Hanapa Nindo si Jehova Bago an Aldaw kan Saiyang Kaanggotan

“Hanapa nindo si Jehova . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”—SOFONIAS 2:3.

1. Ano an espirituwal na kamugtakan kan Juda kan ponan ni Sofonias an saiyang paghula?

PINONAN ni Sofonias an saiyang paghula sa sarong kritikal na panahon sa kasaysayan nin Juda. Maluyahon an espirituwal na kamugtakan kan nasyon. Imbes na sinda magtiwala ki Jehova, an banwaan nag-aasa sa paganong mga saserdote asin astrologo para sa giya. An pagsamba ki Baal, kaiba an mga rituwal kaiyan sa pagkamainaki, lakop sa daga. Inaapi kan mga namomoon sa banwaan​—an mga prinsipe, mga noble, asin mga hokom​—an mismong mga tawo na dapat kutanang pinoprotehiran ninda. (Sofonias 1:​9; 3:3) Bakong makangangalas na nagdesisyon si Jehova na ‘ibingat an saiyang kamot’ tumang sa Juda asin Jerusalem tanganing laglagon iyan!​—Sofonias 1:4.

2. Ano an paglaom para sa fiel na mga lingkod nin Dios sa Juda?

² Minsan siring, baga man maraot an situwasyon, may banaag nin paglaom. An aki ni Amon na si Josias nasa trono na ngonyan. Minsan ngani sia solterito pa sana, tunay an pagkamoot ni Josias ki Jehova. Kun ibalik kan bagong hade an dalisay na pagsamba sa Juda, ikaoogma nanggad iyan kan pipira na fiel na naglilingkod sa Dios! Tibaad mapahiro an iba na umayon sa sainda asin maligtas man sa aldaw kan kaanggotan ni Jehova.

Mga Kahagadan Para sa Pagkaligtas

3, 4. Anong tolong kahagadan an dapat na maabot tanganing an sarong indibiduwal maligtas sa “aldaw kan kaanggotan ni Jehova”?

³ Talaga daw na may mga indibiduwal na maliligtas sa aldaw kan kaanggotan ni Jehova? Iyo,  basta maabot ninda an tolong kondisyon na sinasabi sa Sofonias 2:​2, 3. Mantang binabasa ta an mga bersikulong ini, mangnohon niato na marhay an mga kahagadan na ini. Si Sofonias nagsurat: “Bago mangaki nin ano man an pagboot, bago mag-agi an aldaw na garo nasosolong dagami, bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”

⁴ Kun siring, tanganing maligtas, kaipuhan na (1) hanapon si Jehova, (2) hanapon an katanosan, asin (3) hanapon an kahoyoan. Maninigo na magin interesado kitang marhay ngonyan sa mga kahagadan na ini. Taano? Huli ta kun paanong an Juda asin Jerusalem napaatubang sa sarong aldaw nin pakipagkuenta kaidtong ikapitong siglo B.C.E., an mga nasyon kan Kakristianohan​—sa katunayan, an gabos na maraot​—mahampang ki Jehova Dios sa maabot na “dakulang kahorasaan.” (Mateo 24:21) An siisay man na gustong matago sa panahon na iyan dapat na desididong humiro na ngonyan. Paano? Paagi sa paghanap ki Jehova, paghanap kan katanosan, asin paghanap kan kahoyoan bago magin huri an gabos!

5. Ano an kalabot sa ‘paghanap ki Jehova’ ngonyan?

⁵ Tibaad sabihon nindo: ‘Saro akong dusay, bautisadong lingkod nin Dios, saro sa Mga Saksi ni Jehova. Bako daw na naabot ko na an mga kahagadan na iyan?’ An totoo, dakol pa an imbuelto kisa pagdusay sana kan satong sadiri ki Jehova. An Israel sarong dusay na nasyon, alagad kan kaaldawan ni Sofonias an mga taga Juda dai namumuhay sono sa pagdusay na iyan. Bilang resulta, sa kahurihurihi isinikwal an nasyon. Kalabot sa ‘paghanap ki Jehova’ ngonyan an pagpatalubo asin pagpapadanay nin maogma asin personal na relasyon sa saiya sa kaibanan kan saiyang daganon na organisasyon. Nangangahulogan iyan nin pag-aram kun ano an pagmansay nin Dios sa mga bagay-bagay asin pagkonsiderar sa saiyang mga saboot. Hinahanap ta si Jehova kun maingat niatong inaadalan an saiyang Tataramon, hinohorophorop  iyan, asin iinaaplikar sa buhay an hatol kaiyan. Mantang hinahanap ta man an paggiya ni Jehova paagi sa odok na pamimibi asin sinusunod an paggiya kan saiyang banal na espiritu, minararom an satong relasyon sa saiya asin itinutulod kita na paglingkodan sia ‘sa bilog niatong puso, kalag, asin kosog.’​—Deuteronomio 6:​5; Galacia 5:​22-25; Filipos 4:​6, 7; Kapahayagan 4:11.

6. Paano ta ‘hinahanap an katanosan,’ asin taano ta mahihimo ini dawa sa kinaban na ini?

⁶ An ikaduwang kahagadan na sinambit sa Sofonias 2:​3 iyo an ‘paghanap kan katanosan.’ An kadaklan sa sato naggibo nin mahalagang mga pagbabago tanganing kita makualipikar sa Kristianong bautismo, alagad dapat na padagos niatong suportaran an matanos na mga pamantayan nin Dios sa bilog niatong buhay. An nagkapira na marahay kan enot sa bagay na ini tinogotan an saindang sadiri na madigtaan kan kinaban. Bakong pasil an paghanap kan katanosan, huli ta kita napalilibotan nin mga tawo na normal na sana an pagheling sa seksuwal na inmoralidad, pagputik, asin iba pang kasalan. Pero, kayang daogon nin makosog na pagmawot na paogmahon si Jehova an ano man na tendensia na hanapon an pag-oyon kan kinaban paagi sa paghihingoang makiibaiba dian. Nawara kan Juda an pag-oyon nin Dios huli sa pag-arog-arog sa maraot na kataraed na nasyon kaini. Kun siring, imbes na arogon an kinaban, kita magin “mga paraarog sa Dios,” na kinukultibar an “bagong personalidad na linalang segun sa kabotan nin Dios sa tunay na katanosan asin kaimbodan.”​—Efeso 4:​24; 5:1.

7. Paano ta ‘hinahanap an kahoyoan’?

⁷ An ikatolong idinoon sa Sofonias 2:​3 iyo na kun boot niatong matago sa aldaw kan kaanggotan ni Jehova, dapat niatong ‘hanapon an kahoyoan.’ Kada aldaw, nakakaibaiba niato an mga lalaki, babae, asin hoben na bakong mahoyo. Para sa sainda, an pagigin hababa an boot sarong katatsaran. An pagkamapagpasakop ibinibilang na grabeng kaluyahan. Sinda mapaghanap, maimot, asin matagas sa sadiring opinyon, na naniniwala na an saindang personal na “mga diretso” asin kagustohan dapat na paonrahan ano man an mangyari. Makamomondo nanggad kun maolakitan kita kan nagkapira sa mga kaisipan na iyan! Ini na an panahon na ‘hanapon an kahoyoan.’ Paano? Paagi sa pagigin mapagpasakop sa Dios, na mapakumbabang inaako an saiyang disiplina asin kinukuyog an saiyang kabotan.

Taano ta “Tibaad” Matago?

8. Ano an ipinaririsa kan paggamit kan tataramon na “tibaad” sa Sofonias 2:3?

⁸ Mangnohon na an Sofonias 2:​3 nagsasabi: “Tibaad kamo matago sa aldaw kan kaanggotan ni Jehova.” Taano ta ginamit an tataramon na “tibaad” kan sinasabihan an mga “mahoyo sa daga”? Bueno, an mga mahoyo na idto naggibo na nin positibong mga lakdang, alagad mayo nin lugar para sa pagkompiar sa sadiri. Dai pa sinda nakaabot sa katapusan kan saindang buhay nin pagigin fiel. Puedeng isipon na an nagkapira sa sainda tibaad maholog sa kasalan. Totoo man iyan sa sato. Sabi ni Jesus: “An nakatagal sagkod sa katapusan iyo an maliligtas.” (Mateo 24:13) Iyo, an pagkaligtas sa aldaw kan kaanggotan ni Jehova nakadepende sa satong pagpapadagos sa paggibo kan tama sa saiyang pagheling. Iyan daw an saindong marigon na desisyon?

9. Anong tanos na mga lakdang an ginibo kan hoben na si Hadeng Josias?

⁹ Minalataw na bilang reaksion sa mga tataramon ni Sofonias, si Hadeng Josias napahiro na ‘hanapon si Jehova.’ An Kasuratan nagsasabi: “Sa ikawalong taon kan saiyang paghade, mantang [si Josias] aki pa [mga 16 anyos], pinonan niang hanapon an Dios ni David na saiyang apoon.” (2 Cronica 34:3) Si Josias nagpadagos man sa ‘paghanap kan katanosan,’ huli ta satong mababasa: “Sa ikakagduwang taon [kan si Josias mga 20 anyos na] pinonan niang linigan an Juda asin Jerusalem kan haralangkaw na lugar asin sagradong mga palo asin kinortihan na mga ladawan patin minoldeng mga estatuwa. Dugang pa, ginaba ninda sa atubangan nia an mga altar kan mga Baal.” (2 Cronica 34:​3, 4) Si Josias ‘naghanap man kan kahoyoan,’ na mapakumbabang naghiro tanganing paogmahon si Jehova paagi sa paglinig sa daga kan idolatriya asin iba pang falsong relihiosong mga gibo. Sierto nanggad na ipinaggayagaya kan iba pang mahoyo an mga pangyayaring idto!

10. Ano an nangyari sa Juda kan 607 B.C.E., alagad sairisay an naligtas?

 ¹⁰ Dakol na Judio an nagbalik ki Jehova durante kan paghade ni Josias. Minsan siring, pagkagadan kan hade, an kadaklan nagbuelta sa saindang dating mga gawe-gawe​—sa mga gibo na biyong dai inaako nin Dios. Siring kan idinekreto ni Jehova, dinaog kan mga Babilonyo an Juda asin linaglag an kabiserang siudad kaini, an Jerusalem, kan 607 B.C.E. Pero, bakong mayo na nanggad nin paglaom. Si propeta Jeremias, an Etiopeng si Ebed-melec, an mga gikan ni Jonadab, asin iba pang fiel sa Dios natago sa aldaw na idto kan kaanggotan ni Jehova.​—Jeremias 35:​18, 19; 39:​11, 12, 15-18.

Mga Kaiwal nin Dios—Magmangno Kamo!

11. Taano ta depisil an magdanay na fiel sa Dios ngonyan, alagad ano an maninigong isipon kan mga kaiwal kan banwaan ni Jehova?

¹¹ Mantang hinahalat ta an aldaw kan kaanggotan ni Jehova sa maraot na sistemang ini, kita “napapaatubang sa manlaenlaen na pagbalo.” (Santiago 1:2) Sa dakol na kadagaan na naghihingakong may pagpapahalaga sa katalingkasan nin pagsamba, ginamit kan mapagmaniobrang mga klerigo an saindang impluwensia sa sekular na mga autoridad tanganing maringis na lamagon an banwaan nin Dios. Pinapakaraot kan mga tawong daing prinsipyo an Mga Saksi ni Jehova, na inaapod sinda na “peligrosong kulto.” Aram nin Dios an saindang mga ginigibo​—asin an mga ini talagang kakastigohon. Maninigong isipon kan saiyang mga kaiwal an nangyari sa suanoy na mga kaiwal kan saiyang banwaan na arog kan mga Filisteo. An sabi kan hula: “Kun dapit sa Gaza, sia magigin binayaan na siudad; asin an Askelon magigin mapungaw na kahiwasan. Kun dapit sa Asdod, sa kaodtohan palalayason sia ninda; asin kun dapit sa Ekron, sia gagaboton.” Lalaglagon an mga siudad sa Filistea na Gaza, Askelon, Asdod, asin Ekron.​—Sofonias 2:​4-7.

12. Ano an nangyari sa Filistea, Moab, asin Amon?

¹² An hula nagpapadagos: “Nadangog ko an pagtuyaw nin Moab asin an mapanlibak na mga tataramon kan mga aking lalaki ni Amon, na paagi kaiyan tinuyaw ninda an sakuyang banwaan asin padagos na nagpaabaw-abaw tumang sa saindang teritoryo.” (Sofonias 2:8) Totoo, an Egipto asin Etiopia nagdusa sa kamot kan mga nananakyadang Babilonyo. Alagad ano an paghokom nin Dios tumang sa Moab asin Amon, mga nasyon na gikan sa sobrino ni Abraham na si Lot? Ihinula ni Jehova: “An Moab mismo magigin siring kan Sodoma, asin an mga aking lalaki ni Amon siring kan Gomorra.” Bakong arog kan saindang mga apoon​—an duwang aking babae ni Lot, na nakaligtas sa pagkalaglag kan Sodoma asin Gomorra​—an mapalangkaw na Moab asin Amon dai matatago sa mga paghokom nin Dios. (Sofonias 2:​9-12; Genesis 19:​16, 23-26, 36-38) Ngonyan, haen na an Filistea asin haen na an mga siudad kaiyan? Kumusta man an dating mapalangkaw na Moab asin Amon? Dawa pa hanapon nindo, dai nindo iyan manonompongan.

13. Ano an nadiskobre nin arkeolohiya sa Ninive?

¹³ Kan kaaldawan ni Sofonias, an Imperyo nin Asiria nasa alitoktok kan kapangyarihan kaiyan. Sa paglaladawan sa sarong kabtang nin palasyo kan hade na nakotkot nia sa kabisera kan Asiria na Ninive, an arkeologong si Austen Layard nagsurat: “An mga kisame . . . binarangabanga nin kuadrado, na pininturahan nin mga burak, o nin mga ladawan nin mga hayop. An nagkapira may tampok na marfil, na an kada kabtang napalilibotan nin eleganteng mga pagirilid asin moldura. An mga panalgan, siring man an mga lanob kan kuarto, puedeng kinalupkopan, o tinubog pa ngani, sa bulawan asin pirak; asin an pinakabihirang klaseng mga kahoy, na risang-risa dian an sedro, an ginamit sa mga kana na kahoy.” Pero, siring kan sinabi sa hula ni Sofonias, an Asiria lalaglagon asin an kabiserang siudad kaiyan, an Ninive magigin “mapungaw na kahiwasan.”​—Sofonias 2:13.

14. Paano naotob an hula ni Sofonias sa Ninive?

¹⁴ Kinseng taon sana pagkatapos na itaram ni Sofonias an hulang iyan, linaglag an poderosong Ninive, na an palasyo nin hade nagin kagabaan. Iyo, an mapalangkaw na siudad na iyan nagin kabokabo. Malinaw na marhay na ihinuhula sa mga tataramon na ini kun sagkod saen an destroso: “An pelikano sagkod an erizo matotorog sa tahaw mismo kan [buminagsak nang] pinakapayo kan mga harigi kaiyan. Sarong tingog an padagos na makanta sa may bintana. Magkakaigwa nin kagabaan sa tata.” (Sofonias 2:​14, 15) An matayo na mga edipisyo kan Ninive magigin angay na  sanang erokan nin mga erizo asin pelikano. Mayo na sa mga lansangan kan siudad an mga ribok nin komersio, an mga kurahaw nin mga parapakilaban, an mga kanta kan mga saserdote. Sa dating masibot na mga agihan na idto, an madadangog na sana iyo an sarong tingog na nag-aawit nin nakapanggigirabo sa may bintana, na tibaad an mamondong huni nin sarong gamgam o an ragubrob nin doros. Sa siring na paagi, mapoho logod an gabos na kaiwal nin Dios!

15. Ano an manonodan sa nangyari sa Filistea, Moab, Amon, asin Asiria?

¹⁵ Ano an manonodan ta sa nangyari sa Filistea, Moab, Amon, asin Asiria? Ini: Bilang mga lingkod ni Jehova, mayo kitang dapat ikatakot sa satong mga kaiwal. Naheheling nin Dios an ginigibo kan mga nagtutumang sa saiyang banwaan. Huminiro si Jehova tumang sa saiyang kaiwal kan nakaagi, asin gigibohon man an saiyang mga paghokom sa bilog na ineerokan na daga ngonyan. Pero, may mga makaliligtas​—‘sarong dakulang kadaklan hale sa gabos na nasyon.’ (Kapahayagan 7:9) Puede kamong mapabilang sa sainda​—alagad basta padagos nindong hahanapon si Jehova, hahanapon an katanosan, asin hahanapon an kahoyoan.

Herak Man sa Daing Galang na mga Paragibo nin Sala!

16. Ano an sinabi kan hula ni Sofonias manongod sa mga prinsipe asin namomoon sa relihion sa Juda, asin taano ta tama an mga tataramon na ini sa Kakristianohan?

¹⁶ An hula ni Sofonias nakasentro giraray sa Juda asin Jerusalem. An sabi kan Sofonias 3:​1, 2: “Herak man sa saiya na nagrerebelde asin dinidigtaan an sadiri, an mapan-aping siudad! Dai sia naghinanyog sa sarong tingog; dai sia nag-ako nin disiplina. Dai sia nagtiwala ki Jehova. Sa saiyang Dios dai sia ruminani.” Makaturotriste nanggad na dai hinimate an mga paghihingoa ni Jehova na disiplinahon an saiyang banwaan! Maraoton nanggad an pagkadaing herak kan mga prinsipe, noble, asin hokom. Kinondenar ni Sofonias  an pagkadaing sopog kan mga namomoon sa relihion, na sinasabi: “An saiyang mga propeta daing galang, mga tawong madaya. An saiyang mga saserdote mismo naglanghad sa banal; naggibo sinda nin kadahasan sa ley.” (Sofonias 3:​3, 4) Tama nanggad an pagkaladawan kan mga tataramon na iyan sa kamugtakan kan mga propeta asin padi nin Kakristianohan ngonyan! Daing galang nanggad, hinale ninda an ngaran nin Dios sa saindang mga traduksion kan Biblia asin nagtokdo nin mga doktrina na nagmimisrepresentar sa Saro na sinasamba daa ninda.

17. Maghinanyog man o dai an mga tawo, taano ta dapat na padagos na ibalangibog an maogmang bareta?

¹⁷ Makonsiderasyon na pinatanidan ni Jehova an saiyang suanoy na banwaan mapadapit sa gigibohon nia. Isinugo nia an saiyang mga lingkod na propeta​—si Sofonias asin Jeremias, kabilang sa iba pa​—tanganing sadolon na magsolsol an banwaan. Iyo, ‘si Jehova dai magibo nin karatan. Kada aga itinatao nia an saiyang hudisyal na desisyon. Pagkaaga iyan dai nagkukulang.’ Ano an reaksion? “Alagad ta an maraot daing sopog,” an sabi ni Sofonias. (Sofonias 3:5) May kaagid na patanid na ipinapaabot sa panahon na ini. Kun ika parahayag kan maogmang bareta, igwa ka nin kabtang sa gibohon na ini na pagpapatanid. Padagos na ipahayag an maogmang bareta na daing ontok! Maghinanyog man o dai an mga tawo, mapanggana an saindong ministeryo sa pagheling nin Dios basta fiel nindong ginigibo iyan; mayo kamong dapat ikasopog mantang ginigibo nindo nin may kaigotan an gibohon nin Dios.

18. Paano maootob an Sofonias 3:6?

¹⁸ An paghokom nin Dios bako sanang sa paglaglag sa Kakristianohan. Dinugangan ni Jehova an saiyang pagdenunsiar na nagin kabale an gabos na nasyon: “Nagpoho ako nin mga nasyon; an saindang mga torre sa eskina nagkagaraba. Rinadas ko an saindang mga lansangan, kaya mayo nang siisay man na nag-aagi. An saindang mga siudad ginaraba.” (Sofonias 3:6) Mapagtitiwalaan na gayo an mga tataramon na ini kaya an pagtaram ni Jehova manongod sa kalaglagan garo baga nangyari na iyan. Ano an nangyari sa mga siudad nin Filistea, Moab, asin Amon? Asin kumusta man an kabisera kan Asiria, an Ninive? An pagkalaglag kan mga iyan nagseserbing panalmingan para sa mga nasyon ngonyan. An Dios dai maoolog-olog.

Padagos na Hanapon si Jehova

19. Anong nakapupukaw nin isip na mga hapot an puede niatong ihapot?

¹⁹ Kan kaaldawan ni Sofonias, ilinuwas an kaanggotan nin Dios sa mga may karatan na ‘ginigibong maraot an gabos nindang gawe-gawe.’ (Sofonias 3:7) Iyan man an mangyayari sa panahon niato. Naheheling daw nindo an ebidensia na harani na an aldaw kan kaanggotan ni Jehova? Padagos daw nindong ‘hinahanap si Jehova’ paagi sa pagbasa kan saiyang Tataramon nin regular​—aroaldaw? Saindo daw na ‘hinahanap an katanosan’ paagi sa pamumuhay nin malinig sa moral kaoyon kan mga pamantayan nin Dios? Saindo daw na ‘hinahanap an kahoyoan’ paagi sa pagpaheling nin mahoyo, mapagpasakop na aktitud sa Dios asin sa saiyang mga areglo para sa kaligtasan?

20. Anong mga hapot an eestudyaran niato sa ultimong artikulo kan seryeng ini dapit sa hula ni Sofonias?

²⁰ Kun padagos niatong fiel na hahanapon si Jehova, an katanosan, asin an kahoyoan, makakaasa kita na magkamit nin nagsosopay na mga bendisyon ngonyan mismo​—iyo, dawa sa nakababalo nin pagtubod na “huring mga aldaw” na ini. (2 Timoteo 3:​1-5; Talinhaga 10:22) Alagad posibleng ihapot man niato, ‘Sa anong mga paagi kita binebendisyonan bilang mga lingkod ni Jehova sa presenteng panahon, asin anong mga bendisyon sa ngapit an iinaatubang kan hula ni Sofonias para sa mga matatago sa marikas nang nagdadangadang na aldaw kan kaanggotan ni Jehova?’

Ano an Isisimbag Nindo?

• Paano ‘hinahanap si Jehova’ kan mga tawo?

• Ano an kalabot sa ‘paghanap nin katanosan’?

• Paano niato ‘hahanapon an kahoyoan’?

• Taano ta maninigo tang padagos na hanapon si Jehova, an katanosan, asin an kahoyoan?

[Mga Hapot Para sa Pag-adal]

[Ritrato sa pahina 18]

Hinahanap daw nindo si Jehova paagi sa pag-adal sa Biblia asin odok na pamimibi?

[Ritrato sa pahina 21]

Huling padagos nindang hinahanap si Jehova, sarong dakulang kadaklan an makaliligtas sa aldaw kan saiyang kaanggotan