Pagpaomay sa mga Lugad nin Guerra

SI Abraham kabale sa hukbong gerilya sa laog nin 20 taon. * Alagad nag-ontok na sia sa pakikilaban asin nungka na liwat na makikiguerra. Sa katunayan, an nagkapira sa mga dati niang kalaban iyo na ngonyan an pinakadayupot niang katood. Ano an nagpabago sa saiya? An Biblia. Nagtao iyan ki Abraham nin paglaom asin pakarorop, na nakatabang sa saiya na mansayon an mga gibo-gibo nin tawo gikan sa punto de vista nin Dios. Hinale kan Biblia an saiyang pagmawot na makilaban, asin pinonan niang paomayan an saiyang kapungawan, kamondoan, pagkaongis, asin kapaitan nin boot. Saiyang nadiskobre na yaon sa Biblia an epektibong bolong sa puso.

Paano tinatabangan kan Biblia an saro na paomayan an emosyonal na mga lugad? Dai kaiyan puedeng liwaton an nangyari ki Abraham. Pero, an pagbasa asin paghorophorop sa Tataramon nin Dios iinoyon an saiyang kaisipan sa kaisipan kan Kaglalang. Igwa na sia ngonyan nin paglaom sa ngapit, asin igwa na sia nin bagong mga prioridad. An mga bagay na importante sa Dios nagin importante na sa saiya. Kan oras na magpoon ining mangyari, an mga lugad sa saiyang puso nagpoon na maomayan. Sa paaging iyan natabangan si Abraham na magbago.

Napalabot sa Guerra Sibil

Si Abraham namundag kan mga taon nin 1930 sa Aprika. Pagkatapos kan ikaduwang guerra mundial, an saiyang nasyon pinamahalaan nin sarong poderosong kataed na nasyon, alagad an dakol sa kahimanwa ni Abraham gusto nin independensia. Kan 1961, si Abraham uminayon sa sarong mobimiento para sa katalingkasan na nakilaban bilang mga gerilya tumang sa poderosong kataed na nasyon na idto.

“Sinda an samong kalaban. Plano nindang gadanon kami, kaya plinano ming gadanon sinda,” an paliwanag ni Abraham.

An buhay ni Abraham parateng nasa peligro, kaya kan 1982, pakalihis nin 20 taon nin armadong pakikilaban, duminulag sia pa-Europa. Kan panahon na iyan magsi-50 na sia, asin huling nagkaigwa nin panahon para sa saiyang sadiri, pinensar nia an saiyang buhay. Ano na an nangyari sa saiyang mga pangarap? Ano an natatagama sa ngapit? Nanuparan ni Abraham an nagkapira sa Mga Saksi ni Jehova asin nagpoon na umatender sa saindang pagtiripon. Nagirumdoman nia na duman sa Aprika pirang taon na an nakaagi, may nabasa siang pulyeto na itinao sa saiya nin sarong Saksi. Ilinadawan kan pulyeto an sarong maabot na paraiso digdi sa daga asin an sarong langitnon na gobyerno na mamamahala sa katawohan. Magkakatotoo daw iyan?

 Sabi ni Abraham: “Nanodan ko sa Biblia na nasayang an gabos na taon na idto na ginamit sa pakikilaban. An solamenteng gobyerno na may katanosan an magigin pagtratar sa gabos iyo an Kahadean nin Dios.”

Dai nahaloy pakabautismohi ki Abraham bilang sarong Saksi ni Jehova, an sarong lalaki na an ngaran Robert duminulag hale sa Aprika pasiring sa siudad sa Europa na ineerokan ni Abraham. Si Robert asin Abraham luminaban sa iyo man sanang guerra alagad nasa mag-ibong na kampi. Si Robert parateng nag-iisip-isip manongod sa tunay na katuyohan nin buhay. Saro siang tawong relihioso, asin huling nakabasa na nin mga kabtang kan Biblia, aram nia na an ngaran nin Dios Jehova. Kan an mga Saksi sa kongregasyon ni Abraham mag-alok na tabangan si Robert na orog na masabotan an Biblia, uminoyon tolos sia.

Nagpapaliwanag si Robert: “Sa kapoonpooni, hanga ako sa paagi nin paggamit kan mga Saksi sa ngaran ni Jehova asin ni Jesus, na minimidbid na sinda magkalaen na persona. Kaoyon iyan kan dati ko nang aram sa Biblia. An mga Saksi malinig asin areglado man na maggubing saka maboot sa iba, ano man an nasyonalidad. An siring na mga bagay hararom an nagin epekto sa sako.”

An Magkalaban Nagin Magkatood

Si Robert asin Abraham, na dating magkalaban, ngonyan dayupot na magkatood. Sinda naglilingkod bilang bilog na panahon na mga paraebanghelyo sa iyo man sanang kongregasyon kan Mga Saksi ni Jehova. “Durante kan guerra, parate kong iniisip-isip kun paano nangyari na an mga tawo sa magkataraed na nasyon​—na an dakol kaiyan magkasirelihion​—nagkakainorongisan,” an paliwanag ni Abraham. “Kami ni Robert magkasiiglesia, alagad ta nakipagguerra kami laban sa kada saro. Ngonyan pareho na kami Saksi ni Jehova, asin pinagsaro kami kan samong pagtubod.”

“Iyan an pagkakalaen,” sabi pa ni Robert. “Kabilang kami ngonyan sa sarong pagtubod na minagibo sa samo na kabtang nin sarong tunay na kasararoan nin magturugang. Nungka na liwat kaming makikiguerra.” Makosog an nagin impluwensia kan Biblia sa puso kan dating magkalaban na ini. An pagkaongis asin kapaitan nin boot luway-luway na nasalidahan nin pagtitiwala asin pagkakatood.

Kadungan kan panahon na si Abraham asin Robert nasa guerra, may duwa pang hoben na lalaki na nasa mag-ibong na kampi nin saro pang labanan nin duwang magkataed na nasyon. Dai nahaloy an Biblia nagin siring sa sarong epektibong marhay na bolong na mapaomay man kan saindang puso. Paano?

Gumadan—Dangan Magadan Bilang Martir

Si Gabriel, na pinadakula sa sarong relihiosong pamilya, tinokdoan na an saiyang dagang tinuboan nasa masakit na kamugtakan nin pakikilaban sa sarong banal na guerra. Huli kaini, sa edad na 19, nagboluntaryo sia sa serbisyo militar asin naghagad na isubol sa labanan. Sa laog nin 13 bulan yaon sia sa pinakamaringis na ralaban, na kun beses saro may kabanga na sanang kilometro an distansia sa kalaban. “May nagigirumdoman akong sarong partikular na okasyon,” sabi nia. “Sinabihan kami kan samong komandante na an kalaban masalakay kan bangging idto. Kinabahan kaming marhay kaya magdamlag kaming nagpaputok kan samong mga kanyon.” Ibinilang nia na saiyang kalaban an mga taga duman sa kataed na nasyon, na maninigong gadanon. “An nasa isip ko gumadan nin pinakadakol sagkod posible.  Dangan, arog kan dakol sa sakong mga katood, gusto kong magadan na martir.”

Minsan siring, pag-abot nin panahon si Gabriel nagin desganado. Duminulag sia pasiring sa kabukidan, patagong buminalyo sa linderos pasiring sa sarong neutral na nasyon, asin nagbiahe pa-Europa. Padagos siang naghahapot sa Dios kun taano ta masakit na marhay an buhay, kun baga an mga problema pagkastigo nin Dios. Nanuparan nia an mga Saksi ni Jehova, na ipinaheling sa saiya sa Biblia kun taano ta pano-pano nin problema an buhay ngonyan.​—Mateo 24:​3-14; 2 Timoteo 3:​1-5.

Mientras na nakakanood si Gabriel sa Biblia, orog man niang narerealisar na yaon dian an katotoohan. “Nanodan ko na puede kitang mabuhay sagkod lamang sa sarong paraisong daga. Baga man namagohan ako, iyan an hinihimuyawot ko kan ako aki pa.” Naranga kan Biblia si Gabriel asin pinaginhawa an sagkod kan oras na idto napupurisaw na puso nia. An saiyang hararomon na lugad sa emosyon nagpoon na maomayan. Kaya kan panahon na nanuparan nia si Daniel, sarong dating kalaban, si Gabriel mayo nang namatean na pagkaongis. Alagad taano ta nagpa-Europa si Daniel?

“Kun Talagang Ika Nag-eeksister, Tabangi Tabi Ako!”

Si Daniel pinadakula na Katoliko asin sa edad na 18 inapodan sa serbisyo militar. Isinubol sia na makilaban sa iyo man sanang guerra na sinubolan ki Gabriel alagad nasa kampi kan kalaban. Harani sa labanan, si Daniel sakay sa sarong tangke kan iyan malagarto. Nagadan an saiyang mga katood, asin sia seryosong naerido asin binihag. Dakol na bulan sia sa ospital asin sa sarong kampo bago idineportar sa sarong neutral na nasyon. Huling nagsosolo asin mayong-mayo, naisip nia na maghugot. Si Daniel namibi sa Dios: “Kun talagang ika nag-eeksister, tabangi tabi ako!” Kan mismong sunod na aldaw, an mga Saksi ni Jehova nagsongko sa saiya asin nasimbag an dakol niang hapot. Sa katapustapusi, nagbiahe sia pa-Europa bilang dulag. Sa giraray, si Daniel nakiasosyar sa mga Saksi asin nag-adal sa Biblia. An nanodan nia nakapaginhawa sa saiyang kahaditan asin kapaitan nin boot.

Si Gabriel asin Daniel dayupot na magkatood na ngonyan, nagkakasaro sa sarong espirituwal na kasararoan nin magturugang bilang bautisadong Saksi ni Jehova. “An sakong pagkamoot ki Jehova asin kaaraman sa Biblia an nakatabang sa sako na mansayon an mga bagay-bagay nin siring sa pagmansay nia. Si Daniel bako ko nang kalaban. Kaidtong dakol nang taon an nakaagi gustong-gusto ko kutana na gadanon sia. Itinokdo sa sako kan Biblia an mismong kabaliktaran​—na magin andam na magadan para sa saiya,” sabi ni Gabriel.

“Nakaheling ako nin mga tawo na magkalaen nin relihion asin nasyonalidad na naggagaradanan,” sabi ni Daniel. “Asin igwa nin mga tawo na magkasirelihion na nasa mag-ibong na kampi nin guerra na naggagaradanan. Kan maheling ko ini, inisip ko na an Dios an dapat basolon. Ngonyan aram ko na na si Satanas an nasa likod kan gabos na guerra. Kami ni Gabriel ngonyan magkapagtubod na. Nungka na giraray kaming makikilaban!”

 “An Tataramon nin Dios Buhay Asin Mapuersa”

Taano ta pambihira an pagbabago ni Abraham, Robert, Gabriel, asin Daniel? Paano ninda nahimong paraon sa saindang puso an hararom an pagkagamot na pagkaongis asin kamondoan?

An balang saro kan mga lalaking ini binasa, hinorophorop, asin pinag-adalan an katotoohan sa Biblia, na “buhay asin mapuersa.” (Hebreo 4:12) An Autor kan Biblia iyo an Kaglalang kan katawohan, na nakakaaram kun paano iimpluwensiahan sa ikararahay an puso nin saro na andam na maghinanyog asin makanood. “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” Oras na togotan nin nagbabasa na sia giyahan kan Biblia, nagkakaigwa sia nin bagong mga prinsipyo asin pamantayan sa buhay. Nagpopoon na manodan nia kun paano minamansay ni Jehova an mga bagay-bagay. An prosesong ini nagtatao nin dakol na pakinabang, kabale an pagkaomay kan mga lugad nin guerra.​—2 Timoteo 3:16.

An Tataramon nin Dios nagpapaliwanag na mayo nin nasyon, rasa, o grupong etniko na mas marahay o mas maraot kisa iba. “An Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” An nagbabasa na nagtutubod kaini luway-luway na natatabangan na haleon an saiyang mga pagmate nin pagkaongis sa rasa asin nasyonalidad.​—Gibo 10:​34, 35.

Ipinaheheling kan mga hula sa Biblia na madali nang salidahan nin Dios an presenteng sistema nin pamamahala nin tawo kan saiyang Mesiyanikong Kahadean. Paagi sa gobyernong ini, “pinaoontok [nin Dios] an mga guerra sagkod sa kaporoporohi kan daga.” Hahaleon an mga institusyon na nagsusuportar sa mga guerra asin nagsasadol sa mga tawo na makipaglaban dian. An mga biktima nin guerra bubuhayon liwat asin tatawan nin oportunidad na mabuhay sa sarong paraisong daga. Mayo na nin kaipuhan na dumulag sa atubangan nin nananalakay o nan-aapi.​—Salmo 46:​9; Daniel 2:​44; Gibo 24:15.

Dapit sa mga tawo na mabubuhay sa panahon na iyan, an Biblia nagsasabi: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok . . . Dai sinda magpapagal na mayong kapakanan, ni mangangaki man sinda para sa karibokan.” Mayong danyos o pagkaerido na dai paoomayan. An pagtubod sa siring na paglaom luway-luway na hinahale an kamondoan asin kapungawan sa puso nin saro.​—Isaias 65:​21-23.

An Biblia tunay nanggad na epektibong bolong sa puso. Pinaoomayan na kan mga katokdoan kaiyan an mga lugad nin guerra. An mga dating magkalaban pinagsasaro sa sarong internasyonal na kasararoan nin magturugang. An prosesong ini nin pagpaomay magpapadagos sa bagong sistema nin Dios sagkod na mayo na nin pagkaongis asin kapaitan nin boot, kapungawan asin kamondoan sa puso nin katawohan. An Kaglalang nanunuga na “an dating mga bagay dai na magigirumdoman, ni masabong pa iyan sa puso.”​—Isaias 65:17.

[Nota sa Ibaba]

[Blurb sa pahina 4]

“Nanodan ko sa Biblia na nasayang an gabos na taon na idto na ginamit sa pakikilaban”

[Blurb sa pahina 5]

Makosog an puedeng magin impluwensia kan Biblia sa puso kan mga dating magkalaban

[Blurb sa pahina 6]

An pagkaongis asin kapaitan nin boot luway-luway na nasalidahan nin pagtitiwala asin pagkakatood

[Blurb sa pahina 6]

Oras na togotan nin nagbabasa na sia giyahan kan Biblia, nagkakaigwa sia nin bagong mga prinsipyo asin pamantayan sa buhay

[Ritrato sa pahina 7]

An mga dating magkalaban pinagsasaro ngonyan sa sarong internasyonal na kasararoan nin magturugang

[Picture Credit Line sa pahina 4]

Kampo nin mga dulag: UN PHOTO 186811/J. Isaac