“Totoo Nanggad na Ibinangon an Kagurangnan!”

Imahinara kun gurano kanapurisaw an mga disipulo ni Jesus kan gadanon an saindang Kagurangnan. An saindang paglaom garo siring kadaing buhay kan bangkay na ihinutad ni Jose na taga Arimatea sa lolobngan. Nawara man an ano man na paglaom na patatalingkason ni Jesus an mga Judio sa pagdominar kan Roma.

KUN iyan na an nagin katapusan kan bagay, an mga disipulo ni Jesus posible kutanang nawara na arog kan mga parasunod kan dakol na Mesiyas daa. Alagad si Jesus buhay! Segun sa Kasuratan, sia nagpaheling sa saiyang mga parasunod sa nagkapirang pangyayari dai nahaloy pagkagadan nia. Kun siring, an nagkapira sa sainda napahirong magkagsing: “Totoo nanggad na ibinangon an Kagurangnan!”​—Lucas 24:34.

Kinaipuhan kan mga disipulo na idepensa an saindang pagtubod ki Jesus bilang an Mesiyas. Sa paggibo kaiyan, itinotokdo ninda espesyalmente an saiyang pagkabuhay liwat hale sa mga gadan bilang marigon na marhay na prueba kan saiyang pagka-Mesiyas. Tunay nanggad, “sa dakulang kapangyarihan an mga apostol nagpadagos na magtao kan patotoo manongod sa pagkabuhay liwat kan Kagurangnan na si Jesus.”​—Gibo 4:33.

Kun napatunayan nin siisay man na an pagkabuhay liwat na ini sarong pandadaya​—tibaad paagi sa pagpatuga sa saro kan mga disipulo na pandadaya man nanggad iyan o paagi sa pagpaheling na an bangkay ni Jesus yaon pa giraray sa laog kan lolobngan​—an Kristianismo naprakaso kutana sa kapinonan pa sana. Alagad dai iyan nangyari. Nakaaaram na si Cristo buhay, an mga parasunod ni Jesus nagduman sa gabos na lugar na ibinabalangibog an saiyang  pagkabuhay liwat, asin kadakoldakol an nagin paratubod sa ibinangon na Cristo.

Taano ta kamo man makatutubod sa pagkabuhay liwat ni Jesus? Ano an ebidensia na ini aktuwal na pangyayari?

Taano ta Dapat na Estudyaran an Ebidensia?

An apat na pagkasaysay sa Ebanghelyo gabos nagbabareta sa pagkabuhay liwat ni Jesus. (Mateo 28:​1-​10; Marcos 16:​1-8; Lucas 24:​1-​12; Juan 20:​1-​29) * An ibang kabtang kan Kristianong Griegong Kasuratan nagtataram na may kasiertohan manongod sa pagbangon ni Cristo hale sa kagadanan.

Bakong makangangalas na an pagkabuhay liwat ni Jesus ipinahayag kan saiyang mga parasunod! Kun sia talagang ibinangon nin Dios pasiring sa buhay, iyan an pinakamakangangalas na bareta na nadangog kan kinaban kasuarin man. Iyan nangangahulogan na nag-eeksister an Dios. Dugang pa, iyan nangangahulogan na si Jesus nabubuhay ngonyan mismo.

Paano iyan nakakaapektar sa sato? Bueno, si Jesus namibi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Iyo, puede kitang magkaigwa nin nagtatao nin buhay na kaaraman dapit ki Jesus asin sa saiyang Ama. Paagi sa pag-aplikar kan siring na kaaraman, dawa kun kita magadan, kita mismo puedeng buhayon liwat, mantang si Jesus mismo binuhay liwat. (Juan 5:​28, 29) Puede kitang magkaigwa kan paglaom na buhay na daing katapusan sa sarong paraisong daga na sakop kan langitnon na Kahadean nin Dios sa kamot kan saiyang pinamuraway na Aki, si Jesu-Cristo, an Hade kan mga hade.​—Isaias 9:​6, 7; Lucas 23:​43; Kapahayagan 17:14.

Kaya, kun siring, importante an kustion kun baga si Jesus talagang nagbangon hale sa mga gadan. Naaapektaran kaiyan an satong buhay ngonyan asin an satong mga oportunidad sa ngapit. Iyan an dahelan kun taano ta inaagda niamo kamo na siyasaton an apat na ebidensia na si Jesus nagadan asin binuhay liwat.

Si Jesus Talagang Nagadan sa Harigi

An nagkapirang mapagduda naghihingako na, minsan ngani ipinako sa harigi, si Jesus dai talaga nagadan sa harigi. Sinasabi ninda na sia nag-aagaw-buhay sana asin na nakabalik an saiyang animo huli sa lipot kan lolobngan. Pero, an gabos na makukuang reperensia nagpapatunay na an daing buhay na hawak ni Jesus an ibinugtak sa lolobngan.

Mantang si Jesus ginadan nin hayagan, may mga nakaheling mismo sa aktuwal na pangyayari na sia talagang nagadan sa harigi. An saiyang kagadanan sinegurado kan senturyon na namamahala sa paggadan. An opisyal sa hukbo na iyan sarong propesyonal na kabilang sa saiyang trabaho an pagdeterminar na talagang gadan na an ipinagagadan. Dugang pa, pakatapos na makompirmar na si Jesus gadan na saka sana ipinakua ni Gobernador Poncio Pilato nin Roma ki Jose na taga Arimatea an bangkay ni Jesus tanganing ilobong.​—Marcos 15:​39-​46.

Nadiskobre na Daing Laog an Lolobngan

An lolobngan na daing laog nagtao sa mga disipulo kan primero nindang prueba kan pagkabuhay liwat ni Jesus, asin an ebidensiang ini padagos na dai makukustion. Si Jesus ilinobong sa sarong bagong lolobngan, saro na dai pa nagamit. Idto harani sa lugar kan pinagpakoan asin kaidto dai mapagdududahan na madalion hanapon. (Juan 19:​41, 42) An gabos na pagkasaysay sa Ebanghelyo nagkakaoroyon na kan umabot an mga katood ni Jesus sa lolobngan kan ikaduwang aga pagkagadan nia, an saiyang bangkay mayo na.​—Mateo 28:​1-7; Marcos 16:​1-7; Lucas 24:​1-3; Juan 20:​1-10.

An lolobngan na daing laog nakasorpresa sa mga enemigo ni Jesus, kun paanong iyo man sa saiyang mga katood. An saiyang mga kalaban haloy nang nagmamaigot tangani na maheling siang gadan asin nakalobong. Huling nakua an saindang kamawotan, nagmaigot nanggad sindang paguardiahan asin serahan an lolobngan. Minsan siring, kan  kinaagahan kan enot na aldaw kan semana, idto dai nang laog.

Hinale daw kan mga katood ni Jesus an saiyang bangkay sa lolobngan? Imposible, mantang an ipinaheheling kan Ebanghelyo na sinda napupurisaw na marhay pakatapos na sia gadanon. Apuera kaini, an saiyang mga disipulo dai nanggad kutana nagtogot na umagi nin paglamag asin kagadanan huli sa bagay na aram nindang mapandaya.

Siisay an naghale kan laog kan lolobngan? An mga kaiwal ni Jesus an pinakabakong posibleng kumua kan bangkay. Dawa kun sinda an nagkua, sierto nanggad na ilinuwas kutana ninda iyan kan huri tanganing pahimutikan an paghingako kan mga disipulo na si Jesus binuhay na liwat. Alagad dai nangyari an arog kaiyan, huli ta an Dios an naghiro.

Pakalihis nin pirang semana, an mga kaiwal ni Jesus daing ikinasimbag na nakagugulat na pangangatanosan kan si Pedro magpatotoo: “Mga lalaki nin Israel, dangoga nindo an mga tataramon na ini: si Jesus na Nazareno, lalaking ipinahayag nin Dios sa saindo paagi sa mapangyaring mga gibo asin ngangalasan patin tanda na ginibo nin Dios paagi sa saiya sa tanga nindo, arog kan aram mismo nindo, an tawong ini, bilang saro na itinao paagi sa itinalagang hatol asin pakaaram antes pa nin Dios, ipinako nindo sa sarong harigi paagi sa kamot nin mga paralapas sa ley asin ginadan. Alagad binuhay sia liwat nin Dios paagi sa paghubad kan mga sakit nin kagadanan, huli ta dai mahihimo na sia padagos na mapogolan kaiyan. Huli ta si David nagtataram mapadapit sa saiya, ‘Si Jehova danay na nasa atubangan kan sakong mga mata . . . Apuera dian, minsan an sakong laman mag-eerok sa paglaom; huli ta dai mo pababayaan an sakong kalag sa Hades, ni na totogotan mo man an saimong maimbod na saro na makaheling nin kalapaan.’ ”​—Gibo 2:​22-27.

Dakol an Nakaheling sa Binuhay Liwat na si Jesus

Sa librong Mga Gibo, an kagsurat kan Ebanghelyo na si Lucas nagsabi: “Sa [mga apostol] man pinatunayan [ni Jesus] na sia buhay pagkatapos kan saiyang pagdusa paagi sa balakid na positibong patotoo, mantang naheling ninda sa laog nin apat na polong aldaw asin nagtataram kan mga bagay dapit sa kahadean nin Dios.” (Gibo 1:​2, 3) Dakol na disipulo an nakaheling sa binuhay liwat na si Jesus sa laen-laen na pangyayari​—sa sarong tatamnan, sa dalan, mantang nagkakakan, sa may Dagat nin Tiberias.​—Mateo 28:​8-​10; Lucas 24:​13-​43; Juan 21:​1-​23.

An mga kritiko kinukuestion an pagigin totoo kan mga pagpaheling na ini. Sinasabi ninda na inimbento kan mga kagsurat an mga pagkasaysay, o sinisitar ninda an garo baga mga dai pagkakaoyon sa mga iyan. An totoo, an saradit na pagkakalaen sa mga pagkasaysay sa Ebanghelyo nagpapatunay na mayo nin imbueltong pagkasapakat. An satong kaaraman dapit ki Jesus minahiwas kun an sarong kagsurat nagtatao nin mga detalye na nagdadagdag sa iba pang mga pagkasaysay manongod sa nagkapirang pangyayari sa daganon na buhay ni Cristo.

Imahinasyon sana daw an mga pagpaheling ni Jesus pakatapos na buhayon liwat? An ano man na argumento na basado dian dai puedeng magin totoo, mantang sia naheling nin kadakol na tawo. Kabilang sa sainda an mga parasira, mga babae, sarong lingkod kan banwaan, asin dawa an nagduduwaduwang apostol na si Tomas, na nakombensir sana kan maheling an dai mapahihimutikan na prueba na si Jesus binuhay hale sa mga gadan. (Juan 20:​24-​29) Sa nagkapirang pangyayari, dai tolos namidbid kan mga disipulo ni Jesus an saindang binuhay liwat na Kagurangnan. Sarong beses, labing 500 katawo an nakaheling sa saiya, na an kadaklan sa sainda buhay pa kan gamiton ni apostol Pablo an pangyayaring iyan bilang ebidensia sa saiyang pagdepensa kan pagkabuhay liwat.​—1 Corinto 15:6.

 An Buhay na si Jesus May Epekto sa mga Tawo

An pagkabuhay liwat ni Jesus bako sanang bagay na puedeng pagkainteresan o pagdebatehan. An bagay na sia buhay nakaapektar sa positibong paagi sa mga tawo sa gabos na lugar. Poon kan enot na siglo, dai mabilang na indibiduwal an naghale sa pagkaindiperente o biyong pagtumang sa Kristianismo pasiring sa pagkaigwa nin absolutong kasiertohan na iyan an tunay na relihion. Ano an nakapabago sa sainda? An pag-adal kan Kasuratan pinatunayan sa sainda na binuhay liwat nin Dios si Jesus bilang sarong mamuraway na espiritung linalang sa langit. (Filipos 2:​8-11) Naggibo sinda nin pagtubod ki Jesus asin sa probisyon ni Jehova Dios para sa kaligtasan paagi sa atang na pantubos ni Cristo. (Roma 5:8) An siring na mga indibiduwal nakanompong nin tunay na kaogmahan paagi sa paggibo kan kabotan nin Dios asin pamumuhay kaoyon kan mga katokdoan ni Jesus.

Estudyare kun ano an kalabot sa pagigin Kristiano kan enot na siglo. Mayo nin makukuang prestihio, kapangyarihan, o kayamanan. Kabaliktaran nanggad, an dakol na enot na Kristiano ‘magayagaya na inako an pagsamsam sa saindang mga rogaring’ para sa kapakanan kan saindang pagtubod. (Hebreo 10:34) An Kristianismo naghahagad nin buhay na may pagsasakripisyo asin paglamag na sa dakol na kamugtakan minasagkod sa pagkagadan bilang martir.

Bago nagin mga parasunod ni Cristo, an nagkapira igwa nin marahay na mga oportunidad kun manongod sa prestihio asin kayamanan. Si Saulo na taga Tarso nag-adal bilang estudyante kan bantog na paratokdo sa Ley na si Gamaliel asin nagpopoon nang magin kaomaw-omaw sa pagheling kan mga Judio. (Gibo 9:​1, 2; 22:​3; Galacia 1:14) Pero, si Saulo nagin si apostol Pablo. Tinalikdan nia asin kan dakol pang iba an prestihio asin kapangyarihan na iinalok kan kinaban na ini. Taano? Tanganing palakopon an mensahe nin tunay na paglaom na basado sa mga panuga nin Dios asin sa bagay na si Jesu-Cristo binuhay liwat hale sa mga gadan. (Colosas 1:28) Sinda andam na magdusa huli sa causa na aram nindang napapasikad sa katotoohan.

Totoo man iyan sa minilyon ngonyan. Manonompongan nindo sinda sa mga kongregasyon kan Mga Saksi ni Jehova sa bilog na kinaban. Mainit kamong iniimbitaran kan mga Saksi sa taonan na selebrasyon kan kagadanan ni Cristo, na gigibohon pagsolnop kan saldang sa Domingo, Abril 8, 2001. Sinda maoogma na kamo magin presente sa okasyon na iyan asin sa gabos nindang pagtiripon para sa pag-adal kan Biblia na ginigibo sa saindang mga Kingdom Hall.

Taano ta dai mag-adal nin orog pa, bako sanang manongod sa kagadanan asin pagkabuhay liwat ni Jesus kundi siring man manongod sa saiyang buhay asin mga katokdoan? Inaagda nia kita na dumolok sa saiya. (Mateo 11:​28-30) Humiro na ngonyan tanganing makakua nin tamang kaaraman dapit ki Jehova Dios asin ki Jesu-Cristo. An paggibo kaiyan puedeng mangahulogan nin buhay na daing sagkod sa pagsakop kan Kahadean nin Dios sa kamot kan saiyang namomotan na Aki.

[Nota sa Ibaba]

[Mga Ritrato sa pahina 7]

Minilyon an nakanonompong nin tunay na kaogmahan bilang mga parasunod ni Jesu-Cristo

[Picture Credit Line sa pahina 6]

Hale sa Self-Pronouncing Edition of the Holy Bible, na igwa kan mga bersion na King James asin Revised