An Maogmang Bareta kan Kahadean—Ano Iyan?

Kan nakaaging taon sa 235 kadagaan sa bilog na kinaban, 6,035,564 katawo, hoben asin gurang, an naggamit nin 1,171,270,425 oras sa pakikipag-olay sa iba manongod dian. Apuera sa pagpaabot kaiyan sa berbal na paagi, nakapasakamot sinda sa publiko nin labing 700 milyones na babasahon tanganing ipaisi asin ipaliwanag iyan. Nagdistribwir man sinda nin rinibong audiocassette asin videocassette tanganing palakopon iyan. Ano “iyan”?

“IYAN” an maogmang bareta kan Kahadean nin Dios. Tunay nanggad, nungka kaidto sa kasaysayan nin tawo na ikinahulit “an maogmang baretang ini kan kahadean” sa sokol na naheheling ta ngonyan.​—Mateo 24:14.

An mga naggigibo kan paghuhulit asin pagtotokdong ini sa bilog na kinaban gabos boluntaryo. Sa sekular na punto de vista, tibaad sinda garo bakong kualipikado para sa gibohon. Kun siring, ano an dahelan kan saindang kosog nin boot asin kan saindang kapangganahan? An kapangyarihan kan maogmang bareta kan Kahadean sarong mayor na dahelan, huli ta iyan bareta manongod sa mga bendisyon na maabot sa katawohan. Ini an mga bendisyon na hinihimuyawot kan gabos na tawo​—kaogmahan, katalingkasan sa kasakitan sa pagbuhay, marahay na gobyerno, katoninongan asin katiwasayan, asin sarong bagay na dai lamang ngani pinepensar kan kadaklan​—buhay na daing katapusan! Ini tunay nanggad na maogmang bareta para sa mga tawo na naghahanap nin kahulogan asin katuyohan kan buhay. Iyo, an gabos na bendisyon na ini asin dakol pa puedeng mapasaindo kun kamo mahimate asin mapaheling nin marahay na reaksion sa pagbalangibog kan maogmang bareta kan Kahadean.

Ano an Kahadean?

Pero, ano an Kahadean na ipinapahayag bilang maogmang bareta? Iyan an Kahadean na itinokdo sa minilyon na ipamibi paagi sa pamilyar na mga tataramon na ini: “Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.”​—Mateo 6:​9, 10.

Iyan an Kahadean na itinaram kan propetang Hebreo na si Daniel labing 25 siglo na an nakaagi kan isurat nia: “An Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.”​—Daniel 2:44.

Sa siring, an maogmang bareta manongod sa Kahadean, o gobyerno, nin Dios na mahale kan gabos na karatan dangan mamamahala sa bilog na daga sa katoninongan. Pangyayarihon kaiyan an  orihinal na katuyohan kan Kaglalang para sa katawohan asin para sa daga.​—Genesis 1:28.

“An Kahadean kan Kalangitan Naghaharani Na”

Haros 2,000 na taon na an nakaagi, an maogmang bareta kan Kahadean enot na ibinalangibog sa publiko nin sarong dusay na tawo na an itsura asin hiro-hiro nakaaapod nanggad nin atension. An tawong iyan iyo si Juan na Bautisador, aki kan Judiong saserdote na si Zacarias asin kan saiyang agom, si Elizabet. Si Juan nagsulot nin gubing na gibo sa balukag nin kamelyo, na may hagkos na anit sa saiyang habayan, na garo si propeta Elias, na nagserbing anino nia. Alagad an mensahe nia an nakaakit sa atension kan dakol. “Magsorolsol kamo,” an ibinalangibog nia, “huli ta an kahadean kan kalangitan naghaharani na.”​—Mateo 3:​1-6.

An nagdadangog ki Juan mga Judio, na naghihingako na mga parasamba kan tunay na Dios, si Jehova. Bilang sarong nasyon, inako ninda an tipan nin Ley paagi ki Moises mga 1,500 na taon na an nakaagi. Yaon pa kaidto sa Jerusalem an kahangahangang templo, na duman idinodolot an mga atang kaoyon sa Ley. An mga Judio nagsaboot na siertong tama sa pagheling nin Dios an saindang pagsamba.

Minsan siring, huli sa paghinanyog ki Juan, an nagkapirang tawo nagpoon na marealisar na an saindang relihion bakong siring sa pinaghona ninda kaidto. An kultura asin pilosopiyang Griego nakalaog sa Judiong relihiosong mga katokdoan. An ley na inako hale sa Dios paagi ki Moises nasalakan na ngonyan, na ginibo pa nganing imbalido, kan mga paniniwala asin tradisyon na gibo nin tawo. (Mateo 15:6) Huling ilinagalag kan saindang matagas an puso asin mayong pagkaherak na mga namomoon sa relihion, an kadaklan dai na nagsasamba sa Dios sa inaakong paagi. (Santiago 1:27) Kaipuhan sindang magsolsol sa saindang mga kasalan tumang sa Dios asin tumang sa tipan nin Ley.

Kan panahon na idto, inaasahan kan dakol na Judio an paglataw kan ipinanugang Mesiyas, o Cristo, asin may nagkapira na nag-iisip manongod ki Juan: “Sia daw an Cristo?” Minsan siring, si Juan nagdehar na sia an Cristo asin imbes may iba siang itinokdo sa sainda, na dapit saiya sinabi nia: “An sintas kan saiyang sandalyas alangan akong maghubad.” (Lucas 3:​15, 16) Iiniintrodusir si Jesus sa saiyang mga disipulo, ipinahayag ni Juan: “Uya, an Kordero nin Dios na naghahale kan kasalan kan kinaban!”​—Juan 1:29.

Maogmang bareta nanggad iyan, huli ta, sa katunayan, itinotokdo ni Juan sa gabos na tawo an dalan pasiring sa buhay asin kaogmahan​—si Jesus, an saro na “naghahale kan kasalan kan kinaban.” Bilang mga gikan ni Adan asin Eva, an gabos na tawo namundag na sakop kan mapan-aping kapangyarihan kan kasalan asin kagadanan. An Roma 5:​19 nagpapaliwanag: “Kun paanong sa pakisuway nin sarong tawo [si Adan] dakol an nagin mga parakasala, siring man sa pagkuyog nin sarong tawo [si Jesus] dakol an magigin matanos.” Si Jesus, arog nin sarong atang na kordero, an ‘mahale kan kasalan’ asin mapangyari nin pagkabaliktad kan mamondong kamugtakan kan agi-agi nin tawo. “An ibinabayad nin kasalan kagadanan,” an paliwanag kan Biblia, “alagad an regalo na itinatao  nin Dios buhay na daing katapusan paagi ki Cristo Jesus na satong Kagurangnan.”​—Roma 6:23.

Bilang sangkap na tawo​—sa katunayan, an pinakadakulang tawo na nabuhay kasuarin man​—si Jesus naghulit kan maogmang bareta. An pagkasaysay sa Biblia sa Marcos 1:​14, 15 nagsasabi sa sato: “Ngonyan kan si Juan mabilanggo na si Jesus nagduman sa Galilea, na naghuhulit kan maogmang bareta nin Dios asin nagsasabi: ‘An itinalaan na panahon naotob na, asin an kahadean nin Dios harani na. Magsorolsol kamo, banwaan, asin magtubod kamo sa maogmang bareta.’”

An mga naghimate sa mensahe ni Jesus asin naggibo nin pagtubod sa maogmang bareta binendisyonan nin labi-labi. An Juan 1:​12 nagsasabi: “An gabos na nag-ako [ki Jesus], sa sainda sia nagtao nin autoridad na magin mga aki nin Dios, huli ta sinda nagsagibo nin pagtubod sa saiyang ngaran.” Bilang mga aki nin Dios, sinda maako nin balos na buhay na daing katapusan.​—1 Juan 2:25.

Alagad an pribilehio na mag-ako nin mga bendisyon kan Kahadean bakong limitado sa mga tawo kan enot na siglo. Siring kan nasambitan kasubago, an maogmang bareta kan Kahadean nin Dios ibinabalangibog asin itinotokdo sa bilog na ineerokan na daga ngonyan. Kaya an mga bendisyon kan Kahadean makukua pa. Ano an dapat nindong gibohon tanganing mag-ako kan siring na mga bendisyon? An minasunod na artikulo an mapaliwanag.