Isinapuso Na daw Nindo an Katotoohan?

“Maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.”—ROMA 12:2.

1, 2. Taano ta bakong pasil an magin tunay na Kristiano ngonyan?

AN MAGIN tunay na Kristiano sa huring mga aldaw na ini​—sa “delikadong mga panahon [na ini] na masakit pakibagayan”​—bakong pasil. (2 Timoteo 3:1) An totoo tanganing masunod an halimbawa ni Cristo, dapat na daogon nin saro an kinaban. (1 Juan 5:4) Girumdoma an sabi ni Jesus manongod sa Kristianong dalan: “Maglaog kamo sa tatang hayakpit; huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakukua kaiyan.” Sinabi man nia: “Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.”​—Mateo 7:​13, 14; Lucas 9:23.

² Huling nanompongan na an piot na dalan pasiring sa buhay, an sunod na angat sa sarong Kristiano iyo an magdanay dian. Taano ta sarong angat iyan? Huli ta an satong pagdusay asin bautismo ginigibo kitang punteriya kan mga katusohan, o tusong mga pakana ni Satanas. (Efeso 6:​11, nota sa ibaba) Minamasdan nia an satong mga kaluyahan asin hinihingoang aprobetsaran iyan sa pagmamaigot na raoton an satong espirituwalidad. Total, prinobaran niang paluyahon si Jesus, kaya taano ta dai man nia iyan gigibohon sa sato?​—Mateo 4:​1-11.

An Tusong mga Taktika ni Satanas

3. Paano itinanom ni Satanas an mga pagduda sa isip ni Eva?

³ An sarong pakana na ginagamit ni Satanas iyo an pagtanom nin mga pagduda sa satong isip. Naghahanap sia nin mga kaluyahan sa satong espirituwal na pangalasag. Sa kapoonpooni, ginamit nia an taktikang iyan ki Eva, na naghahapot: “Ano totoo na an Dios nagsabi na dai kamo magkakan sa gabos na kahoy kan tatamnan?” (Genesis 3:1) Sa ibang pagtaram, sinasabi ni Satanas, ‘Posible daw talaga na mahihimo nin Dios an siring na pagbabawal sa saindo? Isasayuma daw nia sa saindo an sarong bagay na marahayon? Tara, aram nin Dios na sa mismong aldaw na kamo kumakan sa kahoy mabubuklat an saindong mga mata asin kamo magigin arog nin Dios, na nakamimidbid kan marahay asin maraot!’ Si Satanas nagtanom nin banhi nin pagduda asin hinalat na tumubo iyan.​​—Genesis 3:5.

4. Anong mga pagduda an puedeng makaapektar sa nagkapira ngonyan?

⁴ Paano ginagamit ni Satanas an taktikang ini ngonyan? Kun mapabayaan ta an satong pagbasa sa Biblia, an satong personal na pag-adal, an satong pamimibi, asin an satong Kristianong ministeryo asin mga pagtiripon, puedeng binabayaan ta an satong sadiri na bukas sa mga pagduda na ibinabangon nin iba. Halimbawa: “Paano niato naaaraman na ini an katotoohan na itinokdo ni Jesus?” “Talaga daw na ini na an huring mga aldaw? Total, yaon na kita sa ika-21 siglo.” “Yaon na daw kita sa tata kan Armagedon, o harayo pa iyan?” Enkaso bumangon an siring na mga pagduda, ano an puede tang gibohon tanganing haleon iyan?

5, 6. Ano an dapat niatong gibohon kun may bumangon na mga pagduda?

⁵ Nagtao si Santiago nin praktikal na hatol kan sia sumurat: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa, huli ta an nagduduwaduwa siring sa alon nin dagat na ipinapadpad nin doros asin iinaapwak minsan saen. Sa katunayan, dai maghona  an siring na tawo na sia mag-aako nin ano man hale ki Jehova; sia tawong dai makadesisyon, bakong marigon sa gabos niang dalan.”​—Santiago 1:​5-8.

⁶ Ano, kun siring, an dapat tang gibohon? Paagi sa pamibi maninigo kitang ‘padagos na maghagad sa Dios’ nin pagtubod asin pakasabot saka dugangan ta an satong paghihingoa sa personal na pag-adal mapadapit sa ano man na mga kuestion o pagduda. Puede man kitang magpatabang sa mga makosog sa pagtubod, na nungkang nagdududa na itatao sa sato ni Jehova an suporta na kaipuhan niato. Nagsabi man si Santiago: “Kun siring pumasakop kamo sa Dios; alagad tumangon nindo an Diablo, asin sia madulag sa saindo. Rumani kamo sa Dios, asin sia marani sa saindo.” Iyo, mahahale an satong mga pagduda mantang kita minarani sa Dios paagi sa pag-adal asin pamibi.​—Santiago 4:​7, 8.

7, 8. Ano an nagkapirang pundamental na basehan sa pagdeterminar kan porma nin pagsamba na itinokdo ni Jesus, asin sairisay an nakakaabot sa basehan na ini?

⁷ Halimbawa, yaon an hapot na: Paano ta naaaraman na an inootob ta iyo an porma nin pagsamba na itinokdo ni Jesus? Tanganing masimbag ini, anong basehan an dapat na estudyaran? Sinasabi kan Biblia na an totoong mga Kristiano dapat na tunay na nagkakaminorootmootan. (Juan 13:​34, 35) Dapat na santipikaron ninda an ngaran nin Dios, an Jehova. (Isaias 12:​4, 5; Mateo 6:9) Asin dapat na ipamidbid ninda an ngaran na iyan.​​—Exodo 3:​15; Juan 17:26.

⁸ An saro pang midbidan kan tunay na pagsamba iyo an paggalang sa Tataramon nin Dios, an Biblia. Iyan an daing kaagid na libro na naghahayag kan personalidad nin Dios asin kan saiyang mga katuyohan. (Juan 17:​17; 2 Timoteo 3:​16, 17) Saro pa, an tunay na mga Kristiano nagbabalangibog kan Kahadean nin Dios bilang solamenteng paglaom nin tawo para sa buhay na daing katapusan sa sarong paraisong daga. (Marcos 13:​10; Kapahayagan 21:​1-4) Nagdadanay sindang siblag sa maraot na politika kan kinaban na ini asin sa nakararamog na pamumuhay kaiyan. (Juan 15:​19; Santiago 1:​27; 4:4) Sairisay ngonyan an talagang nakakaabot sa basehan na ini? An mga katunayan nagpapatotoo na saro sana an simbag​—an Mga Saksi ni Jehova.

Paano Kun Dai Nawawara an mga Pagduda?

9, 10. Ano an puede tang gibohon tanganing haleon an dai nawawarang mga pagduda?

⁹ Paano kun kita talagang dinaog nin mga pagduda? Ano na an maninigo tang gibohon? Itinatao kan madonong na si Hadeng Salomon an simbag: “Aki ko, kun ika mag-aako kan sakong mga tataramon asin magpapahalaga kan sakong mga togon, tanganing magtao nin atension sa kadonongan paagi sa saimong talinga, na ikakiling mo an saimong puso sa pakamansay; dugang pa, kun ika mag-apod sa pakasabot mismo asin ika magkurahaw sa pakamansay, kun ika padagos na maghahanap kaiyan siring baga sa pirak, asin siring baga sa natatagong kayamanan ika padagos na magsusungkat kaiyan,  sa siring masasabotan mo an pagkatakot ki Jehova, asin makukua mo an mismong kaaraman nin Dios.”​—Talinhaga 2:​1-5.

¹⁰ Bako daw na nakabibigla iyan? Kun gusto niatong magtao nin odok na atension sa kadonongan nin Dios, ‘makukua niato an mismong kaaraman nin Dios.’ Iyo, abot niato an kaaraman kan Soberanong Kagurangnan kan uniberso kun gusto niatong akoon asin pahalagahan an saiyang mga tataramon. Nangangahulogan iyan nin pagdolok ki Jehova sa pamibi asin paagi sa personal na pag-adal. An natatagong mga kayamanan kan saiyang Tataramon kayang haleon an ano man na mga pagduda asin tabangan kitang maheling an liwanag nin katotoohan.

11. Paano naapektaran nin pagduda an surogoon ni Eliseo?

¹¹ An sarong malinaw na halimbawa sa kun paano nakatabang an pamibi sa sarong matatakton asin nagdududang lingkod nin Dios manonompongan sa 2 Hade 6:​11-18. An surogoon ni Eliseo mayo nin espirituwal na pakamansay. Dai nia mamansayan na yaon an langitnon na mga hukbo tanganing suportaran an propeta nin Dios, na nasasalikopan kan hukbo nin Siria. Huli sa takot nagkurahaw an surogoon: “Ay, kagurangnan ko! Ano an gigibohon niato?” Ano an simbag ni Eliseo? “Dai ka matakot, huli ta mas dakol an nasa sato kisa nasa sainda.” Alagad paano kokombensiron an surogoon? Dai nia naheheling an langitnon na mga hukbo.

12. (a) Paano naresolberan an mga pagduda kan surogoon? (b) Paano niato puedeng resolberan an ano man na tibaad mga pagduda niato?

¹² “Nagpoon na mamibi si Eliseo asin magsabi: ‘O Jehova, buklata tabi an saiyang mga mata tangani na sia makaheling.’ Tolos na binuklat ni Jehova an mga mata kan surogoon, kaya sia nakaheling; asin, uya! an mabukid na rehion pano-pano nin mga kabayo asin panlaban na karuwaheng kalayo sa palibot ni Eliseo.” Sa kamugtakan na iyan pinangyari ni Jehova na maheling kan surogoon an langitnon na mga hukbo na nagpoprotehir ki Eliseo. Minsan siring, dai niato maninigong asahan an iyo man na klase nin tabang nin Dios ngonyan. Girumdomon, an surogoon na idto kan propeta mayo kan kompletong Biblia na aadalan tanganing pakosogon an saiyang pagtubod. Kita igwa nanggad nin Biblia. Kun gagamiton niato iyan nin marahay, an satong pagtubod mapakokosog man. Halimbawa, puede tang pensaron an nagkapirang pagkasaysay na ilinaladawan si Jehova sa saiyang langitnon na patyo. Paagi kaini dai mapagdududahan na si Jehova talagang igwa nin langitnon na organisasyon na nagsusuportar sa saiyang mga lingkod sa pambilog na kinaban na gibong pagtotokdo ngonyan.​—Isaias 6:​1-4; Ezequiel 1:​4-28; Daniel 7:​9, 10; Kapahayagan 4:​1-11; 14:​6, 7.

 Magmaan sa mga Pakana ni Satanas!

13. Sa anong mga paagi hinihingoa ni Satanas na paluyahon an satong pangangapot sa katotoohan?

¹³ Ano an nagkapira sa iba pang mga paagi nin pagpaluya ni Satanas sa satong espirituwalidad asin sa satong pangangapot sa katotoohan? An saro kaiyan inmoralidad, sa gabos na laen-laen na porma kaiyan. Sa kinaban ngonyan na bangkag sa sekso, an inaapod na relasyon (sarong pandisimular sa pagtraydor sa agom) o sarong bangging pagdodorog (basta na sanang pakikisaro) nagin na sanang ordinaryo para sa sarong hedonistikong henerasyon na gustong-gustong magparapasiramsiram ano man an mangyari. Pinalalakop nin mga pelikula, TV, asin video an estilong ini nin pamumuhay. An pornograpiya lakop sa media, nangorogna sa Internet. Naghahalat an sugot sa mga nananalian.​—1 Tesalonica 4:​3-5; Santiago 1:​13-15.

14. Taano an nagkapirang Kristiano ta nabiktima kan mga pakana ni Satanas?

¹⁴ An nagkapirang Kristiano nagpadaog sa saindang kanalian asin inatian an saindang isip asin puso paagi sa pagheling nin bakong gayong malinaw o malinawon pa nganing pornograpikong mga ladawan. Tinogotan ninda na sinda maholog sa nakatetentar na siod ni Satanas. An paggibo kaiyan parateng minaresulta sa espirituwal na pagbagsak. An mga siring dai nakapagdanay na “omboy kun dapit sa karatan.” Dai sinda nagin “maygurang sa mga kakayahan nin pagsabot.” (1 Corinto 14:20) Kada taon, rinibo an nagdudusa sa mga resulta nin dai pagsunod sa mga prinsipyo asin pamantayan sa Tataramon nin Dios. Napabayaan nindang isolog asin papagdanayon an saindang “bilog na pangalasag hale sa Dios.”​—Efeso 6:​10-13; Colosas 3:​5-10; 1 Timoteo 1:​18, 19.

Pahalagahan an Yaon sa Sato

15. Taano ta tibaad nasasakitan an nagkapira na apresyaron an saindang espirituwal na mana?

¹⁵ “Mamimidbid nindo an katotoohan, asin an katotoohan mapatalingkas sa saindo,” sabi ni Jesus. (Juan 8:32) Kinaipuhan kan kadaklan na Saksi na bayaan an saindang dating estilo nin pamumuhay asin relihiosong pakikiasosyar. Kun siring, tibaad mas madali nindang maapresyar an katalingkasan na itinatao kan katotoohan. Sa ibong na kampi, an nagkapirang hoben na pinadakula nin mga magurang na nasa katotoohan tibaad nasasakitan na apresyaron an saindang espirituwal na mana. Nungka sindang nagin kabtang nin sarong falsong relihion o kabtang kan kinaban na ini kabale an pagdodoon kaiyan sa pagpasiramsiram, an adiksion kaiyan sa droga, asin an inmoralidad kaiyan. Bilang resulta, tibaad dai ninda naheheling an biyong kalaenan kan satong espirituwal na paraiso asin kan maraot na kinaban ni Satanas. An nagkapira tibaad magpadara pa ngani sa sugot na namitan an hilo kan kinaban tanganing maeksperyensiahan an nalipasan ninda!​—1 Juan 2:​15-17; Kapahayagan 18:​1-5.

16. (a) Ano an mga puede tang ihapot sa satong sadiri? (b) Ano an itinotokdo asin ineenkaminar sa sato na gibohon?

¹⁶ Talaga daw na kaipuhan tang pasoon an satong mga moro tanganing maaraman an kolog asin sakit? Dai daw kita puedeng makanood sa negatibong mga eksperyensia nin iba? Kaipuhan ta daw na bumalik sa “lamaw” kan kinaban na ini tanganing maaraman kun may nalipasan kita? (2 Pedro 2:​20-22) Pinagirumdom ni Pedro an mga Kristiano kan enot na siglo na dati kabtang kan kinaban ni Satanas: “An panahon na nakaagi igo na sa saindo na nagibo an kabotan kan mga nasyon kan kamo maglakaw sa mga gibo nin malaswang gawe, mga horot, mga pagpalabilabi sa arak, mga sobrang kaogmahan, mga daraogan sa pag-inom, asin ilegal na mga  idolatriya.” Iyo nanggad, dai ta kaipuhan na maeksperyensiahan an “karigsokan” kan kinaban tanganing maaraman kun gurano karigsok kan puedeng mangyari sa buhay. (1 Pedro 4:​3, 4) Al kontraryo, tinotokdoan kita kan halangkaw na moral na mga pamantayan ni Jehova sa satong mga Kingdom Hall, na iyo an sentro nin pagtotokdo sa Biblia. Asin ineenkaminar kita na gamiton an satong kakayahan nin pangangatanosan tanganing patunayan sa satong sadiri na yaon sa sato an katotoohan asin sa siring isinasapuso an katotoohan.​—Josue 1:​8; Roma 12:​1, 2; 2 Timoteo 3:​14-17.

An Satong Ngaran Bako Sanang Tatak

17. Paano kita magigin epektibong Saksi ni Jehova?

¹⁷ Kun isinasapuso ta an katotoohan, maghihingoa kita na ihiras iyan sa iba sa lambang angay na okasyon. Dai boot sabihon kaini na hihingoahon tang ipirit iyan sa mga mayo nin interes. (Mateo 7:6) Imbes, dai kita masosopog na magpamidbid na kita Saksi ni Jehova. Kun an sarong tawo nahehelingan nin interes paagi sa pagbangon nin sinserong hapot o paagi sa pag-ako nin sarong publikasyon sa Biblia, kita magigin andam asin preparadong ihiras an satong paglaom. Siempre, isinusuherir kaini na kita pirmeng magdara nin babasahon magsaen man kita​—sa harong, sa trabaho, sa eskuelahan, sa tindahan, o sa mga lugar nin aling-alingan.​​—1 Pedro 3:15.

18. Paano puedeng magin positibong puersa sa satong buhay an malinaw na pagpamidbid niato na kita Kristiano?

¹⁸ Kun malinaw niatong ipinamimidbid na kita Kristiano, pinakokosog ta an satong pandepensa tumang sa patagong mga pagsalakay ni Satanas. Kun igwa nin parti para sa kumpleanyo o Navidad o loteriya sa opisina, an parateng sasabihon nin mga katrabaho, “Bayae na iyan. Saro iyan sa Mga Saksi ni Jehova.” Sa iyo man sanang dahelan, an mga tawo tibaad mag-aalangan na mag-estorya nin malaswang mga suba kun yaon kita. Sa siring, an pagsabi niato kan satong Kristianong paninindogan sarong positibong puersa sa satong buhay, siring kan sabi ni apostol Pedro: “Sa katunayan, siisay an maano saindo kun kamo magin maigot para sa marahay? Minsan pa kun kamo magtios dahel sa katanosan, maogma kamo.”​—1 Pedro 3:​13, 14.

19. Paano niato naaaraman na kita nasa poro na kan huring mga aldaw?

¹⁹ An saro pang pakinabang nin pagsapuso kan katotoohan iyo na kita magigin kombensido na ini na talaga an huring mga aldaw kan sistemang ini nin mga bagay. Maaaraman ta na an dakol sa mga hula kan Biblia nakakaabot na sa kulminasyon kaiyan sa panahon niato. * An patanid ni Pablo na “sa huring mga aldaw maabot an delikadong mga panahon na masakit pakibagayan” pinatutunayan nanggad kan makatatakot na mga pangyayari sa nakaaging siglo. (2 Timoteo 3:​1-5; Marcos 13:​3-37) An sarong dai pa sana nahahaloy na artikulo sa peryodiko mapadapit sa ika-20 siglo may titulong “Iyan Magigirumdoman Bilang an Panahon nin Barbarismo.” An artikulo nagsabi: “An 1999 nagin an pinakamapangadan na taon sa ikaduwang kabangaan kan pinakamapangadan na siglo.”

20. Ngonyan na an panahon para sa anong paghiro?

²⁰ Bako ngonyan an panahon na magsibogsibog. An bendisyon ni Jehova malinaw na naheheling sa pinakadakulang gibong pagtotokdo sa Biblia na nagibo kasuarin man sa bilog na kinaban bilang patotoo sa mga nasyon. (Mateo 24:14) Isapuso nindo an katotoohan, asin ihiras iyan sa iba. An daing katapusan na ngapit nindo nakadepende sa ginigibo nindo ngonyan. An pagluyaluya dai maninigo sa pag-ako kan bendisyon ni Jehova. (Lucas 9:62) Imbes, panahon nang ‘magin marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan.’​—1 Corinto 15:58.

[Nota sa Ibaba]

Nagigirumdoman daw Nindo?

• Paano niato mahahale an mga pagduda?

• Ano an manonodan ta sa halimbawa kan surogoon ni Eliseo?

• Tumang sa anong mga sugot sa moral na dapat kitang dayaday na magmaan?

• Taano ta maninigo na malinaw niatong ipamidbid na kita Saksi ni Jehova?

[Mga Hapot Para sa Pag-adal]

[Mga Ritrato sa pahina 10]

An regular na pag-adal sa Biblia asin pamibi makatatabang sa sato na haleon an mga pagduda

[Ritrato sa pahina 11]

An mga pagduda kan surogoon ni Eliseo naresolberan paagi sa sarong bisyon

[Ritrato sa pahina 12]

Tinotokdoan kita kan halangkaw na moral na mga pamantayan ni Jehova sa mga Kingdom Hall arog kan saro na ini sa Benin