Kun Paano an Namamahalang Grupo Napapalaen sa Legal na Korporasyon

AN TAONAN na mga miting kan Watch Tower Bible and Tract Society of Pennsylvania ginigibo poon pa kan Enero nin 1885. Kan tinitipon an linahidan na mga Kristiano kaidtong huring kabtang kan ika-19 siglo, an mga direktor asin opisyal kan korporasyon na ini igwa nin langitnon na paglaom. Sa katunayan, kaidto pa iyan.

Nagkaigwa nin sarong eksepsion. Kan 1940, si Hayden C. Covington​—na kan panahon na idto abogado kan Sosyedad asin saro sa “ibang karnero,” na may daganon na paglaom​—inelehir bilang direktor kan Sosyedad. (Juan 10:16) Sia naglingkod bilang bise presidente kan Sosyedad poon kan 1942 sagkod 1945. Kan panahon na idto, si Tugang na Covington nagdemitir bilang direktor tanganing sunodon an minalataw kaidto na kabotan ni Jehova​—na an gabos na direktor asin opisyal kan korporasyon sa Pennsylvania dapat na linahidan na mga Kristiano. Si Lyman A. Swingle an suminalida ki Hayden C. Covington sa junta directiva, asin si Frederick W. Franz an inelehir na bise presidente.

Taano ta nagtubod an mga lingkod ni Jehova na an gabos na direktor asin opisyal kan Watch Tower Bible and Tract Society of Pennsylvania maninigo na linahidan na mga Kristiano? Huli ta kan panahon na idto, an junta directiva asin opisyales kan korporasyon sa Pennsylvania midbid na konektadong marhay sa Namamahalang Grupo kan Mga Saksi ni Jehova, na pirmeng kompuesto gabos nin mga lalaking linahidan nin espiritu.

Sarong Taonan na Miting na May Dakulang Importansia

Sa ginibong taonan na miting kan Oktubre 2, 1944, sa Pittsburgh, inaprobaran kan mga miembro kan korporasyon sa Pennsylvania an anom na resolusyon na nag-enmienda sa carta kaiyan. An carta nagbugtak kan kondisyon na an mga kabtang na may pribilehiong bumoto itatao sa mga nagkokontribwir nin pondo sa gibohon kan Sosyedad, alagad an ikatolong enmienda hinale an kondisyon na iyan. An sarong report manongod sa taonan na miting na iyan nagsasabi: “An mga miembro kan Sosyedad bubugtakan nin limite na dai malabi sa 500 . . . An kada mapili dapat bilog na panahon na lingkod kan Sosyedad o parsial na panahon na lingkod nin sarong kompanya [kongregasyon] kan mga saksi ni Jehova asin dapat na nagpapaheling kan espiritu kan Kagurangnan.”

Pakatapos kaiyan, an mga direktor kan Sosyedad dapat na elehiron sa puesto kan mga indibiduwal na biyong dusay ki Jehova, gurano man na kuarta an ikinokontribwir ninda sa pagpaoswag kan gibong pan-Kahadean. Minalataw na ini kaoyon kan progresibong pagpakarhay na ihinula sa Isaias 60:​17, na dian mababasa niato: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat; asin nonombrahan ko an katoninongan bilang saimong mga paraataman asin an katanosan bilang saimong mga namamahala.” Sa pagtaram manongod sa “mga paraataman” asin “mga namamahala,” an hulang ini nagtotokdo sa mga pagpakarhay sa organisasyonal na mga prosedimiento sa tahaw kan banwaan ni Jehova.

An mahalagang lakdang na ini sa pagdara sa organisasyon sa tamang teokratikong kamugtakan nangyari sa katapusan kan “duwang ribo tolong gatos na banggi asin aga,” na nasambitan sa Daniel 8:14. Kan panahon na idto, ‘an banal na lugar dinara sa tamang kamugtakan kaiyan.’

Minsan siring, pakatapos kan taonan na miting na may dakulang importansia kan 1944, dai pa nasimbag an sarong mahalagang marhay na hapot. Mantang an Namamahalang Grupo kaidto midbid na konektadong marhay sa junta directiva na may pitong miembro kan korporasyon sa Pennsylvania, nangangahulogan daw ini na an Namamahalang Grupo dai nanggad puedeng ikompuesto nin labi sa pitong linahidan na Kristiano? Dugang pa, mantang an mga direktor ineelehir kan mga miembro kan korporasyon, ineelehir daw kan mga miembro kan korporasyon an mga miembro kan Namamahalang  Grupo sa taonan na miting kada taon? An mga direktor asin opisyal daw kan Watch Tower Bible and Tract Society of Pennsylvania asin an mga miembro kan Namamahalang Grupo pareho man sana, o sinda daw magkalaen?

Saro Pang Dai Malilingawan na Taonan na Miting

An mga hapot na ini sinimbag sa taonan na miting na ginibo kan Oktubre 1, 1971. Sa okasyon na iyan, an saro sa mga ispiker nagsabi na an namamahalang grupo nin “fiel asin may diskresion na oripon” naenot nin ginatos na taon sa Watch Tower Bible and Tract Society of Pennsylvania. (Mateo 24:​45-47) Nabilog an sarong namamahalang grupo kaidtong Pentecostes nin 33 C.E., labing 18 siglo bago nagkaigwa nin korporasyon sa Pennsylvania. Kan primero, an namamahalang grupo kompuesto nin, bakong 7 lalaki, kundi 12 apostol. Malinaw na an kabilangan dinagdagan kan huri, huli ta an “mga apostol asin kamagurangan na lalaki sa Jerusalem” an nangengenot.​—Gibo 15:2.

Kan 1971 an iyo man sanang ispiker nagpaliwanag na dai puedeng eelehir kan mga miembro kan Watch Tower Society an mga miembro kan linahidan na Namamahalang Grupo. Taano? “Huli ta,” sinabi nia, “an namamahalang grupo kan grupong ‘oripon’ dai ninonombrahan nin siisay man na tawo. Iyan ninonombrahan ni . . . Jesu-Cristo, an Payo kan tunay na Kristianong kongregasyon asin an Kagurangnan kan grupong ‘fiel asin may diskresion na oripon.’” Kun siring, malinaw nanggad, an mga miembro kan Namamahalang Grupo dai puedeng eelehir sa puesto kan mga miembro nin arin man na legal na korporasyon.

Sa pagpadagos, sinabi kan ispiker an makahulogan na marhay na kapahayagan na ini: “An namamahalang grupo mayo nin opisyales na arog baga kan sa Junta Directiva kan Sosyedad, arin na baga, an presidente, bise presidente, sekretaryo-tesurero asin katabang na sekretaryo-tesurero. Igwa sana iyan nin tsirman.” Sa laog nin dakol na taon, an presidente kan korporasyon sa Pennsylvania iyo man an pangenot na miembro kan Namamahalang Grupo. Bako nang arog kaini an kamugtakan ngonyan. Minsan ngani bakong magkakapantay sa eksperyensia o abilidad, an mga miembro kan Namamahalang Grupo magkakapantay sa paninimbagan. Idinugang pa kan ispiker: “An siisay man na miembro kan namamahalang grupo puedeng magin tsirman kaiyan na dai kaipuhan na kadungan kaiyan sia pa an presidente kan . . . Sosyedad . . . Iyan gabos depende sa turnohan na sistema para sa pagigin tsirman kan namamahalang grupo.”

Sa dai malilingawan na taonan na miting na iyan kan 1971, lininaw nanggad an kalaenan kan linahidan nin espiritu na mga miembro kan Namamahalang Grupo asin kan mga direktor kan korporasyon sa Pennsylvania. Pero, an mga miembro kan Namamahalang Grupo nagpadagos na maglingkod bilang mga direktor asin opisyal kan Sosyedad. Minsan siring, ngonyan minalataw an hapot: Igwa daw nin Makakasuratan na dahelan kun taano ta dapat na mga miembro kan Namamahalang Grupo an mga direktor kan Watch Tower Bible and Tract Society of Pennsylvania?

An simbag mayo. An korporasyon sa Pennsylvania bako an solamenteng legal na ahensia na ginagamit kan Mga Saksi ni Jehova. Igwa pa nin iba. An saro iyo an Watchtower Bible and Tract Society of New York, Incorporated. Ginigibo kaiyan na magin pasil an satong gibohon sa Estados Unidos. An bendisyon ni Jehova malinaw na nasa korporasyon na iyan, minsan ngani an mga direktor asin opisyal kaiyan kadaklan hale sa “ibang karnero.” An International Bible Students Association ginagamit sa Britania. An iba pang legal na ahensia ginagamit tanganing palakopon an intereses kan Kahadean sa ibang kadagaan. Gabos iyan may pagkaoroyon na nagtatabang asin igwa nin kabtang tanganing ikahulit an maogmang bareta sa bilog na daga. Saen man iyan namumugtak o dawa siisay an naglilingkod bilang mga direktor o opisyal, an mga ahensiang ini ginigiyahan sa teokratikong paagi asin ginagamit kan Namamahalang Grupo. Huli kaini, an mga ahensiang iyan may iinasignar na mga trabaho na dapat gibohon sa pagpaoswag kan intereses kan Kahadean.

Kapakipakinabang para sa sato an pagkaigwa nin legal na mga ahensia. Paagi kaiyan kita nagkukuyog sa lokal asin nasyonal na mga ley, na hinahagad kan Tataramon nin Dios. (Jeremias 32:​11; Roma 13:1) Ginigibong magin pasil kan legal na mga ahensia an satong gibohon na pagpalakop kan mensahe kan Kahadean paagi sa pag-imprenta nin mga Biblia, libro, magasin, brosyur, asin iba pang babasahon. An siring na mga ahensia  nagseserbi man na legal na instrumento sa pag-asikaso sa mga bagay na konektado sa pagsasadiri nin propiedad, pag-ayuda, kontrata sa paggamit nin mga pasilidad sa kombension, asin iba pa. Kita nagpapasalamat sa mga serbisyo kan siring na legal na mga ahensia.

An Ngaran ni Jehova Itinampok

Kan 1944, an Artikulo II kan carta kan Watch Tower Bible and Tract Society of Pennsylvania inenmendaran tanganing idoon an mga obheto kan korporasyon na ini. Segun sa carta, an mga katuyohan kan Sosyedad kabilang an mayor na katuyohan na ini: “Tanganing ihulit an ebanghelyo kan kahadean nin Dios na sakop ni Cristo Jesus sa gabos na nasyon bilang patotoo sa ngaran, tataramon asin supremasiya kan Makakamhan sa gabos na Dios na si JEHOVA.”

Poon kan 1926 itinampok kan ‘fiel na oripon’ an ngaran ni Jehova. Nangorognang nagin risang gayo an 1931 kan gamiton kan Mga Estudyante sa Biblia an ngaran na Mga Saksi ni Jehova. (Isaias 43:​10-12) An mga publikasyon kan Sosyedad na nagdoon kan ngaran nin Dios kabilang an mga librong Jehovah (1934), “Let Your Name Be Sanctified” (1961), asin “The Nations Shall Know That I Am Jehovah”​​—How? (1971).

Nangorognang dapat sambiton an manongod sa New World Translation of the Holy Scriptures, na ipinublikar nin bilog sa Ingles kan 1960. Yaon dian an ngaran ni Jehova sa gabos na lugar na minalataw an Tetragrammaton sa Hebreong Kasuratan. Ilinaag man sa traduksion na ini an ngaran nin Dios sa 237 lugar sa Kristianong Griegong Kasuratan kun saen an maingat na pag-analisar nagsasabi na ini angay. Kanigoan an satong pagpasalamat na, sa manlaenlaen na paagi, tinogotan ni Jehova an “oripon” asin an Namamahalang Grupo kaiyan na gamiton an saindang rekursos sa pagpublikar asin legal na mga ahensia sa pagpahayag kan saiyang ngaran sa bilog na daga!

Pinalakop an Pagdistribwir kan Tataramon nin Dios

An banwaan ni Jehova pirmeng nagpapatotoo sa saiyang ngaran asin sinusurog an saiyang Tataramon paagi sa pagpublikar asin pagdistribwir nin minilyon na publikasyon na basado sa Biblia asin siring man nin Biblia mismo. Sa kapinonan kan mga taon nin 1900, an Watch Tower Society nagin kagsadiri kan diretsong magpublikar kan The Emphatic Diaglott, an Griego-Ingles na interlinear na edisyon ni Benjamin Wilson kan Kristianong Griegong Kasuratan. Ipinublikar kan Sosyedad an edisyon kan Mga Estudyante sa Biblia kan King James Version, na may kaibang 500 na pahinang apendiks. Kan 1942 ipinublikar kaiyan an King James Version na may mga reperensia sa pagirilid. Dangan kan 1944 pinonan kan Sosyedad na imprentahon an American Standard Version nin 1901, na naggagamit kan ngaran nin Dios. An ngaran ni Jehova tampok na kabtang man kan The Bible in Living English, ni Stephen T. Byington, na ipinublikar kan Sosyedad kan 1972.

An legal na mga ahensia na ginamit kan Mga Saksi ni Jehova nagtabang sa pag-imprenta asin pagdistribwir kan gabos na traduksion na ini kan Biblia. Minsan siring, nagin lataw na marhay an dayupot na kooperasyon sa pag-oltanan kan Watch Tower Society asin kan grupo nin linahidan na mga Saksi ni Jehova na minakompuesto kan Komite sa Pagtradusir kan Bibliang Bagong Kinaban. Kita naggagayagaya na, bilog man o kabtang sana, sagkod sa panahon na ini labing 106,400,000 na kopya kan traduksion na ini an naimprenta na sa 38 lenguahe. An Watch Tower Bible and Tract Society of Pennsylvania tunay nanggad na sarong sosyedad nin Biblia!

‘An fiel na oripon pinaniwalaan kan gabos na rogaring kan saiyang kagurangnan.’ Kaiba digdi an mga pasilidad sa opisina prinsipal sa Estado nin Nueva York, E.U.A., asin an 110 na sangang opisina na nagpupunsionar ngonyan sa bilog na kinaban. An mga miembro kan grupong oripon nakaaaram na sinda papaninimbagon sa kun paano ninda ginamit an ipinagkatiwala sa sainda. (Mateo  25:​14-​30) Pero, dai kaini inoolang an ‘oripon’ sa pagtogot sa kualipikadong mga paraataman hale sa “ibang karnero” na asikasohon an legal asin administratibong mga paninimbagan. Sa katunayan, minatogot ini sa mga miembro kan Namamahalang Grupo na idusay an mas dakol na panahon “sa pamibi asin sa ministeryo kan tataramon.”​—Gibo 6:4.

Sagkod na itinotogot kan mga kamugtakan sa kinaban na ini, gagamiton kan Namamahalang Grupo, na nagrerepresentar sa “fiel asin may diskresion na oripon,” an legal na mga ahensia. An mga ini nakatatabang na gamiton, alagad puede man maski mayo. Kun an sarong legal na ahensia rebokaron paagi sa dekreto nin gobyerno, an paghuhulit magpapadagos pa man giraray. Dawa ngonyan, sa kadagaan na igwa nin mga restriksion asin mayo nin ginagamit na legal na mga ahensia, an mensahe kan Kahadean ibinabalangibog, naggigibo nin mga disipulo, asin nagpapadagos an pag-oswag kan teokrasya. Nangyayari iyan huli ta an mga Saksi ni Jehova nagtatanom asin nagbabaribi, asin ‘padagos na pinatutubo iyan nin Dios.’​—1 Corinto 3:​6, 7.

Mantang tinatanaw ta an ngapit, kita kompiado na aasikasohon ni Jehova an espirituwal asin materyal na mga pangangaipo kan saiyang banwaan. Sia asin an saiyang Aki, si Jesu-Cristo, magpapadagos sa pagtao nin langitnon na paggiya asin suporta na kaipuhan tanganing matapos an paghuhulit kan Kahadean. Siempre, ano man an mahaman ta bilang mga lingkod nin Dios nagigibo ‘bakong paagi sa puersa militar, ni sa kapangyarihan, kundi paagi sa espiritu ni Jehova.’ (Zacarias 4:6) Kun siring kita namimibi para sa tabang nin Dios, mantang nakaaaram na paagi sa kosog na itinatao ni Jehova, matatapos ta an gibohon na ipinagigibo nia sa sato sa panahon na ini kan katapusan!