Relihion daw an Matao nin Katoninongan sa Kinaban?

POON kan Agosto 28 sagkod Agosto 31, 2000, labing 500 na representante hale sa 73 na nasyon an nagtiripon sa Siudad nin Nueva York. Sinda nagtiripon sa Naciones Unidas para sa “An Milenyong Pankinaban na Katoninongan na Komperensia nin Relihioso Asin Espirituwal na mga Namomoon.” An mga namomoon​—an dakol may sulot na turbante, kolor azafran na halabang gubing, pantakop sa payo na gibo sa balukag, o halabang itom na alikboy​—nagrepresentar sa kadakoldakol na pagtubod. Kabilang digdi an Baha’i, Budismo, Hinduismo, Islam, Jainismo, Judaismo, Sintoismo, Sikismo, Taoismo, Zoroastrismo, asin an mga relihion nin Kakristianohan.

An mga delegado nagtiripon sa Naciones Unidas para sa enot na duwang aldaw kan apat na aldaw na komperensia. Minsan siring, an komperensia dai inorganisar o pinondohan kan Naciones Unidas kundi kan manlaenlaen na institusyon na may taong sustento. Alagad ta an NU sagkod an mga namomoon sa relihion nagtaram dapit sa kahalagahan nin iribang paghihingoa tanganing haleon an kadukhaan, rasismo, mga problema sa palibot, guerra, asin mga armas para sa lagduan na paglaglag.

An mga delegado nagpirma sa sarong dokumento na may titulong “Dedikasyon sa Lakop sa Globong Katoninongan.” Minsan ngani inaadmitir na an kadahasan asin guerra “kun minsan ginigibo sa ngaran nin relihion,” sinasabi kan dokumento na an mga nagpirma “matabang sa Naciones Unidas . . . sa pagmamaigot na kamtan an katoninongan.” Minsan siring, mayo nin espesipikong mga resolusyon na nagsasabi kun paano ini puedeng magibo.

Sa ikaduwang aldaw, si Bawa Jain, an sekretaryo-heneral kan komperensia, tinapos an saiyang pambukas na pahayag paagi sa pagpaliwanag na sa nakaaging pirang taon may nariparo siang sarong ipininta sa Naciones Unidas. An ipininta ilinadawan an sarong lalaki na mas halangkaw sa edipisyo kan Sekretariya kan Naciones Unidas. Sia nagtotoktok sa edipisyo na garo baga iyan pinto. Sa ibaba kan retrato may paliwanag: “Prinsipe nin Katoninongan.” Si Mr. Jain nagsabi: “[An retrato] nagkaigwa nin hararom na epekto sa sako kan maheling ko iyan. Hinapot ko an manlaenlaen na tawo kun ano an boot sabihon [kaiyan]. Sa boot ko ngonyan aram ko na an simbag. An pagtiripon nindo gabos digdi, espirituwal asin relihiosong mga namomoon kan kinaban, ipinaheheling sa sako na [ini] iyo an prinsipe nin katoninongan na nagtotoktok sa pinto kan Naciones Unidas.”

An Biblia nagtatao nin laen na punto de vista. Ipinaheheling kaiyan na an Prinsipe nin Katoninongan iyo si Jesu-Cristo. Sia matao nin katoninongan sa bilog na globo, bakong paagi sa mga paghihingoa kan politikal o relihiosong mga namomoon kan kinaban na ini, kundi paagi sa Kahadean nin Dios. An Kahadean na ini​—an langitnon na gobyerno nin Dios​—iyo an mapangganang mapasararo sa makinuyog na katawohan asin mapangyaring gibohon an kabotan nin Dios digdi sa daga.​—Isaias 9:​6; Mateo 6:​9, 10.