Harani Na an Aldaw nin Paghokom ni Jehova!

“An dakulang aldaw ni Jehova harani na. Iyan harani na, asin igwa nin paghihidale na gayo kaiyan.”—SOFONIAS 1:14.

1. Anong patanid an ipinaluwas nin Dios paagi ki Sofonias?

MADALI nang humiro si Jehova Dios tumang sa mga maraot. Paghinanyog kamo! Ini an saiyang patanid: “Uuboson ko an daganon na tawo . . . Popohoon ko an katawohan sa ibabaw kan daga.” (Sofonias 1:3) An mga tataramon na iyan kan Soberanong Kagurangnan na si Jehova itinaram paagi sa saiyang propetang si Sofonias, na tibaad an makoapo sa dapan kan fiel na si Hadeng Ezequias. An kapahayagan na iyan, na ginibo kaidtong kaaldawan kan marahay na si Hadeng Josias, bakong marahay para sa mga maraot na nag-eerok sa daga nin Juda.

2. Taano an mga ginibo ni Josias ta dai nakaolang sa aldaw nin paghokom ni Jehova?

² An panhuhula ni Sofonias daing duda na lalong ipinarealisar sa hoben na si Josias an pangangaipo na haleon sa Juda an maating pagsamba. Alagad an ginibo kan hade na paghale kan falsong relihion sa daga dai nakahale sa gabos na karatan sa tahaw kan banwaan o nakatubos sa mga kasalan kan saiyang apoon, si Hadeng Manases, na ‘pinano an Jerusalem nin inosenteng dugo.’ (2 Hade 24:​3, 4; 2 Cronica 34:3) Kaya an aldaw nin paghokom ni Jehova seguradong maabot.

3. Paano kita makasesegurado na puedeng makaligtas “sa aldaw kan kaanggotan ni Jehova”?

³ Pero, may mga makaliligtas sa makangingirhat na aldaw na iyan. Kun siring, an propeta nin Dios nagsadol: “Bago mangaki nin ano man an pagboot, bago mag-agi an aldaw na garo nasosolong dagami, bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sofonias 2:​2, 3) Nasa isip an paglaom na makaligtas durante kan aldaw nin paghokom ni Jehova, pag-olayan niato an libro kan Biblia na Sofonias. Isinurat sa Juda bago kan 648 B.C.E., iyan kabtang kan “makahulang tataramon” nin Dios, na maninigo niato gabos na tawan nin bilog na pusong atension.​—2 Pedro 1:19.

Ibiningat an Kamot ni Jehova

4, 5. Paano naotob an Sofonias 1:​1-3 sa mga maraot sa Juda?

⁴ “An tataramon ni Jehova” ki Sofonias minapoon paagi sa patanid na sinitar kasubago. An Dios nagpahayag: “‘Uuboson kong biyo an gabos na bagay sa ibabaw kan daga,’ an sabi ni Jehova. ‘Uuboson ko an daganon na tawo asin hayop. Uuboson ko an naglalayog na linalang sa kalangitan asin an mga sira sa dagat, asin an mga singkogan kaiba kan mga maraot; asin popohoon ko an katawohan sa ibabaw kan daga,’ an sabi ni Jehova.”​—Sofonias 1:​1-3.

⁵ Iyo, tataposon ni Jehova an grabeng karatan sa daga nin Juda. Siisay an gagamiton nin Dios sa ‘paglaglag sa gabos na bagay sa ibabaw kan daga’? Huling minalataw na si Sofonias naghula durante kan enot na kabtang kan pagreynar ni Hadeng Josias, na nagpoon kan 659 B.C.E., an makahulang mga tataramon na iyan nagkaigwa nin kaotoban sa pagkagaba kan Juda asin kan kabiserang siudad kaini, an Jerusalem, sa kamot kan mga Babilonyo kan 607 B.C.E. Kan panahon na idto, nagkaigwa nin ‘pag-ubos’ sa mga maraot sa Juda.

6-8. Ano an ihinula sa Sofonias 1:​4-6, asin paano naotob an hula na iyan sa suanoy na Juda?

⁶ Ihinuhula an gigibohon nin Dios tumang sa  falsong mga parasamba, an Sofonias 1:​4-6 nagsasabi: “Ibibingat ko an sakuyang kamot tumang sa Juda asin tumang sa gabos na nag-eerok sa Jerusalem, asin popohoon ko sa lugar na ini an mga natatada kan Baal, an ngaran kan mga saserdote nin ibang dios kaiba an mga saserdote, asin an mga naghohorohod sa ibabaw kan mga atop sa hukbo kan kalangitan, asin an mga naghohorohod, na nagsusurumpa ki Jehova asin nagsusurumpa sa ngaran ni Malcam; asin an mga nagsisiribog sa pagsunod ki Jehova asin dai naghaharanap ki Jehova saka dai nakikihumapot manongod sa saiya.”

⁷ Ibiningat an kamot ni Jehova tumang sa mga taga Juda asin Jerusalem. Desidido sia na pohoon an mga nagsasamba sa dios kan mga Cananeo sa pagkamainaki na si Baal. An manlaenlaen na lokal na dios inaapod na mga Baal huli ta an mga nagsasamba dian naghohona na sinda an may kapot asin may impluwensia sa partikular na mga lugar. Halimbawa, yaon an Baal na sinasamba kan mga Moabita asin Midianita sa Bukid nin Peor. (Bilang 25:​1, 3, 6) Sa bilog na Juda, popohoon ni Jehova an mga saserdote ni Baal, siring man an bakong fiel na mga Levitang saserdote na nagbabalga sa ley nin Dios paagi sa pakikiiba sa sainda.​—Exodo 20:​2, 3.

⁸ Popohoon man nin Dios an mga ‘naghohorohod sa hukbo kan kalangitan,’ na minalataw na naggigibo nin astrolohiya asin nagsasamba sa aldaw. (2 Hade 23:​11; Jeremias 19:​13; 32:29) Iluluwas man an kaanggotan nin Dios sa mga nagpoprobar na isalak an tunay na pagsamba sa falsong relihion paagi sa ‘pagsumpa ki Jehova asin sa ngaran ni Malcam.’ An Malcam posibleng ibang ngaran ni Moloc, an pangenot na dios kan mga Amonita. Kabale sa pagsamba ki Moloc an pag-atang nin aki.​—1 Hade 11:​5; Jeremias 32:35.

Harani Na an Katapusan kan Kakristianohan!

9. (a) Sa ano may sala an Kakristianohan? (b) Bakong arog kan bakong fiel na mga taga Juda, ano an maninigo na determinado niatong gibohon?

⁹ Tibaad ipagirumdom nanggad kaini gabos sa sato an Kakristianohan, na sagom sa falsong pagsamba asin astrolohiya. Asin makababalde nanggad an kabtang kaini sa pag-atang nin minilyon na buhay sa altar nin guerra na suportado nin klero! Nungka kitang magin arog kan bakong fiel na mga taga Juda, na ‘nagsiribog sa pagsunod ki Jehova,’ na nagin indiperente asin dai na nagharanap sa saiya o naghagad nin paggiya nia. Imbes, papagdanayon niato an satong integridad sa Dios.

10. Paano nindo ipaliliwanag an makahulang kahulogan kan Sofonias 1:7?

¹⁰ An sunod na mga tataramon kan propeta angay sa mga paragibo nin sala sa Juda sagkod sa mga maraot sa kaaldawan niato. An sabi kan Sofonias 1:​7: “Dai ka maggirong sa atubangan kan Soberanong Kagurangnan na Jehova; huli ta an aldaw ni Jehova harani na, huli ta si Jehova nag-andam nin atang; saiyang sinantipikar an saiyang mga inagda.” An “mga inagda” na ini minalataw na iyo an mga kaiwal na Caldeo kan Juda. An “atang” iyo an Juda mismo, kabale an kabiserang siudad kaini. Sa siring na paagi ipinaisi ni Sofonias  an katuyohan nin Dios na laglagon an Jerusalem, asin an hula na ini nanonongod man sa paglaglag sa Kakristianohan. Sa katunayan, huling haranihon na ngonyan an aldaw nin paghokom nin Dios, an bilog na kinaban maninigo na ‘dai maggirong sa atubangan kan Soberanong Kagurangnan na Jehova’ asin magdangog sa sinasabi nia paagi sa “sadangoton na aripompon” nin linahidan na mga parasunod ni Jesus asin sa kairiba ninda, an saiyang “ibang karnero.” (Lucas 12:​32; Juan 10:16) Pagkapara an naghahalat sa gabos na dai mahinanyog asin paagi kaiyan minakontra sa pamamahala kan Kahadean nin Dios.​—Salmo 2:​1, 2.

Madali Na—Sarong Aldaw nin Pag-ungal!

11. Ano an pinakang kahulogan kan Sofonias 1:​8-11?

¹¹ Mapadapit sa aldaw ni Jehova, idinagdag kan Sofonias 1:​8-11: “‘Mangyayari sa aldaw kan pag-atang ni Jehova na ako mataong atension sa mga prinsipe, asin sa mga aking lalaki kan hade, asin sa gabos na nagugubingan nin sa taga ibang daga. Asin ako matao nin atension sa lambang minasakat sa plataporma sa aldaw na iyan, idtong mga pinapano an harong kan sindang mga kagurangnan nin kadahasan asin pandadaya. Asin mangyayari sa aldaw na iyan,’ an sabi ni Jehova, ‘an tingog nin inagrangay hale sa Tata nin Sira, asin nin inungal hale sa ikaduwang distrito, patin nin dakulang pagkagaba hale sa mga bolod. Mag-urungal kamo, mga nag-eerok sa Mactes, huli ta an gabos na tawong parabariwas pinasilensio; pinoho idto gabos na nagtitimbang nin pirak.’ ”

12. Paano na an nagkapira nanompongan na “nagugubingan nin sa taga ibang daga”?

¹² Si Hadeng Josias sasalidahan ni Joacaz, Joaquim, asin Joachin. Dangan madatong an pamamahala ni Zedequias, na tatandaan kan pagkalaglag kan Jerusalem. Minsan ngani napapaatubang sa sainda an kalamidad na iyan, an nagkapira minalataw na nagmawot na akoon sinda kan saindang kataraed na nasyon paagi sa ‘paggubing nin sa taga ibang daga.’ Kaagid kaiyan, dakol ngonyan an nagpapaheling sa laen-laen na paagi na sinda bakong kaiba sa organisasyon ni Jehova. Bilang risang-risang kabtang kan organisasyon ni Satanas, kakastigohon sinda.

13. Kaoyon kan hula ni Sofonias, ano an mangyayari kaidto kun salakayon na kan mga Babilonyo an Jerusalem?

¹³ An “aldaw na iyan” nin paniningil sa Juda katimbang kan aldaw ni Jehova tanganing hokoman an mga kaiwal nia, taposon an karatan, asin patunayan an saiyang pagkasupremo. Mantang sinasalakay kan mga Babilonyo an Jerusalem, may inagrangay na maluwas hale sa Tata nin Sira. Posibleng siring kaiyan an ngaran kaiyan huli ta harani iyan sa sadan nin mga sira. (Nehemias 13:16) An mga hukbo nin Babilonya malaog sa kabtang na inaapod ikaduwang distrito, asin an “pagkagaba hale sa mga bolod” puedeng mangahulogan kan ribok kan nagdadangadang na mga Caldeo. ‘Maurungal’ an mga nag-eerok sa Mactes, tibaad duman sa itaas kan Kababan nin Tiropeo. Taano ta maurungal sinda? Huli ta an komersio, kabale an komersio kan mga “nagtitimbang nin pirak,” mapopondo na duman.

14. Gurano kahiwas an magigin pagsiyasat nin Dios sa naghihingakong mga nagsasamba sa saiya?

¹⁴ Gurano kahiwas an magigin pagsiyasat ni Jehova sa naghihingakong mga nagsasamba sa saiya? An hula nagpapadagos: “Mangyayari sa panahon na iyan na maingat kong sisiyasaton an Jerusalem na may mga ilawan, asin tatawan ko nin atension an mga tawong nagigin matagas na sa ibabaw kan saindang mga lagod asin nagsasarabi sa saindang puso, ‘Si Jehova dai maggigibo nin marahay, asin dai sia maggigibo nin maraot.’ Asin an saindang kayamanan sasalakaton asin an saindang mga harong gagarabaon. Asin sinda magtotogdok nin mga harong, alagad ta dai sinda mag-oontok dian; asin magtatanom sinda nin mga ubasan, alagad ta dai ninda maiinom an arak kaiyan.”​—Sofonias 1:​12, 13.

15. (a) Ano an mangyayari kaidto sa apostatang mga saserdote sa Jerusalem? (b) Ano an nakatalaan na mangyari sa mga naggigibo nin falsong relihion sa presenteng panahon?

¹⁵ An apostatang mga saserdote sa Jerusalem isinasalak an pagsamba ki Jehova sa falsong relihion. Minsan ngani sinda naghohona na ligtas na sinda, hahanapon sinda ni Jehova na garo igwa nin maliwanag na ilawan na mataros sa espirituwal na kadikloman na pinagtagoan ninda. Daing makadudulag sa pagpahayag asin pagsagibo kan paghokom nin Dios. An kampanteng mga apostatang  idto nagtundag na garo mga lagod sa irarom nin tangke nin arak. Habo nindang maistorbo nin ano man na kapahayagan nin pag-interbenir nin Dios sa mga gibo-gibo nin tawo, alagad dai ninda madudulagan an paghokom nin Dios sa sainda. Dai man makakadulag an mga naggigibo nin falsong relihion sa presenteng panahon, kaiba an mga miembro nin Kakristianohan asin an mga nag-apostata sa pagsamba ki Jehova. Huli sa pagdehar na ini na an “huring mga aldaw,” sinasabi ninda sa saindang puso, “si Jehova dai maggigibo nin marahay, asin dai sia maggigibo nin maraot.” Sala nanggad sinda!​—2 Timoteo 3:​1-5; 2 Pedro 3:​3, 4, 10.

16. Ano an mangyayari kaidto kun an paghokom nin Dios gibohon na sa Juda, asin ano an maninigo na magin epekto sa sato kan pakaaram kaiyan?

¹⁶ An mga apostata sa Juda pinatanidan na sasalakaton kan mga Babilonyo an saindang mga kayamanan, gagabaon an saindang mga harong, asin kukuanon an mga bunga kan saindang mga ubasan. Mawawaran nin halaga an materyal na mga bagay kun hokoman na nin Dios an Juda. Totoo man iyan kun dumatong na an aldaw nin paghokom ni Jehova sa presenteng sistema nin mga bagay. Kun siring, magkaigwa logod kita nin espirituwal na pananaw asin ‘magtipon kita nin mga kayamanan sa langit’ paagi sa pag-enot kan paglilingkod ki Jehova sa satong buhay!​—Mateo 6:​19-21, 33.

“An Dakulang Aldaw ni Jehova Harani Na”

17. Segun sa Sofonias 1:​14-16, gurano na kaharani an aldaw nin paghokom ni Jehova?

¹⁷ Gurano na kaharani an aldaw nin paghokom ni Jehova? Segun sa Sofonias 1:​14-16, itinatao nin Dios an asegurasyon na ini: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan. An tanog kan aldaw ni Jehova mapait. Duman an makosog na tawo minakuragrit. An aldaw na iyan aldaw nin kabangisan, aldaw nin kasakitan asin nin panangis, aldaw nin bagyo asin nin panggaba, aldaw nin kadikloman asin nin paglomlom, aldaw nin pagdagom asin nin pagdiklom, aldaw nin amodyong asin nin alarma, tumang sa mga siudad na pusog asin tumang sa haralangkaw na bantayan.”

18. Taano ta dai kita maninigong magkonklusyon na an aldaw nin paghokom ni Jehova harayoon pa?

¹⁸ Pinatanidan an makasalan na mga saserdote, prinsipe, asin namamanwaan sa Juda na “an dakulang aldaw ni Jehova harani na.” Para sa Juda ‘magkakaigwa nin paghihidale na gayo kan aldaw ni Jehova.’ Sa panahon man niato, mayo logod nin mag-isip na harayoon pa an paghokom ni Jehova sa mga maraot. Imbes, kun paanong an Dios tolos-tolos na huminiro sa Juda, ‘hihidaleon’ man nia an saiyang aldaw nin paghiro. (Kapahayagan 16:​14, 16) Magigin mapait nanggad na panahon  iyan para sa gabos na nag-iignoro sa mga patanid ni Jehova na itinatao kan saiyang mga Saksi asin na dai nag-aako kan tunay na pagsamba!

19, 20. (a) Ano an nagkapirang kabtang kan pagpahayag kan kaanggotan nin Dios sa Juda asin Jerusalem? (b) Huli sa may pinipiling paglaglag na napapaatubang sa sistemang ini nin mga bagay, anong mga hapot an pinalataw?

¹⁹ An pagpahayag kan grabeng kaanggotan nin Dios sa Juda asin Jerusalem nagin “aldaw nin kasakitan asin nin panangis.” Dakol na pagdusa an dinara kan mga nananakyadang Babilonyo sa mga nag-eerok sa Juda, kabale an panangis sa isip sa atubangan nin kagadanan asin kalaglagan. An ‘aldaw na iyan nin bagyo asin panggaba’ nagin madiklom, malomlom, asin may mahibog na dagom, na tibaad bako sanang piguratibo kundi literal man, huli ta an aso asin mga nagadan lakop sa gabos na lugar. Iyan nagin “aldaw nin amodyong asin nin alarma,” alagad daing saysay an mga pagpatanid.

²⁰ Daing maginibo an mga bantay sa Jerusalem mantang tinutumpag kan mga panggaba kan mga Babilonyo an “haralangkaw na bantayan.” An mga kuta kan presenteng maraot na sistema nin mga bagay magigin man daing serbi tumang sa mga armas na nasa langitnon na arsenal nin Dios, na nakaandam na gamiton sa madali nang ngapit sa may pinipiling paglaglag. Naglalaom daw kamo na maligtas? Kamo daw marigon nang nanindogan sa kampi ni Jehova, na ‘nagbabantay sa gabos na namomoot sa saiya alagad paparaon an gabos na maraot’?​—Salmo 145:20.

21, 22. Paano maootob sa satong kaaldawan an Sofonias 1:​17, 18?

²¹ Abaa kamakatatakot na aldaw nin paghokom an ihinula sa Sofonias 1:​17, 18! “Pasasakitan ko an katawohan,” sabi ni Jehova Dios, “asin sinda magraralakaw nanggad na garo mga buta; huli ta tumang ki Jehova na sinda nagkasala. Asin an saindang dugo ibububo nanggad na garo talbo, asin an saindang mga bituka na garo odo. Minsan an saindang pirak ni an saindang bulawan dai makapagliligtas sa sainda sa aldaw kan kabangisan ni Jehova; kundi paagi sa kalayo kan saiyang kaigotan an bilog na daga matototong, huli ta magibo sia nin pangubos, nin totoong gayong makangingirhat, sa gabos na nag-eerok sa daga.”

²² Siring kan ginibo nia kaidtong kaaldawan ni Sofonias, sa dai na mahahaloy pasasakitan ni Jehova an “gabos na nag-eerok sa daga,” idtong mga  habong maghimate sa saiyang patanid. Huling nagkasala sinda sa Dios, sinda maralagawlagaw na daing maginibo siring sa mga buta, na dai makanonompong nin kaligtasan. Sa aldaw nin paghokom ni Jehova, an saindang dugo “ibububo nanggad na garo talbo,” arog sa sarong bagay na daing kamanungdanan. Tunay nanggad na makasusupog an aabtan ninda, huli ta iwawarak nin Dios sa ibabaw kan daga an mga bangkay​—pati an mga bituka​—kan mga maraot na ini, “na garo odo.”

23. Minsan ngani dai makakadulag an mga paragibo nin sala “sa aldaw kan kabangisan ni Jehova,” anong paglaom an itinatao kan hula ni Sofonias?

²³ Mayo nin puedeng magligtas sa mga nagtutumang sa Dios asin sa saiyang banwaan. Maski an pirak ni bulawan dai makapagliligtas sa mga paragibo nin sala sa Juda, kun paanong an nakatagong mga kayamanan asin mga suhol dai makakatao nin proteksion o dudulagan “sa aldaw kan kabangisan ni Jehova” sa Kakristianohan asin sa iba pang kabtang kan sistemang ini nin mga bagay. Sa aldaw na iyan nin desisyon, “an bilog na daga matototong” sa kalayo nin kaigotan nin Dios mantang pinopoho nia an mga maraot. Huling igwa kita nin pagtubod sa makahulang tataramon nin Dios, kita kombensido na kita nasa poro na ngonyan kan “panahon kan katapusan.” (Daniel 12:4) Harani na an aldaw nin paghokom ni Jehova, asin madali na niang gibohon an pamamalos sa saiyang mga kaiwal. Pero, an hula ni Sofonias talagang nagtatao nin paglaom na kaligtasan. Ano, kun siring, an hinahagad sa sato tanganing matago kita sa aldaw kan kaanggotan ni Jehova?

Ano an Isisimbag Nindo?

• Paano naotob an hula ni Sofonias sa Juda asin Jerusalem?

• Ano an nakatalaan na mangyari sa Kakristianohan asin sa gabos na maraot sa satong kaaldawan?

• Taano ta dai niato maninigong isipon na an aldaw nin paghokom ni Jehova harayoon pa?

[Mga Hapot Para sa Pag-adal]

[Ritrato sa pahina 13]

Pusoan na ipinahayag ni Sofonias na an aldaw nin paghokom ni Jehova harani na

[Credit Line]

Hale sa Self-Pronouncing Edition of the Holy Bible, na igwa kan bersion na King James asin Revised

[Ritrato sa pahina 15]

An aldaw ni Jehova nagdatong sa Juda asin Jerusalem sa kamot kan mga Babilonyo kan 607 B.C.E.

[Ritrato sa pahina 16]

Kamo daw naglalaom na maligtas kun laglagon na ni Jehova an mga maraot?