An mga Paraataman Asin Ministeryal na Lingkod Ninombrahan sa Teokratikong Paagi

“Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman.”—GIBO 20:28.

1, 2. Paano naootob an Isaias 60:22?

IHINULA ni Jehova kaidtong haloy nang panahon na may pambihirang mangyayari sa panahon kan katapusan. Paagi ki propeta Isaias, sinabi: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.”​—Isaias 60:22.

² May ebidensia daw na naootob na ngonyan an hulang ini? Iyo nanggad! Durante kan mga taon nin 1870, sarong kongregasyon kan banwaan ni Jehova an inorganisar sa Allegheny, Pennsylvania, E.U.A. Gikan sa sadit na kapinonan na iyan, nagkaigwa nin manampulong ribong kongregasyon asin an mga iyan nag-ooswag sa bilog na kinaban. Minilyon na parabalangibog kan Kahadean​—sarong makosog na nasyon​—an nag-aasosyar ngonyan sa labing 91,000 na kongregasyon sa 235 kadagaan sa bilog na daga. Daing duda, pinatutunayan kaini na pinaririkas ni Jehova an pagtipon sa tunay na mga parasamba bago an biglang pag-abot kan “dakulang kahorasaan,” na ngonyan haranihon na.​—Mateo 24:​21; Kapahayagan 7:​9-14.

3. Ano an kahulogan kan pagigin binautismohan ‘sa ngaran kan Ama, kan Aki, asin kan banal na espiritu’?

³ Pakatapos na gumibo nin personal na pagdusay ki Jehova, asin kaoyon sa instruksion ni Jesus, an minilyon na ini binautismohan “sa ngaran kan Ama asin kan Aki patin kan banal na espiritu.” (Mateo 28:19) An pagigin binautismohan “sa ngaran kan Ama” nangangahulogan na an nagdusay na mga indibiduwal na ini rinerekonoser si Jehova bilang saindang langitnon na Ama asin Paratao nin Buhay saka nagpapasakop sa saiyang soberaniya. An bautismo sa ‘ngaran kan Aki’ nangangahulogan na ipinapahayag ninda si Jesu-Cristo bilang saindang Paratubos, Namomoon, asin Hade. Minimidbid man ninda an kabtang kan banal na espiritu, o puersa aktiba nin Dios, sa paggiya sa saindang buhay. Ipinaheheling kaini na sinda binautismohan ‘sa ngaran kan banal na espiritu.’

4. Paano inoordenan an Kristianong mga ministro?

⁴ Sa bautismo ninda, an bagong mga disipulo inoordenan bilang mga ministro ni Jehova Dios. Siisay an nag-oorden sa sainda? Bilang dugang na aplikasyon, minaaplikar sa sainda an mga tataramon na nasusurat sa 2 Corinto 3:​5: “An samong pagigin biyong kualipikado [bilang mga ministro] naghahale sa Dios.” Dai na sindang mamawoton na dakulang onra na maorog pa sa pagigin inordenan ni Jehova Dios mismo! Pakatapos kan bautismo ninda, sinda padagos na matalubo sa espirituwal bilang mga ministro kan “maogmang bareta” basta inaako ninda an paggiya kan espiritu nin Dios asin padagos na iinaaplikar an saiyang Tataramon.​—Mateo 24:​14; Gibo 9:31.

Teokratiko—Bakong Demokratiko—na Nombramiento

5. Pinili daw sa demokratikong paagi an Kristianong mga paraataman asin ministeryal na lingkod? Ipaliwanag.

⁵ Kinakaipuhan an maygurang na pangangataman nin kualipikadong mga paraataman asin an may kakayahan na tabang nin ministeryal na mga lingkod sa pag-asikaso kan espirituwal na mga pangangaipo kan nagdadakol na aktibong ministro. (Filipos 1:1) Paano ninonombrahan an siring na espirituwal na mga lalaki? Bakong sa mga paagi na arog kan ginigibo sa Kakristianohan. Halimbawa, an Kristianong mga paraataman dai iineelehir sa demokratikong paagi, an boot sabihon, paagi sa pag-ako kan mga boto kan mayoriya kan mga tawong asosyado sa sarong kongregasyon. Imbes,  an mga nombramientong ini ginigibo sa teokratikong paagi. Ano an kahulogan kaiyan?

6. (a) Ano an tunay na teokrasya? (b) Taano ta teokratiko an mga nombramiento kan mga paraataman asin ministeryal na lingkod?

⁶ Sa simpleng pagtaram, an tunay na teokrasya pamamahala nin Dios. An mga Saksi ni Jehova boluntad na nagpapasakop sa saiyang pamamahala asin sararong nagkokooperar tanganing gibohon an kabotan nin Dios. (Salmo 143:​10; Mateo 6:​9, 10) Teokratiko an mga nombramiento kan Kristianong mga paraataman, o kamagurangan, asin ministeryal na lingkod huli ta an proseso nin pagrekomendar asin pagnombra sa siring na responsableng mga lalaki ginigibo sono sa areglo nin Dios na sinasabi sa Banal na Kasuratan. Asin bilang an “payo sa gabos,” siempre si Jehova an may diretso na magdeterminar kun paano mapunsionar an saiyang naheheling na organisasyon.​—1 Cronica 29:​11; Salmo 97:9.

7. Paano ginogobernaran an Mga Saksi ni Jehova?

⁷ Kabaliktaran kan dakol na grupong relihioso sa Kakristianohan, an Mga Saksi ni Jehova dai nagsasadiring desisyon kun anong klase nin espirituwal na gobyerno an pagpupunsionaran ninda. An sinserong mga Kristianong ini nagmamaigot na magdanay sa mga pamantayan ni Jehova. An mga paraataman sa tahaw ninda dai ibinubugtak sa katongdan paagi sa sarong kongregasyonal, hirarkiko, o presbiterianong porma nin gobyerno nin iglesia. Kun an mga elemento kan kinaban naghihingoang mag-entremeter sa mga nombramientong ini, an banwaan ni Jehova nagsasayumang magkompromiso. Sa marigon na paagi, pinapagdadanay ninda an paninindogan na malinaw na marhay na ipinahayag kan mga apostol kan enot na siglo kan sabihon ninda: “Dapat na kuyogon niamo an Dios bilang namamahala imbes na mga tawo.” (Gibo 5:29) Sa siring, an mga Saksi nagpapasakop sa Dios sa gabos na bagay. (Hebreo 12:​9; Santiago 4:7) An pagsunod sa teokratikong prosedimiento nagbubunga kan pag-oyon nin Dios.

8. Ano an kalaenan kan demokratiko asin teokratikong mga prosedimiento?

⁸ Bilang mga lingkod kan Dakulang Teokrata, si Jehova, marahay na tandaan niato an mga kalaenan kan demokratiko asin teokratikong mga prosedimiento. An demokratikong mga proseso naghahagad nin pantay-pantay na representasyon asin sa parate igwa nin pangangampanya para sa puesto asin eleksion paagi sa boto kan mayoriya. An siring na mga prosedimiento dai imbuelto sa teokratikong mga nombramiento. An mga ini bakong gikan sa mga tawo; ni hale iyan sa sarong legal na ahensia. Minalataw na pinanonongdan an pagkanombra mismo sa saiya ni Jesus asin ni Jehova bilang “apostol sa mga nasyon,” sinabi ni Pablo sa mga taga Galacia na sia ninombrahan “bakong gikan sa mga tawo ni paagi man sa sarong tawo, kundi paagi ki Jesu-Cristo asin sa Dios na Ama, na nagbangon sa saiya hale sa mga gadan.”​— Roma 11:​13; Galacia 1:1.

Ninombrahan kan Banal na Espiritu

9. Ano an sinasabi kan Gibo 20:​28 manongod sa nombramiento nin Kristianong mga paraataman?

⁹ Ipinagirumdom ni Pablo sa mga paraataman na taga Efeso na sinda ninombrahan nin Dios paagi sa banal na espiritu. Sia nagsabi: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) An Kristianong mga paraataman na idto kinaipuhan na padagos na giyahan kan banal na espiritu mantang ginigibo ninda an saindang mga obligasyon bilang mga pastor kan aripompon nin Dios. Kun an sarong lalaki na igwa nin nombradong katongdan dai na nakakaabot sa pamantayan nin Dios, pag-abot nin panahon mahiro an banal na espiritu tanganing haleon sia sa saiyang katongdan.

10. Taano ta importanteng marhay an kabtang kan banal na espiritu sa teokratikong mga nombramiento?

¹⁰ Taano ta importante an kabtang kan banal na espiritu? Enot sa gabos, an rekord na nagtatalaan kan mga kahagadan para sa espirituwal na pangangataman ipinasabong kan banal na espiritu. Sa saiyang mga surat ki Timoteo asin Tito, sinabi ni Pablo an mga pamantayan na dapat aboton kan mga paraataman asin ministeryal na lingkod. Gabos-gabos, mga 16 na laen-laen na kahagadan an sinambit nia. Halimbawa, an mga paraataman dapat na dai nin kanawayan, tamang-tama sana sa mga pag-uugale, marahay an kaisipan, areglado, mapag-istimar, kualipikadong magtokdo, asin arogan bilang payo nin pamilya. Sinda dapat na  timbang sa paggamit nin mga inomon na de alkohol, dai dapat na magin mamomoton sa kuarta, asin dapat na magpogol sa sadiri. Kaagid kaiyan, itinao an halangkaw na mga pamantayan para sa mga lalaki na naghihingoang manombrahan bilang ministeryal na lingkod.​—1 Timoteo 3:​1-10, 12, 13; Tito 1:​5-9.

11. Ano an nagkapira sa mga kualipikasyon na dapat aboton nin mga lalaki na naghihingoang magkaigwa nin paninimbagan sa kongregasyon?

¹¹ An pagrepaso sa mga kualipikasyon na ini nagpapaheling na an mga nangengenot sa pagsamba ki Jehova dapat na magin arogan sa Kristianong paggawe. An mga lalaking naghihingoa na magkaigwa nin mga paninimbagan sa kongregasyon dapat na tumao nin ebidensia na an banal na espiritu naghihiro sa sainda. (2 Timoteo 1:14) Dapat na marisa na an espiritu nin Dios nagpapaluwas sa mga lalaking ini kan mga bunga na “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Galacia 5:​22, 23) An siring na bunga mahahayag sa saindang relasyon sa mga kapagtubod asin iba pa. Siempre, an nagkapira tibaad marahayon sa pagpaheling nin nagkapirang bunga kan espiritu, mantang an iba tibaad nakalalabi sa pakaabot sa ibang mga kualipikasyon para sa mga paraataman. Minsan siring, sa kabilogan na ugale ninda sa buhay, an gabos na naglalaom na manombrahan bilang mga paraataman o ministeryal na lingkod maninigo na magpaheling na sinda espirituwal na mga lalaki, na nakakaabot sa mga kahagadan kan Tataramon nin Dios.

12. Siisay an masasabing ninombrahan kan banal na espiritu?

¹² Kan sadolon ni Pablo an iba na magin paraarog sa saiya, nagibo nia iyan na may katalingkasan sa pagtaram huli ta sia mismo nag-aarog ki Jesu-Cristo, na ‘nagwalat sa sato nin modelo tanganing sunodon niato nin estrikto an saiyang mga lakad.’ (1 Pedro 2:​21; 1 Corinto 11:1) An mga nakakaabot sa mga kahagadan sa Kasuratan sa panahon kan nombramiento sa sainda bilang mga paraataman o ministeryal na lingkod masasabi kun siring na ninombrahan kan banal na espiritu.

13. Paano tinatabangan kan banal na espiritu an mga naggigibo nin mga rekomendasyon para sa mga lalaki na maglilingkod sa kongregasyon?

¹³ May saro pang nagpapaheling kun paano naghihiro an banal na espiritu sa pagrekomendar asin pagnombra nin mga paraataman. Sinabi ni Jesus na ‘an Ama sa langit nagtatao nin banal na espiritu sa mga naghahagad sa saiya.’ (Lucas 11:13) Kaya kun nagmimiting an kamagurangan sa lokal na kongregasyon tanganing magrekomendar nin mga lalaki para sa paninimbagan sa kongregasyon, namimibi sinda na logod giyahan sinda kan espiritu nin Dios. Ibinabasar ninda an saindang mga rekomendasyon sa sinasabi kan ipinasabong na Tataramon nin Dios, asin pinangyayari kan banal na espiritu na mamansayan ninda kun baga naaabot kan indibiduwal na pinaplanong nombrahan an mga kahagadan sa Kasuratan. An mga naggigibo kan mga rekomendasyon dai dapat na basta maimpluwensiahan nin panluwas na itsura, inadalan, o natural na mga abilidad. An pangenot na dapat nindang tawan nin atension iyo na kun baga an tawong iyan sarong espirituwal na lalaki, saro na dai pag-aalanganan na dolokon kan mga miembro kan kongregasyon tanganing hagadan nin espirituwal na hatol.

14. Ano an manonodan ta sa Gibo 6:​1-3?

¹⁴ Baga man kaibanan kan nagbibiaheng mga paraataman an mga grupo nin kamagurangan sa pagrekomendar nin mga tugang na lalaki na maglilingkod bilang kamagurangan asin ministeryal na lingkod, an aktuwal na pagnombra ginigibo sono sa arogan na itinao kaidtong enot na siglo. Sarong beses, may naglataw na pangangaipo para sa mga lalaking may espirituwal na kualipikasyon na maasikaso sa sarong importanteng asignasyon. An namamahalang grupo nagtao kan minasunod na instruksion: “Maghanap kamo nin pitong lalaki na marahay an dangog dian sa tahaw nindo, na pano nin espiritu asin kadonongan, tanganing manombrahan niamo sinda para sa mahalagang gibong ini.” (Gibo 6:​1-3) Baga man an mga lalaki na nag-aasikaso sa situwasyon an naggibo kan rekomendasyon, an mga nombramiento ginibo kan responsableng mga lalaki duman sa Jerusalem. Iyan man an arogan na sinusunod ngonyan.

15. Paano imbuelto an Namamahalang Grupo kun dapit sa pagnombra nin mga lalaki?

¹⁵ An Namamahalang Grupo kan Mga Saksi ni Jehova an direktang nagnonombra sa gabos na miembro kan mga Komite kan Sanga. Kun nagdedesisyon kun siisay an puedeng magkapot kan siring na magabat na paninimbagan, nasa isip kan  Namamahalang Grupo an sinabi ni Jesus: “An lambang saro na tinawan nin dakol, dakol an hahagadon sa saiya; asin an saro na pinamahala nin mga tawo sa dakol, orog kisa ordinaryo an hahagadon ninda sa saiya.” (Lucas 12:48) Apuera sa pagnombra nin mga miembro kan Komite kan Sanga, an Namamahalang Grupo nagnonombra nin kamagurangan sa Bethel asin nagbibiaheng mga paraataman. Minsan siring, may inaasignaran talaga sindang responsableng mga tugang na lalaki na maakto para sa sainda sa paggibo nin nagkapirang iba pang nombramiento. Igwa man ini nin susundan sa Kasuratan.

‘Magnombra Ka, Siring sa Ipinagboot Ko sa Saimo’

16. Taano ta iwinalat ni Pablo si Tito sa Creta, asin ano an ipinaririsa kaini mapadapit sa teokratikong mga pagnombra ngonyan?

¹⁶ Sinabihan ni Pablo an saiyang kapwa trabahador na si Tito: “Huli kaini iwinalat taka sa Creta, tanganing husayon mo an mga bagay na may depekto asin magnombra ka nin kamagurangan na lalaki sa lambang siudad, siring sa ipinagboot ko sa saimo.” (Tito 1:5) Dangan sinabi ni Pablo an mga kualipikasyon na dapat hanapon ni Tito sa mga lalaki na makukualipikar sa siring na mga nombramiento. Ngonyan, kun siring, an Namamahalang Grupo nagnonombra nin kualipikadong mga tugang na lalaki sa mga sangang opisina tanganing magrepresentar kaiyan sa pagnombra nin kamagurangan asin ministeryal na mga lingkod. Iniingatan na an mga nag-aakto bilang representante kan Namamahalang Grupo malinaw na nasasabotan asin sinusunod an mga giya sa Kasuratan sa siring na mga pagnombra. Huli kaini, nasa pagdirehir kan Namamahalang Grupo an pagnombra nin kualipikadong mga lalaki na maglilingkod sa mga kongregasyon kan Mga Saksi ni Jehova sa bilog na kinaban.

17. Paano inaasikaso nin sangang opisina an mga rekomendasyon para sa nombramiento nin mga paraataman asin ministeryal na lingkod?

¹⁷ Pag-isinumitir sa sangang opisina kan Watch Tower Society an mga rekomendasyon para sa nombramiento nin mga paraataman asin ministeryal na lingkod, an may kabatidan na mga lalaki nananarig sa espiritu nin Dios na giyahan sinda sa pagnombra. An mga lalaking ini nakamamate na sinda maninimbag, na nakakaaram na dai sinda dapat magdoon kan saindang kamot nin padale sa siisay man na lalaki, tanganing dai sinda magkaigwa nin kabtang sa saiyang mga kasalan.​—1 Timoteo 5:22.

18, 19. (a) Paano ipinaaabot an nagkapirang nombramiento? (b) Paano ginigibo an bilog na proseso nin pagrekomendar asin pagnombra?

 ¹⁸ An nagkapirang nombramiento puedeng ipaabot paagi sa sarong surat na igwa nin opisyal na selyo hale sa sarong legal na ahensia. An siring na surat puedeng gamiton sa pagnombra nin labi sa sarong tugang na lalaki sa kongregasyon.

¹⁹ An teokratikong mga nombramiento naggigikan ki Jehova paagi sa saiyang Aki asin sa naheheling na pinakapaagihan nin Dios digdi sa daga, “an fiel asin may diskresion na oripon” asin an Namamahalang Grupo kaiyan. (Mateo 24:​45-47) An bilog na proseso kan siring na pagrekomendar asin pagnombra dinidirehiran, o ginigiyahan, kan banal na espiritu. Totoo ini huli ta an mga kualipikasyon nakasurat sa Tataramon nin Dios, na ipinasabong kan banal na espiritu, asin an indibiduwal na ninombrahan nagpapaheling nin ebidensia nin pagpaluwas kan mga bunga kan espiritung iyan. Kun siring, an mga nombramiento dapat na mansayon na ginigibo kan banal na espiritu. Kun paanong an mga paraataman asin ministeryal na lingkod ninombrahan sa teokratikong paagi kaidtong enot na siglo, totoo man iyan ngonyan.

Nagpapasalamat sa Paggiya nin Dios

20. Taano ta kapareho niato an mga saboot ni David na nakasurat sa Salmo 133:1?

²⁰ Sa panahon na ini nin espirituwal na prosperidad asin teokratikong pag-oswag sa aktibidad na paghuhulit kan Kahadean, nagpapasalamat kita na si Jehova an pangenot na responsable sa pagnombra nin mga paraataman asin ministeryal na lingkod. An areglong ini na sono sa Kasuratan nakatatabang na mapagdanay an halangkaw na mga pamantayan nin Dios sa katanosan sa tahaw niato bilang Mga Saksi ni Jehova. Dugang pa, an Kristianong espiritu asin odok na mga paghihingoa kan mga lalaking ini dakula an ikinakokontribwir sa satong makangangalas na katoninongan asin pagkasararo bilang mga lingkod ni Jehova. Arog ki salmista David, napahihiro kita kun siring na magkagsing: “Uya! Kanigoan karahay asin kanigoan kaogma na an magturugang mag-ontok na sararo!”​—Salmo 133:1.

21. Paano naootob ngonyan an Isaias 60:17?

²¹ Kanigoan an pasasalamat niato sa pagdirehir ni Jehova paagi sa saiyang Tataramon asin banal na espiritu! Asin tunay nanggad na makahulogan an mga tataramon na nakasurat sa Isaias 60:​17: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat; asin nonombrahan ko an katoninongan bilang saimong mga paraataman asin an katanosan bilang saimong mga namamahala.” Mantang an teokratikong mga prosedimiento mas lubos na progresibong iniimplementar sa tahaw kan Mga Saksi ni Jehova, naeeksperyensiahan niato an maogmang mga kamugtakan na ini sa bilog na daganon na organisasyon nin Dios.

22. Sa ano kita tamang magpasalamat, asin ano an maninigo na determinado niatong gibohon?

²² Kita odok na nagpapasalamat sa teokratikong mga areglo na ginigibo sa tahaw niato. Asin pinahahalagahan niatong marhay an masakit alagad nakakokontentong trabaho na ginigibo kan mga paraataman asin ministeryal na lingkod na ninombrahan sa teokratikong paagi. Bilog na puso niatong irinurukyaw an satong mamomoton na langitnon na Ama, na tinawan kita nin espirituwal na prosperidad asin binendisyonan kita nin bastante. (Talinhaga 10:22) Kun siring, magin determinado kita na danay na makidungan sa organisasyon ni Jehova. Orog sa gabos, padagos kitang maglingkod na sararo para sa onra, kaomawan, asin kamurawayan kan dakula asin banal na ngaran ni Jehova.

Ano an Isisimbag Nindo?

• Taano ta masasabi niato na an nombramiento sa mga paraataman asin ministeryal na lingkod teokratiko, bakong demokratiko?

• Paano ninombrahan kan banal na espiritu an responsableng Kristianong mga lalaki?

• Paano imbuelto an Namamahalang Grupo sa pagnombra nin mga paraataman asin ministeryal na lingkod?

• Kun dapit sa teokratikong mga nombramiento, taano ta maninigo kitang magpasalamat ki Jehova?

[Mga Hapot Para sa Pag-adal]

[Mga Ritrato sa pahina 15]

An kamagurangan asin ministeryal na mga lingkod may pribilehiong maglingkod paagi sa teokratikong nombramiento