An Mga Saksi ni Jehova—Nag-aabante na Igwa nin Marigon na Kombiksion!

Report kan Taonan na Miting

SA MGA aldaw na ini nin pagkamapagduda asin pagduwaduwa, an Mga Saksi ni Jehova napapalaen bilang mga Kristiano na igwa nin marigon na kombiksion. Ini lininaw sa taonan na miting kan Watch Tower Bible and Tract Society of Pennsylvania, na ginibo sa Jersey City, New Jersey, Assembly Hall of Jehovah’s Witnesses kan Sabado, Oktubre 7, 2000. *

Sa saiyang pambukas na pahayag, an tsirman, si John E. Barr, miembro kan Namamahalang Grupo kan Mga Saksi ni Jehova, nagsabi: “Sa gabos na binilyon na tawo sa daga, kita nakakaaram asin nagtutubod na an namomotan na Aki ni Jehova, si Cristo Jesus, pinatukaw na ngonyan sa trono sa kalangitan, na namamahala sa tahaw kan saiyang mga enemigo.” An ebidensia kan siring na makosog na kombiksion iinatubang sa anom na nakapupukaw sa boot na report hale sa bilog na kinaban.

Pagdaog sa Espiritismo Paagi sa Katotoohan sa Biblia sa Haiti

An espiritismo lakop na marhay sa Haiti. “Sa parate,” an sinabi kan nagkokoordinar kan Komite kan Sanga na si John Norman, “an mga tawo minalaog sa vodu tanganing protehiran an saindang sadiri.” An sarong parabawi nagkaigwa nin mga pagduda kan mawaran sia nin tabay sa sarong aksidente. ‘Paano ini nangyari sa sako kun ako protektado kan mga espiritu?’ an inisip-isip nia. Kapareho nin dakol na iba pa, an tawong ini natokdoan kan katotoohan kan Mga Saksi ni Jehova asin natabangan na makatalingkas sa espiritismo. An potensial sa pag-oswag sa Haiti ipinaheheling kan bagay na kan Abril 19, 2000, apat na doble kan kabilangan kan mga parahayag kan Kahadean sa nasyon na iyan an nag-atender sa Memorial kan kagadanan ni Cristo.

Kaigotan sa Mahiwason na Teritoryo sa Korea

Sa Korea, 40 porsiento kan Mga Saksi ni Jehova an naglilingkod nin bilog na panahon. “Huli sa dakulaon na hukbong ini,” an sinabi kan nagkokoordinar kan Komite kan Sanga na si Milton Hamilton, “an samong teritoryo na may labing 47 milyones katawo nakokobrehan nin mga sarong beses kada bulan.” An pag-oswag sa mga kongregasyon na nagtataram paagi sa senyas partikularmenteng naririsa. Sa sarong sirkito na nagtataram paagi sa senyas, 800 na pag-adal sa Biblia an pinamamayohan. Ini promedyo nin sarong pag-adal kada parahayag. Makamomondo, an hoben na mga tugang na lalaki ikinakarsel sagkod ngonyan huli sa saindang neutralidad. Pero, an fiel na mga Kristianong ini tinatratar sa maboot na paagi, asin sa parate tinatawan sinda nin mga trabaho na naghahagad nin pagkamapagtitiwalaan.

 Pagtao kan mga Kinakaipuhan sa Pag-oswag sa Mejico

An pinakahalangkaw na kabilangan nin mga parabalangibog kan Kahadean na 533,665 nagreport nin paglilingkod sa langtad sa Mejico kan Agosto 2000. Labing tolong doble kan kabilangan na iyan nin mga indibiduwal an nag-atender sa Memorial. “An samong pasohan sa taon na ini iyo na magtogdok nin 240 dugang pang Kingdom Hall,” an sinabi kan nagkokoordinar kan Komite kan Sanga na si Robert Tracy. “Pero,” an sinabi pa nia, “kaipuhan mi an mas dakol pa.”

An mga hoben sa tahaw kan mga Saksi ni Jehova sa Mejico maninigong arogon. Mapadapit sa sarong hoben, sinabi nin sarong Katolikong padi: “Mawot kong magkaigwa nin dawa saro na kapareho nia sa tahaw kan sakong mga parasunod. Hinahangaan ko an mga tawong ini huli sa saindang makosog na pagmawot asin madonong na paggamit kan Biblia. Idinepensa ninda an Dios, dawa pa mameligro an saindang buhay.”

Integridad sa Tahaw nin Kariribokan sa Sierra Leone

Poon kan Abril 1991, kan pumutok an guerra sibil sa Sierra Leone, rinibong tawo an nagadan, naerido, o nabaldado. “An guerra asin kasakitan nagkaigwa nin makuring epekto sa mga tawo,” an ibinareta kan nagkokoordinar kan Komite kan Sanga na si Bill Cowan. “An dakol na dating indiperente sa samong mensahe naghihinanyog na ngonyan na may interes. Komun na an mga tawo basta na sana malaog sa samong mga Kingdom Hall sa enot nindang pag-atender sa pagtiripon. An mga tugang sa parate pinapopondo sa tinampo asin pinakokondukta nin pag-adal sa Biblia.” Sa ibong kan nagpapadagos na daing kasegurohan sa nasyon, an paghuhulit kan Kahadean namumunga sa Sierra Leone.

Mahiwas na Programa sa Pagtotogdok sa Aprika del Sur

Sa presente, kaipuhan an nagkapirang ribong Kingdom Hall sa teritoryo na inaasikaso kan sangang opisina sa Aprika del Sur. Ginatos na tiriponan an ikinatogdok na. “Imbes na magtiripon sa sarong payag-payag o sa sirong nin kahoy, siring kan ginigibo kaidto, an satong mga tugang puede nang magtiripon sa sarong angay na lugar na may angay na matutukawan,” an sinabi kan sarong miembro kan Komite kan Sanga na si John Kikot. “Minsan ngani an kadaklan sa mga Kingdom Hall na ini simple sana an disenyo, sa parate an mga iyan an pinakaigwang dignidad na edipisyo sa saindang lokalidad. Sa nagkapirang lugar, nadiskobre na pakatapos na itogdok an sarong Kingdom Hall, an kongregasyon nagigin labi pa sa doble an kabilangan durante kan masunod na taon.”

Sarong Bagong Henerasyon nin mga Saksi sa Ucrania

Durante kan 2000 taon nin paglilingkod, an nasyon na ini nagkaigwa nin pinakahalangkaw na kabilangan nin parahayag na 112,720. Labing 50,000 sa sainda an nakanood kan katotoohan sa Biblia durante kan nakaaging limang taon. “Tunay nanggad, ibinangon ni Jehova an sarong bago, hoben na henerasyon nin mga Saksi tanganing ipahayag an saiyang ngaran!” an sinabi ni John Didur, an nagkokoordinar kan Komite kan Sanga. “Sa nakalihis na duwang taon,” idinugang nia, “nakapasakamot kami nin labing 50 milyones na magasin, na kapantay kan bilang kan populasyon kan nasyon. Kada bulan, sa promedyo, nakakaresibi kami nin sangribong surat hale sa interesadong mga tawo na naghahagad nin dugang na impormasyon.”

Iba Pang Nakapupukaw sa Boot na Kabtang kan Programa

Si Daniel Sydlik, miembro kan Namamahalang Grupo, nagtao nin kawiliwiling pahayag. An artikulong “Kun Paano an Namamahalang Grupo Napapalaen sa Legal na Korporasyon,” na nasa luwas kan magasin na ini, basado sa nakapagtotokdong pag-atubang na iyan.

Si Theodore Jaracz kan Namamahalang Grupo nagtao nin nakapupukaw nin isip na diskurso na an titulo “An Mga Paraataman Asin Ministeryal na Lingkod Ninombrahan sa Teokratikong Paagi.” An saro sa mga artikulo na nasa luwas kan magasin na ini basado sa temang iyan.

Kaiba man sa taonan na miting an nakapupukaw sa boot na pahayag na itinao kan miembro kan Namamahalang Grupo na si David Splane manongod sa teksto kan taon para sa taon 2001. Basado sa mga tataramon ni apostol Pablo, iyan an: ‘Tumindog na lubos asin may marigon na kombiksion sa gabos na kabotan nin Dios.’ (Colosas 4:12) An Mga Saksi ni Jehova sa bilog na kinaban determinadong gibohon iyan mantang fiel nindang ihinuhulit an maogmang bareta kan Kahadean nin Dios sa bilog na daga.​—Mateo 24:14.

[Nota sa Ibaba]