Kaligtasan Para sa mga Gusto kan Liwanag
Kaligtasan Para sa mga Gusto kan Liwanag
“Si Jehova an sakuyang ilaw asin an sakuyang kaligtasan. Siisay an matatakotan ko?”—SALMO 27:1.
1. Anong nagtataong buhay na mga probisyon an itinatao ni Jehova?
SI Jehova an Gikanan kan sirang nin saldang na nagpapagin posible kan buhay sa daga. (Genesis 1:2, 14) Sia man an Kaglalang nin espirituwal na liwanag, na naghahale kan nakagagadan na kadikloman sa kinaban ni Satanas. (Isaias 60:2; 2 Corinto 4:6; Efeso 5:8-11; 6:12) An mga gusto kan liwanag makasasabi kapareho kan salmista: “Si Jehova an sakuyang ilaw asin an sakuyang kaligtasan. Siisay an matatakotan ko?” (Salmo 27:1) Minsan siring, arog kan nangyari kan panahon ni Jesus, an malalaoman sana kan mga gusto kan kadikloman iyo an bakong paborableng paghokom.—Juan 1:9-11; 3:19-21, 36.
2. Kan suanoy na mga panahon, ano an nangyari sa mga naghabo sa liwanag ni Jehova asin sa mga naghinanyog sa saiyang tataramon?
2 Kan kaaldawan ni Isaias, hinaboan kan kadaklan sa katipan na banwaan ni Jehova an liwanag. Bilang resulta, naheling ni Isaias an kalaglagan kan amihanan na kahadean nin Israel bilang sarong nasyon. Asin kan 607 B.C.E., linaglag an Jerusalem asin an templo kaiyan patin idinistiero an mga nag-eerok sa Juda. Minsan siring, an mga naghinanyog sa tataramon ni Jehova pinakosog na labanan an apostasiya kan kaaldawan na idto. Mapadapit sa 607 B.C.E., nanuga si Jehova na maliligtas an mga naghihinanyog sa saiya. (Jeremias 21:8, 9) Ngonyan, kitang mga namomoot sa liwanag dakol na manonodan sa nangyari kaidto.—Efeso 5:5.
An Kaogmahan kan mga Nasa Liwanag
3. Ngonyan, anong kompiansa an puedeng mapasato, asin anong “matanos na nasyon” an namomotan ta, asin anong “posog na siudad” an yaon sa “nasyon” na iyan?
3 “Igwa kita nin posog na siudad. Kaligtasan mismo an ibubugtak [nin Dios] na pinakang mga lanob asin kuta. Buksi nindo an mga tata, tanganing makalaog an matanos na nasyon na nagpapadanay sa fiel na gawe.” (Isaias 26:1, 2) Ini an maogmahon na sinasabi kan banwaan na nagtiwala ki Jehova. An fiel na mga Judio kan kaaldawan ni Isaias nag-asa ki Jehova, bakong sa falsong mga dios kan saindang mga kahimanwa, bilang an solamenteng tunay na Gikanan nin katiwasayan. Ngonyan, igwa man kita kan kompiansang iyan. Dugang pa, namomotan ta an “matanos na nasyon” ni Jehova—an “Israel nin Dios.” (Galacia 6:16; Mateo 21:43) Namomotan man ni Jehova an nasyon na ini huli sa fiel na gawe kaiyan. Paagi sa bendisyon nia, an Israel nin Dios igwa nin “posog na siudad,” sarong arog-siudad na organisasyon na nagsusuportar asin nagpoprotehir kaiyan.
4. Anong nasa isip na aktitud an marahay na kultibaron ta?
4 TAram na gayo kan mga nasa laog kan “siudad” na ini na “an tendensia na marigon . . . iingatan [ni Jehova] sa nagdadanay na katoninongan, huli ta [ki Jehova] na an saro pinapagtitiwala.” Sinusuportaran ni Jehova an mga an tendensia kan isip tumiwala sa saiya asin sumunod sa saiyang matanos na mga prinsipyo. Sa siring, hinimate kan mga fiel sa Juda an sadol ni Isaias: “Magtiwala kamo ki Jehova, banwaan, sa gabos na panahon, huli ta dian ki Jah Jehova an Gapo kan daing talaan na mga panahon.” (Isaias 26:3, 4; Salmo 9:10; 37:3; Talinhaga 3:5) An mga igwa kan siring na kamugtakan nin isip nag-aasa ki “Jah Jehova” bilang an solamenteng ligtas na Gapo. Igwa sinda nin “nagdadanay na katoninongan” sa kaibanan nia.—Filipos 1:2; 4:6, 7.
Pagkapasupog kan mga Kaiwal nin Dios
5, 6. (a) Paano ibinaba an suanoy na Babilonya? (b) Sa anong paagi ibinaba an “Dakulang Babilonya”?
5 Paano kun an mga nagtitiwala ki Jehova umagi nin kahorasaan? Dai sinda kaipuhan na matakot. Tinotogotan ni Jehova an siring na mga bagay sa laog nin kadikit na panahon, alagad sa kahurihurihi nagtatao sia nin kaginhawahan, asin aatubangon kan mga may gibo kan kahorasaan an saiyang paghokom. (2 Tesalonica 1:4-7; 2 Timoteo 1:8-10) Estudyare an nangyari sa sarong “halangkaw na banwaan.” Si Isaias nagsasabi: “Tinumba [ni Jehova] an mga nag-eerok sa kalangkawan, an halangkaw na banwaan. Ibinababa nia iyan, ibinababa nia iyan sa daga; idinuduta nia iyan sa kabokabo. Babatayan iyan kan bitis, kan mga bitis kan mga nagsasakit nin makuri, kan mga lakad kan mga may kababaan.” (Isaias 26:5, 6) An halangkaw na banwaan na nasambitan digdi tibaad iyo an Babilonya. Tunay nanggad na pinasakitan nin makuri kan siudad na iyan an banwaan nin Dios. Alagad ano an nangyari sa Babilonya? Kan 539 B.C.E., iyan buminagsak sa mga Medo asin Persiano. Kanigoan na pagkababa!
6 Sa satong kaaldawan malinaw na ilinaladawan kan makahulang mga tataramon ni Isaias an nangyari sa “Dakulang Babilonya” poon kan 1919. An halangkaw na banwaan na iyan nag-agi nin makasusupog na pagbagsak kan taon na iyan kan iyan mapiritan na paluwason an banwaan ni Jehova gikan sa espirituwal na pagkabihag. (Kapahayagan 14:8) An suminunod na nangyari mas makasusupog pa ngani. ‘Binatayan’ kan sadit na grupong idto nin mga Kristiano an dating nambihag sa sainda. Kan 1922 pinonan nindang ipaisi an maabot na katapusan kan Kakristianohan, na iinaanunsiar an pagpatanog kan apat na trumpeta kan mga anghel sa Kapahayagan 8:7-12 asin an tolong herak man na ihinula sa Kapahayagan 9:1–11:15.
“An Dalan kan Matanos Tanos”
7. Anong paggiya an inaako kan mga minapasiring sa liwanag ni Jehova, kiisay sinda naglalaom, asin ano an pinahahalagahan ninda?
7 Si Jehova nagtatao nin kaligtasan sa mga minapasiring sa saiyang liwanag, asin ginigiyahan nia an saindang dalan, siring kan sunod na ipinaheheling ni Isaias: “An dalan kan matanos tanos. Mantang ika tanos, saimong papatagon an mismong dana nin matanos. Iyo, huli sa dalan kan saimong mga paghokom, O Jehova, kami naglaom sa saimo. An saimong ngaran asin an saimong girumdoman iyo an minawot kan kalag.” (Isaias 26:7, 8) Si Jehova matanos na Dios, asin an mga nagsasamba sa saiya dapat na kumuyog sa saiyang matanos na mga pamantayan. Kun ginigibo ninda iyan, ginigiyahan sinda ni Jehova, na pinapatag an saindang dana. Paagi sa paghimate sa saiyang paggiya, ipinaheheling kan mga mahoyong ini na sinda naglalaom ki Jehova asin bilog na pusong pinahahalagahan an saiyang ngaran—an saiyang “girumdoman.”—Exodo 3:15.
8. Anong arogan na aktitud an ipinaheling ni Isaias?
8 Pinahalagahan ni Isaias an ngaran ni Jehova. Risang-risa iyan sa suminunod niang mga tataramon: “Sa sakuyang kalag minawot taka sa banggi; iyo, sa sakuyang espiritu sa laog ko ako nagpaparahanap sa saimo; huli ta, kun igwa nin mga paghokom gikan sa saimo para sa daga, an katanosan iyo nanggad an manonodan kan mga nag-eerok sa mabungang daga.” (Isaias 26:9) Minawot ni Isaias si Jehova ‘sa saiyang kalag’—sa bilog niang pagkatawo. Imahinara an propeta na ginagamit an toninong na mga oras nin banggi tanganing mamibi ki Jehova, na ipinahahayag an saiyang kairairaroming mga kaisipan asin maigoton na hinahagad an paggiya ni Jehova. Kanigoan karahay na halimbawa! Apuera dian, si Isaias nakanood nin katanosan sa mga gibo nin paghokom ni Jehova. Digdi, ipinagigirumdom nia sa sato an pangangaipong dayaday na magpuka, na nagdadanay na listong mansayon an kabotan ni Jehova.
An Nagkapira Gusto kan Kadikloman
9, 10. Anong mga kabootan an ginibo ni Jehova para sa saiyang bakong fiel na nasyon, alagad ano an reaksion ninda?
9 Si Jehova nagpaheling nin dakulang mamomoton na kabootan sa Juda, alagad makamomondo ta bakong gabos naghimate. Sa parate, ginusto kan mayoriya an rebelyon asin apostasiya imbes na an liwanag kan katotoohan ni Jehova. Si Isaias nagsabi: “Minsan pa pahelingan nin marahay na boot an sarong maraot, dai nanggad sia makakanood nin katanosan. Sa daga nin katanosan sia magibo nin bakong makatanosan asin dai makakaheling kan kamurawayan ni Jehova.”—Isaias 26:10.
10 Kan kaaldawan ni Isaias kan pinoprotehiran kan kamot ni Jehova an Juda tumang sa mga kaiwal kaini, habo ining rekonoseron kan mayoriya. Kan binebendisyonan nia sinda kan saiyang katoninongan, an nasyon dai nagpaheling nin utang na boot. Huli kaini, binayaan sinda ni Jehova na maglingkod sa “ibang mga kagurangnan,” na sa katapustapusi tinogotan an mga Judio na darahon na bihag sa Babilonya kan 607 B.C.E. (Isaias 26:11-13) Sa ibong kaiyan, sa kahurihurihi sarong natatada kan nasyon an nagbalik, dinalisay, sa saindang dagang tinuboan.
11, 12. (a) Ano an nagin ngapit kan mga nambihag sa Juda? (b) Kan 1919 ano an nagin ngapit kan dating nambihag sa linahidan na mga lingkod ni Jehova?
11 Kumusta man an mga nambihag sa Juda? Si Isaias makahulang minasimbag: “Gadan sinda; dai sinda mabubuhay. Daing maginibo sa kagadanan, dai sinda mabuhat. Kun siring itinao mo an saimong atension tanganing mapara mo sinda asin laglagon an gabos na pagkasabi manongod sa sainda.” (Isaias 26:14) Iyo, pagkatapos na malaglag ini kan 539 B.C.E., an Babilonya mayo nang ngapit. Pag-abot nin panahon, an siudad mawawara na. Ini ‘dai nang maginibo sa kagadanan,’ asin an dakulaon na imperyo kaini mapapasa mga libro nin kasaysayan. Kanigoan na patanid para sa mga naglalaom sa mga makapangyarihan sa kinaban na ini!
12 May mga aspekto kan hulang ini na nagkaigwa nin kaotoban kan togotan nin Dios an saiyang linahidan na mga lingkod na mapasa espirituwal na pagkabihag kan 1918 dangan patalingkason sinda kan 1919. Poon kaidto, malumlom na an ngapit kan dating nambihag sa sainda, sa pangenot an Kakristianohan. Alagad an mga bendisyon na natatagama para sa banwaan ni Jehova nagsosopay nanggad.
“Dinagdagan Mo an Nasyon”
13, 14. Anong nagsosopay na mga bendisyon an nakakamtan kan linahidan na mga lingkod ni Jehova poon kan 1919?
13 Binendisyonan nin Dios an may pagsolsol na aktitud kan saiyang linahidan na mga lingkod kan 1919 asin pinadakol sinda. Enot, tinawan nin atension an pagtipon sa ultimong mga miembro kan Israel nin Dios, dangan “an sarong dakulang kadaklan” nin “ibang karnero” pinonan na tiponon. (Kapahayagan 7:9; Juan 10:16) An mga bendisyon na ini sinabi sa hula ni Isaias: “Dinagdagan mo an nasyon; O Jehova, dinagdagan mo an nasyon; pinamuraway mo an saimong sadiri. Pinahiwas mo an gabos na pagdolonan kan daga. O Jehova, sa panahon nin kasakitan itinao ninda an saindang atension sa saimo; sinda nagpahayag nin hinghing na pamibi kan mag-ako sinda kan saimong pagdisiplina.”—Isaias 26:15, 16.
14 Ngonyan, an mga pagdolonan kan Israel nin Dios huminiwas na sa bilog na daga, asin an dakulang kadaklan na idinagdag may kabilangan na ngonyan na mga anom na milyon na entusiastikong nakikikabtang sa paghuhulit kan maogmang bareta. (Mateo 24:14) Kanigoan na bendisyon hale ki Jehova! Asin kanigoan na kamurawayan an itinatao kaini sa saiyang ngaran! An ngaran na iyan nadadangog ngonyan sa 235 kadagaan—sarong makangangalas na kaotoban kan saiyang panuga.
15. Anong simbolikong pagkabuhay liwat an nangyari kan 1919?
15 Kinaipuhan kan Juda an tabang ni Jehova tanganing makadulag sa pagkabihag sa Babilonya. Dai ninda iyan magigibo na sinda sana. (Isaias 26:17, 18) Kaagid kaiyan, an pagkatalingkas kan Israel nin Dios kan 1919 prueba kan pagsuportar ni Jehova. Dai kutana iyan nangyari kun bakong huli sa saiya. Asin nakabibiglang marhay an pagkaliwat kan saindang kamugtakan kaya iinaagid iyan ni Isaias sa pagkabuhay liwat: “An saimong mga gadan magkakaburuhay. Sakuyang bangkay—sinda maburuhat. Pagmata kamo asin kurahaw kamo sa kagayagayahan, kamong mga nag-eerok sa kabokabo! Huli ta an saimong ambon siring sa ambon nin malvas, asin minsan an mga daing kosog sa kagadanan papangyayarihon mismo kan daga na mamundag.” (Isaias 26:19; Kapahayagan 11:7-11) Iyo, an mga mayong maginibo sa kagadanan garo man sana mamumundag liwat para sa pagpadagos kan aktibidad!
Proteksion sa Peligrosong mga Panahon
16, 17. (a) Kan 539 B.C.E., ano an kinaipuhan na gibohon kan mga Judio tanganing makaligtas sa pagbagsak kan Babilonya? (b) Posible na ano an ‘panlaog na mga kuarto’ ngonyan, asin paano kita nakikinabang dian?
16 Pirmeng kaipuhan kan mga lingkod ni Jehova an saiyang proteksion. Pero sa dai na mahahaloy, gigibohon nia an ultimong pagbingat kan saiyang kamot tumang sa kinaban ni Satanas, asin kakaipuhanon kan saiyang mga parasamba an tabang nia nin orog kasuarin man. (1 Juan 5:19) Mapadapit sa peligrosong panahon na iyan, pinatatanidan kita ni Jehova: “Lakaw, banwaan ko, lumaog ka sa panlaog mong mga kuarto, asin pintoan mo an mga tata sa likod mo. Magtago ka nin kadikit sanang panahon sagkod na makalihis an kabangisan. Huli ta, uya! si Jehova minadatong hale sa saiyang lugar tanganing pabayadan an kasalan kan nag-eerok sa daga tumang sa saiya, asin an daga siertong mabuyagyag kan saiyang pagpabolos nin dugo asin dai na matahob sa saiyang mga gadan.” (Isaias 26:20, 21; Sofonias 1:14) Ipinaheling kan patanid na ini sa mga Judio kun paano makaliligtas sa pagbagsak kan Babilonya kan 539 B.C.E. An mga naghimate dian kinaipuhan na magdanay sa saindang harong, na ligtas sa nananakop na mga soldados na yaon duman sa mga tinampo.
17 Ngonyan, an ‘panlaog na mga kuarto’ sa hula posibleng naglaladawan sa manampulong ribong kongregasyon kan banwaan ni Jehova sa bilog na kinaban. An mga kongregasyon na iyan proteksion maski ngonyan, sarong lugar na dian an mga Kristiano nakanonompong nin seguridad sa tahaw kan saindang mga tugang, na nasa mamomoton na pangangataman kan kamagurangan. (Isaias 32:1, 2; Hebreo 10:24, 25) Ini nangorognang totoo huli sa kaharanihan kan katapusan kan sistemang ini nin mga bagay na an pagkaligtas nakadepende sa pagkuyog.—Sofonias 2:3.
18. Paano “gagadanon [ni Jehova] an sa dagat na higanteng hayop” sa dai na mahahaloy?
18 Mapadapit sa panahon na iyan, si Isaias naghuhula: “Sa aldaw na iyan si Jehova, paagi sa saiyang mabaskog asin dakula patin makosog na espada, matao kan saiyang atension sa Leviatan, an nagkakamang na halas, sa Leviatan ngani, an bikong halas, asin gagadanon nanggad nia an sa dagat na higanteng hayop na yaon sa dagat.” (Isaias 27:1) Ano an “Leviatan” sa presenteng aldaw? Minalataw na iyan iyo “an enot na halas,” si Satanas mismo, pati an saiyang maraot na sistema nin mga bagay, na ginagamit nia sa pakikilaban tumang sa Israel nin Dios. (Kapahayagan 12:9, 10, 17; 13:14, 16, 17) Kan 1919, nabutasan kan Leviatan an banwaan nin Dios. Pag-abot nin panahon, iyan mawawara na nin biyo. (Kapahayagan 19:19-21; 20:1-3, 10) Sa siring, “gagadanon [ni Jehova] an sa dagat na higanteng hayop.” Mientras tanto, an ano man na tibaad probaran na gibohon kan Leviatan tumang sa banwaan ni Jehova dai magkakaigwa nin nagdadanay na epekto. (Isaias 54:17) Kanigoan kanakararanga na makasierto kaiyan!
“Sarong Ubasan nin Arak na Nagsasabo”
19. Ano an kamugtakan ngonyan kan natatada?
19 Huli sa gabos na liwanag na ini hale ki Jehova, bako daw na igwa kita nin lambang dahelan na maggayagaya? Iyo nanggad! Magayonon an pagkaladawan ni Isaias kan kagayagayahan kan banwaan ni Jehova kan sia sumurat: “Sa aldaw na iyan mag-awit kamo sa saiya, banwaan: ‘Sarong ubasan nin arak na nagsasabo! Ako, si Jehova, nagbabantay sa saiya. Sa kada panahon babaribian ko sia. Tanganing mayo nin siisay man na tumumang sa saiya, babantayan ko sia banggi-aldaw.’” (Isaias 27:2, 3) Inaataman ni Jehova an saiyang “ubasan,” an natatada kan Israel nin Dios, asin an saindang mahihigos na kairiba. (Juan 15:1-8) An nagin resulta iyo an bunga na nagtatao nin kamurawayan sa saiyang ngaran asin nagtatao nin dakulang paggayagaya sa tahaw kan saiyang mga lingkod sa daga.
20. Paano pinoprotehiran ni Jehova an Kristianong kongregasyon?
20 Maoogma kitang marhay na uminontok na an naenot na kaanggotan ni Jehova tumang sa saiyang linahidan na mga lingkod—na huli kaiyan tinogotan nia sinda na mapasa espirituwal na pagkabihag kan 1918. Si Jehova mismo nagsasabi: “Mayo sa sakuya nin kaanggotan. Siisay an matao sa sakuya nin mga kilitis asin doot sa ralaban? Babatayan ko an mga iyan. Sosoloon ko man iyan nin durungan. Kun dai mamogol sia sa sakuyang pailihan, makipagkatoninongan sia sa sakuya; makipagkatoninongan sia sa sakuya.” (Isaias 27:4, 5) Tanganing siertohon na an saiyang mga ubasan padagos na nagpoprodusir nin bastanteng “arak na nagsasabo,” rinoronot asin sinosolo ni Jehova an ano man na arog-doot na impluwensia na puedeng makaraot sa sainda. Huli kaini, mayong siisay man na magsapeligro sa ikararahay kan Kristianong kongregasyon! An gabos ‘mamogol sa pailihan ni Jehova,’ na hinahagad an saiyang pabor asin proteksion. Sa paggibo kaiyan, kita nakikipagkatoninongan sa Dios—sarong bagay na mahalaga nanggad kaya duwang beses na sinambit iyan ni Isaias.—Salmo 85:1, 2, 8; Roma 5:1.
21. Sa anong paagi pinapano nin “bunga” an mabungang daga?
21 An mga bendisyon nagpapadagos: “Sa maabot na mga aldaw si Jacob tutuboan nin mga gamot, an Israel mamumurak asin magsasaringsing; asin papanoon ninda nin bunga an ibabaw kan mabungang daga.” (Isaias 27:6) An bersikulong ini naotob poon kan 1919, na nagseserbing makangangalas na ebidensia kan kapangyarihan ni Jehova. An daga pinapano kan linahidan na mga Kristiano nin “bunga,” masustansiang espirituwal na pagkakan. Sa tahaw nin maraot na kinaban, magayagaya nindang iniingatan an halangkaw na mga pamantayan nin Dios. Asin padagos na binebendisyonan sinda ni Jehova nin pagdakol. Bilang resulta, an minilyon na kairiba ninda, an ibang karnero, “nagtatao sa [Dios] nin sagradong paglilingkod aldaw asin banggi.” (Kapahayagan 7:15) Nungka logod niatong malingawan an dakulang pribilehio na pakikikabtang sa “bunga” asin paghiras kaiyan sa iba!
22. Anong mga bendisyon an nakakamtan kan mga minaako kan liwanag?
22 Sa delikadong mga panahon na ini, na an kadikloman nakatatahob sa daga asin an grabeng kadikloman sa mga nasyon, bako daw na nagpapasalamat kita na si Jehova nagtatao nin espirituwal na liwanag sa saiyang banwaan? (Isaias 60:2; Roma 2:19; 13:12) Para sa gabos na minaako kaiyan, an liwanag na iyan nangangahulogan nin katoninongan nin isip asin kagayagayahan ngonyan patin buhay na daing katapusan pa ngani sa ngapit. Kun siring, may marahay na dahelan na kitang mga namomoot sa liwanag mag-orogma sa pag-omaw ki Jehova asin magsabi kaiba kan salmista: “Si Jehova an kasarigan kan sakuyang buhay. Sa kiisay ako matatakot? Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.”—Salmo 27:1b, 14.
Nagigirumdoman daw Nindo?
• Ano an ngapit kan mga nan-aapi sa banwaan ni Jehova?
• Anong pagdakol an ihinuhula sa Isaias?
• Sa laog nin anong “panlaog na mga kuarto” maninigo kitang magdanay, asin taano?
• Taano an kamugtakan kan banwaan ni Jehova ta nagtatao sa saiya nin kaomawan?
[Mga Hapot Para sa Pag-adal]
[Kahon sa pahina 22]
BAGONG PUBLIKASYON
An kadaklan sa impormasyon na tinokar sa duwang artikulong pinag-adalan na ini iinatubang bilang pahayag sa programa kan pandistritong kombension para sa 2000/2001. Sa katapusan kan pahayag, sarong publikasyon an ilinuwas, na may titulong Isaiah’s Prophecy—Light for All Mankind I. An 416-pahinas na librong ini igwa kan bersikulo por bersikulong pagtokar kan enot na 40 kapitulo kan libro ni Isaias.
[Ritrato sa pahina 18]
An mga matanos sana an tinotogotan sa “posog na siudad” ni Jehova, an saiyang organisasyon
[Ritrato sa pahina 19]
Hinanap ni Isaias si Jehova “sa banggi”
[Ritrato sa pahina 21]
Pinoprotehiran ni Jehova an saiyang “ubasan” asin pinagigin mabunga iyan