Kamo daw Namumuhay Sono sa Saindong Pagdusay?

“Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo.”​—COLOSAS 3:23.

1. Sa sekular na konteksto, ano an kahulogan kan tataramon na “pagigin dusay”?

PAANO nagigibo nin mga atleta an pinakamaaabot kan saindang makakaya? Sa tenis, putbol, basketbol, beisbol, pareya, golp, o ano man na iba pang isport, an pinakamatibay nakakaabot sana sa primera paagi sa marigon na pagigin dusay. An pagpakondisyon sa hawak asin isip an mga prioridad. Tamang-tama nanggad ini sa saro kan mga kahulogan kan tataramon na “pagigin dusay,” na pagigin “lubos na komitido sa sarong partikular na iniisip o ginigibo.”

2. Ano an kahulogan kan “pagdusay” oyon sa Biblia? Iilustrar.

² Minsan siring, ano an kahulogan kan “pagdusay” oyon sa Biblia? An “magdusay” traduksion nin sarong berbo sa Hebreo na an kahulogan “magdanay na siblag; sumiblag; humale.” * Sa suanoy na Israel, isinulot kan Halangkaw na Saserdoteng si Aaron sa saiyang turbante an “banal na tanda nin pagdusay,” na sarong makintab na plaka nin purong bulawan na inukitan kan mga tataramon sa Hebreo para sa “An kabanalan ki Jehova.” Iyan nagserbing pagirumdom sa halangkaw na saserdote na dapat niang likayan an paggibo nin ano man na maglalanghad sa santuaryo “huli ta an tanda nin pagdusay, an lanang panlahid kan saiyang Dios, nasa saiya.”​—Exodo 29:​6; 39:​30; Levitico 21:12.

3. Paano maninigo na makaapektar sa satong gawe-gawe an pagdusay?

³ Maheheling niato sa kontekstong ini na an pagdusay sarong seryosong bagay. Nangangahulogan iyan nin boluntad na pagpamidbid bilang lingkod nin Dios, asin naghahagad iyan nin malinig na gawe-gawe. Kun siring, masasabotan niato kun taano ta kinotar ni apostol Pedro si Jehova na nagsasabing: “Kaipuhan kamong magin banal, huli ta ako banal.” (1 Pedro 1:​15, 16) Bilang dusay na mga Kristiano, igwa kita nin magabat na paninimbagan na mamuhay sono sa satong pagdusay, na magin fiel sagkod sa katapusan. Alagad ano an kalabot sa Kristianong pagdusay?​—Levitico 19:​2; Mateo 24:13.

4. Paano niato naaabot an lakdang na pagdusay, asin sa ano iyan ikakaagid?

⁴ Pakatapos niatong magkaigwa nin tamang kaaraman dapit ki Jehova Dios asin sa saiyang mga katuyohan saka dapit ki Jesu-Cristo asin sa saiyang kabtang sa mga katuyohan na iyan, kita personal na nagdesisyon na maglingkod sa Dios sa bilog niatong puso, isip, kalag, asin kosog. (Marcos 8:​34; 12:​30; Juan 17:3) Puede ngani iyan na ibilang na sarong personal na kapanugaan, sarong lubos na pagdusay sa Dios. An satong pagdusay dai ginibo bilang resulta nin emosyonal na kapritso. Iyan maingat asin mapagngayongayong pinag-isipan, na ginagamit an kakayahan nin pangangatanosan. Sa siring, bako iyan na temporaryong desisyon. Dai kita puedeng magin arog nin sarong nag-aarado sa oma dangan minapondo pakapoon nin kadikit huli ta iyan mapagalon o huli ta an pag-ani garo baga haloyon pa o bako nanggad na segurado. Horophoropa an halimbawa nin nagkapira na “nagkapot sa arado” nin teokratikong paninimbagan sa ibong nin mga kadepisilan.​—Lucas 9:​62; Roma 12:​1, 2.

Dai Ninda Tinalikdan an Saindang Pagigin Dusay

5. Paano si Jeremias sarong pambihirang halimbawa nin dusay na lingkod nin Dios?

⁵ An ministeryong paghula ni Jeremias sa Jerusalem luminawig nin labing 40 taon (647-607  B.C.E.), asin bako iyan na pasil na asignasyon. Aram na aram nia an saiyang mga limitasyon. (Jeremias 1:​2-6) Kinaipuhan nia an kosog nin boot asin pakatagal tanganing atubangon aroaldaw an matagas an payong banwaan nin Juda. (Jeremias 18:​18; 38:​4-6) Minsan siring, nagtiwala si Jeremias ki Jehova Dios, na pinakosog sia kaya sia nagin totoong dusay na lingkod nin Dios.​​—Jeremias 1:​18, 19.

6. Anong halimbawa an itinao sa sato ni apostol Juan?

⁶ Kumusta man an fiel na si apostol Juan, na nadistiero sa masakit na isla nin Patmos kan sia gurang na huli sa “pagtaram dapit sa Dios asin pagpatotoo ki Jesus”? (Kapahayagan 1:9) Sia nagtagal asin inotob an saiyang pagigin dusay bilang Kristiano sa laog nin mga 60 taon. Nabuhay pa sia pagkatapos na malaglag an Jerusalem sa kamot kan mga hukbo nin Roma. Nagkapribilehio sia na magsurat nin Ebanghelyo, tolong ipinasabong na surat, asin kan librong Kapahayagan, na dian nia naheling antes pa an ralaban nin Armagedon. Puminondo daw sia kan maaraman nia na an Armagedon dai madatong sa panahon na sia nabubuhay? Sia daw buminagsak sa pagigin indiperente? Dai, si Juan nagdanay na fiel sagkod sa saiyang kagadanan, sa pakaaram na minsan ngani “harani na an itinalaan na panahon,” an saiyang mga bisyon maootob sa huri pang petsa.​—Kapahayagan 1:​3; Daniel 12:4.

Mga Halimbawa nin Pagigin Dusay sa Presenteng Panahon

7. Paano nagin marahay na halimbawa nin Kristianong pagdusay an sarong tugang na lalaki?

⁷ Sa presenteng mga panahon, rinibong fiel na Kristiano an maigot na nagdanay sa saindang pagigin dusay sa ibong nin dai pagdadanay na buhay tanganing maheling mismo an Armagedon. An saro sa mga indibiduwal na iyan iyo si Ernest E. Beavor kan Inglaterra. Sia nagin Saksi kan 1939 sa kapinonan kan Guerra Mundial II, asin binayaan nia an asensadong negosyo na imprentahan nin retrato tanganing lumaog sa bilog na panahon na ministeryo. Huli sa pagpapadanay kan saiyang Kristianong neutralidad, nabilanggo sia nin duwang taon. Nanindogan sa kampi nia an saiyang pamilya, asin kan 1950 an tolo niang aki nag-atender sa Paadalan sa Biblia kan Watchtower sa Gilead para sa pagsasanay sa pagmimisyonero, sa Nueva York. Maigoton si Tugang na Beavor sa saiyang paghuhulit kaya an apod sa saiya kan saiyang mga katood Armagedon Ernie. Maimbod siang namuhay sono sa saiyang pagdusay, asin sagkod mismo sa saiyang kagadanan kan 1986, ibinalangibog nia an kaharanihan kan ralaban nin Dios sa Armagedon. Dai nia ibinilang na an saiyang pagdusay sarong kontrata sa Dios sa limitadong panahon! *​​—1 Corinto 15:58.

8, 9. (a) Anong halimbawa an itinao nin dakol na hoben na lalaki sa España durante kan rehimen ni Franco? (b) Anong mga hapot an angay?

⁸ An saro pang halimbawa nin dai nagluluyang kaigotan hale sa España. Durante kan rehimen ni Franco (1939-​75), ginatos na dusay na hoben na Saksi an nanindogan bilang mga neutral na Kristiano. Dakol sa sainda an nagsampulong taon o labi  pa sa mga karsel militar. An sarong Saksi, si Jesus Martin nakatipon pa ngani nin mga sentensia na uminabot nin 22 na taon sa karsel. Sia binugbog nin grabe mantang nakabilanggo sa sarong karsel militar sa Aprika del Norte. Mayo ni saro kaini an pasil, alagad habo niang magkompromiso.

⁹ Sa kadaklan na panahon, an hoben na mga lalaking ini mayo nin ideya kun noarin, enkaso, sinda paluluwason, huli ta dakol asin sunod-sunod an sentensia sa sainda. Pero, pinapagdanay ninda an saindang integridad asin an saindang kaigotan para sa ministeryo mantang nakabilanggo. Kan sa katapustapusi magrahay an situwasyon kan 1973, an dakol sa mga Saksing ini, na kaidto labing 30 anyos, pinaluwas sa karsel asin naglaog tolos-tolos sa bilog na panahon na ministeryo, na an nagkapira nagin espesyal payunir asin nagbibiaheng paraataman. Namuhay sinda sono sa saindang pagdusay mantang nasa karsel, asin an kadaklan nagpadagos sa paggibo kaiyan poon kan sinda paluwason. * Kumusta man kita ngonyan? Kita daw fiel sa satong pagdusay arog kan mga maimbod na ini?​​—Hebreo 10:​32-​34; 13:3.

Tamang Pagmansay sa Satong Pagdusay

10. (a) Paano ta maninigong mansayon an satong pagdusay? (b) Paano minamansay ni Jehova an satong paglilingkod sa saiya?

¹⁰ Paano ta minamansay an satong pagdusay sa Dios na gibohon an saiyang kabotan? Iyan daw an enot sa satong buhay? Ano man an satong kamugtakan, hoben man o gurang, may agom o mayo, marahay an salud o may helang, maninigo kitang maghingoa na mamuhay sono sa satong pagdusay, oyon sa satong kamugtakan. An situwasyon nin saro tibaad magtogot sa saiya na maglingkod sa bilog na panahon na ministeryo bilang payunir, bilang boluntaryo sa sangang opisina kan Watch Tower Society, bilang misyonero, o sa ministeryong nagbibiahe. Sa ibong na kampi, an nagkapirang magurang tibaad sibot-sibot, na inaasikaso an pisikal asin espirituwal na mga pangangaipo kan pamilya. An medyo kadikit daw na oras na ginagamit ninda sa ministeryo kada bulan mas dikit an halaga sa pagheling ni Jehova kisa dakol na oras na ginamit nin sarong bilog na panahon na lingkod? Bako. An Dios nungkang nag-aasa sa sato nin mayo sa sato. Sinabi ni apostol Pablo an prinsipyong ini: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.”​—2 Corinto 8:12.

11. Sa ano nakadepende an satong kaligtasan?

¹¹ Sa paano man, an satong kaligtasan nakadepende, bakong sa ano man na tibaad ginigibo ta, kundi sa dai na kutana maninigong kabootan ni Jehova paagi ki Cristo Jesus, na satong Kagurangnan. Malinaw na ipinaliwanag ni Pablo: “An gabos nagkasala asin nagkulang sa kamurawayan nin Dios, asin iyan bilang daing bayad na regalo na sinda ipinapahayag na matanos paagi sa saiyang dai na kutana maninigong kabootan huli sa pagkabutas paagi sa pantubos na binayadan ni Cristo Jesus.” Minsan siring, an satong mga gibo prueba kan satong aktibong pagtubod sa mga panuga nin Dios.​—Roma 3:​23, 24; Santiago 2:​17, 18, 24.

12. Taano ta dai kita maninigong magkomparar?

 ¹² Dai niato kaipuhan na ikomparar sa iba an panahon na nagagamit ta sa paglilingkod sa Dios, an satong ikinakapasakamot na mga babasahon sa Biblia, o kun pirang pag-adal sa Biblia an pinamamayohan ta. (Galacia 6:​3, 4) Ano man an nahahaman niato sa Kristianong ministeryo, kaipuhan na girumdomon niato gabos an nakapakukumbabang mga tataramon ni Jesus: “Kaya kamo man, kun nahaman na nindo an gabos na ipinagigibo sa saindo, magsabi kamo, ‘Kami mga oripon na daing kamanungdanan. An ginibo niamo iyo an dapat niamong gibohon.’” (Lucas 17:10) Gurano kaparate niato talagang masasabi na nahaman na niato “an gabos na ipinagigibo” sa sato? Kaya an hapot, Ano an maninigo na kualidad kan satong paglilingkod sa Dios?​—2 Corinto 10:​17, 18.

Paggibo sa Kada Aldaw na Magin May Halaga

13. Anong aktitud an kaipuhan ta mantang inootob ta an satong pagdusay?

¹³ Pakatapos na tumao nin hatol sa mga agom na babae, mga agom na lalaki, mga aki, mga magurang, asin mga oripon, si Pablo nagsurat: “Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo, huli ta aram nindo na hale ki Jehova mag-aako kamo kan tamang balos nin pamana. Magpaoripon kamo sa Kagurangnan, si Cristo.” (Colosas 3:​23, 24) Dai kita naglilingkod tanganing pahangaon an mga tawo paagi sa satong nahahaman sa paglilingkod ki Jehova. Naghihingoa kitang maglingkod sa Dios paagi sa pagsunod sa halimbawa ni Jesu-Cristo. Ginibo nia an saiyang medyo halipot na ministeryo na may pagkaapurado.​—1 Pedro 2:21.

14. Anong patanid an itinao ni Pedro mapadapit sa huring mga aldaw?

¹⁴ Si apostol Pedro nagpaheling man nin pagkaapurado. Sa saiyang ikaduwang surat, nagpatanid sia na sa huring mga aldaw, magkakaigwa nin mga paraolog-olog​—mga apostata asin nagdududa​—na, sono sa saindang sadiring mga kagustohan, mabangon nin mga kuestion manongod sa  presensia ni Cristo. Minsan siring, si Pedro nagsabi: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol. Pero an aldaw ni Jehova madatong siring sa parahabon.” Iyo, an aldaw ni Jehova seguradong madatong. Kun siring, maninigo na isaisip niato aroaldaw kun gurano man nanggad kasegurado asin kasarig kan satong pagtubod sa panuga nin Dios.​—2 Pedro 3:​3, 4, 9, 10.

15. Paano niato maninigo na helingon an kada aldaw sa satong buhay?

¹⁵ Tanganing makapamuhay sono sa satong pagdusay sa sadiosan na paagi, maninigo na gamiton ta an kada aldaw sa kaomawan ni Jehova. Sa katapusan kan kada aldaw, puede ta daw na salingoyon iyan asin helingon kun paano kita nakakontribwir minsan paano sa pagsantipikar sa ngaran nin Dios asin sa pagbalangibog kan maogmang bareta kan Kahadean? Tibaad paagi iyan sa satong malinig na gawe-gawe, sa satong nakapakokosog na pakikipag-olay, o sa satong mamomoton na pagmakolog sa pamilya asin mga katood. Ginamit ta daw an mga oportunidad tanganing ihiras sa iba an satong Kristianong paglaom? Igwa daw kitang tinabangan na pakaisipon nin seryoso an manongod sa mga panuga nin Dios? Magkaigwa kita nin sarong bagay na may halaga sa espirituwal kada aldaw, na garo baga nagtitipon kita nin awad-awad na espirituwal na deposito sa bangko.​—Mateo 6:​20; 1 Pedro 2:​12; 3:​15; Santiago 3:13.

Papagdanayon na Malinaw an Saindong Pagheling

16. Sa anong mga paagi pinagmamaigotan ni Satanas na paluyahon an satong pagigin dusay sa Dios?

¹⁶ Nabubuhay kita sa mga panahon na paorog nang paorog na nagigin masakit para sa mga Kristiano.  Si Satanas asin an saiyang mga kampon nagmamaigot na palibogon an kalaenan kan marahay asin maraot, kan malinig asin marigsok, kan moral asin inmoral, kan tamang ugale asin salang ugale. (Roma 1:​24-28; 16:​17-19) Saiyang pinagin pasil na marhay para sa sato na atian an satong puso asin isip paagi sa remote control nin TV o Internet. An satong espirituwal na pagheling puedeng magin malibog, o mawara sa pokus, kaya dai na niato mamamansayan an saiyang mga katusohan. Puedeng lumuya an satong desisyon na mamuhay sono sa satong pagdusay asin lumuag an satong pagkakapot sa “arado” kun ikokompromiso ta an satong espirituwal na mga prinsipyo sa buhay.​—Lucas 9:​62; Filipos 4:8.

17. Paano makatatabang sa sato an hatol ni Pablo na mapagdanay an satong relasyon sa Dios?

¹⁷ Napapanahon na marhay kun siring an mga tataramon ni Pablo sa kongregasyon sa Tesalonica: “Iyo ini an kabotan nin Dios, an pagsantipikar sa saindo, na kamo lumikay sa pakikisaro; na an lambang saro sa saindo makanood na pamogolan an saiyang sadiring lalagan sa santipikasyon asin onra, bakong sa maaraon na horot sa sekso siring kan nasa mga nasyon na dai nakakamidbid sa Dios.” (1 Tesalonica 4:​3-5) An inmoralidad nagresulta sa pagkatiwalag nin nagkapira sa Kristianong kongregasyon​—idtong mga nagpabaya sa saindang pagdusay sa Dios. Pinabayaan nindang lumuya an saindang relasyon sa Dios, kaya bako na siang mahalaga sa saindang buhay. Pero, nagsabi si Pablo: “Kita inapod nin Dios, bakong may lugar para sa karigsokan, kundi manongod sa santipikasyon. Kun siring, an tawong nagbabasangbasang binabasangbasang, bakong an tawo, kundi an Dios, na nagbubugtak kan saiyang banal na espiritu sa saindo.”​—1 Tesalonica 4:​7, 8.

Ano an Saindong Determinasyon?

18. Ano an maninigo na magin determinasyon niato?

¹⁸ Kun nasasabotan ta an pagigin seryoso kan satong pagdusay ki Jehova Dios, ano an maninigo na determinado niatong gibohon? An maninigo na satong marigon na determinasyon iyo na papagdanayon an marahay na konsensia may labot sa satong gawe-gawe sagkod sa satong ministeryo. Nagsadol si Pedro: “Papagdanayon nindo an marahay na konsensia, tanganing sa bagay na itinataram tumang sa saindo mapasopog an mga nagpapakaraot sa saindong marahay na gawe dian ki Cristo.” (1 Pedro 3:16) Tibaad kaipuhan kitang magdusa asin mapaatubang sa pagmaltrato huli sa satong Kristianong gawe-gawe, alagad si Cristo iyo man huli sa saiyang pagtubod asin kaimbodan sa Dios. “Kun siring,” sabi ni Pedro, “mantang si Cristo nagtios sa laman, kamo man magkaigwa kan siring na kaisipan; huli ta an tawo na nagtios sa laman dai nagkasala.”​—1 Pedro 4:1.

19. Ano an gusto niatong masabi manongod sa sato?

¹⁹ Tunay nanggad, an marigon na determinasyon niato na mamuhay sono sa satong pagdusay an maprotehir sa sato sa mga siod kan kinaban ni Satanas na may depekto sa espirituwal, moral, asin pisikal. Alagad orog pa kaiyan, magkakaigwa kita nin kompiansa na nasa sato an pag-oyon nin Dios, na orog nanggad karahay kisa ano man na ikaaalok ni Satanas asin kan saiyang mga kampon. Sa siring, dai logod noarin man masabi na binayaan ta an pagkamoot niato kan enot niatong mamidbid an katotoohan. Imbes, masabi logod manongod sa sato an arog kan nasabi manongod sa mga taga kongregasyon nin Tiatira kan enot na siglo: “Aram ko an saimong mga gibo, asin an saimong pagkamoot asin pagtubod asin ministeryo patin pakatagal, asin na an mga gibo mong nahuri orog kisa kan enot.” (Kapahayagan 2:​4, 18, 19) Iyo, dai kita magin gabinhod mapadapit sa satong pagdusay, kundi magin kitang “malaad sa espiritu,” maigot sagkod sa katapusan​—asin an katapusan harani na.​—Roma 12:​11; Kapahayagan 3:​15, 16.

[Mga Nota sa Ibaba]

Nagigirumdoman daw Nindo?

• Ano an kalabot sa pagdusay?

• Anong suanoy asin presenteng panahon na mga halimbawa nin dusay na mga lingkod nin Dios an maninigo na arogon niato?

• Paano niato maninigong mansayon an satong paglilingkod sa Dios?

• Ano an maninigo na magin determinasyon niato mapadapit sa satong pagdusay sa Dios?

[Mga Hapot Para sa Pag-adal]

[Ritrato sa pahina 15]

Si Jeremias nagdanay na fiel sa ibong kan maringis na pagtrato

[Ritrato sa pahina 16]

Itinao ni Ernest Beavor an halimbawa para sa saiyang mga aki bilang maigot na Kristiano

[Ritrato sa pahina 17]

Ginatos na hoben na Saksi sa mga karsel sa España an nagdanay sa saindang integridad

[Mga Ritrato sa pahina 18]

Magkaigwa kita nin sarong bagay na may halaga sa espirituwal sa kada aldaw