Ano an Espirituwal na Paraiso?

SI Gustavo nagdakula sa sarong sadit na siudad sa Brazil. * Poon sa pagkaaki itinokdo sa saiya na an marahay na mga tawo minaduman sa langit pagkagadan. Mayo siang pakaaram manongod sa katuyohan nin Dios na sa maabot na panahon kakamtan kan fiel na katawohan an sangkap na buhay sa sarong daganon na paraiso. (Kapahayagan 21:​3, 4) Asin may saro pang bagay na dai nia aram. Dai nia aram na dawa ngonyan, sia puedeng mapasa espirituwal na paraiso.

Nadangog na lamang daw nindo an manongod sa espirituwal na paraisong iyan? Aram daw nindo kun ano iyan asin kun ano an kahagadan tanganing magin kabtang kaiyan? An siisay man na gustong magin totoong maogma kaipuhan na makaaram manongod sa paraisong iyan.

Pakakua sa Espirituwal na Paraiso

An pagsabi na dawa ngonyan an saro puedeng mabuhay sa sarong paraiso tibaad garo harayo sa katunayan. An kinaban na ini harayo nanggad sa sarong paraiso. Kadakol na tawo an nakaeeksperyensia sa sinabi kan sarong suanoy na Hebreong hade: “Uya! an mga luha kan mga inaapi, alagad mayo sindang pararanga; asin sa kampi kan saindang mga paraapi igwa nin kapangyarihan, kaya mayo sinda nin pararanga.” (Eclesiastes 4:1) Ginatos na milyon an nagdudusa sa pamamahala kan maraot na sistema politikal, relihioso, asin ekonomika, asin ta mayo sindang pakaginhawa, mayong “pararanga.” Dakol pa an nasasakitan sa pagbayad kan saindang mga utang, pagpadakula kan saindang mga aki, asin paggibo kan kadakoldakol na iba pang bagay na kaipuhan tanganing magdanay na buhay. An mga ini man posibleng marhay na maogmang aakoon an sarong pararanga, saro na mapagian nin kadikit kan pagabat. Para sa sainda gabos, an buhay harayo sa pagigin paraiso.

Kun siring, haen an espirituwal na paraiso? Bueno, an terminong Ingles na “paradise” [sa Bicol, “paraiso”] konektado sa mga terminong Griego, Persiano, asin Hebreo na gabos nagtatao kan ideyang sarong parke o hardin, sarong matoninong, nakakarepreskong lugar. An Biblia nanunuga na sa maabot na panahon an daga magigin sarong pisikal na paraiso, garo hardin na erokan para sa daing kasalan na rasa nin tawo. (Salmo 37:​10, 11) Nasa isip ini, naheheling ta na an espirituwal na paraiso sarong kamugtakan na nakapaoogma sa mata asin nakapakakalma sa isip, na tinotogotan an saro na kamtan an katoninongan sa kapwa tawo asin sa Dios. Ngonyan, arog kan nadiskobre ni Gustavo, igwa kan siring na paraiso, asin kaiba dian an nagdadakol na kabilangan nin mga tawo.

Sa edad na 12, nagdesisyon si Gustavo na gusto niang magin pading Katoliko Romano. May pag-aprobar an mga magurang nia, naglaog sia sa sarong relihiosong seminaryo. Duman naimbuelto sia sa musika, teatro, asin politika, na sinusuportaran kan simbahan sa pag-akit sa mga hobenes. Aram nia na dapat na idusay nin sarong padi an saiyang sadiri sa mga tawo asin na dai sia puedeng mag-agom. Pero, an nagkapirang padi asin seminarista na midbid ni Gustavo imbuelto sa inmoral na mga gibo. Sa siring na kamugtakan sa palibot, dai nahaloy si Gustavo nagpoon na mag-inom nin makosog. Malinaw nanggad, dai pa nia nanonompongan an espirituwal na paraiso.

Sarong aldaw, nabasa ni Gustavo an sarong pulyeto sa Biblia na nagsasabi manongod sa sarong daganon na paraiso. Pinapag-isip sia kaiyan manongod sa katuyohan nin buhay. Sia nagsabi: “Pinonan kong basahon nin parate an Biblia, alagad dai ko iyan nasasabotan. Dai ko ngani naheling na an Dios igwa nin ngaran.” Binayaan nia an seminaryo asin dinolok an Mga Saksi ni Jehova, na naghahagad nin tabang tanganing masabotan an Biblia. Pakatapos  kaiyan, sia marikas na nag-oswag asin dai nahaloy idinusay an saiyang buhay sa Dios. Nakakanood na si Gustavo manongod sa espirituwal na paraiso.

Sarong Banwaan Para sa Ngaran nin Dios

Nanodan ni Gustavo na an ngaran nin Dios, na Jehova, bako sanang sarong punto na interesante para sa sarong estudyante sa Biblia. (Exodo 6:3) Iyan mahalagang marhay na kabtang kan tunay na pagsamba. Tinokdoan ni Jesus an saiyang mga parasunod na mamibi: “Ama niamo na nasa langit, santipikaron logod an saimong ngaran.” (Mateo 6:9) Nagtataram manongod sa mga Hentil na nagin mga Kristiano, an disipulong si Santiago nagsabi: “An Dios . . . nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran.” (Gibo 15:14) Kan enot na siglo, an “banwaan para sa saiyang ngaran” iyo an Kristianong kongregasyon. Igwa daw nin sarong banwaan para sa ngaran nin Dios ngonyan? Igwa, asin nakaagimadmad si Gustavo na an banwaan na iyan iyo an Mga Saksi ni Jehova.

An Mga Saksi ni Jehova aktibo sa 235 kadagaan asin teritoryo. An kabilangan ninda labi sa anom na milyon na ministro, asin walong milyon pa na interesado an nakaatender sa saindang mga pagtiripon. Midbid na marhay sa saindang pampublikong ministeryo, inootob ninda an tataramon ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” (Mateo 24:14) Pero, taano ta namatean ni Gustavo na nanompongan na nia an espirituwal na paraiso sa pakikiasosyar sa Mga Saksi ni Jehova? Sia nagsabi: “Ikinomparar ko an naheling ko sa kinaban asin espesyalmente sa seminaryo sa nanompongan ko sa tahaw kan Mga Saksi ni Jehova. An dakulaon na pagkakalaen iyo an pagkamoot sa tahaw kan mga Saksi.”

An iba nagkokomento nin kaagid kaiyan manongod sa Mga Saksi ni Jehova. Si Miriam, sarong hoben na babaeng taga Brazil, nagsabi: “Dai ko aram kun paano magin maogma, dawa sa sakong pamilya. Naheling ko sa kaenot-enote an pagkamoot na ginigibo sa tahaw kan Mga Saksi ni Jehova.” An sarong lalaki na an ngaran Christian nagsabi: “Kun minsan ako nakikisale kaidto sa espiritismo, alagad an relihion bakong importante sa sako. Mas mahalaga sa sako an posisyon ko sa sosyedad asin an trabaho ko bilang sarong inhenyero. Pero, kan an agom ko magpoon na makipag-adal nin Biblia sa Mga Saksi ni Jehova, naheling ko an kalaenan sa saiya. Naghanga man ako sa kagayagayahan asin kaigotan kan Kristianong mga babae na nagdadalaw sa saiya.” Taano ta siring kaiyan an sinasabi kan mga tawo manongod sa Mga Saksi ni Jehova?

Ano an Espirituwal na Paraiso?

An apresasyon ninda sa kaaraman sa Biblia sarong bagay kaya nagigin lataw an Mga Saksi ni Jehova. Nagtutubod sinda na an Biblia totoo asin na iyan Tataramon nin Dios. Huli kaini, dai sinda naninigoan na manodan sana an pundamental na mga katokdoan kan saindang relihion. Igwa sinda nin nagpapadagos na programa nin personal na pag-adal asin pagbasa kan Biblia. Mientras na naghahaloy an pakikiasosyar nin saro sa Mga Saksi ni Jehova, mas nadudugangan an saiyang nanonodan manongod sa Dios asin sa Saiyang kabotan siring kan ihinayag sa Biblia.

Pinatatalingkas kan siring na kaaraman an Mga Saksi ni Jehova hale sa mga bagay na nakahahale kan kaogmahan nin mga tawo, siring baga kan superstisyon asin nakadadanyar na mga ideya. Si Jesus nagsabi: “An katotoohan mapatalingkas sa saindo,” asin nanompongan kan Mga Saksi ni Jehova na ini totoo. (Juan 8:32) Si Fernando, na kaidto naggigibo nin espiritismo, nagsasabi: “An pakanood manongod sa buhay na daing katapusan dakulaon na pakaginhawa. Natakot ako na tibaad magadan magsalang an mga magurang ko o ako.” Pinatalingkas si Fernando hale sa pagkatakot nia sa kinaban nin mga espiritu asin sa buhay daa pagkagadan.

Sa Biblia, an kaaraman manongod sa Dios konektadong marhay sa paraiso. An propetang si Isaias nagsabi: “Dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”​—Isaias 11:9.

Siempre, an kaaraman mismo bakong igo  tanganing magtao kan katoninongan na ihinula ni Isaias. Kaipuhan na gibohon nin saro an nanonodan nia. Ini an komento ni Fernando: “Kun kinukultibar nin saro an mga bunga kan espiritu, nagkokontribwir sia sa espirituwal na paraiso.” Si Fernando nagtataram manongod sa sinabi ni apostol Pablo, na inapod an marahay na mga kualidad na maninigong kultibaron nin sarong Kristiano na “bunga kan espiritu.” Sinarosaro nia an mga iyan bilang an “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”​—Galacia 5:​22, 23.

Naheheling daw nindo kun taano ta magigin garo nasa paraiso nanggad an pakikiasosyar sa sarong komunidad nin mga indibiduwal na nagmamaigot na kultibaron an siring na mga kualidad? An espirituwal na paraiso na ihinula ni propeta Sofonias mag-eeksister sa tahaw kan siring na mga tawo. Sia nagsabi: “Dai sinda magibo nin karatan, ni magtataram nin kaputikan, ni may makukua man sa saindang ngoso na madayang dila; huli ta sinda mismo makarakan asin mahirigda nanggad, asin mayo nin siisay man na mapatakig sa sainda.”​—Sofonias 3:13.

An Mahalagang Marhay na Kabtang kan Pagkamoot

Tibaad narisa nindo na pagkamoot an enot na nasambitan ni Pablo sa mga bunga kan espiritu. Ini kualidad na manongod dian dakol an sinasabi kan Biblia. Si Jesus nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Totoo, bako man na sangkap an Mga Saksi ni Jehova. Kun beses sinda may personal na mga problema sa tahaw mismo ninda arog kan mga apostol ni Jesus. Alagad totoong namomotan ninda an lambang saro, asin namimibi sinda para sa suporta kan banal na espiritu mantang kinukultibar ninda an kualidad na ini.

Bilang resulta, an saindang asosasyon daing kaagid. Mayo nin tribalismo o nakababangang nasyonalismo sa tahaw ninda. Sa katunayan, dakol na Saksi na nanompongan an sadiri na yaon sa tahaw nin paglinig etniko asin pagpara sa bilog na rasa durante kan paghinanapos kan ika-20 siglo an prinotehiran an lambang saro dawa isapeligro an sainda mismong buhay. Minsan “hale sa gabos na nasyon asin tribo asin banwaan patin tataramon,” sinda may pagkasararo na depisil masabotan sagkod na maeksperyensiahan nindo iyan.​—Kapahayagan 7:9.

Paraiso sa Tahaw kan mga Naggigibo kan Kabotan nin Dios

Mayo nin lugar an kahanaban, inmoralidad, asin kaimotan sa espirituwal na paraiso. Sinasabihan an mga Kristiano: “Dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) Kun malinig, moral an satong pamumuhay asin ginigibo niato an kabotan nin Dios sa ibang mga paagi, nagtatabang kita sa pagtogdok kan espirituwal na paraiso asin nagkokontribwir kita sa sato mismong kaogmahan. Nanompongan ni Carla na ini totoo. Sia nagsasabi: “Tinokdoan ako kan sakong ama na maghigos sa trabaho tanganing magin independiente sa pinansial. Alagad minsan ngani nagtao sako nin pakamate nin seguridad an sakong inadalan sa unibersidad, hinanaphanap ko an pagkasararo kan pamilya asin an seguridad na solamente an kaaraman hale sa Tataramon nin Dios an puedeng magtao sa sato.”

Siempre, an pagkakamit kan espirituwal na paraiso  dai hinahale an pisikal na mga problema sa buhay. Nagkakahelang pa man giraray an mga Kristiano. Puedeng mapalabot sa sibil na iriwal an nasyon na iniistaran ninda. Tinatagalan nin dakol an kadukhaan. Pero, an pagkakaigwa nin dayupot na relasyon ki Jehova Dios​—na importanteng kabtang kan espirituwal na paraiso​—nangangahulogan na puede kitang maglaom sa saiyang suporta. Tunay nanggad, iniimbitaran nia kita na ‘itao sa saiya an pagabat sa sato,’ asin dakol an makapagpapatotoo sa makangangalas na paagi na sinuportaran nia sinda sa pinakadepisil na mga situwasyon. (Salmo 55:​22; 86:​16, 17) Nanunuga an Dios na makakaibanan sia kan saiyang mga parasamba dawa sa “kababan nin kadikloman.” (Salmo 23:4) An kompiansa sa pagigin andam nin Dios na suportaran kita nakatatabang na maingatan ta an “katoninongan nin Dios na minalampas sa gabos na kaisipan,” na sarong liabe sa espirituwal na paraiso.​—Filipos 4:7.

Pagkontribwir sa Espirituwal na Paraiso

Dakol na tawo an naoogma sa pagpasyar sa sarong parke o hardin. Gusto nindang maglakawlakaw dian o tibaad magtukaw sa bangko asin mag-ogma sa palibot. Sa kaagid na paagi, dakol an naoogmang makiasosyar sa Mga Saksi ni Jehova. An asosasyon nakagiginhawa, matoninong, asin nakaoomay para sa sainda. Minsan siring, an sarong magayon na hardin nangangaipong manteneron tanganing iyan magdanay na paraiso. Kaagid kaiyan, an espirituwal na paraiso nag-eeksister sa bako nanggad na paraisong kinaban na ini huli sana ta kinukultibar iyan kan Mga Saksi ni Jehova, asin binebendisyonan nin Dios an saindang mga paghihingoa. Kun siring, paano makatatao an saro nin makahulogan na kontribusyon sa paraisong iyan?

Enot, kaipuhan nindong makiasosyar sa sarong kongregasyon kan Mga Saksi ni Jehova, makipag-adal sa sainda sa Biblia, asin magkaigwa kan kaaraman sa Biblia na iyo an basehan kan espirituwal na paraiso. Sabi ni Carla: “Mayong espirituwal na paraiso kun mayong espirituwal na kakanon.” Kaiba digdi an regular na pagbasa kan Tataramon nin Dios asin pag-isip-isip kan saindong binasa. An nakuang kaaraman mas mapadayupot sa saindo ki Jehova Dios, asin mamomotan nindo sia. Makakanood man kamong makipag-olay sa saiya sa pamibi asin hagadon an saiyang paggiya saka an saiyang espiritu tanganing sumuportar sa saindo mantang ginigibo nindo an saiyang kabotan. Sinabihan kita ni Jesus na mamibi nin sige-sige. (Lucas 11:​9-13) Si apostol Pablo nagsabi: “Mamibi nin daing ontok.” (1 Tesalonica 5:17) An pribilehio na makipag-olay sa Dios sa pamibi na may absolutong kompiansa na dinadangog ka nia sarong importanteng kabtang kan espirituwal na paraiso.

Mantang nag-aagi an panahon, an buhay nindo mababago sa ikararahay huli sa nanonodan nindo, asin pag-abot nin panahon gugustohon nindong ipakipag-olay iyan sa iba. Dangan masusunod na nindo an pagboot ni Jesus: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) An paghiras sa iba kan kaaraman manongod ki Jehova Dios asin Jesu-Cristo saka an pagrukyaw kan dakulang pagkamoot na ipinaheling ninda sa katawohan nagtatao nin dakulang kaogmahan.

Nagdadangadang an panahon na an bilog na daga magigin sarong pisikal na paraiso​—garo hardin na lugar na mayong polusyon asin angay na istaran para sa fiel na katawohan. An pag-eksister kan espirituwal na paraiso ngonyan na “delikadong mga panahon na masakit pakibagayan” ebidensia kan kapangyarihan nin Dios asin panamit kan kaya asin talagang gigibohon nia sa ngapit.​—2 Timoteo 3:1.

Dawa ngonyan, an mga nasa espirituwal na paraiso naeeksperyensiahan an espirituwal na kaotoban kan Isaias 49:​10: “Dai sinda magugutom, ni mapapaha pa man sinda, ni tatamaan sinda nin nakapapahang init o saldang. Huli ta an Saro na naheherak sa sainda gigiyahan sinda, asin sa mga burabod nin tubig dadarahon nia sinda.” Si Jose mapatotoo sa katotoohan kaiyan. Sia nangarap na magin bantog na musikero, alagad mas dakula an nakua niang satispaksion sa paglilingkod sa Dios kaiba kan Kristianong kongregasyon. Sia nagsasabi: “Nakakamtan ko ngonyan an makahulogan na buhay. Tiwasay an pagmate ko sa laog kan Kristianong kasararoan nin magturugang, asin midbid ko si Jehova siring sa sarong mamomoton na Ama na puede tang pagtiwalaan.” Sa siring, marahayon an pagkaladawan sa kaogmahan ni Jose​—asin kan minilyon na iba pa na arog nia​—sa Salmo 64:​10: “An matanos maggagayagaya dian ki Jehova asin magpapaili nanggad sa saiya.” Abaa karahay na pagkaladawan sa espirituwal na paraiso!

[Nota sa Ibaba]

[Ritrato sa pahina 10]

Mantang nasa espirituwal na paraiso, magtabang sa pagpahiwas kaiyan!