Puede daw Kamong Magin Talagang Maogma?

AN GABOS tinataratara kaidto ni George nin huyom. Para sa saiya, an buhay mahalagang marhay na regalo na dapat ikaogma. An saiyang kaogmahan asin optimismo marka na nia​—orog na kan magpoon na siang magdusa kan mga kolog nin paggurang. Sagkod kan aldaw na sia nagadan, midbid si George bilang tawong maogma. Maogma daw kamo kapareho ni George? Ibinibilang daw nindo an kada bagong aldaw na regalong dapat ikaogma? O ginigibo daw kamong indiperente o handal pa ngani kan pagtanaw sa bagong aldaw? Igwa daw nin nakakahale kan saindong kaogmahan?

An kaogmahan tinawan nin kahulogan na pagigin marahay an kamugtakan na medyo permanente. Iyan midbid sa mga emosyon na magpoon sa pagkakontento sagkod sa hararom saka dakulaon na kagayagayahan asin nin natural na kamawotan na magpadagos an kamugtakan na iyan. Talaga daw na igwa kan arog kaiyan na kaogmahan?

Ngonyan, pinalalakop nin sosyedad an punto de vista na magigin maogma an mga tawo kun sinda sana may igong kayamanan. Minilyon an sibot-sibot sa saindang natatarantang mga paghihingoa na yumaman. Sa paggibo kaiyan, dakol an isinasakripisyo an personal na mga relasyon asin iba pang importanteng mga bagay sa buhay. Garo mga tanga sa buklod, sinda daing ontok sa paghihidale, asin haros mayo na sinda nin panahon para sa pag-isip-isip o sa lambang saro. Natural sana, “palangkaw na nin palangkaw an kabilangan nin mga tawo na nadidiskobreng may depresyon,” sabi nin sarong report sa Los Angeles Times, “asin pababa na nin pababa an edad nin pagpoon [kan depresyon]. . . . An mga pangontra sa depresyon nasa listahan kan mga kompaniya nin droga kan mga pinakamabenta.” Minilyon an nagtotomar nin bawal na mga droga o pinoprobaran na lamoson nin inomon na de alkohol an saindang mga problema. An nagkapira naggagasto nin daing pakundangan kun sinda  nakakamate nin depresyon. Sa sarong surbey, “an mga babae luminuwas na iyong pinakamay tendensiang mamakal bilang terapi,” sabi kan diaryong Britano na The Guardian. “Tolong doble kisa mga lalaki na sinda posibleng marhay na mamakal kun may depresyon.”

Minsan siring, an tunay na kaogmahan dai manonompongan sa sarong tindahan, pag-inom, tableta, hiringgilya, o deposito sa bangko. An kaogmahan dai ipinababakal; iyan libre. Saen daw niato manonompongan an siring kamahalagang marhay na regalo? Pag-oolayan niato iyan sa kasunod na artikulo.