Paggayagaya Para sa mga Naglalakaw sa Liwanag
Paggayagaya Para sa mga Naglalakaw sa Liwanag
“Madia asin maglakaw kita sa liwanag ni Jehova.”—ISAIAS 2:5.
1, 2. (a) Gurano kaimportante an liwanag? (b) Taano ta seryosong marhay an patanid na an kadikloman makalalakop sa daga?
SI Jehova an Gikanan nin liwanag. Inaapod sia kan Biblia na “an Kagtao kan aldaw tanganing magin liwanag sa aldaw, kan mga pinagsusunod kan bulan asin kan mga bitoon tanganing magin liwanag sa banggi.” (Jeremias 31:35; Salmo 8:3) Sia an Saro na naglalang kan satong saldang, na garo man sana sarong dakulaon na nuklear na horno na nagpapaluwas sa espasyo nin kadakoldakol na enerhiya, na an nagkapira sa pormang liwanag asin init. An saditon na porsentahe kan enerhiyang iyan na nakakaabot sa sato bilang sirang nin saldang an nagsusustenir sa buhay sa dagang ini. Kun mayo an sirang nin saldang, dai kita mabubuhay. An daga magigin daing buhay na planeta.
2 Nasa isip iyan, masasabotan ta an pagigin seryoso nin sarong situwasyon na ilinadawan ni propeta Isaias. Sinabi nia: “Uya! an kadikloman mismo makalalakop sa daga, asin an mahibog na kaduloman sa mga nasyon.” (Isaias 60:2) Siempre, bakong pisikal na kadikloman an pinanonongdan kaini. Dai boot sabihon ni Isaias na pag-abot nin panahon an saldang, bulan, asin mga bitoon dai na masirang. (Salmo 89:36, 37; 136:7-9) Imbes, an boot niang sabihon espirituwal na kadikloman. Alagad an espirituwal na kadikloman nakagagadan. Sa katapustapusi, dai kita mabubuhay na mayo nin espirituwal na liwanag kun paanong dai kita mabubuhay kun mayo nin pisikal na liwanag.—Lucas 1:79.
3. Huli sa mga tataramon ni Isaias, ano an maninigong gibohon nin mga Kristiano?
3 Huli kaini, dapat na seryosong mangnohon na an mga tataramon ni Isaias, minsan ngani naotob sa suanoy na Juda, nagkakaigwa nin mas dakulang kaotoban ngonyan. Iyo, sa panahon niato an kinaban natatahoban nin espirituwal na kadikloman. Sa siring na peligrosong situwasyon, an espirituwal na liwanag iyo an pinakaimportante. Iyan an dahelan na marahay na himateon kan mga Kristiano an sadol ni Jesus: “Pasiranga an saindong liwanag sa atubangan nin mga tawo.” (Mateo 5:16) Puedeng ilawan kan fiel na mga Kristiano an kadikloman para sa mga mahoyo, na sa siring tinatawan sinda kan oportunidad na magkamit nin buhay.—Juan 8:12.
Madiklom na mga Panahon sa Israel
4. Kasuarin enot na naotob an makahulang mga tataramon ni Isaias, alagad ano na an nagin situwasyon kaidtong saiya mismong kaaldawan?
4 An mga tataramon ni Isaias manongod sa kadikloman na nakalalakop sa daga enot na naotob kan an Juda daing tawo asin an mga tawo dian nadidistiero sa Babilonya. Minsan siring, dawa bago kaiyan, kan mismong kaaldawan ni Isaias, an kadaklan na kabtang kan nasyon natatahoban na nin espirituwal na kadikloman, an katunayan na nagpahiro sa saiya na sadolon an saiyang mga kahimanwa: “O mga tawo kan harong ni Jacob, madia asin maglakaw kita sa liwanag ni Jehova”!—Isaias 2:5; 5:20.
5, 6. Anong mga bagay an nakakontribwir sa kadikloman kan kaaldawan ni Isaias?
5 Naghula si Isaias sa Juda “kan kaaldawan ni Uzias, Jotam, Acaz asin Ezequias, na mga hade kan Juda.” (Isaias 1:1) Maribok na panahon idto nin politikal na kariribokan, pagsaginsagin sa relihion, hudisyal na karatan, asin pan-aapi sa mga dukha. Dawa durante kan pagreynar kan fiel na mga hade, arog ki Jotam, may maheheling na mga altar nin falsong mga dios sa alitoktok nin kaboboldan. Sa pagsakop kan bakong fiel na mga hade, an situwasyon mas maraot. Halimbawa, an maraot na si Hadeng Acaz idinolot pa ngani an saiyang aki sa sarong ritual sa pag-atang sa dios na si Moloc. Kadikloman nanggad idto!—2 Hade 15:32-34; 16:2-4.
6 Malumlom man an internasyonal na situwasyon. An Moab, Edom, asin Filistea nakahuma sa may linderos kan Juda. An kahadean nin Israel sa amihanan, minsan ngani kadugo, sarong rekonosidong kaiwal. Sa enotan pa kan amihanan, an Siria nagin huma sa katoninongan kan Juda. Mas peligroso pa ngani an maringis na Asiria, na pirmeng naghahanap nin mga oportunidad na pahiwason an kapangyarihan kaiyan. Durante kan panahon nin paghula ni Isaias, biyong pinara kan Asiria sa mapa an nasyon nin Israel asin haros linaglag an Juda. Kaidto an lambang nakukutaan na siudad sa Juda apuera sa Jerusalem kapot kan Asiria.—Isaias 1:7, 8; 36:1.
7. Anong dalan an pinili kan Israel asin Juda, asin ano an nagin reaksion ni Jehova?
7 An katipan na banwaan nin Dios nag-agi sa grabeng mga kapahamakan na iyan huli ta an Israel asin Juda bakong maimbod sa saiya. Arog kan mga nasambitan sa libro nin Talinhaga, sinda “nagbabaya sa mga dalan nin katanosan tanganing maglakaw sa mga dalan nin kadikloman.” (Talinhaga 2:13) Pero, minsan ngani naanggot si Jehova sa saiyang banwaan, dai nia sinda lubos na binayaan. Imbes, ibinangon nia si Isaias asin an iba pang propeta tanganing tumao nin espirituwal na liwanag para sa siisay man sa nasyon na naghihingoa pa man giraray na maglingkod nin fiel ki Jehova. Mahalagang marhay nanggad an liwanag na itinao paagi sa mga propetang ini. Nagtatao iyan nin buhay.
Mga Panahon nin Kadikloman Ngonyan
8, 9. Anong mga bagay an nakakokontribwir sa kadikloman kan kinaban ngonyan?
8 An situwasyon kan kaaldawan ni Isaias kaagid na marhay kan mga kamugtakan ngonyan. Sa panahon niato, an mga tawong namomoon tinalikdan si Jehova asin an saiyang pinatukaw na sa trono na Hade, si Jesu-Cristo. (Salmo 2:2, 3) Dinaya kan mga namomoon sa relihion kan Kakristianohan an saindang mga aripompon. An mga namomoon na iyan naghihingakong naglilingkod sa Dios, alagad an totoo an kadaklan sa sainda sinusuportaran an mga dios kan kinaban na ini—an nasyonalismo, militarismo, kayamanan, asin prominenteng mga indibiduwal—dai na baga sambiton pa an pagtotokdo nin paganong mga doktrina.
9 Sa sunod-sunod na lugar, an mga relihion kan Kakristianohan napalabot sa mga guerra asin iriwal sibil na may kaibang paglinig etniko asin iba pang makatatakot na marhay na mga pangyayari. Apuera kaini, imbes na manindogan apabor sa moralidad na basado sa Biblia, an dakol na iglesia magsalang nagbubutabutahan o aktibong nagsusuportar sa inmoral na mga gibo na arog nin pakikisaro asin homoseksuwalidad. Bilang resulta kan siring na pagsikwal sa mga pamantayan kan Biblia, an mga aripompon kan Kakristianohan kapareho kan mga tawo na nasambitan kan suanoy na salmista: “Dai sinda nakaaram, asin dai sinda nakakasabot; sinda naglalakaw sa kadikloman.” (Salmo 82:5) Totoo nanggad, an Kakristianohan, arog kan suanoy na Juda, nasa grabeng kadikloman.—Kapahayagan 8:12.
10. Paano nagsisirang an liwanag sa kadikloman ngonyan, asin paano nakikinabang an mga mahoyo?
10 Sa tahaw nin siring na kadikloman, pinasisirang ni Jehova an liwanag sa kapakanan kan mga mahoyo. Sa katuyohan na ini, ginagamit nia an saiyang linahidan na mga lingkod sa daga, “an fiel asin may diskresion na oripon,” asin an mga ini “nagliliwanag siring sa mga ilaw sa kinaban.” (Mateo 24:45 Filipos 2:15) An grupong oripon na iyan, na sinusuportaran kan minilyon na kairibang “ibang karnero,” nagpapabanaag kan espirituwal na liwanag na basado sa Tataramon nin Dios, an Biblia. (Juan 10:16) Sa duminiklom nang kinaban na ini, an siring na liwanag nagtatao nin paglaom sa mga mahoyo, nagtatabang sa sainda na magkaigwa nin relasyon sa Dios, asin nagtatabang sa sainda na malikayan an espirituwal na mga atbong. Iyan mahalagang marhay, nagtataong buhay.
“Inoomaw Ko an Saimong Ngaran”
11. Anong impormasyon an itinao ni Jehova kan kaaldawan ni Isaias?
11 Sa madiklom na mga aldaw na nabuhayan ni Isaias asin sa mas madiklom pa nganing mga aldaw pakatapos kaiyan kan bihagon kan mga Babilonyo an nasyon ni Jehova, anong klaseng giya an itinao ni Jehova? Apuera sa pagtao nin moral na giya, malinaw na sinabi nia antes pa kun paano nia ootobon an saiyang mga katuyohan may labot sa saiyang banwaan. Halimbawa, estudyare an makangangalas na mga hula na yaon sa Isaias kapitulo 25 sagkod 27. An mga tataramon sa mga kapitulong ini nagpapaheling kun paano inasikaso ni Jehova an mga bagay-bagay kaidto asin kun paano nia iyan ginigibo ngonyan.
12. Ano an odok sa pusong ipinahahayag ni Isaias?
12 Enot, si Isaias nagpapahayag: “O Jehova, ika an sakuyang Dios. Pinamumuraway taka, inoomaw ko an saimong ngaran.” Abaa kaodok sa pusong kapahayagan nin pag-omaw! Alagad ano an nagpahiro sa propeta na mamibi nin siring? An sarong mayor na dahelan ihinahayag sa ikaduwang kabtang kan bersikulo, kun saen mababasa niato: “Huli ta naggibo ka [Jehova] nin makangangalas na mga bagay, mga hatol poon kan enot na mga panahon, sa pagigin fiel, sa pagigin mapagtitiwalaan.”—Isaias 25:1.
13. (a) Anong kaaraman an nagpakosog kan apresasyon ni Isaias ki Jehova? (b) Paano kita makakanood sa halimbawa ni Isaias?
13 Pag-abot kan kaaldawan ni Isaias, dakol nang makangangalas na bagay an ginibo ni Jehova para sa Israel, asin an mga ini isinurat na. Malinaw na pamilyar si Isaias sa mga isinurat na ini. Halimbawa, aram nia na ilinuwas ni Jehova an saiyang banwaan sa pagkaoripon sa Egipto asin ilinigtas sinda sa kabangisan kan hukbo ni Faraon sa Dagat na Pula. Aram nia na giniyahan ni Jehova an saiyang banwaan sa kaawagan asin dinara sinda sa Dagang Panuga. (Salmo 136:1, 10-26) An siring na mga rekord sa kasaysayan nagpaheling na si Jehova Dios fiel asin mapagtitiwalaan. An saiyang “mga hatol”—an gabos na katuyohan nia—nagkakatotoo. An tamang kaaraman na itinao nin Dios nagpakosog ki Isaias na magpadagos sa paglakaw sa liwanag. Sa siring, saro siang marahayon na halimbawa para sa sato. Kun maingat niatong inaadalan an nasusurat na Tataramon nin Dios asin iinaaplikar iyan sa satong buhay, kita magdadanay man sa liwanag.—Salmo 119:105; 2 Corinto 4:6.
Linaglag an Sarong Siudad
14. Ano an ihinula manongod sa sarong siudad, asin may posibilidad na anong siudad idto?
14 An sarong halimbawa nin hatol nin Dios manonompongan sa Isaias 25:2, na dian mababasa ta: “Ginibo mo an siudad na sarong tambak nin mga gapo, an may kutang banwaan na kagabaan, an torreng erokan nin mga estranghero na magin bako nang siudad, na dai na itotogdok liwat sagkod sa panahon na daing katapusan.” Ano an siudad na ini? May posibilidad na sa makahulang paagi an pinanonongdan ni Isaias iyo an Babilonya. Tunay nanggad, talagang uminabot an panahon na an Babilonya nagin na sanang tambak nin mga gapo.
15. Anong “dakulang siudad” an nag-eeksister ngonyan, asin ano an mangyayari dian?
15 Igwa daw nin kapareho ngonyan an siudad na nasambitan ni Isaias? Igwa. An libro nin Kapahayagan nagtataram dapit sa “dakulang siudad na igwa nin kahadean sa mga hade kan daga.” (Kapahayagan 17:18) An dakulang siudad na iyan iyo an “Dakulang Babilonya,” an pambilog na kinaban na imperyo nin falsong relihion. (Kapahayagan 17:5) Ngonyan, an mayor na kabtang kan Dakulang Babilonya iyo an Kakristianohan, na an klero kaiyan iyo an nangengenot sa pagtumang sa gibohon na paghuhulit kan Kahadean kan banwaan ni Jehova. (Mateo 24:14) Minsan siring, arog kan suanoy na Babilonya, an Dakulang Babilonya madali nang laglagon, na nungka nang matindog liwat.
16, 17. Paano an mga kaiwal ni Jehova nagpamuraway sa saiya kaidtong suanoy asin sa presenteng mga panahon?
16 Ano pa an ihinula ni Isaias manongod sa “may kutang banwaan”? Kinakaolay si Jehova, si Isaias nagsasabi: “Idtong makosog na banwaan magpapamuraway sa saimo; an banwaan kan maringis na mga nasyon, sinda matatakot sa saimo.” (Isaias 25:3) Paano magpapamuraway ki Jehova an antipatikong nasyon na ini, “an banwaan kan maringis na mga nasyon”? Bueno, girumdoma an nangyari sa pinakamakosog na hade nin Babilonya, si Nabucodonosor. Pakatapos nin nakapapepensar na eksperyensia na nagpapaheling kan saiya mismong kaluyahan, napiritan siang ihayag an kadakulaan ni Jehova asin an Saiyang makakamhan sa gabos na kapangyarihan. (Daniel 4:34, 35) Kun ginagamit ni Jehova an saiyang kapangyarihan, maski an saiyang mga kaiwal napipiritan na rekonoseron, minsan ngani magabat sa boot, an saiyang makapangyarihan na mga gibo.
17 Napiritan na daw an Dakulang Babilonya na rekonoseron an makapangyarihan na mga gibo ni Jehova? Iyo. Durante kan enot na guerra mundial, an linahidan na mga lingkod ni Jehova naghulit na may kahorasaan. Kan 1918 sinda napasa espirituwal na pagkabihag kan ibilanggo an pangenot na mga opisyal kan Watch Tower Society. Haros napondo an organisadong paghuhulit. Dangan, kan 1919, sinda ibinalik ni Jehova asin pinabagsik liwat sinda kan saiyang espiritu, kaya pinonan ninda na otobon an sugo na ihulit an maogmang bareta sa bilog na ineerokan na daga. (Marcos 13:10) An gabos na ini ihinula sa libro nin Kapahayagan, siring man an epekto kaiyan sa saindang mga kalaban. An mga ini “natakot asin nagpamuraway sa Dios kan langit.” (Kapahayagan 11:3, 7, 11-13) Bako na sinda gabos nakombertir, kundi napiritan sinda na rekonoseron an makapangyarihan na gibo ni Jehova sa pangyayaring ini, siring kan ihinula ni Isaias.
“Kakosogan kan Hababa”
18, 19. (a) Taano ta nasudya an mga kalaban na raoton an integridad kan banwaan ni Jehova? (b) Paano papopondohon “an awit kan mga maringis”?
18 Sa pagpasiring ngonyan sa maboot na mga pagtratar ni Jehova sa mga naglalakaw sa liwanag, si Isaias nagsasabi ki Jehova: “Ika nagin kakosogan kan hababa, kakosogan kan dukha sa saiyang kasakitan, pailihan sa bagyo, limpoy tumang sa init, kun an putok kan mga maringis siring sa bagyo na minatama sa lanob. Siring kan init sa alang na lugar, papopondohon mo an ribok nin mga estranghero, an init na may limpoy nin panganoron. An awit kan mga maringis papopondohon.”—Isaias 25:4, 5.
19 Poon kan 1919, prinobaran kan mga maringis an gabos na medyos tanganing raoton an integridad kan tunay na mga parasamba, alagad nasudya sinda. Taano? Huli ta si Jehova an kakosogan asin an pailihan kan saiyang banwaan. Sia nagtatao nin preskong limpoy tumang sa nakasosolong init nin paglamag asin nagtitindog siring sa masarig na lanob laban sa bagyo nin pagtumang. Kitang mga naglalakaw sa liwanag nin Dios kompiadong nag-aantisipar sa panahon na “an awit kan mga maringis papopondohon.” Iyo, galaga niatong hinahalat an aldaw na mawawara na an mga kaiwal ni Jehova.
20, 21. Anong bangkete an itinatao ni Jehova, asin ano an magigin kabale sa bangketeng iyan sa bagong kinaban?
20 Bako sanang pagprotehir sa saiyang mga lingkod an ginigibo ni Jehova. Nagtatao sia sa sainda nin probisyon bilang saindang mamomoton na Ama. Pakatapos na patalingkason an saiyang banwaan sa Dakulang Babilonya kan 1919, pinuestohan nia sinda nin bangkete sa kapangganahan, nin abundang suplay nin espirituwal na pagkakan. Ihinula ini sa Isaias 25:6, na dian mababasa ta: “Si Jehova kan mga hukbo magibo nanggad para sa gabos na banwaan, sa bukid na ini, nin bangkete nin matatabang putahe, bangkete nin arak na laon, nin matatabang putahe na pano nin hotok, nin arak na laon, sinara.” Abaang ogma niato na makikabtang sa bangketeng iyan! (Mateo 4:4) An “lamesa ni Jehova” totoong pano nin masisiram na kakanon. (1 Corinto 10:21) Paagi sa “fiel asin may diskresion na oripon,” tinatawan kita kan gabos na kakaipuhanon niato sa espirituwal.
21 Asin may maorog pa sa bangketeng ini na itinatao nin Dios. An espirituwal na bangkete na nakakamtan ta ngonyan nagpapagirumdom sa sato kan abundang pisikal na pagkakan na makukua sa ipinanuga nin Dios na bagong kinaban. Sa panahon na iyan, magigin kabale sa “bangkete nin matatabang putahe” an abundang pisikal na pagkakan. Mayo nang magugutom sa pisikal o espirituwal. Kanigoan na kaginhawahan iyan para sa namomotan na mga fiel na ngonyan nagdudusa huli sa ihinulang “mga kakulangan nin kakanon” na kabtang kan “tanda” kan presensia ni Jesus! (Mateo 24:3, 7) Para sa sainda, nakararanga nanggad an mga tataramon kan salmista. Sinabi nia: “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.”—Salmo 72:16.
22, 23. (a) Anong “hinabol,” o “tahob,” an hahaleon, asin paano? (b) Paano hahaleon ‘an langhad sa banwaan ni Jehova’?
22 Hinanyoga ngonyan an orog pa nganing makangangalas na panuga. Ikinokomparar an kasalan asin kagadanan sa sarong “hinabol,” o sarong “tahob,” si Isaias nagsasabi: “Sa bukid na ini hahalonon nanggad [ni Jehova] an ibabaw kan tahob na nakatatahob sa gabos na banwaan, asin an hinabol na nabibiklad sa gabos na nasyon.” (Isaias 25:7) Isip-isipa nanggad! An kasalan asin kagadanan, na nagpapagabat sa katawohan siring sa nakapupuot na tamong, mawawara na. Kanigoan an pag-antisipar niato kan aldaw na an mga pakinabang kan pantubos na atang ni Jesus lubos nang iinaaplikar sa makinuyog asin fiel na katawohan!—Kapahayagan 21:3, 4.
23 Itinotokdo an mamuraway na panahon na iyan, inaasegurar kita kan pinasabngan na propeta: “Totoong hahalonon [nin Dios] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon. Asin an langhad sa saiyang banwaan hahaleon nia sa bilog na daga, huli ta si Jehova mismo an nagtaram kaiyan.” (Isaias 25:8) Mayo nin magagadan sa natural na mga dahelan o magtatangis huli sa pagkagadan nin namomotan. Abaa kaogmang pagkaliwat! Apuera kaini, dai na sa arin man na lugar sa daga madadangog an langhad asin putik na propaganda na haloyon na tinios nin Dios asin kan saiyang mga lingkod. Taano ta dai na? Huli ta hahaleon ni Jehova an gikanan kaiyan—an ama kan kaputikan, si Satanas na Diablo, kaiba an gabos na banhi ni Satanas.—Juan 8:44.
24. Ano an reaksion kan mga naglalakaw sa liwanag dapit sa makapangyarihan na mga gibo ni Jehova para sa sainda?
24 Paghinohorophorop an siring na mga kapahayagan kan kapangyarihan ni Jehova, an mga naglalakaw sa liwanag napapahiro na kumagsing: “Uya! Ini an satong Dios. Kita naglaom sa saiya, asin sia magliligtas sa sato. Ini si Jehova. Kita naglaom sa saiya. Mag-orogma asin maggayagaya kita sa pagligtas nia.” (Isaias 25:9) Sa dai na mahahaloy, an matanos na katawohan magkakaigwa nin lambang dahelan na maggayagaya. An kadikloman hahaleon nin biyo, asin an mga fiel sisirangan kan liwanag ni Jehova sa panahon na daing sagkod. Igwa daw nin ano pa man na mas mamuraway na paglaom? Mayo nanggad!
Ikapaliliwanag daw Nindo?
• Taano ta importante ngonyan na lumakaw sa liwanag?
• Taano ta inomaw ni Isaias an ngaran ni Jehova?
• Taano ta nungkang mararaot kan mga kaiwal an integridad kan banwaan nin Dios?
• Anong nagsosopay na mga bendisyon an naghahalat sa mga naglalakaw sa liwanag?
[Mga Hapot Para sa Pag-adal]
[Ritrato sa pahina 12, 13]
An mga nag-eerok sa Juda nag-atang nin mga aki ki Moloc
[Mga Ritrato sa pahina 15]
An kaaraman dapit sa makakamhan na mga gibo ni Jehova nagpahiro ki Isaias na omawon an ngaran ni Jehova
[Ritrato sa pahina 16]
An mga matanos sisirangan kan liwanag ni Jehova sagkod lamang