Binibista an Pagkabuhay Liwat ni Jesus

“Prangka kong masasabi saindo na minsan ngani makaseseguro nanggad kita na si Jesus nabuhay . . . , dai niato masasabi nin siring kasierto na kita nakaaaram na Sia ibinangon nin Dios hale sa mga gadan.” Iyan an sinabi kan halangkaw an katongdan na prelado kan Iglesia nin Inglaterra, an Arsobispo kan Canterbury.

AN Kristianong apostol na si Pablo mayo kan siring na mga pagduwaduwa. Sa kapitulo 15 kan saiyang enot na ipinasabong na surat para sa mga kapwa Kristiano sa suanoy na Corinto, si Pablo nagsurat: “Itinao ko sa saindo, kaiba kan enot na mga bagay, an inako ko man, na si Cristo nagadan para sa satong mga kasalan oyon sa Kasuratan; asin na sia ilinobong, iyo, na sia binuhay liwat sa ikatolong aldaw oyon sa Kasuratan.”​—1 Corinto 15:​3, 4.

Pagtubod sa pagkabuhay liwat ni Jesu-Cristo an nagpahiro sa saiyang mga disipulo na ihulit an ebanghelyo sa bilog na Greco-Romanong kinaban​—“sa gabos na linalang sa sirong nin langit.” (Colosas 1:23) Sa katunayan, an pagkabuhay liwat ni Jesus an pinakapundasyon kan Kristianong pagtubod.

Pero, poon sa kapoonpooni, an pagkabuhay liwat ni Jesus napaatubang sa pagduda asin dai pakatubod. Para sa mga Judio sa pankagabsan, paglapastangan sa Dios an paghingako kan mga parasunod ni Jesus na an ipinakong tawong ini iyo an Mesiyas. Asin sa kadaklan na edukadong Griego, na naniniwala sa inmortalidad kan kalag, nakaoongis an mismong ideya nin pagkabuhay liwat.​—Gibo 17:​32-​34.

Mga Nagdududa sa Presenteng Panahon

Sa dai pa sana nahahaloy na mga taon, an nagkapirang intelektuwal na mga Kristiano daa nagpublikar nin mga libro asin artikulo na pinagdududahan na sarong pabula an pagkabuhay liwat ni Jesus asin pinonan an sarong mainit na debate manongod sa temang ini. Sa saindang paghanap kan “historikong Jesus,” an laen-laen na intelektuwal nakikidiskutir na eroestorya sana nanggad an mga pagkasaysay sa Ebanghelyo manongod sa daing laog na lolobngan asin mga pagpaheling ni Jesus pakatapos na buhayon liwat, na inimbento haloy na pagkagadan nia tanganing suportaran an mga paghingako manongod sa saiyang kapangyarihan sa langit.

Halimbawa, helinga an punto de vista kan intelektuwal na Aleman na si Gerd Lüdemann, propesor kan Bagong Tipan asin autor kan librong What Really Happened to Jesus​​—A Historical Approach to the Resurrection. Sia nakikidiskutir na an pagkabuhay liwat ni Jesus “sarong daing basehan na kapahayagan” na dapat sayumahan kan siisay man na igwa nin “sientipikong punto de vista kan kinaban.”

Si Propesor Lüdemann naghihingako na an binuhay liwat na Cristo na nagpaheling ki apostol Pedro sarong bisyon na resulta kan grabeng kamondoan ni Pedro asin pakamate nin kasalan huli sa pagnegar  ki Jesus. Asin segun ki Lüdemann, an pagpaheling ni Jesus sa labing 500 na nagtutubod sa sarong pangyayari sarong kamugtakan nin “lakop na labi-labing kaogmahan.” (1 Corinto 15:​5, 6) Sa halipot, an dakol na intelektuwal ibinilang na sunod-sunod na pakaimahinar nin mga pangyayari an mga pagkasaysay sa Biblia manongod sa binuhay liwat na si Jesus na nagpaluwas nin pinakosog giraray na pakamate nin espirituwal na kompiansa sa sadiri asin kaigotan sa pagmimisyonero sa mga disipulo.

Siempre, an dakol bakong gayong interesado sa akademikong mga kontrobersia. Minsan siring, an pagtokar kan pagkabuhay liwat ni Jesus maninigo na pagkainteresan niato gabos. Taano? Huli ta, kun dai sia binuhay liwat, an Kristianismo basado sa falsong pundasyon. Sa ibong na lado, kun an pagkabuhay liwat ni Jesus tunay nanggad na pangyayari sa kasaysayan, an Kristianismo basado sa katotoohan. Sa siring na mga kamugtakan, bako sanang nabibindikar an mga paghingako ni Cristo kundi siring man an saiyang mga panuga. Dugang pa, kun igwa nin pagkabuhay liwat, an kagadanan bakong an dakulang ganador kundi sarong kalaban na kayang daogon.​—1 Corinto 15:55.

[Picture Credit Line sa pahina 3]

Hale sa Self-Pronouncing Edition of the Holy Bible, na igwa kan mga bersion na King James asin Revised