, 2.

10, 11. Paano an pagigin motibado nin pagkamoot nakatatabang sa sato na magtagal?

¹⁰ Pero, ano kun an pagmawot niatong mabuhay sa bagong kinaban iyo an solamente niatong motibo sa paglilingkod ki Jehova? Kun siring, madali kitang mawawaran nin pasensia o magigin deskontento kun nagigin masakit an mga bagay o dai nangyayari an mga bagay arog kan o sa oras na iyan linalaoman niato. Kita puedeng mamugtak sa grabeng peligro na ikaanod. (Hebreo 2:​1; 3:12) Si Pablo nagtaram manongod sa sarong dating kaibaiba na an ngaran Demas, na buminaya sa saiya. Taano? Huli ta “namotan nia an presenteng sistema nin mga bagay.” (2 Timoteo 4:10) An siisay man na naglilingkod huli sa maimot sanang mga dahelan namemeligrong arog man kaiyan an gibohon. Sinda puedeng maakit kan yaon nang mga oportunidad na alok kan kinaban asin habo nang magsakripisyo ngonyan sa paglaom na magkamit nin maabot na mga bendisyon.

¹¹ Minsan ngani tama asin natural na magkaigwa nin kamawotan na umako nin mga bendisyon sa ngapit asin nin linalaoman na pakaginhawa sa mga pagbalo, pinatatalubo nin pagkamoot an satong apresasyon sa maninigong magin pangenot sa satong buhay. An mahalaga iyo an kabotan ni Jehova, bakong niato. (Lucas 22:​41, 42) Iyo, an pagkamoot nagpaparigon sa sato. Ginigibo kita kaiyan na kontento na pasensiosong maghalat sa satong Dios, na kontento sa ano man na bendisyon na itinatao nia asin kompiado na sa itinalaan niang panahon aakoon niato an gabos na ipinanuga nia​—asin labi pa. (Salmo 145:​16; 2 Corinto 12:​8, 9) Mientras tanto, tinatabangan kita nin pagkamoot na padagos na maglingkod na daing kaimotan ta “an pagkamoot . . . dai naghahanap kan saiyang sadiring kapakanan.”​—1 Corinto 13:​4, 5.

Siisay an Maninigong Kamotan nin mga Kristiano?

12. Segun ki Jesus, siisay an maninigo niatong kamotan?

¹² Si Jesus nagtao nin pankagabsan na reglamento sa kun siisay an maninigo niatong kamotan kan kotaron nia an duwang deklarasyon hale sa Ley ni Moises. Sabi nia: “Kamotan mo si Jehova na saimong Dios sa bilog mong puso asin sa bilog mong  kalag patin sa bilog mong isip” asin, “Kamotan mo an saimong kapwa nin siring sa saimo man sana.”​—Mateo 22:​37-39.

13. Paano kita makakanood na kamotan si Jehova, dawa dai niato sia naheheling?

¹³ Sa mga tataramon ni Jesus, malinaw na sa pangenot maninigo niatong kamotan si Jehova. Minsan siring, dai kita namundag na may kompleto nang pagkamoot ki Jehova. Iyan bagay na dapat niatong kultibaron. Kan enot kitang makadangog manongod sa saiya, kita naakit sa saiya kan satong nadangog. Dikit-dikit, nanodan niato kun paano nia inandam an daga para sa katawohan. (Genesis 2:​5-​23) Nanodan niato kun paano nia trinatar an katawohan, na dai kita isinikwal kan enot na laogon nin kasalan an pamilya nin tawo, kundi guminibo sia nin mga paagi na mabalukat kita. (Genesis 3:​1-5, 15) Nagin sia maboot sa mga fiel, asin pag-abot nin panahon itinao nia an saiyang Aking bugtong para sa kapatawadan kan satong mga kasalan. (Juan 3:​16, 36) Huli sa nag-oorog na kaaraman na ini nagdakula an satong apresasyon ki Jehova. (Isaias 25:1) Sinabi ni Hadeng David na namomotan nia si Jehova huli sa Saiyang mamomoton na pangataman. (Salmo 116:​1-9) Ngonyan, inaataman kita ni Jehova, ginigiyahan kita, pinakokosog kita, asin pinaririgon an boot ta. Mientras na orog kitang nakakanood manongod sa saiya, orog man na minararom an satong pagkamoot.​—Salmo 31:​23; Sofonias 3:​17; Roma 8:28.

Paano Niato Ikapaheheling an Satong Pagkamoot?

14. Sa anong paagi ikapaheheling niato na tunay an satong pagkamoot sa Dios?

¹⁴ Siempre, dakol sa palibot kan kinaban an nagsasabi na sinda namomoot sa Dios, alagad an saindang paggawe nagpapahimutik sa saindang paghihingako. Paano niato maaaraman na kita talagang namomoot ki Jehova? Puede kitang makipag-olay sa saiya sa pamibi asin isabi sa saiya an satong saboot. Asin makagagawe kita sa paagi na nagpapatunay kan satong pagkamoot. Sinabi ni apostol Juan: “An siisay man na nagkukuyog sa . . . tataramon [nin Dios], tunay na sa tawong ini ginibo nang sangkap an pagkamoot sa Dios. Huli kaini naaaraman niato na kita kasaro nia.” (1 Juan 2:​5; 5:3) Kabilang sa iba pang bagay, sinasabi sa sato kan Tataramon nin Dios na mag-iribaiba asin mamuhay nin malinig saka moral. Kita naglilikay sa pagsaginsagin, nagtataram kan katotoohan, asin pinapagdadanay niatong malinig an satong kaisipan. (2 Corinto 7:​1; Efeso 4:​15; 1 Timoteo 1:​5; Hebreo 10:​23-25) Nagpapaheling kita nin pagkamoot paagi sa pagtao nin materyal na tabang sa mga nangangaipo. (1 Juan 3:​17, 18) Asin dai kita nagpopogol na magsabi sa iba manongod ki Jehova. Kabale dian an pakikikabtang sa pambilog na kinaban na paghuhulit kan maogmang bareta kan Kahadean. (Mateo 24:​14; Roma 10:10) An pagkuyog sa Tataramon nin Dios sa siring na mga bagay ebidensia na tunay an satong pagkamoot ki Jehova.

15, 16. Paano an pagkamoot ki Jehova nakaapektar sa dakol na buhay kan sarong taon?

¹⁵ An pagkamoot ki Jehova nakatatabang sa mga tawo na gumibo nin marahay na mga desisyon. Kan sarong taon, an siring na pagkamoot nagpahiro sa 288,907 indibiduwal na idusay an saindang buhay sa saiya asin simbolisaran an desisyon na iyan paagi sa bautismo sa tubig. (Mateo 28:​19, 20) Makahulogan an saindang pagdusay. Iyan nagsenyalar nin pagbago sa saindang buhay. Halimbawa, si Gazmend saro sa sikat na mga basketbolista sa Albania. Sa laog nin nagkapirang taon, sinda mag-agom nag-adal sa Biblia asin sa ibong nin mga kaolangan nakualipikar bilang mga parahayag kan Kahadean pag-abot nin panahon. Kan sarong taon, si Gazmend nabautismohan, saro sa 366 na nabautismohan sa Albania kan 2000 na taon nin paglilingkod. An sarong diaryo nagpublikar nin sarong artikulo manongod sa saiya asin nagsabi: “May katuyohan an buhay nia, asin huli kaini, sia asin an pamilya nia nagkakamit kan pinakamaogmang mga aldaw sa saindang  buhay. Para sa saiya, bako nang mahalagang maheling kun gurano an makukua nia sa buhay kundi, imbes, kun gurano an ikatatao nia sa pagtabang sa ibang tawo.”

¹⁶ Kaagid kaiyan, an sarong bagong mabautismohan na tugang na babae na nagtatrabaho sa sarong kompanya nin gasolina sa Guam nag-ako nin nakaaakit na alok. Pakatapos na maghingoang lumangkaw an puesto sa laog nin dakol na taon, sa katapustapusi inalok sia kan oportunidad na magin an enot na babaeng bise presidente sa kasaysayan kan kompanya. Minsan siring, idinusay na nia ngonyan an saiyang buhay ki Jehova. Kaya pakatapos na ipakipag-olay an mga bagay sa saiyang agom, sinayumahan kan bagong tugang an alok asin imbes iinareglo an trabahong por ora sana tangani na sia mag-oswag pasiring sa pagigin bilog na panahon na ministro, sarong payunir. An pagkamoot ki Jehova nagpahiro sa saiya na magmawot na maglingkod sa saiya bilang payunir imbes na pagmaigotan na kamtan an pinansial na intereses kan kinaban na ini. Sa katunayan, sa bilog na kinaban an siring na pagkamoot nagpahiro sa 805,205 na makikabtang sa laen-laen na kabtang kan ministeryo bilang payunir durante kan 2000 na taon nin paglilingkod. Kanigoan na kapahayagan nin pagkamoot asin pagtubod an ginibo kan mga payunir na idto!

Napapahiro na Kamotan si Jesus

17. Anong marahay na halimbawa nin pagkamoot an naheheling niato ki Jesus?

¹⁷ Si Jesus marahayon na halimbawa nin saro na motibado nin pagkamoot. Sa saiyang buhay bago nagin tawo, namotan nia an saiyang Ama asin namotan nia an katawohan. Bilang an ladawan nin kadonongan, sinabi nia: “Yaon ako sa kataed [ni Jehova] bilang pangenot na trabahador, asin ako an nangongorog niang kinaoogmahan sa aroaldaw, mantang ako maogma sa atubangan nia sa gabos na panahon, na naoogma sa mabungang daga kan saiyang kinaban, asin an mga bagay na sakong kinaoogmahan iyaon sa mga aki nin mga tawo.” (Talinhaga 8:​30, 31) An pagkamoot ni Jesus nagpahiro sa saiya na talikdan an saiyang langitnon na erokan asin mamundag bilang omboy na daing maginibo. Trinatar nia nin pasensioso saka maboot an mga mahoyo saka may kababaan asin nagdusa sia sa kamot kan mga kaiwal ni Jehova. Sa katapustapusi, sia nagadan para sa bilog na katawohan sa sarong hariging pasakitan. (Juan 3:​35; 14:​30, 31; 15:​12, 13; Filipos 2:​5-11) Abaa karahay na halimbawa nin tamang motibasyon!

18. (a) Paano niato kinukultibar an pagkamoot ki Jesus? (b) Sa anong paagi niato pinatutunayan na namomotan niato si Jesus?

¹⁸ Kun binabasa kan mga tama an kamugtakan nin puso an kasaysayan kan buhay ni Jesus sa mga  Ebanghelyo asin hinohorophorop kun gurano kadakol na bendisyon an itinao sa sainda kan saiyang fiel na paggawe, pinatatalubo kaini sa sainda an hararom na pagkamoot sa saiya. Kita ngonyan kapareho kan mga kaolay ni Pedro kan sia magsabi: “Minsan ngani [si Jesus] dai nindo noarin man naheling, kamo namomoot sa saiya.” (1 Pedro 1:8) Naheheling an satong pagkamoot kun kita minagibo nin pagtubod sa saiya asin inaarog niato an saiyang buhay na mapagsakripisyo. (1 Corinto 11:​1; 1 Tesalonica 1:​6; 1 Pedro 2:​21-25) Kan Abril 19, 2000, 14,872,086 gabos an napagirumdom kan satong mga dahelan na kamotan si Jesus kan sinda umatender sa taonan na Memorial kan saiyang kagadanan. Kanigoan kadakulang kabilangan idto! Asin abaa kanakapakokosog na maaraman na kadakol kan interesado sa kaligtasan paagi sa atang ni Jesus! Totoo nanggad, naparirigon kita kan pagkamoot ni Jehova saka ni Jesus para sa sato asin kan satong pagkamoot sa sainda.

19. Anong mga hapot manongod sa pagkamoot an tatrataron sa masunod na artikulo?

¹⁹ Sinabi ni Jesus na maninigong kamotan niato si Jehova sa bilog niatong puso, kalag, isip, asin kosog. Alagad sinabi man nia na maninigo niatong kamotan an satong kapwa siring sa sato man sana. (Marcos 12:​29-31) Siisay an kaiba dian? Asin paano an pagkamoot sa kapwa nakatatabang sa sato na mapagdanay an marahay na pagkatimbang asin tamang motibo? An mga hapot na ini tatrataron sa masunod na artikulo.

Nagigirumdoman daw Nindo?

• Taano ta mahalagang marhay na kualidad an pagkamoot?

• Paano kita makakanood na kamotan si Jehova?

• Paano pinatutunayan kan satong gawe-gawe na namomotan niato si Jehova?

• Paano niato pinatutunayan an satong pagkamoot ki Jesus?

[Mga Hapot Para sa Pag-adal]

[Mga Ritrato sa pahina 10, 11]

Tinatabangan kita nin pagkamoot na pasensiosong halaton an pakaginhawa

[Ritrato sa pahina 12]

An dakulang atang ni Jesus nagpapahiro sa sato na kamotan sia