Sarong Espesyal na Paisi

SA PAGTATAPOS kan taonan na miting kan Watch Tower Bible and Tract Society of Pennsylvania kan Oktubre 7, 2000, sarong espesyal na paisi an itinao kan tsirman, si John E. Barr kan Namamahalang Grupo. Ginamit na basehan kan paising ini an mga pahayag na mas naenot na itinao kan aldaw na iyan ni Theodore Jaracz asin Daniel Sydlik.​​—Helingon an pahina 12-16 asin 28-31 kan magasin na ini.

Sinasambit an sarong mahalagang marhay na punto, si Tugang na Barr nagsabi: “ ‘An fiel asin may diskresion na oripon’ asin an Namamahalang Grupo kaiyan pinaniwalaan nin intereses na mas halangkaw asin mas mahiwas an sakop kisa kan itinao sa legal na mga korporasyon. An sinasabi sa nakasurat sa carta na mga katuyohan kan balang saro kan legal na mga ahensiang iyan limitado sana an sakop. Minsan siring, ipinaniwala kan satong Kagurangnan, si Jesu-Cristo, sa grupong fiel na oripon an gabos niang ‘rogaring,’ o intereses na pan-Kahadean digdi sa daga.”​—Mateo 24:​45-47.

May labot sa korporasyon sa Pennsylvania, idinugang ni Tugang na Barr: “Poon kan gibohon iyan na korporasyon kan 1884, nagkaigwa an Watch Tower Bible and Tract Society of Pennsylvania nin importanteng kabtang sa satong kasaysayan sa presenteng aldaw. Pero, iyan legal na instrumento sana na ginagamit kan ‘fiel asin may diskresion na oripon’ kun iyan kaipuhan.”

Sa mga diskurso ninda, ipinaliwanag ni Tugang na Sydlik asin Jaracz na an bagay na “an fiel asin may diskresion na oripon” an pinaniwalaan kan gabos na daganon na rogaring kan Kagurangnan dai inoolang an grupong oripon sa pagtogot sa kualipikadong mga lalaki hale sa “ibang karnero” tanganing mag-asikaso sa nagkapirang rutinang responsibilidad sa pag-administrar. (Juan 10:16) Ni may ano man na sono sa Kasuratan na dahelan na iinsistir na an gabos o siisay man sa mga direktor kan legal na mga ahensia na ginagamit kan Mga Saksi ni Jehova kaipuhan na linahidan na mga Kristiano.

Sinabihan ni Tugang na Barr an mga nagdadangog na kasuarin pa sana an nagkapirang miembro kan Namamahalang Grupo kan Mga Saksi ni Jehova na naglilingkod bilang mga direktor asin opisyal boluntaryong nagdemitir sa junta directiva kan gabos na korporasyon na ginagamit kan “fiel asin may diskresion na oripon” sa Estados Unidos. Responsableng mga tugang na lalaki na kabilang sa grupong ibang karnero an inelehir bilang mga kasalida.

Kapakipakinabang nanggad an desisyon na ini. Itinotogot kaiyan na mas dakol na panahon an magamit kan mga miembro kan Namamahalang Grupo sa pagpreparar kan espirituwal na kakanon asin sa pag-asikaso pa sa espirituwal na mga pangangaipo kan pambilog na kinaban na kasararoan nin magturugang.

Sa pagtatapos, sinabihan kan tsirman an naoogmang marhay na mga nagdadangog sa saiya: “Minsan ngani manlaenlaen na legal asin administratibong obligasyon an iinasignar sa eksperyensiadong mga paraataman, . . . gabos sinda naglilingkod sa irarom kan espirituwal na pagdirehir kan Namamahalang Grupo. . . . Gabos kita mapagngayongayong naglalaom ki Jehova na logod bendisyonan nia an satong nagkakasararong paghihingoa sa paggibo kan saiyang kabotan, sa onra asin kamurawayan kan saiyang dakulang ngaran.”