Danay na Makidungan sa Organisasyon ni Jehova
Danay na Makidungan sa Organisasyon ni Jehova
“An Dios logod nin katoninongan . . . sumangkap sa saindo nin lambang marahay na bagay sa pag-otob kan saiyang kabotan.”—HEBREO 13:20, 21.
1. Ano an populasyon sa kinaban, asin pira an ibinibilang na miembro nin nagkapirang relihion?
KAN taon 1999, an populasyon kan kinaban uminabot sa anom na bilyon! An The World Almanac nagsasabi na sa kabilangan na ini mga 1,165,000,000 an Muslim; 1,030,000,000 an Katoliko Romano; 762,000,000 an Hindu; 354,000,000 an Budista; 316,000,000 an Protestante; asin 214,000,000 an Ortodokso.
2. Ano an masasabi manongod sa kamugtakan sa relihion ngonyan?
2 Huli sa pagkabaranga asin pagkaribaraw sa relihion ngonyan, an gabos daw na minilyon na ini naghihiro kaoyon kan kabotan nin Dios? Dai, “huli ta an Dios sarong Dios, bakong nin karibarawan, kundi nin katoninongan.” (1 Corinto 14:33) Sa ibong na lado, kumusta man an internasyonal na kasararoan nin magturugang kan mga lingkod ni Jehova? (1 Pedro 2:17) An maingat na pagsiyasat nagpapatunay na ‘an Dios nin katoninongan sinasangkapan sinda nin lambang marahay na bagay sa pag-otob kan saiyang kabotan.’—Hebreo 13:20, 21.
3. Ano an nangyari sa Jerusalem kan Pentecostes 33 C.E., asin taano?
3 Siempre, an kabilangan kan mga asosyado sa Mga Saksi ni Jehova bakong basehan sa pagdeterminar kun baga yaon sa sainda an pag-oyon nin Dios; ni napapahanga an Dios sa mga estadistika nin pagdakol. Dai nia pinili an mga Israelita huli ta sinda an “pinakadakol” sa mga banwaan. An totoo, sinda “an pinakasadit” sa sainda. (Deuteronomio 7:7) Alagad huling dai nagin fiel an Israel, kan Pentecostes 33 C.E., ibinalyo ni Jehova an saiyang pag-oyon sa bagong kongregasyon na kompuesto kan mga parasunod ni Jesu-Cristo. Sinda linahidan kan banal na espiritu ni Jehova asin maigot na ibinalangibog sa iba an katotoohan manongod sa Dios asin ki Cristo.—Gibo 2:41, 42.
Danay na Nag-aabante
4. Taano ta sasabihon nindo na an enot na Kristianong kongregasyon danay na nag-aabante?
4 Kan enot na siglo, an Kristianong kongregasyon danay na nag-aabante, na nagbubukas nin bagong mga teritoryo, naggigibo nin mga disipulo, asin nagkakaigwa nin orog na pakasabot dapit sa mga katuyohan nin Dios. An enot na mga Kristiano danay na nakidungan sa espirituwal na kaliwanagan na itinatao paagi sa ipinasabong nin Dios na mga surat. Napahiro kan mga pagsongko kan mga apostol asin iba pa, ginibo ninda an saindang ministeryo. May dokumentadong ebidensia nanggad ini sa Kristianong Griegong Kasuratan.—Gibo 10:21, 22; 13:46, 47; 2 Timoteo 1:13; 4:5; Hebreo 6:1-3; 2 Pedro 3:17, 18.
5. Taano ta nag-ooswag ngonyan an organisasyon nin Dios, asin taano ta maninigo kitang danay na makidungan dian?
5 Arog kan enot na mga Kristiano, an mga Saksi ni Jehova sa presenteng aldaw nagpoon sa sadit. (Zacarias 4:8-10) Poon kan huring kabtang kan ika-19 siglo, nagkaigwa nin malinaw na ebidensia na an espiritu nin Dios yaon sa saiyang organisasyon. Huling kita nanarig, bakong sa kapangyarihan nin tawo, kundi sa paggiya kan banal na espiritu, nagpadagos kita sa pag-oswag sa satong pakasabot sa Kasuratan asin sa paggibo kan kabotan nin Dios. (Zacarias 4:6) Ngonyan na kita nasa “huring mga aldaw” na, importanteng marhay na kita danay na makidungan sa progresibong organisasyon ni Jehova. (2 Timoteo 3:1-5) An paggibo kaiyan nagpapangyari sa sato na papagdanayon na buhay an satong paglaom asin makikabtang sa pagpapatotoo manongod sa naestablisar nang Kahadean nin Dios bago abotan kan pangultimong katapusan an sistemang ini nin mga bagay.—Mateo 24:3-14.
6, 7. Pag-oolayan niato an anong tolong kabtang nin pag-abante kan organisasyon ni Jehova?
6 May mga kaibanan kita na nagpoon na makiasosyar sa organisasyon ni Jehova kaidtong mga taon nin 1920, 1930, asin 1940. Durante kan enot na mga taon na idto, siisay sa sato an makaiimahinar sa pambihirang pag-oswag asin progresibong pagtalubo kan organisasyon sagkod sa aldaw na ini? Isip-isipa an makahulogan na mga nangyari sa satong presenteng aldaw na kasaysayan! Tunay nanggad na nakakokontento sa espirituwal na horophoropon an nahaman ni Jehova paagi sa saiyang banwaan na inorganisar sa teokratikong paagi.
7 Si David kan suanoy natudok na gayo an boot kan horophoropon nia an makangangalas na mga gibo ni Jehova. “Kun ako magmawot na isaysay asin itaram iyan,” sabi nia, “iyan dai ko na kayang isaysay huli sa kadakolan.” (Salmo 40:5) Iyan man an limitasyon niato, dai niato kayang isaysay an dakol na dakula asin kaomaw-omaw na gibo ni Jehova sa satong kaaldawan. Minsan siring, pag-oolayan niato an tolong kabtang nin pag-abante kan organisasyon ni Jehova: (1) progresibong espirituwal na kaliwanagan, (2) pinakarhay asin pinahiwas na ministeryo, asin (3) napapanahon na mga pagliliwat sa organisasyonal na mga prosedimiento.
Nagpapasalamat sa Espirituwal na Kaliwanagan
8. Kaoyon kan Talinhaga 4:18, ano an pinangyari kan espirituwal na kaliwanagan na mamansayan niato mapadapit sa Kahadean?
8 Mapadapit sa progresibong espirituwal na kaliwanagan, an Talinhaga 4:18 nagin totoo. Iyan nagsasabi: “An dana kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.” Kanigoan an pasasalamat niato sa progresibong espirituwal na kaliwanagan na naeeksperyensiahan niato! Sa kombension sa Cedar Point, Ohio, kan 1919, itinampok an Kahadean nin Dios. Ginagamit ni Jehova an Kahadean tanganing santipikaron an saiyang ngaran asin ibindikar an saiyang pagkasoberano. An totoo, an espirituwal na kaliwanagan an nagpangyari sa sato na mamansayan na poon sa Genesis sagkod sa Kapahayagan, pinatototoohan kan Biblia an katuyohan ni Jehova na santipikaron an saiyang ngaran paagi sa Kahadean na pinamamahalaan kan saiyang Aki. Dian nakasarig an marahayon na paglaom kan gabos na namomoot sa katanosan.—Mateo 12:18, 21.
9, 10. Kan mga taon nin 1920, ano an nanodan manongod sa Kahadean asin manongod sa duwang magkatumang na organisasyon, asin paano ini nakatabang?
9 Sa kombension sa Cedar Point kan 1922, an pangenot na ispiker, si J. F. Rutherford, sinadol an banwaan nin Dios na “ipaisi, ipaisi, ipaisi, an Hade asin an saiyang kahadean.” Sa artikulong “Birth of the Nation” (sa Bicol, “Pagkamundag kan Nasyon”), na ipinublikar sa The Watch Tower na Marso 1, 1925, dinara an atension sa espirituwal na pakarorop may labot sa mga hula na nagtokdo sa pagkatindog kan Kahadean nin Dios kan 1914. Namansayan man kan mga taon nin 1920 na igwa nin duwang magkatumang na organisasyon—ki Jehova asin ki Satanas. Nagpapadagos an paglalaban kaiyan, asin kita mapapabilang sana sa lado kan kapangganahan kun kita danay na makikidungan sa organisasyon ni Jehova.
10 Paano kita natabangan kan siring na espirituwal na kaliwanagan? Huling an Kahadean nin Dios asin an Hadeng si Jesu-Cristo bakong kabtang kan kinaban, kita dai man puede na magin kabtang kaiyan. Paagi sa pagdadanay na siblag sa kinaban, ipinaheheling ta na kita nasa lado kan katotoohan. (Juan 17:16; 18:37) Kun minamasdan ta an komplikadong mga problema na nagpapasakit sa maraot na sistemang ini, kanigoan an pasasalamat niato na kita bakong kabtang kan organisasyon ni Satanas! Asin kanigoan na pabor an itinao sa sato na magkaigwa nin espirituwal na katiwasayan sa laog kan organisasyon ni Jehova!
11. Anong ngaran na basado sa Kasuratan an ginamit kan banwaan nin Dios kan 1931?
11 Sa kombension sa Columbus, Ohio, kan 1931, tinawan nin tamang aplikasyon an Isaias 43:10-12. Ginamit kan Mga Estudyante sa Biblia an nagpapamidbid na ngaran na Mga Saksi ni Jehova. Kanigoan kadakulang pribilehio na ipamidbid an ngaran nin Dios tanganing an iba makaapod dian para maligtas!—Salmo 83:18; Roma 10:13.
12. Anong espirituwal na kaliwanagan may labot sa dakulang kadaklan an itinao kan 1935?
12 Bago kan mga taon nin 1930, an dakol sa banwaan nin Dios medyo bakong segurado manongod sa saindang paglaom para sa buhay sa ngapit. May mga an iniisip manongod sa langitnon na buhay alagad naakit sa mga tokdo sa Biblia manongod sa paraisong daga. Sa kombension sa Washington, D.C., kan 1935, nakaoogmang marhay na maaraman na an dakulang kaburunyogan, o dakulang kadaklan, sa Kapahayagan kapitulo 7 sarong grupo na may daganon na paglaom. Poon kaidto, an pagtipon sa dakulang kadaklan orog na ruminikas an pag-abante. Bako daw na nagpapasalamat kita na bako nang misteryo para sa sato kun sairisay an dakulang kadaklan? An katunayan na kadakol na tawo an tinitipon hale sa gabos na nasyon, tribo, asin tataramon nagmomotibar sa sato na rumikas mantang kita danay na nakikidungan sa organisasyon ni Jehova.
13. Anong dakulang isyu an itinampok sa kombension sa St. Louis kan 1941?
13 An dakulang isyu na maninigong makaapektar sa sosyedad nin tawo itinampok sa kombension sa St. Louis, Missouri, kan 1941. Iyan an unibersal na pagdominar, o soberaniya. Ini an isyu na dapat na husayon sa dai na mahahaloy, asin an dakula asin makangingirhat na aldaw tanganing gibohon iyan madatong nin panale! Idinoon man kan 1941 an konektadong isyu dapit sa integridad, na nagtotogot sa sato na ipaheling kun saen kitang kampi bilang indibiduwal may labot sa soberaniya nin Dios.
14. Sa internasyonal na kombension kan 1950, ano an naaraman manongod sa mga prinsipe na sinambit sa Isaias 32:1, 2?
14 Sa internasyonal na kombension sa Siudad nin Nueva York kan 1950, an mga prinsipe sa Isaias 32:1, 2 ipinamidbid nin tama. Nakakapalaad nin boot kan si Tugang na Frederick Franz magpahayag dapit sa temang ini asin ipaliwanag na an mga prinsipe sa bagong daga kabilang sa sato. Sa kombension na idto asin sa mga suminunod pa, nagkaigwa nin kadakol na silyab nin espirituwal na liwanag. (Salmo 97:11) Kanigoan an pasasalamat niato na an satong dana “kabaing kan liwanag na paorog nang paorog na nagliliwanag”!
Pag-abante sa Satong Ministeryo
15, 16. (a) Paano kita nag-abante sa satong ministeryo durante kan mga taon nin 1920 asin 1930? (b) Anong mga publikasyon an nag-engganyar sa Kristianong ministeryo sa nakaagi pa sanang mga dekada?
15 An ikaduwang paagi nin pag-abante kan organisasyon ni Jehova igwa nin koneksion sa satong pangenot na gibohon—an paghuhulit kan Kahadean asin paggibo nin mga disipulo. (Mateo 28:19, 20; Marcos 13:10) Tanganing mahaman an gibohon na ini, dayaday na idinodoon sa sato kan organisasyon an importansia nin pagpahiwas kan satong ministeryo. Kan 1922 an gabos na Kristiano sinadol na makikabtang sa paghuhulit. Nasa balang saro na na pasirangon an saiyang liwanag asin sa siring magkaigwa nin personal na kabtang sa pagpapatotoo sa katotoohan. (Mateo 5:14-16) Kan 1927 ginibo an mga lakdang na itagama an Domingo bilang aldaw para sa ministeryo sa langtad. Poon kan Pebrero 1940, nagin nang ordinaryo na maheling an mga Saksi sa mga tinampo sa komersial na lugar na nag-aalok kan An Torrengbantayan asin Consolation (ngonyan Awake!).
16 Kan taon 1937 iinintrodusir an pulyetong Model Study, na nagdodoon kan pangangaipo na gumibo nin mga pagdalaw liwat tanganing tokdoan an iba kan katotoohan sa Biblia. Sa mga taon pakatapos kaiyan, idinoon na marhay an aktibidad na pag-adal sa Biblia. Inengganyar an kabtang na ini kan ministeryo paagi sa pagpublikar sa Ingles na edisyon kan librong “Mamidbid Logod Na An Dios Totoo” kan 1946 asin An Katotoohan na Minagiya Pasiring sa Buhay na Daing Sagkod kan 1968. Sa presente, ginagamit ta an librong Kaaraman na Minagiya Pasiring sa Buhay na Daing Katapusan. An pagtratar sa siring na materyal nagigin masarig na Makakasuratan na pundasyon sa paggibo nin mga disipulo.
Pag-abante sa Organisasyonal na mga Pagpakarhay
17. Tanganing makasunod sa Isaias 60:17, paano uminabante an organisasyon ni Jehova?
17 An ikatolong paagi nin pag-abante kan organisasyon ni Jehova igwa nin koneksion sa organisasyonal na mga pagpakarhay. Segun sa Isaias 60:17, si Jehova nanuga: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat; asin nonombrahan ko an katoninongan bilang saimong mga paraataman asin an katanosan bilang saimong mga namamahala.” Tanganing makasunod sa hulang ini, ginibo an mga lakdang na pakarhayon an pangangataman sa gibohon na paghuhulit kan Kahadean asin sa pagpastor sa aripompon.
18, 19. Anong organisasyonal na mga pagpakarhay an nangyari sa nag-aging mga taon?
18 Kan 1919 sarong direktor sa paglilingkod an ninombrahan sa lambang kongregasyon na naghahagad na organisaron para sa paglilingkod sa langtad. Nakaengganyar ini sa satong ministeryo sa langtad. An pag-elehir nin kamagurangan asin diakono tinapos kan 1932, na nagsenyalar kan satong paghale sa demokratikong mga paagi. May saro pang makahulogan na nangyari kan 1938 kan an gabos na lingkod sa kongregasyon nagpoon na nombrahan nin mas kaoyon na marhay kan mga areglo sa teokratikong pagnombra kaidto sa enot na Kristianong kongregasyon. (Gibo 14:23; 1 Timoteo 4:14) Kan 1972 an mga paraataman asin ministeryal na lingkod ninombrahan na maglingkod, arog kan ginibo kan siring na mga lalaki sa tahaw kan enot na mga Kristiano. Imbes kan pagkaigwa nin saro sanang lalaki na naglilingkod bilang paraataman sa sarong kongregasyon, an Filipos 1:1 asin iba pang teksto nagpapaheling na idtong mga nakakaabot sa mga kahagadan sa Kasuratan para sa mga paraataman kompuesto nin sarong grupo nin kamagurangan.—Gibo 20:28; Efeso 4:11, 12.
19 Kan 1975 inimplementar an areglo na magkaigwa nin mga komite kan Namamahalang Grupo kan Mga Saksi ni Jehova na mangangataman sa pambilog na kinaban na mga aktibidad kan organisasyon nin Dios. Nagnombra nin mga Komite kan Sanga na mangangataman sa gibohon sa saindang kanya-kanyang teritoryo. Poon kaidto, tinawan nin atension an pagpasimplipikar kan gibohon sa opisina prinsipal asin sa mga sangang opisina kan Watch Tower Society tangani na ‘masierto an orog na mahalagang mga bagay.’ (Filipos 1:9, 10) Kalabot sa mga paninimbagan na nasa abaga kan mga katabang na pastor ni Cristo an pangengenot sa gibohon na pag-eebanghelyo, pagtotokdo sa kongregasyon, asin tamang pagpastor sa aripompon nin Dios.—1 Timoteo 4:16; Hebreo 13:7, 17; 1 Pedro 5:2, 3.
An Aktibong Pamomoon ni Jesus
20. An danay na pakikidungan sa organisasyon ni Jehova naghahagad na rekonoseron niato an ano manongod sa katongdan ni Jesus?
20 An danay na pakikidungan sa progresibong organisasyon ni Jehova naghahagad na rekonoseron niato an iinasignar nin Dios na papel ni Jesu-Cristo bilang “payo kan kongregasyon.” (Efeso 5:22, 23) Mahalaga man na mangnohon an Isaias 55:4, na dian sinasabihan kita: “Uya! Bilang saksi sa mga nasyon sia itinao ko [Jehova], bilang namomoon asin komandante sa mga nasyon.” Sierto nanggad na aram ni Jesus kun paano mangenot. Midbid man nia an saiyang mga karnero asin an saindang mga gibo. Sa katunayan, kan siyasaton nia an pitong kongregasyon sa Asia Minor, limang beses na sinabi nia: “Aram ko an saimong mga gibo.” (Kapahayagan 2:2, 19; 3:1, 8, 15) Aram man ni Jesus an satong mga kaipuhan, siring kan saiyang Ama, si Jehova. Bago itinao an Modelong Pamibi, sinabi ni Jesus: “Aram na nin Dios na saindong Ama an mga kaipuhan nindo bago pa nindo iyan hagadon sa saiya.”—Mateo 6:8-13.
21. Paano nahahayag an pamomoon ni Jesus sa Kristianong kongregasyon?
21 Paano nahahayag an pamomoon ni Jesus? An saro paagi sa Kristianong mga paraataman, an “balaog na mga lalaki.” (Efeso 4:8) An Kapahayagan 1:16 ilinaladawan an linahidan na mga paraataman na yaon sa too ni Cristo, nasa kontrol nia. Ngonyan, si Jesus an nagdidirehir sa areglo na pagkakaigwa nin kamagurangan, baga man an mga lalaking iyan langitnon o daganon an paglaom. Siring kan ipinaliwanag sa sinusundan na artikulo, ninombrahan sinda kan banal na espiritu kaoyon sa mga kahagadan sa Kasuratan. (1 Timoteo 3:1-7; Tito 1:5-9) Kan enot na siglo, sarong grupo nin kamagurangan na lalaki sa Jerusalem an minakompuesto sa sarong namamahalang grupo na iyo an nangangataman sa mga kongregasyon asin sa aktibidad na paghuhulit kan Kahadean sa pankagabsan. Iyan man an arogan na sinusunod sa laog kan organisasyon ni Jehova ngonyan.
Danay na Makidungan!
22. Anong tabang an itinatao kan Namamahalang Grupo?
22 An intereses kan Kahadean sa daga ipinaniwala sa “fiel asin may diskresion na oripon,” na irinerepresentar kan Namamahalang Grupo kan Mga Saksi ni Jehova. (Mateo 24:45-47) Pangenot na inaasikaso kan Namamahalang Grupo an pagtao nin espirituwal na pagtotokdo asin paggiya sa Kristianong kongregasyon. (Gibo 6:1-6) Minsan siring, kun an mga kapwa parasamba naapektaran nin natural na mga kalamidad, an Namamahalang Grupo sinusugo an saro o labi pang legal na ahensia na mag-ayuda asin hirahayon o ibalik sa dati an naraot na mga harong asin Kingdom Hall. Kun may mga Kristiano na tinatrato nin maisog o pinaglalamag, naggigibo nin mga lakdang tanganing pakosogon sinda sa espirituwal. Asin “sa masakit na panahon,” ginigibo an gabos na paghihingoa na papagdanayon na nag-aabante an paghuhulit.—2 Timoteo 4:1, 2.
23, 24. Ano man an mangyari sa saiyang banwaan, ano an dayaday na itinatao ni Jehova, asin ano an maninigo na magin determinasyon niato?
23 Ano man an mangyari sa saiyang banwaan, si Jehova dayaday na nagtatao nin espirituwal na kakanon asin kinakaipuhan na paggiya. Tinatawan man nin Dios nin pakamansay asin pakarorop an responsableng mga tugang na lalaki na pag-andaman an dugang pang mga pag-oswag asin pagpakarhay sa teokratikong organisasyon. (Deuteronomio 34:9; Efeso 1:16, 17) Siertong gayo, itinatao ni Jehova an kaipuhan niato tanganing otobon an sugo sa sato na gumibo nin mga disipulo asin gibohon an satong ministeryo sa bilog na kinaban.—2 Timoteo 4:5.
24 Lubos an satong kompiansa na nungkang babayaan ni Jehova an saiyang fiel na banwaan; ililigtas nia sinda sa maabot na “dakulang kahorasaan.” (Kapahayagan 7:9-14; Salmo 94:14; 2 Pedro 2:9) Yaon sa sato an gabos na dahelan na papagdanayon na marigon sagkod sa katapusan an kompiansa na nasa sato kan enot. (Hebreo 3:14) Kun siring, magin determinado kita na danay na makidungan sa organisasyon ni Jehova.
Ano an Isisimbag Nindo?
• Taano ta masasabi niato na an organisasyon ni Jehova danay na nag-aabante?
• Ano an ebidensia na an banwaan nin Dios nagkakamit nin progresibong espirituwal na kaliwanagan?
• Paano nagkaigwa nin mga pagpakarhay sa Kristianong ministeryo?
• Anong napapanahon na mga pagliliwat an ginibo sa organisasyonal na mga prosedimiento sa tahaw kan mga lingkod ni Jehova?
[Mga Hapot Para sa Pag-adal]
[Ritrato sa pahina 17]
Arog ki David, dai niato kayang isaysay an gabos na makangangalas na gibo ni Jehova
[Ritrato sa pahina 18]
Nakinabang an aripompon nin Dios sa napapanahon na mga pagliliwat sa organisasyonal na mga prosedimiento