Asikasohon an Espiritu Asin Mabuhay!

“An pag-asikaso sa espiritu nangangahulogan nin buhay.”—ROMA 8:6.

1, 2. Paano pinagkokomparar kan Biblia an kalaenan kan “laman” asin “espiritu”?

BAKONG pasil an magpadanay nin malinig na kamugtakan sa moral sa atubangan nin Dios sa tahaw nin bikong sosyedad na nagpapamuraway sa pagpanigo sa mga mawot nin laman. Minsan siring, pinagkokomparar kan Kasuratan an kalaenan kan “laman” asin “espiritu,” na ipinaheheling nin malinaw an makamomondong mga resulta nin pagtogot nin saro na sia dominaron kan makasalan na laman asin kan maogmang mga ibinubunga kan pagpadara sa impluwensia kan banal na espiritu nin Dios.

² Halimbawa, nagsabi si Jesu-Cristo: “An espiritu iyo an nagtatao nin buhay; an laman mayo man lamang nin pakinabang. An mga tataramon na isinabi ko sa saindo espiritu asin buhay.” (Juan 6:63) Sa mga Kristiano sa Galacia, si apostol Pablo nagsurat: “An laman tumang sa espiritu sa mawot kaiyan, asin an espiritu tumang sa laman; huli ta an mga ini magkatumang.” (Galacia 5:17) Nagsabi man si Pablo: “Sia na nagtatanom sa saiyang laman mag-aani man nin pagkatunaw sa saiyang laman, alagad an nagtatanom sa espiritu mag-aani nin buhay na daing katapusan gikan sa espiritu.”​—Galacia 6:8.

3. Ano an kaipuhan tanganing makatalingkas sa salang mga mawot asin inklinasyon?

³ An banal na espiritu ni Jehova​—an saiyang puersa aktiba​—kayang haleon nin epektibo an marigsok na “mga mawot nin laman” asin an nakadadanyar na pagdominar kan satong makasalan na laman. (1 Pedro 2:11) Tanganing makatalingkas sa pagkaoripon sa salang mga inklinasyon, mahalagang marhay na igwa kita kan tabang kan espiritu nin Dios, ta si Pablo nagsurat: “An pag-asikaso sa laman nangangahulogan nin kagadanan, alagad an pag-asikaso sa espiritu nangangahulogan nin buhay asin katoninongan.” (Roma 8:6) Ano an kahulogan kan pag-asikaso sa espiritu?

“An Pag-asikaso sa Espiritu”

4. Ano an kahulogan kan “pag-asikaso sa espiritu”?

⁴ Kan sumurat si Pablo manongod sa “pag-asikaso sa espiritu,” naggamit sia nin termino sa Griego na nangangahulogan nin “paagi nin pag-isip, (kamugtakan nin) isip, . . . pasohan, kamawotan, pagmamaigot.” An sarong konektadong berbo nangangahulogan nin “mag-isip, isaisip sa sarong paagi.” Sa siring, an pag-asikaso sa espiritu nangangahulogan nin pagigin kontrolado, dominado, asin nadadara kan puersa aktiba ni Jehova. Nangangahulogan iyan na gikan sa boot niatong tinotogotan an satong kaisipan, mga inklinasyon, asin kamawotan na lubos na mapasairarom kan impluwensia kan banal na espiritu nin Dios.

5. Sagkod saen kita maninigong magpasakop sa impluwensia kan banal na espiritu?

⁵ Idinoon ni Pablo kun sagkod saen kita maninigong magpasakop sa impluwensia kan banal na espiritu kan sia magtaram dapit sa pagigin ‘mga oripon kan espiritu.’ (Roma 7:6) Basado sa saindang pagtubod sa pantubos na atang ni Jesus, an mga Kristiano pinatalingkas na sa pagdominar kan kasalan asin sa siring “nagadan” na sa saindang dating kamugtakan bilang mga oripon kaiyan. (Roma 6:​2, 11) An mga sa piguratibong paagi gadan na sa siring na paagi buhay pa sagkod ngonyan sa pisikal asin talingkas na ngonyan na sumunod ki Cristo bilang ‘mga oripon sa katanosan.’​—Roma 6:​18-20.

Sarong Pambihirang Pagliliwat

6. Anong pagliliwat an naeeksperyensiahan kan mga nagigin ‘oripon sa katanosan’?

⁶ Tunay na pambihira an pagliliwat hale sa pagigin “mga oripon nin kasalan” pasiring sa paglilingkod sa Dios bilang ‘mga oripon sa katanosan.’ Mapadapit sa nagkapira na nakaeksperyensia kan siring na pagkaliwat, si Pablo nagsurat: ‘Kamo nahugasan na, kamo sinantipikar na, kamo ipinahayag nang  matanos sa ngaran kan satong Kagurangnan na si Jesu-Cristo asin sa espiritu kan satong Dios.’​—Roma 6:​17, 18; 1 Corinto 6:11.

7. Taano ta mahalaga na maaraman an pagmansay ni Jehova sa mga bagay-bagay?

⁷ Tanganing maeksperyensiahan an siring na pambihirang pagliliwat, kaipuhan ta ngunang manodan an manongod sa pagmansay ni Jehova sa mga bagay-bagay. Kaidtong dakol nang siglo an nakaagi, si salmista David odok na nakimaherak sa Dios: “Paaraman sa sako an saimong mga dalan, O Jehova . . . Palakawa ako sa saimong katotoohan asin tokdoi ako.” (Salmo 25:​4, 5) Hininanyog ni Jehova si David, asin puede man Niang simbagon an siring na pamibi para sa saiyang mga lingkod sa presenteng aldaw. Huling malinig asin banal an mga dalan nin Dios asin an saiyang katotoohan, makatatabang an paghorophorop kaiyan kun kita nasusugotan na panigoan an marigsok na mga mawot nin laman.

An Mahalagang Marhay na Kabtang kan Tataramon nin Dios

8. Taano ta kaipuhan na pag-adalan niato an Biblia?

⁸ An Tataramon nin Dios, an Biblia, produkto kan saiyang espiritu. Sa siring, an sarong mahalagang marhay na paagi nin pagtogot sa espiritu na iyan na maghiro sa sato iyo an pagbasa asin pag-adal sa Biblia​—aroaldaw kun posible. (1 Corinto 2:​10, 11; Efeso 5:18) An paglaog sa isip asin puso niato kan mga katotoohan asin prinsipyo sa Biblia makatatabang sa sato na mapaglabanan an mga pagsalakay sa satong espirituwalidad. Iyo, kun lumataw an inmoral na mga sugot, puedeng ipagirumdom sa sato kan espiritu nin Dios an mga pagirumdom na nasa Kasuratan asin naggigiyang mga prinsipyo na puedeng magpasarig sa satong desisyon na gumawe sono sa kabotan nin Dios. (Salmo 119:​1, 2, 99; Juan 14:26) Kun siring, dai kita nadadaya na sumunod sa salang dalan.​—2 Corinto 11:3.

9. Paano pinakokosog kan pag-adal sa Biblia an satong desisyon na ingatan an satong relasyon ki Jehova?

⁹ Mantang ipinapadagos ta an satong sinsero asin mahigos na pag-adal sa Kasuratan sa tabang kan mga publikasyon na basado sa Biblia, iniimpluwensiahan kan espiritu nin Dios an satong isip asin puso, na pinarararom an satong paggalang sa mga pamantayan ni Jehova. An satong relasyon sa Dios an nagigin pinakaimportante sa satong buhay. Kun napapaatubang sa sugot, an mga ideya manongod sa kun gurano tibaad kasiram kan paggibo nin sala dai iniintindi. Imbes, an ensegidang iniisip niato iyo an pagpadanay kan satong integridad ki Jehova. An makosog na pagpahalaga sa satong relasyon sa saiya pinahihiro kita na labanan an ano man na inklinasyon na puedeng makadanyar o makaraot kaiyan.

“Kanigoan an Sakong Pagkamoot sa Saimong Ley!”

10. Taano ta kaipuhan an pagkuyog sa ley ni Jehova tanganing maasikaso an espiritu?

¹⁰ Tanganing maasikaso niato an espiritu, bakong igo an kaaraman sa Tataramon nin Dios. May igong pakasabot si Hadeng Salomon sa mga pamantayan ni Jehova, alagad dai sia nakapamuhay sono dian durante kan huring kabtang kan saiyang buhay. (1 Hade 4:​29, 30; 11:​1-6) Kun espirituwal an satong kaisipan, masasabotan niato na bako sanang pakaaram sa sinasabi kan Biblia an kaipuhan kundi siring man an bilog na pusong pagkuyog sa ley nin Dios. Nangangahulogan iyan nin maingat na pagsiyasat sa mga pamantayan ni Jehova asin maigot na paghihingoang sunodon iyan. Ini an nagin aktitud kan salmista. Nag-awit sia: “Kanigoan an sakong pagkamoot sa saimong ley! Sa bilog na aldaw iyan sakong pinagmamalasakitan.” (Salmo 119:97) Kun talagang may pagmalasakit kita sa pagsunod sa ley nin Dios, napahihiro kitang magpaheling nin diosnon na mga kualidad. (Efeso 5:​1, 2) Imbes na daing maginibo sa pagkaakit sa salang gibo, ipinaheheling ta an mga bunga kan espiritu, asin an pagmawot na paogmahon si Jehova irinarayo kita sa marigsok na “mga gibo kan laman.”​—Galacia 5:​16, 19-23; Salmo 15:​1, 2.

11. Paano nindo ipaliliwanag na an ley ni Jehova na nagbabawal sa pakikisaro sarong proteksion para sa sato?

 ¹¹ Paano kita makapatatalubo nin hararom na paggalang asin pagkamoot sa ley ni Jehova? An sarong paagi iyo an maingat na pagsiyasat sa kahalagahan kaiyan. Estudyare an ley nin Dios na nagboboot na an seksuwal na pagdodorog para sana sa mag-agom asin ibinabawal an pakikisaro asin pagsambay. (Hebreo 13:4) May marahay daw na nawawara sa sato dahelan sa pagkuyog sa ley na ini? Magibo daw an sarong mamomoton na langitnon na Ama nin sarong ley na isasayuma sa sato an sarong bagay na kapakipakinabang? Siempre dai! Helinga an nangyayari sa buhay nin dakol na dai namumuhay sono sa moral na mga pamantayan ni Jehova. An dai ginustong pagbados parateng nagreresulta sa pagpaaborsion ninda o tibaad sa pag-agom na mayo pa sa panahon asin bakong maogma. Dakol an kaipuhan na magpadakula nin aki na mayo nin agom na lalaki o agom na babae. Apuera kaini, an mga nakikisaro isinasapeligro an saindang sadiri sa mga helang na ikinaoolakit paagi sa pagdodorog. (1 Corinto 6:18) Asin kun an sarong lingkod ni Jehova magkomiter nin pakikisaro, nakapanluluya nin biyo an mga epekto sa emosyon. An paghihingoang pogolan an mga pagtudok nin nagkasalang konsensia puedeng magin dahelan nin dai pakatorog asin kapurisawan sa isip. (Salmo 32:​3, 4; 51:3) Kun siring, bako daw na malinaw na an ley ni Jehova na nagbabawal sa pakikisaro sinadya tanganing protehiran kita? Iyo, tunay nanggad na igwa nin dakulang pakinabang sa pagpadanay nin kalinigan sa moral!

Mamibi Para sa Tabang ni Jehova

12, 13. Taano ta angay na mamibi kun inaatake kita nin makasalan na mga mawot?

¹² An pag-asikaso sa espiritu nangangaipo nanggad nin odok sa pusong pamibi. Angay na arangon an tabang kan espiritu nin Dios, ta si Jesus nagsabi: “Kun kamo . . . tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:13) Sa pamibi, puede tang ipahayag an satong pagdepende sa espiritu para sa tabang mapadapit sa satong mga kaluyahan. (Roma 8:​26, 27) Kun marealisar niato na apektado kita nin makasalan na mga mawot o aktitud, o kun sabihon ini sa sato nin sarong mamomoton na kapagtubod, madonong na magin espesipiko manongod sa problema kun kita namimibi asin arangon an tabang nin Dios na mapangganahan an mga tendensiang ini.

¹³ Puede kitang tabangan ni Jehova na magkonsentrar sa matanos, malinig, birtuoso, asin kaomaw-omaw na mga bagay. Asin angay nanggad na magngayongayo sa saiya nin odok tangani na “an katoninongan nin Dios” mag-iingat sa satong puso asin mga kakayahan nin pag-isip! (Filipos 4:​6-8) Kun siring mamibi kita para sa tabang ni Jehova na ‘sunodon an katanosan, diosnon na debosyon, pagtubod, pagkamoot, pakatagal, kahoyoan nin boot.’ (1 Timoteo 6:​11-14) Sa tabang kan satong langitnon na Ama, an mga kahaditan asin sugot dai makakaabot sa punto na dai na iyan nakokontrol. Imbes, an satong buhay mahehelingan kan katrangkilohan na tao nin Dios.

Dai Pagpamondoon an Espiritu

14. Taano an espiritu nin Dios ta nagigin sarong puersa para sa kalinigan?

¹⁴ Personal na iinaaplikar kan maygurang na mga lingkod ni Jehova an hatol ni Pablo: “Dai nindo pagsigbohon an laad kan espiritu.” (1 Tesalonica 5:19) Huling an espiritu nin Dios iyo an “espiritu nin kabanalan,” iyan malinig, dalisay, sagrado. (Roma 1:4) Kun iyan naghihiro sa sato, sa siring an espiritung iyan nagigin sarong puersa para sa kabanalan, o kalinigan. Nagtatabang iyan na papagdanayon kita sa malinig na dalan nin buhay na nahehelingan nin pagkuyog sa Dios. (1 Pedro 1:2) An ano man na marigsok na gibo sarong pagbasangbasang sa espiritung iyan, asin kapahapahamak an puedeng magin mga resulta kaiyan. Taano man?

15, 16. (a) Paano niato mapamomondo an espiritu nin Dios? (b) Paano niato malilikayan na mapamondo an espiritu ni Jehova?

 ¹⁵ Bueno, si Pablo nagsurat: “Dai nindo pagpamondoon an banal na espiritu nin Dios, na paagi kaiyan tinatakan kamo para sa aldaw nin pagbutas paagi sa pantubos.” (Efeso 4:30) Sinasabi kan Kasuratan na an espiritu ni Jehova sarong tatak, o sarong “garantiya para sa maabot,” para sa fiel na linahidan na mga Kristiano. Asin iyan iyo an inmortal na buhay sa langit. (2 Corinto 1:​22; 1 Corinto 15:​50-57; Kapahayagan 2:10) Puedeng giyahan kan espiritu nin Dios an mga linahidan asin an saindang kairibang may daganon na paglaom pasiring sa sarong buhay na may pagkafiel asin puedeng tumabang sa sainda na malikayan an makasalan na mga gibo.

¹⁶ An apostol nagpatanid tumang sa mga tendensia nin pagputik, paghabon, makasusupog na gawe-gawe, asin iba pa. Kun kita nagpadara sa siring na mga bagay, kita nagtutumang sa ipinasabong nin espiritu na hatol kan Tataramon nin Dios. (Efeso 4:​17-29; 5:​1-5) Minsan paano, napamomondo niato sa siring na paagi an espiritu nin Dios, asin sierto nanggad na boot niatong likayan iyan. An totoo, kun an siisay man sa sato minapoon na ignorohon an hatol kan Tataramon ni Jehova, kita puedeng minapoon na magpatalubo nin mga aktitud o ugale na puedeng magresulta sa tuyong kasalan asin biyong pagkawara kan pag-oyon nin Dios. (Hebreo 6:​4-6) Minsan ngani tibaad dai kita naggigibo nin kasalan ngonyan mismo, puedeng pasiring na kita dian. Paagi sa padagos na pagkontra sa paggiya kan espiritu, pinamomondo niato iyan. Linalabanan asin pinamomondo man niato si Jehova, an gikanan kan banal na espiritu. Siring kan mga namomoot sa Dios, nungka na boot niatong gibohon iyan. Imbes, logod na mamibi kita para sa tabang ni Jehova tanganing dai niato mapamondo an saiyang espiritu kundi nakatatao kita nin onra sa saiyang banal na ngaran paagi sa pagpadagos na asikasohon an espiritu.

Padagos na Asikasohon an Espiritu

17. Ano an nagkapirang puedeng magin espirituwal na pasohan niato, asin taano ta madonong na hingoahon na aboton iyan?

¹⁷ An sarong risang gayo na paagi na kita makapadagos sa pag-asikaso sa espiritu iyo an pagbugtak nin espirituwal na mga pasohan asin paghihingoang aboton iyan. Depende sa satong mga pangangaipo asin kamugtakan, puedeng magin kabale sa satong mga pasohan an pagpaoswag sa satong ugale sa  pag-adal, pagdugang sa pakikikabtang niato sa paghuhulit, o paghihingoang maabot an sarong espesipikong pribilehio nin paglilingkod, arog baga kan bilog na panahon na ministeryong payunir, paglilingkod sa Bethel, o pagmimisyonero. Matabang ini na papagdanayon an satong isip na okupado nin espirituwal na intereses asin matabang sa sato na labanan an pagpadaog sa mga kaluyahan niato bilang tawo o pagpadara sa materyalistikong mga pasohan asin mga mawot na bakong sono sa Kasuratan na komun sa sistemang ini nin mga bagay. Ini nanggad an madonong na gibohon, ta si Jesus nagsadol: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya o takla dai nakararaot, asin an mga parahabon dai nananalakat asin dai naghahabon. Huli ta kun saen an saindong kayamanan, dian man an saindong puso.”​—Mateo 6:​19-21.

18. Taano ta mahalagang marhay na padagos na asikasohon an espiritu sa huring mga aldaw na ini?

¹⁸ An pag-asikaso sa espiritu asin pagpogol sa kinabanon na mga mawot iyo nanggad an madonong na dapat gibohon sa “huring mga aldaw na ini.” (2 Timoteo 3:​1-5) Total, “an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:​15-17) Halimbawa, kun pinag-aaabot nin sarong hoben na Kristiano an pasohan na bilog na panahon na paglilingkod, ini puedeng magserbing giya durante kan masakit na mga taon nin pagkabarobata o pagkahoben. Kun ginigipit na magkompromiso, an siring na indibiduwal magkakaigwa nin malinaw na pananaw sa kun ano an boot niang magibo sa paglilingkod ki Jehova. Iisipon kan siring na espirituwal na tawo na bakong madonong, kamangmangan pa ngani, na butasan an pagkamit nin espirituwal na mga pasohan huli sa materyal na mga okupasyon o ano man na kasingawan na ipinanunugang itatao kan kasalan. Girumdomon na an makiespirituwal na si Moises “pinagmarahay pa na maapi kaibanan kan banwaan nin Dios kisa magkamit kan dai nagdadanay na pag-ogma sa kasalan.” (Hebreo 11:​24, 25) Hoben man o gurang, iyan man an desisyon niato kun padagos niatong inaasikaso an espiritu imbes na an makasalan na laman.

19. Anong mga pakinabang an kakamtan niato kun padagos niatong aasikasohon an espiritu?

¹⁹ “An pag-asikaso sa laman nangangahulogan nin pakikienemigo sa Dios,” mantang “an pag-asikaso sa espiritu nangangahulogan nin buhay asin katoninongan.” (Roma 8:​6, 7) Kun padagos niatong aasikasohon an espiritu, makaeeksperyensia kita nin mahalagang marhay na katoninongan. An satong puso asin kakayahan nin pag-isip magigin orog na biyong protektado sa impluwensia kan satong makasalan na kamugtakan. Mas makakaya niatong labanan an mga sugot na gumibo nin sala. Asin mapapasatuya an tabang nin Dios na makaya an nagpapadagos na paglalaban kan laman asin espiritu.

20. Taano ta makaseseguro kita na posible an pakapanggana sa paglalaban kan laman asin kan espiritu?

²⁰ Paagi sa pagpadagos sa pag-asikaso sa espiritu, pinagdadanay niato an mahalagang marhay na koneksion ki Jehova, an gikanan kan buhay sagkod kan banal na espiritu. (Salmo 36:​9; 51:11) Ginigibo ni Satanas na Diablo asin kan saiyang mga kampon an gabos na mahihimo ninda na raoton an satong relasyon ki Jehova Dios. Hinihingoa ninda na kontrolon an satong isip, sa pakaaram na kun kita mapadara, sa kahurihurihi maresulta ini sa pakikienemigo sa Dios asin sa kagadanan. Alagad puede kitang magin mapanggana sa paglalaban na ini kan laman asin kan espiritu. Iyan an naeksperyensiahan ni Pablo, ta kan magsurat dapit sa saiya mismong pakikilaban, naghapot nguna sia: “Siisay an maligtas sa sako hale sa hawak na napapairarom sa kagadanan na ini?” Dangan, ipinaheheling na posible an pagkaligtas, sia nagkagsing: “Salamat sa Dios paagi ki Jesu-Cristo na satong Kagurangnan!” (Roma 7:​21-25) Makapasasalamat man kita sa Dios paagi ki Cristo huli sa pagtao kan paagi nin pagpanggana sa mga kaluyahan nin tawo asin padagos na pag-asikaso sa espiritu kaiba an makangangalas na paglaom na buhay na daing katapusan.​​—Roma 6:23.

Nagigirumdoman daw Nindo?

• Ano an kahulogan kan pag-asikaso sa espiritu?

• Paano niato matotogotan an espiritu ni Jehova na maghiro sa sato?

• Ipaliwanag kun taano ta, sa satong pakikilaban tumang sa kasalan, mahalagang marhay na mag-adal sa Biblia, kuyogon an ley ni Jehova, asin mamibi sa saiya.

• Paano kita matatabangan kan pagbugtak nin espirituwal na mga pasohan na magdanay sa dalan nin buhay?

[Mga Hapot Para sa Pag-adal]

[Ritrato sa pahina 16]

An pag-adal sa Biblia nakatatabang sa sato na mapaglabanan an mga pagsalakay sa satong espirituwalidad

[Ritrato sa pahina 17]

Tama na mamibi para sa tabang ni Jehova na mapangganahan an makasalan na mga mawot

[Mga Ritrato sa pahina 18]

An espirituwal na mga pasohan makatatabang sa sato na magpadagos sa pag-asikaso sa espiritu