Embahador—An Pagkagamit Kaiyan sa Biblia

SA PAGKAGAMIT sa Biblia, iyan sarong opisyal na representante na sinugo nin sarong namamahala sa sarong espesyal na okasyon para sa sarong espesipikong katuyohan. An mas may edad, maygurang na mga lalaki sa parate an naglilingkod sa katongdan na ini. Sa siring, an mga terminong Griego na pre·sbeuʹo (‘magserbing embahador’ [Efeso 6:​20]; ‘magin embahador’ [2 Corinto 5:​20]) asin pre·sbeiʹa (“embahada” [Lucas 14:​32]) pareho konektado sa terminong pre·sbyʹte·ros, na an boot sabihon “gurang na lalaki; magurang.”​—Gibo 11:​30; Kapahayagan 4:4.

Si Jesu-Cristo nagdatong bilang “apostol,” o “isinugo” ni Jehova Dios. Sia an “nagtao nin liwanag sa buhay asin pagkadaing kalapaan paagi kan maogmang bareta.”​—Hebreo 3:​1; 2 Timoteo 1:10.

Pakabuhaya liwat ki Cristo pasiring sa kalangitan, mantang mayo na sa daga personalmente, an saiyang fiel na mga parasunod ninombrahan na gibohon an katongdan nia, “mga karibay ni Cristo” bilang mga embahador nin Dios. Espesipikong sinambit ni Pablo an saiyang katongdan nin pagigin embahador. (2 Corinto 5:​18-20) Sia, arog kan gabos na linahidan na parasunod ni Jesu-Cristo, isinugo sa mga nasyon asin banwaan na siblag ki Jehova Dios na Supremong Soberano​—embahador sa kinaban na daing pakipagkatoninongan sa Dios. (Juan 14:​30; 15:​18, 19; Santiago 4:4) Bilang embahador, si Pablo nagdara nin sarong mensahe nin pakiulian sa Dios paagi ki Cristo asin kun siring nagtaram manongod sa saiyang sadiri mantang nasa bilanggoan bilang “embahador na nakakadenahan.” (Efeso 6:20) An pagigin nakakadenahan nia nagpapaheling kan antipatikong aktitud kan kinaban na ini sa Dios, ki Cristo, asin sa gobyerno kan Mesiyanikong Kahadean, huli ta an mga embahador poon pa kan panahon na dai na magirumdoman ibinibilang na dai puedeng gibohan nin maraot. Ihinayag an pinakadakulang pakikilaban asin pinakagrabeng insulto sa kabtang kan mga nasyon kan dai ninda iginalang an mga embahador na isinugo na magrepresentar kan Kahadean nin Dios na sakop ni Cristo.

Sa pag-otob kan saiyang papel bilang embahador, iginalang ni Pablo an mga ley kan nasyon alagad nagdanay na neutral talaga sa politikal asin militar na mga aktibidad kan kinaban. Kaoyon ini kan prinsipyo na an mga embahador kan kinabanon na mga gobyerno dapat na kumuyog sa ley alagad libre sa pagtao nin kaimbodan sa nasyon na pinagsugoan sa sainda.

Arog ki apostol Pablo, an gabos na fiel, linahidan, pinaniaki nin espiritu na parasunod ni Cristo, na may langitnon na pagkasiudadano, “mga embahador na karibay ni Cristo.”​—2 Corinto 5:​20; Filipos 3:20.

Kun paano inaako nin saro an mga embahador na ini nin Dios an madeterminar kun paano sia tatrataron nin Dios. Itinao ni Jesu-Cristo an prinsipyo sa saiyang ilustrasyon dapit sa tawo na kagsadiri nin sarong ubasan asin na nagsugo enot sa saiyang mga oripon, dangan sa saiyang aki, bilang saiyang mga representante. An mga paralate sa ubasan maringis na minaltrato an mga oripon na idto asin ginadan an aki kan kagsadiri. Huli kaini linaglag kan kagsadiri kan ubasan an antipatikong mga paralate. (Mateo 21:​33-41) Nagtao si Jesus nin saro pang ilustrasyon, dapit sa hade na an mga oripon kaini ginadan mantang nagseserbi bilang mensahero na nangingimbitar nin mga bisita sa sarong punsion sa kasal. An mga nag-ako sa saiyang mga representante sa siring na paagi ibinilang na mga kaiwal kan hade. (Mateo 22:​2-7) Malinaw na ipinahayag ni Jesus an prinsipyo kan  sinabi nia: “Sia na nag-aako sa siisay man na isinugo ko nag-aako man sa sako. Dangan sia na nag-aako sa sako, nag-aako man sa saiya na nagsugo sa sako.”​—Juan 13:​20; helingon man an Mateo 23:​34, 35; 25:​34-46.

Ginamit man ni Jesus an nagpapalakop nin katoninongan na gibohon nin embahador tanganing iilustrar an satong pangangaipo bilang indibiduwal na makipagkatoninongan ki Jehova Dios asin butasan an gabos tanganing makasunod sa mga lakad kan saiyang Aki tanganing kamtan an pabor nin Dios asin an buhay na daing katapusan. (Lucas 14:​31-33) Sa kabaliktaran, iinilustrar nia an kabalisngagan nin pakikiasosyar sa mga nagsusubol sa mga embahador na magtaram tumang sa saro na tinawan nin Dios nin makahadeng kapangyarihan. (Lucas 19:​12-14, 27) An mga Gabaonita marahay na halimbawa sa paghiro sa mataktika, mapangganang pakipagkatoninongan.​—Josue 9:​3-15, 22-27.

Mga Sugo Bago kan mga Kristiano

Kan panahon bago kan mga Kristiano mayo nin opisyal na katongdan sa gobyerno na katimbang nanggad kan embahador sa presenteng aldaw. Mayo nin residenteng opisyal na nagrerepresentar sa sarong dayong gobyerno. Huli kaini, an mga terminong “mensahero” (sa Hebreo, mal·ʼakhʹ) asin “sugo” (sa Hebreo, tsir) mas tamang naglaladawan sa saindang mga katongdan kaidtong mga panahon kan Biblia. Minsan siring, an saindang ranggo asin posisyon kaagid sa dakol na bagay kan sa mga embahador, asin an nagkapira sa mga aspektong ini eestudyaran digdi. An siring na mga lalaki opisyal na mga representante na nagdadara nin mga mensahe sa pag-oltanan nin mga gobyerno asin indibiduwal na mga namamahala.

Bakong arog kan mga embahador sa presenteng aldaw, an mga sugo, o mensahero kan suanoy, dai nag-erok sa mga kabisera nin ibang nasyon kundi ipinapadara sana sa espesyal na mga okasyon para sa espesipikong mga katuyohan. Sa parate sinda mga tawong halangkaw an ranggo (2 Hade 18:​17, 18), asin an saindang katongdan iginagalang na marhay. Bilang resulta, sinda dai puedeng gibohan nin maraot kun sinda minasongko sa ibang namamahala.

An tratamiento sa mga mensahero, o sugo, nin sarong namamahala, ibinibilang na tratamiento sa namamahala asin sa saiyang gobyerno. Sa siring, kan si Rahab nagpaheling nin kabootan sa mga mensahero na isinugo ni Josue sa Jerico bilang mga espiya, ginibo nia nanggad iyan huli ta rinerekonoser nia na si Jehova an Dios asin Hade kan Israel. Si Jehova, paagi ki Josue, nagpaheling man nin kabootan sa saiya. (Josue 6:​17; Hebreo 11:31) Hayag na pagbalga kan dai nasusurat na internasyonal na kostumbre nin paggalang sa mga sugo an ginibo ni Hanun na hade kan Amon, na sa saiya isinugo ni Hadeng David an nagkapirang lingkod bilang kapahayagan nin pakikikatood. An hade kan Amon naghinanyog sa saiyang mga prinsipe, na salang inapod na mga espiya an mga mensahero, asin hayagan niang sinopog an mga mensahero, na ipinaheheling an saiyang dai paggalang ki David asin sa saiyang gobyerno. An makasosopog na aksion na ini nagbunga nin guerra.​—2 Samuel 10:​2–​11:​1; 12:​26-31.

Imbes na papulion an embahador, na iyo an ginigibo kan mga nasyon sa presenteng aldaw kun nababalga an relasyon diplomatiko, an mga tawo kan suanoy na panahon nagsusugo nin mga mensahero, o sugo, bilang mga representante sa pagtaram sa mag-ibong na lado durante nin mga panahon nin tension sa paghihingoang ibalik an matoninong na relasyon. Si Isaias nagtaram manongod sa siring na “mga mensahero nin katoninongan.” (Isaias 33:7) Si Ezequias nagpadara nin pakiolay para sa pakipagkatoninongan ki Senaquerib na hade kan Asiria. Minsan ngani hinuhuma ni Senaquerib an nakukutaan na mga siudad kan Juda, an mga mensahero tinawan kan mga Asirio nin katalingkasan na umagi huli ta sinda mga sugo ni Ezequias. (2 Hade 18:​13-15) An saro pang halimbawa kaini maheheling sa nasusurat manongod ki Jefte, na hokom sa Israel. Paagi sa mga mensahero sia nagpadara nin sarong surat sa hade kan mga Amonita tanganing magprotesta tumang sa salang paghiro kaini asin tanganing husayon an pasuruhay manongod sa teritoryal na mga diretso. Kun posible, paagi sa saiyang mga sugo, nahusay kutana iyan ni Jefte na mayo nin guerra. An mga mensaherong ini tinogotan na umagi nin balikan sa tahaw kan mga hukbo na daing kaolangan.​—Hokom 11:​12-28.