Tumindog na Lubos Asin May Marigon na Kombiksion

Napangganahan kan Makosog an Boot na mga Nagdadanay na May Integridad an Paglamag kan Nazi

“MAGPAKADONONG ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Talinhaga 27:11) Ihinahayag kan mainit na pakiolay na ini na kaya kan intelihenteng mga linalang nin Dios na paogmahon an puso ni Jehova huli ta sinda fiel asin maimbod sa saiya. (Sofonias 3:17) Minsan siring, determinado si Satanas, an paratuya, na raoton an integridad kan mga naglilingkod ki Jehova.​—Job 1:​10, 11.

Espesyalmente poon sa enot na kabtang kan ika-20 siglo kan iholog sia hale sa langit pasiring sa palibot kan daga, nagpaheling na si Satanas nin grabeng kaanggotan sa banwaan ni Jehova. (Kapahayagan 12:​10, 12) Minsan siring, an tunay na mga Kristiano nagtindog na “lubos asin may marigon na kombiksion” asin pinagdanay an saindang integridad sa Dios. (Colosas 4:12) Estudyaran ta sa halipot an sarong pambihirang halimbawa kan siring na pagdadanay sa integridad​—kan Mga Saksi ni Jehova sa Alemania bago asin durante kan Guerra Mundial II.

An Maigot na Aktibidad Nagbunga nin mga Pagbalo sa Integridad

Kaidtong mga taon nin 1920 asin enot na mga taon nin 1930, an Bibelforscher, na apod kaidto sa Mga Saksi ni Jehova sa Alemania, nagdistribwir nin kadakol na literatura sa Biblia. Sa pag-oltanan nin 1919 asin 1933, nakapasakamot sinda nin promedyong walong libro, pulyeto, o magasin sa kada pamilya sa Alemania.

Kan panahon na iyan, an Alemania an igwa kan saro sa pinakadakulang mga grupo nin linahidan na mga parasunod ni Cristo. Sa katunayan, sa 83,941 katawo sa bilog na kinaban na nakikabtang kan Pamanggihan nin Kagurangnan kan 1933, haros 30 porsiento an taga Alemania. Dai nahaloy, naeksperyensiahan kan mga Saksing Aleman na ini an nakaririnding mga pagbalo sa integridad. (Kapahayagan 12:​17; 14:12) An mga pagsisante sa trabaho, pagsakyada sa mga harong, asin pagpahale sa mga eskuelahan tolos na gruminabe sagkod sa pambubugbog, pan-aarestar, asin pagbilanggo. (Retrato 1) Bilang resulta, sa mga taon na suminagkod sa Guerra Mundial II, an Mga Saksi ni Jehova an minakompuesto kan 5 sagkod 10 porsiento kan gabos na dinetener sa mga kampo de konsentrasyon.

Kun Taano ta Pinaglamag kan mga Nazi an mga Saksi

Pero, taano ta naprobokar kan Mga Saksi ni Jehova an grabeng kaanggotan kan rehimen na Nazi? Sa saiyang librong Hitler​​—1889-​1936: Hubris, an propesor sa historya na si Ian Kershaw nagkokomento na an mga Saksi nagin punteriya nin paglamag huli ta nagsayuma sindang “sumunod sa lubos na kahagadan kan estadong Nazi.”

An librong Betrayal​​—German Churches and the Holocaust, na an editor iyo an propesor sa historya na si Robert P. Ericksen asin an propesor sa mga pag-adal manongod sa mga Judio na si Susannah  Heschel, nagpaliwanag na an mga Saksi “nagsayumang magpartisipar sa kadahasan o paggamit nin puersa militar. . . . Nagtutubod an mga Saksi sa neutralidad sa politika, na nangangahulogan na dai sinda maboto para ki Hitler ni masaludo ki Hitler.” Ini, an sabi pa kan reperensia man sanang iyan, an nakaprobokar kan kaanggotan kan mga Nazi asin nagin dahelan tanganing kolgan an mga Saksi huling “dai totogotan kan Sosyalismo Nasyonal an siring na pagsayuma.”

Sarong Pambilog na Kinaban na Pagprotesta Asin Todo-todong Pag-atake

Paagi sa espesyal na mensahero, kan Pebrero 9, 1934, si Joseph F. Rutherford, an nangengenot sa gibohon kan panahon na idto, nagpadara ki Hitler nin sarong surat nin pagprotesta bilang reaksion sa pagkapanatiko kan Nazi. (Retrato 2) Kan Oktubre 7, 1934, an surat ni Rutherford sinundan nin mga 20,000 na surat asin telegrama nin pagprotesta na ipinadara ki Hitler kan Mga Saksi ni Jehova sa 50 nasyon, kaiba an Alemania.

Suminimbag an mga Nazi paagi sa pagdagdag kan saindang paglamag. Kan Abril 1, 1935, ipinagprohibir an mga Saksi sa bilog na nasyon. Asin kan Agosto 28, 1936, naglansar an Gestapo nin todo-todong pag-atake tumang sa sainda. Pero, an mga Saksi “nagpadagos sa pagdistribwir nin mga libreto asin sa ibang paagi pinapagdanay an saindang pagtubod,” an sabi kan Betrayal​​—German Churches and the Holocaust.

Halimbawa, sa ngangaan na kan Gestapo, kan Disyembre 12, 1936, an mga 3,500 na Saksi nagdistribwir nin manampulong ribong kopya nin sarong inimprentang resolusyon mapadapit sa pagmaltrato na inaagihan ninda. Mapadapit sa kampanyang ini, an The Watchtower nagbareta: “Iyan sarong dakulang kapangganahan asin sarong matarom na saksak sa kaiwal, sa dai ikaladawan na kagayagayahan kan fiel na mga trabahador.”​—Roma 9:17.

Nasudya an Paglamag!

Nagpadagos an paghanap kan Nazi sa Mga Saksi ni Jehova. Pag-abot nin 1939, anom na ribo sa sainda an nabilanggo, asin rinibo an ipinadara sa mga kampo de konsentrasyon. (Retrato 3) Ano an situwasyon sa katapusan kan Guerra Mundial II? Mga 2,000 na Saksing nabilanggo an nagadan, na an labing 250 paagi sa paggadan. Minsan siring, an isinurat ni Propesor Ericksen asin Heschel, “sa kadaklan pinangaptan kan Mga Saksi ni Jehova an saindang pagtubod sa atubangan nin problema.” Bilang resulta, kan bumagsak an rehimen ni Hitler, labing sangribong Saksi an nakapanggana sa mga kampo.​—Retrato 4; Gibo 5:​38, 39; Roma 8:​35-37.

Ano an nagtao nin kosog sa banwaan ni Jehova tanganing matagalan an paglamag? An nakaligtas sa kampo de konsentrasyon na si Adolphe Arnold nagpaliwanag: “Dawa yaon ka sa pinakanakakapanluyang kamugtakan, naheheling ka ni Jehova, naaaraman an inaagihan mo, asin itatao nia sa saimo an kinakaipuhan na kosog tanganing mapangganahan an situwasyon asin magdanay na fiel. An kamot nia bako nanggad na halipot.”

Minaaplikar nanggad sa fiel na mga Kristianong idto an mga tataramon ni propeta Sofonias! Sinabi nia: “Si Jehova na saimong Dios nasa tahaw mo. Bilang makakamhan na Saro, sia magliligtas. Sia mag-oogma sa saimo na may paggayagaya.” (Sofonias 3:17) Logod na arogon kan gabos na parasamba kan tunay na Dios ngonyan an pagtubod kan maimbod na mga Saksing idto na nagpadanay nin integridad sa atubangan kan paglamag nin Nazi asin siring man paogmahon an puso ni Jehova.​—Filipos 1:​12-14.

[Picture Credit Line sa pahina 8]

Państwowe Muzeum Oświęcim-Brzezinka, sa karahayan nin boot kan USHMM Photo Archives